ANG ORAS NA ITINAKDA NG DIYOS

15 Agosto 2023 

Dakilang Kapistahan ng Pag-Aakyat sa Langit sa Mahal na Birheng Maria 

[Pagmimisa sa Araw] 

Pahayag 11, 19a; 12, 1-6a/Salmo 44/1 Corinto 15, 20-27/Lucas 1, 39-56 

This faithful photographic reproduction of the painting (c. 15th century) Polittico dell’Annunziata (Assunzione di Maria) by Pietro Perugino (1448–1523), as well as the actual work of art itself, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Lingid sa kaalaman ng karamihan na isa ring mahalagang araw para sa pamayanan ng Basilika Menor at Pambansang Dambana ng Mahal na Poong Jesus Nazareno at Parokya ni San Juan Bautista na mas kilala ng nakararami bilang Simbahan ng Quiapo ang ika-15 ng Agosto. Sa Kalendaryo ng mga liturhikal na pagdiriwang at gawain sa Simbahan ng Quiapo, ang ika-15 araw ng Agosto ng bawat taon ay inilaan para sa maringal na pagdiriwang ng Mahal na Inang si Mariang Birhen na iniakyat sa langit sa ilalim ng kaniyang titulong Nuestra Señora de la Buena Hora. Kung isasalin natin sa wikang Pilipino ang titulong ito ng Mahal na Ina, ang ibig sabihin nito ay "Mahal na Birhen ng Mabuting Oras (Panahon)." Siya ang Patronesa ng Simbahan ng Quiapo. 

Kinikilala, tinatawag, at pinararangalan natin bilang Simbahan ang Mahal na Inang si Mariang Birhen bilang Birhen ng Mabuting Oras (Panahon) hindi dahil tinuturing natin siyang diyosa o bathala. Sa totoo lamang, walang magagawa ang Mahal na Birhen gamit ang kanyang sariling kapangyarihan at kakayanan. Bagkus, ang ating pagkilala, pagtawag, at pagbibigay ng parangal sa Mahal na Inang si Maria sa ilalim ng titulong Birhen ng Mabuting Oras (Panahon) ay pagkilala sa kanyang pananalig at tiwala sa oras at panahong inilaan at itinakda ng Panginoong Diyos para sa pagsasakatuparan ng Kaniyang mga kahanga-hangang gawa, gaya ng pagligtas ng Diyos sa kanya bago isilang ni Santa Ana (Kalinis-linisang Paglilihi o Inmaculada Concepcion), at ang pag-aakyat sa kanyang katawan at kaluluwa sa langit sa wakas ng kanyang buhay dito sa mundong ito. Sa langit, itinampok at itinaas siya ng Banal na Santatlo bilang Reyna, gaya ng ipinahiwatig sa Unang Pagbasa at maging sa Salmong Tugunan. Ito ang nais isalungguhit ng titulong ito ng Mahal na Birhen. 

Gaya ng Mahal na Birheng Maria, dapat nating ibigay ang ating pananalig at tiwala sa oras at panahong inilaan at itinakda ng Diyos. Huwag tayong mawalan ng pananalig at tiwala sa oras at panahong inilaan at itinakda ng Panginoong Diyos. Ni minsan sa kasaysayan ay nauwi sa kabiguan ang lahat ng mga plano at kalooban ng Diyos sa mga oras at panahong Kanyang inilaan at itinakda. 

Nakasentro sa oras at panahong inilaan ng Diyos para sa pagsasakatuparan ng mga kahanga-hanga Niyang gawa. Sa huling bahagi ng Unang Pagbasa, ang pagliligtas ng Diyos sa pamamagitan ng Mesiyas na walang iba kundi ang Poong Jesus Nazareno ay inihayag sa tanan. Ang ipinangakong Mesiyas at Manunubos na ipinako sa Krus na Banal at nabuhay na mag-uli sa ikatlong araw ay darating muli bilang Hari at Hukom upang iligtas ang lahat ng mga naging tapat sa Kaniya hanggang sa huli. Sa paksang rin ito nakasentro ang pangaral ni Apostol San Pablo sa Ikalawang Pagbasa. Tayo'y iniligtas ni Kristo, ang Panginoong Jesus Nazareno, mula sa kasalanan at kamatayan sa pamamagitan ng Kanyang Banal na Krus at Muling Pagkabuhay. Pinagkalooban tayo ni Kristo ng pagkakataong tanggapin ang paanyaya sa atin na tahakin ang daan o landas ng kabanalan sa pamamagitan ng kahanga-hangang gawang ito. Dahil dito, malakas na inihayag ni Apostol San Pablo sa Ikalawang Pagbasa na nawala na nang tuluyan ang tagumpay at kamandag ng kamatayan dahil sa tagumpay ng Panginoong Jesus Nazareno na naganap sa oras at panahong itinakda ng Diyos. Sa pamamagitan nito, tayong lahat ay iniligtas ng Panginoon. Noong sumapit ang oras at panahong itinakda ng Diyos, hindi Niya tayo iniwan sa ere, tinalikuran, at pinabayaan nang ganoon na lamang upang mapahamak. Bagkus, tayong lahat ay ipinasiya Niyang iligtas sa pamamagitan ng ipinangakong Mesiyas, Manunubos, at Hari na walang iba kundi ang Mahal na Poong Jesus Nazareno. 

Sa Ebanghelyo, inilahad ang Awit ng Mahal na Inang si Mariang Birhen na walang iba kundi ang Magnificat. Ang awiting ito ng Mahal na Inang si Mariang Birhen ay isang pagpapatotoo sa pag-ibig, awa, habag, at kagandahang-loob ng Panginoong Diyos na pinatutunayan ng Kanyang mga kahanga-hangang gawa. Katunayan, ginamit ng Diyos ang Mahal na Inang si Mariang Birhen mismo upang maging patunay ng paksa o tema ng awit-papuring ito na kaniyang inawit nang kaniyang dalawan ang kamag-anak niyang si Elisabet na nagdadalantao rin noong mga sandaling yaon sa Banal na Ebanghelyo. Mula sa kaniyang payak na pamumuhay bilang isang dalaga sa Nazaret, itinaas siya ng Diyos sa pamamagitan ng pagkahirang sa kaniya upang maging ina ni Jesus Nazareno, ang ipinangakong Mesiyas at Manunubos na dumating sa sanlibutan upang tubusin ang lahat ng mga tao sa pamamagitan ng Kaniyang Banal na Krus at Muling Pagkabuhay sa oras at panahong itinakda ng Diyos. 

Ipinapaalala sa atin ng Simbahan sa maringal na pagdiriwang ng Dakilang Kapistahan ng Pag-Aakyat sa Langit sa Mahal na Birheng Maria na laging mayroong mabuting mangyayari sa lahat ng mga oras at panahong itinakda ng Diyos. Ang Panginoong Diyos ay hindi nagtatakda ng mga oras at panahon upang maghatid at magdulot ng kasamaan sa atin. Bagkus, sa mga oras at panahong Kaniyang itinakda, inihahatid ng Panginoong Diyos ang Kaniyang pag-ibig, kabutihan, awa, habag, at kagandahang-loob para sa atin.

Habang namumuhay at naglalakbay pa tayo dito sa lupa nang pansamantala lamang, ipakita natin ang ating pananalig at tiwala sa oras at panahong itinakda ng Diyos sa pamamagitan ng araw-araw na pagsusumikap na mamuhay nang banal at kalugud-lugod sa Kaniyang paningin. Inihahayag natin sa pamamagitan nito ang taos-puso nating desisyong pumanig, manalig, at tumalima sa Panginoong Diyos nang buong katapatan hanggang sa huli. Kapag ito ang ating ipinasiyang gawin hanggang sa huli, ang Reynang Ina na walang iba kundi ang Mahal na Inang si Mariang Birhen at ang mga banal at mga koro ng anghel sa langit ay makakasama natin magpakailanman sa kaharian ng Diyos sa langit na nagpupuri at sumasamba nang walang humpay sa tunay na Haring walang hanggan na walang iba kundi si Kristo, ang Nuestro Padre Jesus Nazareno. 

Manalig sa oras at panahong itinakda ng Panginoong Diyos. Siya naman talaga ang dapat pagkatiwalaan, panaligan, sundin, sambahin, at mahalin. Hinding-hindi Niya tayo bibiguin, ipapahamak, pababayaan, o gagawan ng masama kailanman. 

NAIS BA NATIN SIYANG MAKAPILING?

14 Agosto 2023 

Dakilang Kapistahan ng Pag-Aakyat sa Langit sa Mahal na Birheng Maria 

[Pagmimisa sa Bisperas] 

1 Cronica 15, 3-4. 15-16; 16, 1-2/Salmo 131/1 Corinto 15, 54b-57/Lucas 11, 27-28 

This faithful photographic reproduction of the painting (Between c. 1485 and c. 1850) Mary Queen of Heaven by the Master of the Legend of Saint Lucy (circa 1435–1506/1509), as well as the actual work of art itself from the National Gallery of Art in Washington D.C., is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

"Higit na mapalad ang mga nakikinig sa Salita ng Diyos at tumutupad nito!" (Lucas 11, 28). Sa mga salitang ito na binigkas ng Panginoong Hesukristo, ang Nazareno, sa Ebanghelyo para sa araw na ito nakasentro ang pagninilay ng Simbahan. Katunayan, sa pamamagitan ng mga salitang ito, itinuturo ni Hesus kung paano makakarating sa langit ang bawat isa sa atin. Makakapasok sa langit ang mga banal. Sa pamamagitan ng pamumuhay nang banal at kalugud-lugod sa paningin ng Diyos, ang Kaniyang paanyayang makapiling Siya sa langit ay tinatanggap natin. Ang pamumuhay nang banal na tanda ng pagtanggap natin sa paanyaya ng Panginoong Diyos sa atin na makapiling Siya sa langit magpakailanman ay nagsisimula sa pamamagitan ng ating taos-pusong pakikinig sa Kaniyang Salita. 

Ang mga Pagbasa para sa Bisperas ng Dakilang Kapistahan ng Pag-Aakyat sa Langit sa Mahal na Birheng Maria ay nakasentro sa dapat nating asamin at paghandaang mabuti bilang mga deboto ng Mahal na Poong Jesus Nazareno. Bilang mga deboto ng Poong Jesus Nazareno, dapat nating asamin ang biyaya ng buhay na walang hanggan kapiling Siya sa langit. Dapat nating paghandaan ang buhay sa kabila, sa piling ng Diyos sa langit, habang namumuhay at naglalakbay tayo sa mundong ito. Katulad ito ng paghahanda ng ating mga sarili na kamtin ang mga pinapangarap at inaasam sa buhay dito sa mundong ito. Ganyan rin dapat tayo kasigasig pagdating sa ating mga espirituwal na pamumuhay. Asamin natin ang buhay na walang hanggan sa piling ni Jesus Nazareno sa Kaniyang maluwalhating kaharian sa langit at ngayon pa lamang ay magsimula tayong maghanda nang puspusan para sa buhay na walang hanggan sa langit kapiling ang Nuestro Padre Jesus Nazareno sa pamamagitan ng pagiging banal, tapat, at kalugud-lugod sa Kaniyang paningin habang tayo'y namumuhay at naglalakbay dito sa mundong ito nang pansamantala. 

Sa Unang Pagbasa, isinalaysay ang pagdadala sa Kaban ng Tipan sa lugar na inilaan para dito na walang iba kundi ang toldang inihanda ni Haring David. Gaya ng Kaban ng Tipan sa Lumang Tipan, ang Mahal na Inang si Mariang Birhen ay iniakyat rin sa langit nang dumating ang wakas ng kaniyang buhay dito sa mundo. Hindi lamang ang kaluluwa ng Mahal na Inang si Mariang Birhen ang iniakyat sa langit kundi pati na rin ang mismo niyang katawan sapagkat siya mismo ang Kaban ng Bagong Tipan. Ito ay dahil nanahan sa kaniyang sinapupunan sa loob ng siyam na buwan bago isilang sa mundong ito ang ipinangakong Mesiyas at Manunubos na si Jesus Nazareno. Noong iakyat sa langit ang Mahal na Ina, ang langit ay nagalak at nagsaya. Katunayan, ang galak at saya sa langit noong iniakyat roon ang Mahal na Inang si Mariang Birhen ay higit pa sa galak at saya ng mga tao sa Unang Pagbasa. Dahil dinala niya ang Poong Jesus Nazareno, ang ipinakilala sa Ikalawang Pagbasa bilang Diyos na nagkamit ng tagumpay laban sa kamatayan, nagalak ang tanang nasa langit nang iakyat si Maria. 

Paano tayo mapapabilang sa mga banal na buong galak na nagpupuri, umaawit, at sumasamba sa Panginoong Diyos magpakailanman sa langit, gaya ng inilarawan sa isa sa mga taludtod sa Salmong Tugunan? Tanggapin ang paanyaya ng Panginoong Diyos na makapiling Siya sa langit magpakailanman sa pamamagitan ng araw-araw na pakikinig at pagsunod sa Kaniyang kalooban. Kapag pinakinggan at tinupad natin ang Salita ng Diyos na naghahayag ng Kanyang plano at kalooban para sa atin, ating tinatanggap nang taos-puso ang paanyaya Niya sa atin na mamuhay nang banal at kalugud-lugod sa Kanyang paningin. Sa pamamagitan nito, dinadala natin sa ating mga puso ang Mahal na Poong Jesus Nazareno. 

Nais ba nating makapiling ang Poong Jesus Nazareno? Makinig at sumunod sa mga utos at loobin Niya para sa atin. 

MAAASAHANG TAGAPAGLIGTAS

13 Agosto 2023 

Ika-19 Linggo sa Karaniwang Panahon (A) 

1 Hari 19, 9. 11-13a/Salmo 84/Roma 9, 1-5/Mateo 14, 22-33 

This faithful photographic reproduction of the painting (c. 1590s) St Peter Walking on the Water by Alessandro Allori (1535–1607), as well as the actual work of art from the Uffizi Gallery via the Web Gallery of Art is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

"Sagipin Ninyo ako, Panginoon!" (Mateo 14, 30). Ito ang mga salitang binigkas ng unang Santo Papa ng Simbahan na walang iba kundi si Apostol San Pedro habang nalulunod sa tubig sa Ebanghelyo para sa Linggong ito. Bagamat ang mga salitang ito ay binigkas ni Apostol San Pedro dahil sa takot habang unti-unting nalulunod sa tubig, ang mga salitang ito ay mayroong ugnayan sa mga salitang binigkas ng Poong Jesus Nazareno sa Banal na Ebanghelyo. Katunayan, ang pagninilay ng Simbahan para sa Linggong ito ay nakasentro sa mga salitang binigkas ni Kristo sa Ebanghelyo. Una, "Huwag kayong matakot, si Hesus ito" (Mateo 14, 27). Pangalawa, "Napakaliit ng iyong pananalig . . . Bakit ka nag-alinlangan?" (Mateo 14, 31)

Nakasentro sa pagiging maaasahan ng Diyos sa lahat ng oras ang mga Pagbasa para sa Linggong ito. Walang oras o sandali na binigo ng Panginoong Diyos ang sinumang tao sa mundong ito, lalung-lalo na yaong mga taong naglilingkod sa Kaniya nang may buong pusong pananalig, pagsamba, pagtalima, pagmamahal, at katapatan sa Kanya. Kung mayroong mga oras na hindi maaasahan ang tao o kaya naman mga taong hindi dapat asahan, ang Panginoon ay tunay ngang maaasahan ng lahat sa lahat ng oras. Tunay ngang maaasahan ang Panginoong Diyos sa lahat ng oras. 

Ang pagiging maaasahan ng Diyos sa lahat ng oras ay pinatotohanan ng mang-aawit sa Salmong Tugunan para sa Linggong ito. Isinalungguhit ng mang-aawit sa Salmong Tugunan para sa Linggong ito na dahil sa Kaniyang pag-ibig at kagandahang-loob, inililigtas ng Diyos ang lahat. Ang pagiging maaasahan ng Diyos ay tanda o sagisag ng Kaniyang pag-ibig para sa atin. Tunay ngang maaasahan ang Diyos sa lahat ng oras at panahon sapagkat tunay Niya tayong minamahal at kinahahabagan. 

Ipinakita ng Panginoong Diyos ang Kaniyang pag-ibig kay Propeta Elias sa bundok ng Horeb sa Unang Pagbasa. Matapos magtungo sa bundok ng Horeb dahil sa takot kay Reyna Jezebel, ipinaramdam ng Panginoong Diyos kay Elias ang Kanyang pag-ibig at kagandahang-loob sa pamamagitan ng isang banayad na tinig na sinundan naman ng propetang ito na Kaniyang hinirang. Sa pamamagitan nito, pinalakas ng Diyos ang loob ng Kaniyang Propetang si Elias. Ginawa Niya ito dahil sa Kaniyang pag-ibig na siyang dahilan kung bakit ipinasiya Niyang ipakilala ang Kanyang sarili sa tanan bilang maaasahang Panginoon at Manunubos kahit na may mga oras at sandaling ang mga tao ay hindi maaasahan dahil sa kanilang mga pagkukulang, kahinaan, at kasalanan. 

Pinatotohanan ni Apostol San Pablo sa Ikalawang Pagbasa kung paanong pinalakas ng Diyos ang kaniyang puso at loobin. Ito ang dahilan kung bakit sa kabila ng lahat ng mga pag-uusig at pagsubok sa kaniyang buhay bilang apostol at misyonero sa mga Hentil ay nanatili pa rin siyang tapat sa Panginoong Diyos hanggang sa huli. Dahil dito, ipinahayag ni Apostol San Pablo ang kanyang kalungkutan para sa kanyang mga kababayan sapagkat nais niyang maranasan rin nila kung paano pinalakas ng Diyos ang kanyang puso at loobin. Sa pamamagitan ng pagpapalakas ng kaniyang puso at loobin, lalo lamang namangha si Apostol San Pablo sa katapatan ng Panginoon. Ang tanging naisin ni Apostol San Pablo ay mamulat at mamangha rin ang kaniyang mga kababayan sa walang maliw na katapatan ng Diyos. 

Bagamat nag-alinlangan si Apostol San Pedro noong una, ipinasiya pa rin ng Mahal na Poong Jesus Nazareno na iligtas ang alagad Niyang ito sa Ebanghelyo. Ipinakita ni Jesus Nazareno sa pamamagitan nito na kahit sa mga mahihina o mayroong mga maliliit na pananalig ay makikinabang rin sa pagiging maaasahan ng Panginoon. Ang pagiging maaasahan ng Panginoong Diyos ay hindi Niya ipagkakait sa mga mahihina o maliliit ang pananalig. Bagkus, ipapakita pa rin ito sa kanila ng Panginoong Diyos upang sa pamamagitan nito ay lalo pang lumalim, lumago, at lumakas ang pananalig at pag-asa nila sa Kanya. Sa gayon, ipinapakilala o ipinapaalala ng Mahal na Poon ang Kaniyang sarili sa kanila bilang maaasahang Panginoon at Manunubos. 

Tayong lahat ay tunay na mapalad sapagkat ang Nuestro Padre Jesus Nazareno ay maaasahan natin sa lahat ng oras. Habang tayo'y namumuhay at naglalakbay nang pansamantala sa mundong ito, mayroon tayong Panginoon, Diyos, at Manunubos na tunay nga nating maaasahan. Hindi Niya bibiguin kailanman dahil tunay Niya tayong minamahal at kinahahabagan. 

KUNG HINDI SIYA, SINO?

11 Agosto 2023 

Paggunita kay Santa Clara, dalaga 

Deuteronomio 4, 32-40/Salmo 76/Mateo 16, 24-28 

This faithful photographic reproduction of the painting (c. 1693) Santa Clara ahuyentando a los infieles con la Eucaristía by Isidoro Arredondo (1657–1702), as well as the actual work of art from the Museo del Prado and presently in the Spanish Council of State, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Sino o ano ang ating iibigin nang buong puso at katapatan? Ang mga Pagbasa para sa araw na ito ng Biyernes na inilaan para sa taimtim na debosyon at pamamanata sa Panginoong Hesukristo sa ilalim ng Kanyang titulong Nuestro Padre Jesus Nazareno na sumasagisag sa dakila Niyang pag-ibig para sa atin ay nakasentro sa tanong na ito. Tayong lahat ay inaanyayahan ng Simbahan sa araw na ito na suriin natin nang mabuti ang ating mga sarili habang pinagninilayan ang tanong na ito. Sino o ano ang buong puso nating mamahalin nang buong puso at katapatan? 

Ang pahayag ni Moises sa Unang Pagbasa para sa araw na ito ay nakasentro sa tanong ng pag-ibig at katapatan ng mga Israel. Sa pamamagitan ng pahayag na ito, ipinapaalala ni Moises kung kanino nga ba dapat ibigay at ialay ng mga Israelita nang buong puso at pananalig ang kanilang pag-ibig at katapatan. Tanging sa Panginoong Diyos lamang dapat nila ibigay o ihandog ang pag-ibig at katapatan, kung si Moises mismo ang tatanungin. Subalit, mayroon namang kalayaan ang mga Israelita upang gumawa ng pasiya. Ito ang dahilan kung bakit binigkas ni Moises ang mga salitang ito sa mga Israelita sa Unang Pagbasa. 

Nakasentro sa pag-ibig at katapatan sa Diyos ang mga salitang binigkas ni Kristo, ang Poong Jesus Nazareno, sa Kaniyang pangaral sa Ebanghelyo. Itinuro ng Poong Jesus Nazareno sa Kaniyang mga alagad kung ano nga ba talaga ang dapat gawin ng mga nagnanais sumunod sa Kaniya. Kinakailangan nilang isentro ang kanilang buhay sa Diyos at laging unahin ang Panginoong Diyos sa kanilang buhay. Ang magiging patunay nito ay ang paglimot nila sa kanilang mga sarili, pagpasan ng kanilang mga krus, at pagsunod sa Kaniya araw-araw (Mateo 16, 24). Buong puso nilang ibinibigay o inihahandog sa Diyos ang kanilang mga sarili sa pamamagitan nito. Mahirap man gawin ito, lalung-lalo na sa mga sandali ng pagsubok at pag-uusig, subalit kung si Jesus Nazareno na ating Mahal na Poon ay tunay nating iniibig at nais sundan nang buong pananalig at katapatan, gagawin natin ito. 

Habang pinagninilayan natin ang tanong na ito, inaanyayahan tayo ng tampok na mang-aawit sa Salmong Tugunan para sa araw na ito na alalahanin at pagnilayan ang lahat ng mga kahanga-hangang gawa ng Panginoong Diyos (Salmo 76, 12a). Nais ng Diyos na makilala natin Siya bilang isang bathalang mapagmahal at mahabagin. Sa pamamagitan ng mga kahanga-hangang gawang ito, nililigawan tayo ng Diyos. Ang dakila Niyang pag-ibig, kagandahang-loob, habag, at awa para sa atin ay Kaniyang ipinapahayag sa pamamagitan ng mga kahanga-hangang gawang ito. Katunayan, ito ang sinasagisag ng bawat larawan o imahen ng Mahal na Poong Jesus Nazareno na nagpasan ng Krus na Banal para sa atin. Alang-alang sa atin, hindi Siya sumuko sa bigat ng Krus. Bagkus, patuloy Siyang nakibaka at ipinagpatuloy ang misyon Niyang tubusin at iligtas tayo sa pamamagitan ng Krus at Muling Pagkabuhay. 

Tayong lahat ay patuloy na nililigawan at sinusuyo ng Poong Jesus Nazareno. Ano ang ating tugon sa Kaniyang panliligaw at pagsuyo? Ibibigay rin ba natin ang ating pag-ibig, pagsamba, pananalig, at katapatan sa Kanya? O sa iba natin ito ibibigay? Kung hindi ang Nuestro Padre Jesus Nazareno, kanino ba natin ito ibibigay? 

IBIGAY ANG NARARAPAT SA KANYA

6 Agosto 2023 

Kapistahan ng Pagliliwanag sa Bagong Anyo ng Panginoon (A) 

Daniel 7, 9-10. 13-14/Salmo 96/2 Pedro 1, 16-19/Mateo 17, 1-9 

This faithful photographic reproduction of the painting (c. Between 1308 and 1311) Transfiguration by Duccio di Buoninsegna (1255–1319), as well as the actual work of art itself from the National Gallery in Westminster, Central London, England, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Sariwa pa rin sa gunita ng publiko kung paanong nilapastangan ang panalanging itinuro ng Panginoong Hesukristo, na kilala natin sa tawag na "Ama Namin," sa isang pampublikong lugar. Tampok sa bidyo ng kasuklam-suklam na gawaing ito ang isang taong binihisan ang kanyang sarili ayon sa larawan ng Nazareno na sumasayaw nang malaswa habang pinatugtog ang isang bersyon ng "Ama Namin" na dinagdagan pa ng mga tugtog upang magamit ito para sa mga gawaing katulad noon. Para sa taong gumawa nito, ang nasa sentro nito, isa raw itong uri ng sining upang buong giting at lakas ng loob niyang maipahayag ang kanyang sarili. 

Malinaw naman na hindi ito isang uri ng sining. Bagkus, isa itong kasuklam-suklam na gawa sapagkat nilapastangan ang Diyos sa gawaing ito. Sa halip na parangalan, purihin, at sambahin ang Panginoong Diyos, pinili nila Siyang gawing katatawanan at walang tigil nila Siyang nilait, niyurakan, at nilapastangan sa pamamagitan nito. Pati ang sagisag ng Kanyang dakilang pag-ibig para sa atin, ang imahen ng Panginoong Jesus Nazareno na nagpasan sa Banal na Krus na pinagpakuan sa Kanya sa banal na bundok ng Kalbaryo, ay hindi nila pinatawad. Ang Mahal na Poong Jesus Nazareno ay hindi nila binigyan ng galang, parangal, papuri, at pagsamba. 

Nakakalungkot isipin ito habang pinagninilayan natin bilang Simbahan sa Linggong ito ang isang napakahalagang kaganapan sa buhay ng Panginoon, ang Nuestro Padre Jesus Nazareno, na walang iba kundi ang Kaniyang Pagbabagong-Anyo sa banal na bundok na kilala bilang Bundok ng Tabor. Sa kaganapang ito, ang Amang nasa langit ay muling nagsalita upang si Kristo Hesus, ang Nazareno, ay ipakilala bilang Kaniyang minamahal na Anak na nararapat lamang pakinggan at sundin ng tanan. Subalit, sa kasalukuyang panahon, napakalinaw na mayroong mga hindi sumusunod sa bilin at utos na ito ng Amang nasa langit. Paglilibak, panlalait, at pangungutya ang ibinigay sa Nuestro Padre Jesus Nazareno kaysa sa paggalang at pagsamba. 

Inilarawan ni Propeta Daniel sa kanyang pahayag sa Unang Pagbasa ang kanyang mga nakita sa isang pangitain. Nakita ni Propeta Daniel sa nasabing pangitain kung paanong hinandugan ng santinakpan ng papuri, parangal, paggalang, at pagsamba ang nabubuhay magpakailanman. Sa Ikalawang Pagbasa, pinatotohanan ng unang Santo Papa ng Simbahan na si Apostol San Pedro ang kadakilaan ng Panginoon na nahayag sa Bundok ng Tabor noong ang Poong Jesus Nazareno ay nagbagong-anyo, gaya ng inilarawan ni San Mateo sa Ebanghelyo. 

Ang Amang nasa langit ay muling nagsalita mula sa langit upang ipakilala ang walang hanggan at tunay na Hari, Panginoon, at Manunubos na walang iba kundi ang Poong Jesus Nazareno at iutos ang sangkatauhan na makinig sa Kaniya. Sa pamamagitan nito, itinuro sa atin ng Amang nasa langit kung paano nating maibibigay kay Kristo kung ano ang nararapat sa Kanya na walang iba kundi ang tapat at taos-puso nating papuri, paggalang, pagbubunyi, parangal, at pagsamba sa Kanya. Kapag ginawa natin ito, ang Ama at ang Espiritu Santo ay inaalayan at hinahandugan rin natin ng ating tapat na pagpupuri, pagpaparangal, paggalang, pagbubunyi, at pagsamba. Iyon nga lamang, parang hindi na ito ginagawa. 

Hindi lamang sa pamamagitan ng mga kasuklam-suklam na gawain katulad ng mga malalaswa't mapagkutyang pagsasayaw habang pinatutugtog ang mga binaboy na bersyon ng mga panalanging gaya ng "Ama Namin" na isinaliw sa musika sa ngalan ng "sining" nilalapastangan ang Panginoon. Minsan nga, minura ang Panginoon. Ang salitang ginamit ng pinakamataas na opisyal nang minsan niyang murahin ang Diyos ay "estupido." Nilait niya ang Panginoon sa pamamagitan ng pagtawag sa Kaniya ng "estupido." Dagdag na rin dito ang mga pumalakpak at naghiwayan noong ginawa iyon ng taong iyon na may hawak sa pinakamataas na posisyon sa bansa noon. Ito ay dahil marami sa kanila ang nagturing sa taong iyon bilang diyos-diyosan. 

Lalo lamang dumarami at lumalaganap ang mga kahibangang ito habang patuloy na tumatakbo ang oras at panahon. Ang Panginoong Diyos ay nilalait-lait, kinukutya, hinahamak-hamak, niyuyurakan, minamaliit, at nilalapastangan ng nakararami nang ganoon na lamang. Parang napakadaling gawin yaon sa halip na ibigay sa Kanya ang nararapat. Kahibangan ang lahat ng ito! 

Panahon na upang itigil ang mga kahibangang ito! Ibigay natin sa Panginoong Diyos ang nararapat. Taos-puso nating ihandog sa Kaniya ang ating mga papuri, parangal, katapatan, pagbubunyi, pag-ibig, at pagsamba sa Kaniya na Siyang tumubos sa atin sa pamamagitan ng Krus at Muling Pagkabuhay ng Mahal na Poong Jesus Nazareno dahil sa Kaniyang walang hanggang biyaya, pag-ibig, awa, habag, at kagandahang-loob para sa atin. Kahit na hindi tayo karapat-dapat sapagkat mga makasalanan tayo, ginawa pa rin Niya ito para sa atin. 

PAGTANGGAP SA PANGINOON

4 Agosto 2023 

Paggunita kay San Juan Maria Vianney, pari

Levitico 23, 1. 4-11. 15-16. 27. 34b-37/Salmo 81/Mateo 13, 54-58 

Screenshot: #QuiapoChurchOfficial - 10 AM #OnlineMass - 16 July 2023, 15th Sunday in Ordinary Time (Facebook Live and YouTube) 

Ang mga Pagbasa para sa araw na ito ng Biyernes na inilaan para sa taimtim na debosyon at pamamanata kay Kristo, ang Poong Jesus Nazareno, ay nakasentro sa tapat at taos-pusong pagtanggap sa Kanya. Nais ng Mahal na Poong Jesus Nazareno na magkaroon tayo ng isang malalim at tapat na ugnayan sa Kanya. Bagamat tayong lahat, bilang tao, ay mga hamak na nilalang na mamamatay rin balang araw habang si Jesus Nazareno naman ay tunay na Diyos na walang hanggan, nais pa rin Niyang magkaroon ng isang malalim at tapat na relasyon sa atin. Hinahangad ng Panginoong Jesus Nazareno ang tapat at taos-puso nating pagtanggap, pag-ibig, pananalig, at pagsamba sa Kaniya bilang Diyos, Panginoon, at Manunubos. Kahit hindi naman Niya ito kailangan sapagkat Diyos naman Siya habang tayo naman ay mga makasalanan, hangad pa rin Niya ito sapagkat tunay Niya tayong kinahahabagan at minamahal. 

Sa Unang Pagbasa, inilahad ng Panginoong Diyos kay Moises na Kanyang lingkod ang mga dapat niyang ipahayag sa mga Israelita tungkol sa mga araw ng pagsamba sa Kanya at kung paano Siya sasambahin ng mga Israelita Inilahad ng Diyos kay Moises ang Kanyang mga utos at alituntunin tungkol sa gagawin ng lahat ng mga Israelita pagsapit ng Araw ng Pamamahinga at pati na rin sa iba pang mga araw na itinakda o inilaan para sa pagsamba sa Kanya bilang Panginoon at Tagapagligtas bilang bayang hinirang at binuklod Niya mismo. Sa pamamagitan nito, inihahayag ng bayang Israel nang taos-puso ang kanilang pagtanggap, pananalig, pag-ibig, at pagsamba para sa Diyos na Panginoon at Manunubos. 

Pagtanggap, pagpaparangal, pananalig, pag-ibig, at pagsamba sa Panginoong Diyos ang temang pinagtuunan ng pansin sa Salmong Tugunan. Inanyayahan ng tampok na mang-aawit sa Salmong Tugunan ang lahat na buong galak at siglang mag-alay sa Diyos ng mga awit ng papuri, parangal, at pagsamba sa Kanya (Salmo 81, 2a). Ito ay isang napakagandang pagkakataon para sa atin upang ipahayag nang malakas ang taos-puso at dalisay nating pananalig, pag-ibig, parangal, pagtanggap, at pagsamba sa Panginoong Diyos na Siyang nagdulot ng kaligtasan sa atin. 

Taliwas nito ang isinalaysay sa Mabuting Balita para sa araw na ito. Sa Ebanghelyo, inilarawan kung paanong ang Poong Jesus Nazareno ay hindi tinanggap ng Kaniyang mga kababayan sa Nazaret. Bagamat Siya'y taga-Nazaret (na siyang tanging dahilan kung bakit kilala Siya bilang Nazareno), ang Poong Jesus Nazareno ay hindi tinanggap ng Kanyang mga kababayan sa Nazaret. Ang mga kababayan ni Kristo, ang Nuestro Padre Jesus Nazareno, ay hindi nagbukas ng kanilang mga puso sa Kaniya. Dahil dito, ang Mahal na Poong Jesus Nazareno ay labis na nasaktan. 

Nais ng Panginoong Diyos na magkaroon ng isang malalim na ugnayan sa atin. Tayo ba, hangad rin ba nating magkaroon ng isang malalim at tapat na ugnayan sa Kaniya? Buong puso at katapatan nga ba natin Siyang tatanggapin, pararangalan, pupurihin, at sasambahin? 

MGA PINAHAHALAGAHAN SA BUHAY

30 Hulyo 2023 

Ika-17 Linggo sa Karaniwang Panahon (A) 

1 Hari 3, 5. 7-12/Salmo 118/Roma 8, 28-30/Mateo 13, 44-52 

Screenshot: Banal na Misa | 8:00 n.g.
(January 6, 2023 - The National Shrine and Parish of the Divine Mercy Facebook)

Hindi magkakatulad ng mga pananaw at pinahahalagahan sa buhay ang lahat ng tao sa mundong ito. Magkaiba ang uri ng pag-iisip at lohika ng iba't ibang tao sa isa't isa. Mayroon rin namang mga pagkakataon sa buhay kung saan makakatagpo tayo ng isang taong katulad nating mag-isip. Iyon nga lamang, ang mga pagkakataong yaon ay bibihira lamang mangyari. Hindi ito nangangahulugang maaari na nating bigyan ng pahintulot ang mga kriminal na pairalin ang kanilang mga patakaran at pamantayan o kaya naman ay magiging manhid na lamang tayo sa walang awang paglabag sa lahat ng mga karapatang pantao katulad na lamang ng karapatang mamuhay, kahit gawin pa ito ng mga opisyal sa pamahalaan. 

Ang bawat isa sa atin ay inaaanyayahan ng Simbahan sa Linggong ito na pagnilayan nang mabuti ang ating mga pinahahalagahan sa buhay. Ito ay dahil nakasentro sa tanong na ito ang mga Pagbasa para sa Linggong ito. Sa pamamagitan nito, tayong lahat ay tinutulungan ng Simbahan na suriin natin ang ating mga sarili nang sa gayo'y mapagtanto natin ang sagot sa tanong tungkol sa ating mga pinahahalagahan sa buhay at kung kailangan nating baguhin ang ating mga pananaw at pinahahalagahan sa buhay. 

Itinampok sa salaysay sa Unang Pagbasa para sa Linggong ito ang pasiya ng bagong hari ng Israel na walang iba kundi si Haring Solomon. Sa pasiya niyang ito, ipinakita ni Solomon ang kanyang mga pinahalagahan. Buong kababaang-loob niyang inaming bata pa lamang siya at kapos sa karanasan sa pagiging isang hari o tagapamahala o pinuno. Nais ni Haring Solomon na maging isang mabuting hari para sa bayang Israel, katulad ng kanyang yumaong amang si Haring David. Dahil dito, buong kababaang-loob na humingi ng karunungan si Solomon mula sa Panginoong Diyos. 'Di hamak na mas mahalaga para kay Solomon na magkaroon ng karunungan dahil hindi biro ang tungkuling inatasan sa kanya ng Diyos bilang hari. Aanhin pa niya ang kapangyarihan at kayamanan dito sa mundo kung hindi niya magagamapanan nang mabuti ang mga responsibilidad niya bilang hari ng Israel, ang bayan ng Diyos? 

Sa Ikalawang Pagbasa, inilarawan ni Apostol San Pablo na ang bawat isa sa atin ay tunay ngang pinahalagahan ng Diyos. Inilarawan ni Apostol San Pablo na itinalaga ng Diyos na maging Kaniya ang lahat ng mga tinawag Niya ayon sa Kaniyang panukala upang maging Kaniya (Roma 8, 28-29). Habang namumuhay at naglalakbay tayo sa mundong ito nang pansamantala, lagi tayong pinagkakalooban ng Panginoong Diyos ng pagkakataong mapabilang sa Kanyang mga tinawag at itinalaga upang maging Kanya. Ano ang dapat nating gawin? Isabuhay ang mga salita sa Salmong Tugunan para sa Linggong ito: "Iniibig ko nang lubos, tanang utos Mo, Poong D'yos" (Salmo 118, 97a). Kapag ipinasiya nating isabuhay ang mga salitang ito, inihahayag natin ang ating "Oo" at pagtalima sa kaloobang ito ng Panginoong Diyos. 

Nakasentro rin sa paksang ito ang talinghaga ng Mahal na Poong Jesus Nazareno sa Ebanghelyo para sa Linggong ito. Inilarawan sa talinghagang ito ng Mahal na Poong Jesus Nazareno ang ginawa ng Diyos para sa lubos Niyang pinahalagahan na walang iba kundi ang sangkatauhan. Bagamat mga makasalanan ang buong sangkatauhan, handa pa rin ang Diyos na gawin ang lahat upang mailigtas sila. Gaya ng tampok na mangangalakal na humanap sa mamahaling perlas sa talinghagang isinalaysay ng Poong Jesus Nazareno sa Ebanghelyo, ginawa ng Diyos ang lahat upang mailigtas ang sangkatauhan dahil tunay Niya silang iniibig at pinahalagahan. Ito ay Kaniyang ginawa sa pamamagitan ni Kristo, ang Nuestro Padre Jesus Nazareno. Katulad rin ng tampok na mangangalakal sa talinghaga ng Poong Jesus Nazareno sa Ebanghelyo, walang nakapigil sa Panginoong Diyos na isakatuparan ang kalooban Niyang ito. 

Tayong lahat ay tinatanong sa Linggong ito - ano ang ating mga pinahahalagahan sa buhay? Ang mga pinahahalagahan ba natin sa buhay ay dapat pa rin nating ipaglaban o kaya dapat na ba natin itong palitan at baguhin? 

PAANYAYANG MAGING KANYANG MGA KAIBIGAN

29 Hulyo 2023 

Paggunita kina Santa Marta, Santa Maria, at San Lazaro 

1 Juan 4, 7-16/Salmo 33/Juan 11, 19-27 (o kaya: Lucas 10, 38-42) 

This faithful photographic reproduction of the painting (c. Between 1514 and 1519) The Resurrection of Lazarus by Juan de Flandes (1450–1519), as well as the actual work of art itself from the Museo del Prado, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer, due to its age. 

Mayroong dalawang Pagbasa na maaaring gamitin para sa Ebanghelyo sa Misa para sa araw na ito, ang araw na inilaan ng Simbahan upang gunitain ang magkapatid na taga-Betania na sina Santa Marta, Santa Maria, at San Lazaro. Sa isa sa dalawang Pagbasa para sa Ebanghelyo, inilahad ang pag-uusap ng Panginoong Jesus Nazareno kay Santa Marta kung saan ipinakilala Niya sa kaibigan Niyang ito na nagdadalamhati dahil sa pagpanaw ng kanyang kapatid na lalaki na si San Lazaro ang Kaniyang sarili bilang Muling Pagkabuhay at Buhay (Juan 11, 25). Ang pagdalaw ng Mahal na Poong Jesus Nazareno sa bahay ng mga kaibigan Niya sa Betania ay isinalaysay naman sa alternatibong Ebanghelyo para sa araw na ito. 

Bagamat nakatuon sa dalawang magkaibang kaganapan sa buhay ni Jesus Nazareno ang dalawang salaysay na ito na itinatampok sa Ebanghelyo para sa araw na ito, isa lamang ang puntong nais isalungguhit, talakayin, at pagnilayan. Ang aral o puntong nais bigyan ng pansin ay walang iba kundi ang pananalig at pagsunod sa kalooban ng Diyos bilang pagpapahayag ng pagtanggap sa paanyaya ni Kristo upang maging mga tapat na tagasunod at kaibigan Niya. 

Inilahad sa Unang Pagbasa ang dahilan kung bakit ipinasiya ni Jesus Nazareno na lagi tayong bigyan ng pagkakataong maging Kanyang mga tagasunod at kaibigan. Dahil sa Kanyang pag-ibig, ipinasiya ng Poong Jesus Nazareno na anyayahan tayo maging Kanyang mga tagasunod at kaibigan. Habang patuloy na namumuhay at naglalakbay dito sa mundong ito nang pansamantala lamang ang bawat isa sa atin, lagi tayong binibigyan ng pagkakataong tanggapin ang paanyaya ng Panginoong Jesus Nazareno upang maging Kanyang mga tapat na tagasunod at kaibigan. 

Paano natin maipapahayag nang malakas ang ating pagtanggap sa paanyayang ito sa atin ng Nuestro Padre Jesus Nazareno? Sabi sa Unang Pagbasa, ibigin ang Diyos at ibigin rin ang kapwa. Mag-ibigan tayo sapagkat ang Diyos ay pag-ibig. Kapag ito ang ating ipinasiyang gawin, binibigyan natin ng pahintulot at pagkakataon ang Diyos na manahan sa atin (1 Juan 4, 7. 13. 16). Gaya ng sabi ng Panginoong Jesus Nazareno sa alternatibong Ebanghelyo, ito ang "lalong mabuti" (Lucas 10, 42). Mayroon pa ngang pangako ang Poong Jesus Nazareno sa isa sa dalawang Ebanghelyo para sa araw na ito: "Ang [mga] nananalig sa Akin, kahit mamatay ay muling mabubuhay, at sinumang nabubuhay at nananalig sa Akin, kahit mamatay ay mabubuhay kailanman" (Juan 11, 25-26). Ipinapahayag natin sa pamamagitan ng ating pananalig na isinasalamin ng taos-puso nating pakikinig at pagtalima sa mga utos at loobin ng Diyos ang taos-puso nating pagtanggap sa paanyayang ito ng Mahal na Poong Jesus Nazareno na maging Kaniyang mga tagasunod at kaibigan. Kapag ito ay ipinasiya nating gawin, ang biyaya ng bagong buhay na mula lamang sa Nuestro Padre Jesus Nazareno ay Kanyang ipagkakaloob sa atin. 

Tinanggap nina Santa Marta, Santa Maria, at San Lazaro ang paanyaya ng Mahal na Poong Jesus Nazareno na magkaroon ng isang malalim na relasyon o ugnayan sa Kaniya bilang Kaniyang mga minamahal na kaibigan. Katulad nila, binibigyan tayo ng Mahal na Poong Jesus Nazareno na maging Kanya ring mga tagasunod at kaibigan. Ano ang ating pasiya? 

BUHAY NA WALANG HANGGAN

28 Hulyo 2023 

Biyernes ng Ika-16 na Linggo sa Karaniwang Panahon (I) 

Exodo 20, 1-17/Salmo 18/Mateo 13, 18-23 

Screenshot: QUIAPO CHURCH OFFICIAL - 6AM #OnlineMass - 09 July 2023 - 14th Sunday in Ordinary Time (Facebook Live and YouTube) 

Ang mga Pagbasa para sa araw na ito ng Biyernes, ang araw na inilaan ng Simbahan para sa taimtim na debosyon at pamamanata sa Panginoon sa ilalim ng Kaniyang titulong Nuestro Padre Jesus Nazareno, ay nakasentro sa biyaya ng buhay na walang hanggan sa Kanyang piling sa maluwalhati Niyang kaharian sa langit. Kinamit mismo ng Nuestro Padre Jesus Nazareno ang biyayang ito para sa atin. Sa pamamagitan ng Banal na Krus na Kaniyang pinasan at pinagpakuan sa Kaniya sa banal na bundok na kilala sa tawag na Golgota o Kalbaryo at ang Kanyang Muling Pagkabuhay, nakamit ni Jesus Nazareno para sa atin ang biyayang ito. 

Sa Ebanghelyo, ipinaliwanag ng Poong Jesus Nazareno ang kahulugan ng talinghaga tungkol sa manghahasik. Napakalinaw kung ano ang nais ituro ni Jesus Nazareno sa lahat. Itinuturo ni Jesus Nazareno kung paano natin ang biyaya ng buhay na walang hanggan na Kaniyang kinamit para sa tanan sa pamamagitan ng Kaniyang Banal na Krus at Muling Pagkabuhay. Bagamat ang talinghagang ito ay Kanyang isinalaysay sa mga tao bago Niya harapin ang Kanyang Misteryo Paskwal, ipinahiwatig na ng Poong Jesus Nazareno na makakamit ng lahat ng mga tao ang buhay na walang hanggan sa pamamagitan Niya na magliligtas sa lahat ng mga tao sa pamamagitan ng Kaniyang Banal na Krus at Muling Pagkabuhay. 

Paano natin mapapahayag ang ating pagtanggap sa biyayang ito na ipinagkaloob sa atin ng Poong Jesus Nazareno? Tuparin ang Kanyang mga utos. Maging masunurin sa mga utos ng Panginoong Diyos. Inilahad sa Unang Pagbasa para sa araw na ito ang Sampung Utos ng Diyos na ibinigay Niya kay Moises sa Bundok ng Sinai. Ang mga utos na ito ay ibinigay ng Diyos upang bigyan ng pagkakataon ang mga Israelita na ipahayag sa Kanya ang kanilang taos-pusong pag-ibig, katapatan, at pagsamba sa Kanya. Hanggang sa kasalukuyang panahon, ang bawat tao sa mundo ay patuloy na binibigyan ng pagkakataon ng Panginoon na ipahayag at patunayan ang taos-puso at tapat nilang pag-ibig at pagsamba sa Kanya. Gaya ng sabi sa Salmong Tugunan, ang Panginoong Diyos lamang ang nagtataglay ng Salitang bumubuhay (Juan 6, 68k). Sabi rin sa Salmong Tugunan na nagdudulot ng bagong buhay ang lahat ng mga utos ng Diyos (Salmo 18, 8). Kung susundin natin ang mga utos at loobin ng Panginoon, ang biyaya ng buhay na Kanyang kaloob ay ating tinatanggap. 

Nais ba nating magkaroon ng buhay na walang hanggan? Tanggapin at sundin ang mga utos at loobin ng Panginoong Diyos. Maging taos-puso at tapat tayo sa ating pag-ibig, pananalig, at pagsamba sa Diyos hanggang sa huling sandali ng ating buhay at paglalakbay dito sa mundong ito na pansamantala lamang sa pamamagitan ng taos-pusong pakikinig at pagtupad sa Kanyang mga utos at loobin. 

DAHILAN NG ATING PAGSUNOD SA POONG JESUS NAZARENO

25 Hulyo 2023 

Kapistahan ni Apostol Santiago 

2 Corinto 4, 7-15/Salmo 125/Mateo 20, 20-28

This faithful photographic reproduction of the painting (c. 1597) Santiago Apóstol by Vicente Requena the Younger (1556–1606), as well as the actual work of art itself from the Museu de Belles Arts de València is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

"Ang hirap na babatain Ko'y babatahin nga ninyo" (Mateo 20, 23). Ito ang mga salitang binigkas ng Panginoong Jesus Nazareno sa dalawa Niyang alagad na walang iba kundi ang magkapatid na sina Apostol Santo Santiago Mayor at Apostol San Juan matapos makiusap para sa kanilang dalawa ang kanilang ina. Katunayan, para rin sa kanilang ina ang pahayag na ito ng Panginoon. Ang pakiusap ng ina ng magkapatid na sina Apostol Santo Santiago Mayor at Apostol San Juan ay ipagkaloob sa dalawang alagad na ito ang karapatan at karangalang maupo sa Kanyang kanan at kaliwa sa Kanyang maluwalhating kaharian sa langit. Ipinaliwanag ng Poong Jesus Nazareno na hindi tungkol sa karangalan at karapatan ang pagiging Kanyang mga alagad, apostol, at tagasunod. Kung iyon ang pakay ng bawat isa sa atin sa pagiging mga alagad at tagasunod ng Poong Jesus Nazareno, nagkamali tayo ng pinasok. 

Kung hindi tungkol sa karangalan, karapatan, at posisyon ang pagiging tagasunod at alagad ng Mahal na Poong Jesus Nazareno, tungkol saan nga ba ito? Inilarawan ito sa mga Pagbasa para sa araw na ito. Ang pagiging mga alagad at tagasunod ng Poong Jesus Nazareno ay dapat maging tungkol sa ating pagsamba, pag-ibig, at katapatan sa Kanya. Hindi paghahangad ng mataas na posisyon o maupo sa kanan o kaliwa ng Poong Jesus Nazareno ang dapat pumukaw sa atin na sumunod sa Kanya. Bagkus, dapat sumunod tayo sa Mahal na Poong Jesus Nazareno dahil tunay nga natin Siyang iniibig at sinasamba nang buong katapatan hanggang sa huli. 

Ito ang dahilan kung bakit ipinasiyang isentro ng Poong Jesus Nazareno sa tema ng pagdurusa ang Kanyang tugon sa ina ng magkapatid na sina Apostol Santo Santiago Mayor at Apostol San Juan sa Ebanghelyo para sa Kapistahang ipinagdiriwang sa araw na ito. Katunayan, ang pangaral ni Apostol San Pablo sa Unang Pagbasa para sa Kapistahang ipinagdiriwang sa araw na ito ay ang mismong tema o paksa ring ito na walang iba kundi sa dapat maging dahilan ng ating pasiyang maging mga tagasunod ng Mahal na Poon. Ang dapat magbigay sa atin ng motibasyon o pumukaw sa atin na sumunod kay Kristo, ang Mahal na Poong Jesus Nazareno, ay walang iba kundi ang taos-puso nating pag-ibig, pagsamba, pananalig, at katapatan sa Kanya. 

Hindi dapat tayo maging mga tagasunod ng Nuestro Padre Jesus Nazareno nang sa gayon ay makamit ang posisyon at karapatang maupo sa Kanyang kanan at kaliwa sa maluwalhati Niyang kaharian sa langit. Bagkus, ang dapat maging dahilan ng ating pasiyang sumunod sa Mahal na Poon ay ang ating pag-ibig, pagsamba, pananalig, at katapatan sa Kanya. Ito ang tutulong sa atin na harapin, tiisin, at pagtagumpayan ang iba't ibang uri ng pag-uusig at pagsubok sa buhay dito sa mundong ito. Gaya ng sabi sa Salmong Tugunan: "Ang nagtanim na may luha ay aaning natutuwa" (Salmo 125, 5). Kapag ang pakay natin sa pagiging mga tagasunod ng Poong Jesus Nazareno ay ang ating taos-pusong pag-ibig, pagsamba, pananalig, at katapatan sa Kanya, tayong lahat ay mapupuspos ng tuwa sapagkat makakapiling na rin natin sa wakas ng ating buhay dito sa mundo na pansamantala lamang ang tunay nating iniibig at sinasamba na walang iba kundi si Jesus Nazareno. 

Sumunod tayo sa Mahal na Poong Jesus Nazareno hindi dahil nais nating makamit ang pinakamataas na posisyon sa langit o maupo sa Kaniyang kanan at kaliwa. Ang dapat pumukaw sa atin na sumunod sa Mahal na Poong Jesus Nazareno ay walang iba kundi ang taos-puso nating pag-ibig at pagsamba sa Kanya na magbibigay sa atin ng lakas na manatiling tapat sa Kanya hanggang sa huli. 

HINDI SIYA NAWAWALAN NG PAG-ASA PARA SA ATIN

23 Hulyo 2023 

Ika-16 na Linggo sa Karaniwang Panahon (A) 

Karunungan 12, 13. 16-19/Salmo 85/Roma 8, 26-27/Mateo 13, 24-43 (o kaya: 13, 24-30) 

This faithful photographic reproduction of the painting (c. 1604) Landscape with Herdsmen and Satan Sowing Darnel by Abraham Bloemaert (1564–1651), as well as the actual work of art itself from the Hermitage Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States of America, due to its age. 

Ang mga Pagbasa para sa Linggong ito ay nakasentro sa habag at awa ng Diyos. Tila pinaalalahanan tayo ng Simbahan tungkol sa katotohanang ito. Bagamat ilang ulit na nating tinalakay at pinagnilayan ang misteryong ito tungkol sa Panginoong Diyos, ipinasiya ng Simbahan na muling bigyan ng pansin at pagnilayan ang misteryong ito upang ipaalala sa atin ang katangiang ito ng Diyos. Katunayan, ipinapaalala sa atin ng Simbahan ang dahilan kung bakit nabubuhay pa tayo sa kasalukuyan. Patuloy tayong humihinga at namumuhay sa mundong ito dahil niloob ito ng Diyos. Niloob Niya ito dahil tunay nga Siyang mahabagin, maawain, at mapagmahal sa atin. 

Tiyak na maraming ulit na nating narinig ang kasabihang "Matagal mamatay ang mga masasamang damo." Ibig sabihin, mahahaba ang buhay ng mga taong lubos-lubos ang kasamaan. Marahil minsan ay naitanong rin natin ang ating mga sarili kung bakit ganyan ang buhay sa mundong ito. Bakit nga ba mahahaba ang buhay ng mga taong ubod ng kasamaan habang ang buhay ng mga taong mabubuti at busilak ang puso, budhi, o loobin ay tila maiikli? Dahil sa katotohanang ito, tila nawawalan na tayo ng ganang magsikap maging mabuti at banal. Ano pa nga ba ang saysay o kabuluhan ng pagpapakabuti at pagpapakabanal kung mahahaba naman ang buhay ng mga taong lubos-lubos at sobra-sobra ang kasamaan? Bakit pa natin pahihirapan ang ating mga sarili kung iyon naman ang katotohanan ng buhay sa mundong ito? 

Isinasalamin ng hikayat o himok ng mga alipin ng puno ng sambahayan na naghasik ng mabuting binhi sa kanyang bukid sa talinghagang isinalaysay ng Mahal na Poong Jesus Nazareno sa Ebanghelyo ang uri ng pag-iisip at lohika natin bilang mga tao sa mundong ito. Nais nating mawala sa mundo ang lahat ng mga taong walang ibang ginawa kundi magpalaganap ng kasamaan. Subalit, parang wala namang nangyayari sa kanila. Malakas pa rin sila, kahit mayroong ilan sa kanila na may edad na, at buong laya pa silang nakakalakad at nakakapagpunta sa mga lugar na nais nilang puntahan. Parang wala na talagang katarungan o kaya isa na lamang kathang-isip, guni-guni, o teorya. 'Di hamak na mas nakakalungkot na isiping teorya o konsepto lamang ang katarungan dahil ang ibig sabihin nito ay nabigo tayo sa pagbuo ng teoryang ito at ang ating pagpapagal at pagsisikap buuin ito ay nauwi sa wala. Ang ating mga pawis, hininga, lakas, at luha ay inaksaya natin para sa wala. 

Bakit nga ba tila mahahaba ang buhay ng mga taong masasabi nating maiitim ang loobin? Ipinapaliwanag sa mga Pagbasa, lalung-lalo na sa Ebanghelyo, ang dahilan kung bakit. Ang Diyos ay hindi nawawalan ng pag-asa para sa lahat ng tao. Gaano mang kasama ang isang tao, may pag-asa pa rin siyang magbalik-loob sa Diyos at tahakin ang landas ng kabutihan at kabanalan habang nabubuhay at naglalakbay dito sa mundong ito. Patuloy na nagbibigay ng mga pagkakataon sa bawat tao ang Diyos upang magbagong-buhay at magbalik-loob sa Kanya habang nabubuhay pa tayo sa daigdig na ito.

Kung susundin ang ating lohika bilang tao, na isinasalamin ng mga alipin ng puno ng sambahayan sa talinghagang isinalaysay ng Poong Jesus Nazareno sa Ebanghelyo para sa Linggong ito, wala tayo sa mundong ito. Walang taong mamumuhay dito sa mundong ito kung ang lohikang ito ay masusunod. Tandaan, biyaya, pag-ibig, awa, habag, at kagandahang-loob ng Diyos ay ang dahilan kung bakit namumuhay tayo sa daigdig na ito, kahit pansamantala lamang ito. Gaya nga ng sabi ng Panginoong Jesus Nazareno sa isa sa Kanyang mga pangaral sa mga tao: "Pinasisikat ng Diyos Ama ang araw sa mga masasama at mabubuti, at pinapatak Niya ang ulan sa mga banal at mga makasalanan" (Mateo 5, 45). Iyan ang Panginoong Diyos. Dahil sa Kanyang pag-ibig, biyaya, awa, habag, at kagandahang-loob, patuloy Niya tayong pinagkakalooban ng pagkakataong magbagong-buhay, magbalik-loob sa Kanya, at maging mabuti at banal. Isinasalamin ito ng mga salita ng puno ng sambahayan sa talinghaga ng Poong Jesus Nazareno sa Ebanghelyo para sa Linggong ito: "Huwag . . . Baka mabunot pati trigo. Hayaan na'ng lumago kapwa hanggang anihan" (Mateo 13, 29-30). 

Nakasentro sa biyaya, pag-ibig, awa, habag, at kagandahang-loob ng Diyos ang mga salitang inilahad sa Unang Pagbasa para sa Linggong ito. Dahil sa biyaya, pag-ibig, awa, habag, at kagandahang-loob ng Diyos, pinagkakalooban Niya ng pagkakataong makapagsisi at magbalik-loob sa Kanya ang Kanyang bayan (Karunungan 12, 19). Ito rin ang pinatotohanan ng mang-aawit sa Salmong Tugunan nang kanyang ipahayag: "Poon, Ikaw ay mabuti sa lahat ng nagsisisi" (Salmo 85, 5a). Sa Ikalawang Pagbasa, inihayag ni Apostol San Pablo na lagi tayong tinutulungan ng Espiritu Santo, lalung-lalo na sa mga sandali ng kahinaan. Ang dakilang biyaya, pag-ibig, awa, habag, at kagandahang-loob ng Diyos ay buong linaw na inilarawan sa talinghagang inilahad ni Jesus Nazareno sa Ebanghelyo para sa Linggong ito. 

Dahil sa biyaya, pag-ibig, awa, habag, at kagandahang-loob ng Diyos, patuloy Niya tayong pinagkakalooban ng pagkakataong maging mabuti, banal, at kalugud-lugod sa Kanyang paningin. Hindi Siya magsasawang gawin ito habang ang bawat isa sa atin ay patuloy na namumuhay at naglalakbay nang pansamantala dito sa mundong ito. Ito ay dahil hindi Siya nawawalan ng pag-asa para sa atin. 

KINASASABIKAN BA NATIN SIYA?

22 Hulyo 2023 

Kapistahan ni Santa Maria Magdalena 

Awit ni Solomon 3, 1-4a (o kaya: 2 Corinto 5, 14-17)/Salmo 62/Juan 20, 1-2. 11-18 

This faithful photographic reproduction of the painting (c. Between 1605 and 1610) Penitent Magdalen by El Greco (1541–1614), as well as the actual work of art itself from a Private Collection via Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Nakasentro sa tema ng pananabik ang pagdiriwang ng Simbahan para sa araw na ito, ang araw na inilaan ng Simbahan para sa Kapistahan ni Santa Maria Magdalena. Sa pamamagitan nito, tayong lahat ay inaanyayahan ng Simbahan na suriin natin nang mabuti ang ating mga sarili at tanungin ang ating mga sarili kung sino o ano nga ba talaga ang ating kinasasabikan. Bilang tao, bahagi ng ating buhay ang pananabik para sa isang bagay o isang tao. Handa tayong maghintay o kumilos makamit lamang ang kinasasabikan natin sa buhay. 

Pananabik ang tema ng mga salita sa Unang Pagbasa mula sa Awit ni Solomon. Ang dalawang nag-iibigan ay nagpapahayag ng kanilang pananabik para sa isa't isa. Sabik na sabik sila para sa isa't isa. Hindi sapat para sa kanila na magkita o magtitigan na lamang sila. Bagkus, nais nilang makapiling ang isa't isa. Ang isa'y naghintay para sa pagdating ng iniirog habang ang isa naman ay nagtungo sa kinaroroonan ng kanyang minamahal. Ipinasiya ng isa na hintayin ang pagdating ng minamahal habang ang isa naman ay nagpasiyang magtungo sa kinaroroonan ng kanyang minamahal. Iyan ang pananabik ng dalawang nag-iibigan. Sa alternatibong Unang Pagbasa, isinentro ni Apostol San Pablo ang kanyang pangaral sa pananabik ng Diyos para sa ating lahat sa kabila ng ating pagiging mga makasalanan. Ang bawat isa sa atin ay tunay ngang kinasasabikan ng Diyos at patuloy pa rin Siyang nananabik para sa atin. Katunayan, ito ang dahilan kung bakit Niya tayo iniligtas sa pamamagitan ng Banal na Krus at Muling Pagkabuhay ng Mahal na Poong Jesus Nazareno. Ang Diyos ay nasasabik na tayong lahat ay iligtas at gawin tayong Kanyang mga anak at lingkod. 

Sa Salmong Tugunan, malakas na inihayag ng tampok na mag-aawit ang kanyang pananabik para sa Diyos. Ang Panginoong Diyos ang tangi niyang kinasasabikan sa lahat. Sa Ebanghelyo, lumuluhang inihayag na Santa Maria Magdalena ang kanyang taos-pusong pananabik para sa Panginoon, ang Nuestro Padre Jesus Nazareno, na akala niyang patay pa. Inakala niyang hindi na ginalang si Kristo sa pamamagitan ng pagnanakaw sa Kanyang bangkay sapagkat nawawala ang Kanyang bangkay. Subalit, nagbago ang lahat noong nagpakita't ipinakilala ng Muling Nabuhay na Panginoong Jesus Nazareno ang Kanyang sarili kay Santa Maria Magdalena. Napawi ang lahat ng mga luha ni Santa Maria Magdalena at ang kanyang mga hapis, dalamhati, at luha ay tuluyan nang pinalitan ng kagalakan at tuwa sapagkat tunay ngang nabuhay na mag-uli si Jesus Nazareno. 

Ang Poong Jesus Nazareno mismo ay ang patunay na tayong lahat ay pinananabikan ng Diyos. Nananabik ang Panginoong Diyos para sa ating pagpanig at ang panahong makakapiling natin Siya sa maluwalhati Niyang kaharian sa langit magpakailanman. Kaya, habang patuloy tayong namumuhay at naglalakbay dito sa mundo, lagi tayong binibigyan ng pagkakataon ng Panginoong Diyos na pagsisihan at talikdan ang ating mga kasalanan, magbalik-loob sa Kanya, at magsikap na mamuhay nang banal at kalugud-lugod sa Kanyang paningin bilang patunay ng ating taos-pusong pagpanig sa Kanya nang buong katapatan. Kung ang Panginoong Diyos ay nananabik para sa atin, nananabik rin ba tayo para sa Diyos? Siya ba ang ating kinasasabikan?

ANG DAHILAN KUNG BAKIT MAY SIMBAHAN

21 Hulyo 2023 

Biyernes ng Ika-15 Linggo sa Karaniwang Panahon (I) 

Exodo 11, 10-12. 14/Salmo 115/Mateo 12, 1-8 

SCREENSHOT: QUIAPO CHURCH OFFICIAL - 6PM #OnlineMass - 02 July 2023 13th Sunday in Ordinary Time (Facebook Live and YouTube)

Bilang mga Katoliko, tiyak na maraming ulit na nating tinalakay at pinagnilayan ang temang nais pagtuunan ng pansin ng Simbahan sa araw na ito ng Biyernes. Ang mga Pagbasa para sa araw na ito ng Biyernes, ang araw na inilaan para sa taimtim na debosyon at pamamanata sa Panginoon sa ilalim ng Kanyang titulong Nuestro Padre Jesus Nazareno, ay muling nakasentro sa Kanyang biyaya, pag-ibig, awa, habag, at kagandahang-loob. Oo, maraming ulit na natin itong naririnig at maraming ulit na rin nating pinagnilayan ang paksang ito. Subalit, dahil itinatampok ang banal na imahen o larawan ni Kristo na nagpasan ng Banal na Krus, nararapat lamang na ituon muli ang ating mga isipan at puso sa katotohanang ito. 

Sa Unang Pagbasa, inilahad ang mga utos ng Panginoong Diyos kina Moises at Aaron tungkol sa pagdiriwang ng Paskuwa. Ipinagdiriwang ang Paskuwa upang gunitain ang pasiya ng Diyos na iligtas ang bayang Israel mula sa pagkaalipin sa Ehipto. Kahit maaari na lamang pabayaan ng Panginoong Diyos na manatiling mga alipin ng mga Ehipsiyo ang mga Israelita magpakailanman, ipinasiya pa rin Niya silang iligtas at palayain dahil sa Kaniyang pag-ibig, awa, habag, at kagandahang-loob. Dahil sa pag-ibig, awa, habag, at kagandahang-loob ng Panginoon na tunay nga namang dakila't walang kapantay, ang mga biyaya ng kaligtasan at kalayaan ay ipinagkaloob Niya sa mga Israelita. Ito rin ang inilarawan sa Salmong Tugunan. Ang Panginoong Diyos ay tunay ngang mahabagin at mapagpala. Isinasalamin ng mga biyaya ng Panginoong Diyos ang Kanyang pag-ibig, awa, habag, at kagandahang-loob.

Ang pahayag ng Mahal na Poong Jesus Nazareno sa Ebanghelyo ay isang pahayag ng pag-ibig, awa, habag, at kagandahang-loob ng Diyos. Katunayan, ang Nuestro Padre Jesus Nazareno mismo ay ang pinakadakilang biyayang ipinagkaloob ng Diyos. Ito ay dahil sa pamamagitan mismo ng Panginoong Jesus Nazareno, ang sangkatauhan ay iniligtas ng Diyos. Hindi ito nangangahulugang si Jesus Nazareno ay kumukunsinti sa lantarang paglabag sa mga utos. Bagkus, ipinapakita ng Panginoong Jesus Nazareno sa pamamagitan ng pahayag na ito na batid Niya ang pangangailangan ng lahat ng mga tao. Dahil dito, pinahintulutan Niya ang mga alagad na mangitil ng mga uhay at kainin ang mga butil nito. Kung tutuusin, araw-araw nga itong ginagawa ng Poon sa tuwing ipinagdiriwang ang Sakramento ng Banal na Eukaristiya o Misa. Ang Kabanal-banalang Katawan at Dugo ay Kaniyang ibinibigay sa atin sa Banal na Misa bilang espirituwal na pagkain at inumin ng lahat. 

Maraming ulit na nating pinagnilayan bilang mga Katoliko ang biyaya, pag-ibig, awa, habag, at kagandahang-loob ng Panginoong Diyos. Subalit, ang katotohanang ito ay ipinapaalala sa atin muli ng Simbahan sapagkat ito ang dahilan kung bakit iniligtas ng Diyos sa pamamagitan ni Kristo, ang Nuestro Padre Jesus Nazareno. Tayong lahat ay iniligtas ng Banal na Krus at Muling Pagkabuhay ng Poong Jesus Nazareno dahil ang Diyos ay mapagpala, mapagmahal, at mahabagin. 

SAPAGKAT SIYA LAMANG ANG TUNAY NA DIYOS

16 Hulyo 2023 

Ika-15 Linggo sa Karaniwang Panahon (A) 

Isaias 55, 10-11/Salmo 64/Roma 8, 18-23/Mateo 13, 1-23 (o kaya: 13, 1-9) 

This faithful photographic representation of the painting The Apparition of Our Lady of Mount Carmel to Saint Simon Stock (c. 17th century), as well as the actual work of art itself, which is the painted altarpiece itself in the Parish Church of Santa Maria do Bispo, Montemor-o-Novo, Portugal, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Kapag ang ika-16 ng Hulyo ay hindi tumapat sa isang araw ng Linggo, ginugunita ng buong Simbahan ang Mahal na Inang si Mariang Birhen sa ilalim ng isa sa kanyang mga titulo, ang titulo ng Birhen ng Bundok del Carmen, maliban na lamang sa mga Simbahan gaya ng mga Parokya, Dambana, o Kapilya na si Maria sa ilalim ng titulong ito ay ang Titular na Pintakasi. Tiyak na mapapatanong ang ilan kung saan galing ang Bundok del Carmen at ano ang ugnayan ng bundok na ito sa Mahal na Ina. Ang titulong ito ng Mahal na Inang si Mariang Birhen ay isang napakagandang paalala ng dakilang tagumpay ng Panginoong Diyos laban sa diyus-diyusang si Baal sa Bundok ng Carmelo. Sa nasabing paligsahan, nagpaulan ng apoy mula sa maluwalhati Niyang kaharian sa langit ang Diyos bilang tugon sa mga panalangin ni Elias na Kaniyang propetang hirang. Pinatunayan ng Panginoong Diyos sa pamamagitan ng kahanga-hangang gawang ito na tanging Siya lamang ang tunay na Diyos at wala nang iba. Walang makakahigit o makakapantay man lamang sa tunay na Diyos na walang iba kundi ang Panginoong Diyos. Siya lamang ang tunay at nag-iisang Diyos. 

"Ganyan din ang Aking mga salita, magaganap nito ang lahat Kong nasa" (Isaias 55, 11). Sa mga salitang ito ng Panginoong Diyos na inilahad ni Propeta Isaias sa Unang Pagbasa nakasentro ang pagninilay ng Simbahan sa Linggong ito. Ang mga salitang ito ng Panginoong Diyos na inilahad ni Propeta Isaias sa bayang Israel, ang bayang hinirang ng Diyos, sa Unang Pagbasa para sa Linggong ito ay ang patunay na tanging Siya lamang ay ang tunay na Diyos. Dahil ang Panginoon ay ang tunay na Diyos, ang anumang Kanyang naisin at loobin ay Kanyang mapangyayari. Walang ibang diyos o bathala, maliban lamang sa Panginoon. 

Ang Diyos ay inilarawan sa Salmong Tugunan at sa talinghagang isinalaysay ni Kristo sa Ebanghelyo para sa Linggong ito bilang isang manghahasik. Bilang manghahasik, mga bagay na mabubuti at banal ang inihahasik Niya. Katunayan, ang Kaniyang mga inihahasik ay ang Kanyang biyaya, pag-ibig, awa, habag, at kagandahang-loob. Isa lamang ang dahilan kung bakit Niya itong ipinasiyang gawin - ito ang gusto Niyang gawin. Katunayan, ito rin ang dahilan kung bakit ang Panginoong Jesus Nazareno ay dumating sa mundong ito upang iligtas ang sangkatauhan mula sa kasalanan at kamatayan sa pamamagitan ng Kanyang Banal na Krus at Muling Pagkabuhay. Dahil ninais ng Diyos na gawin iyon, nangyari iyon. 

Nakasenro rin sa kalooban ng Diyos ang pangaral ni Apostol San Pablo sa Ikalawang Pagbasa para sa Linggong ito. Isang maikling buod ng iba't ibang mga pag-uusig, hirap, at sakit na hinarap at tiniis ng mga sinaunang Kristiyano, kabilang na rito ang apostol at misyonero sa mga Hentil na si Apostol San Pablo, ang kanyang inilarawan upang ipaliwanag ang kalooban ng Diyos. Nais ng Diyos na bigyan ng pag-asa ang lahat at dakilain ang lahat ng Kanyang mga anak. Inaanyayahan tayo ng Panginoong Diyos na maging bahagi ng Kanyang pamilya. Nais ng Diyos na ampunin tayo bilang Kanyang mga anak. Tinatanggap natin ang paanyayang ito ng Panginoong Diyos para sa atin sa pamamagitan ng ating pang-araw-araw na pagsisikap na mamuhay nang banal at kalugud-lugod sa Kanyang paningin. Iyon ang pahayag at patunay ng ating taos-pusong katapatan sa Kanya.

Dahil ang Panginoong Diyos lamang ay ang tunay na Diyos, nagagawa Niya ang lahat ng anumang naisin at loobin Niya. Marami Siyang mga kahanga-hangang bagay na ginawa bilang patunay na Siya mismo ang tunay na Diyos. Nais rin ng Diyos na gawin tayong mga instrumento at daluyan ng Kanyang biyaya, pagmamahal, awa, habag, at kagandahang-loob. Dapat lamang nating ibigay ang ating taos-pusong pananalig at pahintulot sa Kanya upang ang Kanyang kalooban at naisin para sa ating lahat ay maisagawa Niya.