HINDI NIYA KINAILANGANG GAWIN IYON

4 Pebrero 2024

Ikalimang Linggo sa Karaniwang Panahon [B] 

Job 7, 1-4. 6-7/Salmo 146/1 Corinto 9, 16-19. 22-23/Marcos 1, 29-39 

SCREENSHOT: Quiapo Church Livestream (Facebook Live and YouTube)

"Ginagawa ko ang lahat ng ito alang-alang sa Mabuting Balita, upang makabahagi ako sa mga pagpapala nito" (1 Corinto 9, 23). Sa mga salitang ito na buong pananalig na binigkas ni Apostol San Pablo sa wakas ng Ikalawang Pagbasa nakasentro ang mga Pagbasa para sa Linggong ito. Gaya ng kaniyang binigkas sa Ikalawang Pagbasa: "Sa aba ko, kung hindi ko ipangaral ang Mabuting Balita!" (1 Corinto 9, 16). Iyon ang prinsipyong pinaninindigan ni Apostol San Pablo at ng buong Simbahan. Alang-alang kay Kristo at sa Mabuting Balita, ang mga apostol gaya ni Apostol San Pablo at ang buong Simbahan ay laging handang gawin ang lahat upang ipalaganap ang Banal na Ebanghelyo (Mabuting Balita) at ipakilala si Kristo. Sa pamamagitan nito, inihayag ni Apostol San Pablo, mga kapwa niyang apostol, at ng buong Simbahan ang kanilang taos-pusong katapatan sa Poong Jesus Nazareno. 

Inilarawan ni Job sa Unang Pagbasa ang hirap ng buhay ng bawat tao. Hindi sa lahat ng pagkakataon ay makulay at maganda ang buhay. Mayroong mga sandali sa buhay kung kailan ang bawat tao ay nakakaranas ng iba't ibang mga tiisin sa buhay. Ito ay bahagi ng buhay ng bawat tao. Hindi natin matatakasan ang katotohanang ito, kahit ano pa'ng gawin natin. Bahagi ng buhay ng bawat tao ang mga hirap, sakit, lungkot, dalamhati, pagsubok, hapis, at pagdurusa. Kahit ano pa'ng gawin nating pag-iiwas sa mga ito, mayroon pa rin tayong haharaping pagsubok. Sa totoo lamang, baka nga tayong lahat ay mayroong pinagdadaanan sa kasalukuyan. Oo, umiiwas tayo, subalit hindi tayo ligtas mula sa mga tukso, pagsubok, hirap, sakit, lungkot, at dalamhati. 

Ang salaysay sa Ebanghelyo para sa Linggong ito ay nakatuon sa mga pagpapagaling na isinagawa ng Poong Jesus Nazareno. Sa unang bahagi ng salaysay sa Ebanghelyo, pinagaling ng Poong Jesus Nazareno ang biyenan ni Apostol San Pedro. Matapos ito, ipinagpatuloy ng Panginoong Jesus Nazareno ang pagpapagaling sa iba't ibang mga tao, anuman ang kanilang karamdaman at sakit, gaya na lamang ng mga sinasapian ng mga masasamang espiritu. Hindi na inisa-isa ni San Marcos ang lahat ng mga karamdaman at sakit na pinagaling ng Panginoong Jesus Nazareno. Sa pamamagitan nito, tinupad ng Mahal na Poong Jesus Nazareno ang mga salita ng tampok na mang-aawit na inilahad sa Salmong Tugunan para sa Linggong ito: "Panginoon ay purihin, Siya ay nagpapagaling" (Salmo 146, 3a). Anuman ang sakit at karamdaman ng bawat tao sa Ebanghelyo, pinagaling ito ng Mahal na Poong Jesus Nazareno. 

Marahil maitatanong natin kung ano naman ang ugnayan ng mga pagpapagaling na isinagawa ng Mahal na Poong Jesus Nazareno sa Ebanghelyo sa lahat ng mga hirap, sakit, tiisin, at pagsubok sa buhay. Subalit, huwag nating kakalimutang naging tao rin ang Mahal na Poong Jesus Nazareno. Ang Kaniyang mga isinagawang pagpapagaling na inilahad sa Ebanghelyo ay hindi lamang isang pagpapamalas ng kapangyarihang taglay Niya bilang tunay na Diyos. Bagkus, ito ay pagpapakita ng Kaniyang pag-ibig, habag, at awa. Huwag rin nating kakalimutan na kahit na Siya'y Diyos, bilang tao, si Jesus Nazareno ay hindi naging ligtas mula sa iba't ibang mga sakit, hirap, at tiisin sa buhay dito sa mundong ito. Kahit batid ito ni Jesus Nazareno, ipinasiya pa rin Niyang  ipakita at ibahagi sa lahat ang Kaniyang pag-ibig, habag, at awa. Hindi Siya umiwas mula sa mga tao dahil sa kanilang mga sakit at karamdaman. Bagkus, ibinahagi Niya ito sa lahat. Hindi Niya ito ipinagdamot. Isa lamang ang dahilan nito - ang Kaniyang pag-ibig para sa lahat na tunay ngang dakila. 

Kung ang Mahal na Poong Jesus Nazareno ay naging handang tiisin ang lahat ng mga hirap, sakit, tiisin, pagsubok, hapis, dalamhati, tukso, at pagdurusa sa buhay alang-alang sa atin, handa rin ba tayong maging tapat sa Kaniya, anuman ang mga tiisin sa buhay na haharapin natin? Tandaan, hindi kinailangang gawin iyon ng Nuestro Padre Jesus Nazareno alang-alang sa atin, subalit ipinasiya pa rin Niyang gawin iyon dahil tunay Niya tayong iniibig. Dahil dito, tayo naman ang tinatanong sa Linggong ito. Ang bawat isa sa atin ay handa bang maging tapat sa Poong Jesus Nazareno sa hirap at ginhawa? Mananatili ba tayong tapat sa Kaniya? 

TUNAY NA HARI AT TUNAY NA LIWANAG

2 Pebrero 2024 

Kapistahan ng Pagdadala kay Jesus Nazareno na Panginoon sa Templo 

Malakias 3, 1-4/Salmo 23/Hebreo 2, 14-18/Lucas 2, 22-40 (o kaya: 2, 22-32) 

This faithful reproduction of the painting (c. 1530) Presentation of Jesus at the Temple by Gregório Lopes (1490–1550), Patriarchate of Lisbon, as well as the actual work of art itself from the Bens Culturais da Igreja, is in the Public Domain ("No Copyright") in its country of origin as well as in other countries and areas, including the United States of America, where the copyright term is the author's life plus 100 years or fewer due to its age. 

"D'yos na makapangyariha'y dakilang hari kailanman" (Salmo 23, 10b). Napakalinaw kung ano ang nais isalungguhit sa mga salitang ito mula sa Salmong Tugunan para sa araw na ito. Buong linaw na isinasalungguhit at binibigyan ng diin ng mga salitang ito na binigkas ng tampok na mang-aawit sa Salmong Tugunan na ang tunay na Hari ay walang iba kundi ang Panginoong Diyos. Subalit, sa araw na ito, ang Diyos ay hindi lamang ipinapakilala sa ating lahat bilang tunay at walang hanggang Hari. Bukod sa pagiging tunay at walang hanggang Hari, ang Diyos rin ay ang tunay na liwanag. May malalim na ugnayan ang dalawang katangiang ito ng Diyos. 

Ang Kapistahang ipinagdiriwang ng Simbahan sa araw na ito ay nakasentro sa isang katangian ng Diyos bilang tunay na liwanag. Hindi lamang sa Kaniya nagmumula ang tunay na liwanag. Bagkus, Siya mismo ay ang tunay na liwanag. Kapag pumanig tayo sa Kaniya nang taos-puso at nang buong katapatan, namumuhay tayo sa ilalim ng Kaniyang liwanag. Pinapawi ng Diyos ang lahat ng uri ng kadiliman. Wala na tayong dapat ikatakot dahil ang Diyos mismo ay ang ating kaliwanagan. 

Hindi magkahiwalay ang pagiging tunay at walang hanggang Hari ng Panginoon at ang Kaniyang pagiging tunay na liwanag. Bagkus, magkaugnay ito. Mayroong isang malalim na ugnayan ang pagkahari at ang pagiging tunay na liwanag ng Panginoong Diyos. Ang ugnayang ito ang siyang pinagtutuunan ng pansin at pinagninilayan nang buong kataimtiman ng Simbahan sa Kapistahang ipinagdiriwang sa araw na ito na siya namang pinagtutuunan ng pansin sa mga Pagbasa. 

Sa Unang Pagbasa, inilahad ni Propeta Malakias ang pangako ng Panginoong Diyos para sa Kaniyang bayan. Ang Panginoong Diyos ay darating bilang tunay na liwanag upang pawiin ang dilim. Papawiin ng tunay na kaliwanagan na walang iba kundi ang Diyos ang lahat ng uri ng kadiliman, lalung-lalo na ang kadiliman sa puso, isipan, at kaluluwa ng Kaniyang bayan. Ito ang ibig sabihin nang ihalintulad sa pagdalisay ng apoy sa bakal ang Kaniyang pagdating (Malakias 3, 2). Sa Ikalawang Pagbasa, buong linaw na inilarawan ng manunulat ng sulat sa mga Hebreo ang tanging dahilan kung bakit ito ipinasiya gawin ng Diyos. Nais ng Panginoong Diyos na palayain tayong lahat mula sa kasalanan (Hebreo 2, 15). Kaya, ipinasiya Niya itong gawin sa pamamagitan ng Poong Jesus Nazareno, ang ipinangakong Mesiyas at Manunubos. Sa Ebanghelyo, isinalaysay ang pagdadala ng Mahal na Inang si Mariang Birhen at ni San Jose kay Jesus Nazareno, ang Banal na Sanggol, sa Templo upang ihandog sa Diyos. Habang naroon sila sa Templo, kinalong Siya ni Simeon at kinilala bilang tunay na liwanag na maghahatid ng kaligtasan sa lahat, gaya ng kaniyang inilarawan sa kaniyang awit-papuri (Lucas 2, 32). 

Tayong lahat ay tunay na mapalad sapagkat ang tunay na liwanag ay ang tunay at walang hanggang Hari. Siya'y walang iba kundi ang Poong Jesus Nazareno. 

IPAKILALA SIYA SA LAHAT

1 Pebrero 2024 

Ika-36 na Anibersaryo ng Pagpasinaya at Pagtatalaga sa Simbahan ng Quiapo (Parokya ni San Juan Bautista) bilang Basilika Menor ng Nazareno  

Huwebes ng Ikaapat na Linggo sa Karaniwang Panahon (II)

1 Hari 2, 1-4. 10-12/1 Mga Cronica 29/Marcos 6, 7-13 

"D'yos na Makapangyarihan, Panginoon Ka ng tanan" (1 Mga Cronica 29, 12b). Sa mga salitang ito mula sa Salmong Tugunan para sa araw na ito nakasentro ang mga Pagbasa para sa araw na ito, lalung-lalo na ang Ebanghelyo para sa araw na ito. Ang temang ito na nais pagtuunan ng pansin sa mga Pagbasa para sa araw na ito ay napapanahon dahil ang araw na ito ay inilaan para sa Ika-36 na Anibersaryo ng Pagpasinaya at Pagtatalaga sa Simbahan ng Quiapo (Parokya ni San Juan Bautista) bilang Basilika Menor ng Poong Jesus Nazareno. Katunayan, ang makasaysayang Simbahang ito ay binigyan ng isa pang titulo, bukod sa mga titulong Basilika Menor ni Jesus Nazareno at Parokya ni San Juan Bautista. Ang titulong Pambansang Dambana ni Jesus Nazareno ay iginawad na rin sa makasaysayang Simbahang ito. Dahil dito, ang Simbahan ng Quiapo ay kilala bilang isang basilika, dambana, at parokya - Basilika Menor at Pambansang Dambana ni Jesus Nazareno at Parokya ni San Juan Bautista. 

Ano nga ba ang layunin ng mga titulong ito ng makasaysayang Simbahan ng Quiapo? Isa lamang ang layunin ng mga titulong ito - ipakilala sa lahat ang Mahal na Poong Jesus Nazareno. Katunayan, ang mga titulong ito ay mga paalala para sa lahat kung bakit ang makasaysayang Simbahan ng Quiapo ay itinayo, itinatag, at itinalaga - upang ang Poong Jesus Nazareno ay makatagpo natin sa banal na lugar na ito. Banal ang lugar na ito dahil sa tunay na presensya ng Poong Jesus Nazareno sa Banal na Sakramento. Ito ang bukod tanging dahilan kung bakit banal ang lugar na ito at wala nang iba. Dahil sa tunay na presensya ni Jesus Nazareno, banal ang lugar na ito. 

Subalit, tayong lahat ay pinaalalahanan na mayroon rin tayong tungkulin. Ipinapaalala sa atin ng mga Pagbasa para sa araw na ito na mayroon tayong misyon bilang Simbahan. Hindi lamang mga gusali Simbahan. Bagkus, tayong mga Katoliko ang siyang bumubuo sa tunay na Simbahan. Ang mga gusaling itinalaga bilang mga bahay-dalanginan gaya na lamang ng makasaysayang Simbahan ng Quiapo ay mga sagisag at paalala ng ating misyon bilang Simbahan. Mayroon tayong misyon na ipakilala sa lahat ang Poong Jesus Nazareno. Katulad nina Haring David at Haring Solomon sa Unang Pagbasa at ng mga apostol sa Ebanghelyo, mayroon tayong misyon bilang Simbahan na ipakilala ang Poong Jesus Nazareno sa pamamagitan ng ating mga salita at gawa. 

Bilang mga Katolikong deboto ng Mahal na Poong Jesus Nazareno na bumubuo sa tunay at nag-iisang Simbahang Siya mismo ang nagtatag, tayong lahat ay mayroong isang misyon na kailangan nating tuparin sa bawat sandali ng ating buhay. Ang misyong ito ay tunay ngang napakahalaga sapagkat ito ang magpapatunay ng ating katapatan sa ating debosyon at pamamanata sa Mahal na Poong Jesus Nazareno. Ipakilala Siya sa lahat. 

PATUNAY NG DEBOSYON AT PAMAMANATA

28 Enero 2024 

Ikaapat na Linggo sa Karaniwang Panahon [B] 

Deuteronomio 18, 15-20/Salmo 94/1 Corinto 7, 32-35/Marcos 1, 21-28 

This image from Sweet Publishing via FreeBibleimages is made available under a Creative Commons Attribution-ShareAlike 3.0 Unported license (CC BY-SA 3.0).

Ang mga Pagbasa para sa Linggong ito ay nakasentro sa isang napakahalagang aral para sa atin, lalung-lalo na yaong mga tapat na nagdedebosyon sa namamanata sa Mahal na Poong Jesus Nazareno. Sa tulong ng mga Pagbasa, itinuturo ng Simbahan kung paano nga ba maging mga tunay na deboto ng Mahal na Poong Jesus Nazareno. Hindi lamang sa pamamagitan ng pagsisimba sa Simbahan ng Quiapo tuwing araw ng Biyernes o kaya naman tuwing ikasiyam na araw ng Enero at pakikilahok sa iba't ibang mga prusisyon, lalung-lalo na sa Prusisyon ng Nazareno tuwing ikasiyam ng Enero at Biyernes Santo, natin mapapatunayan ang ating debosyon at pamamanata sa Poong Jesus Nazareno. Bagkus, mapapatunayan rin ito sa pamamagitan ng mga ginagawa natin araw-araw at ang mga salitang binibigkas natin araw-araw. Kung tutuusin, ang mga salita at gawa ang magpapatunay tunay at taos-puso ang ating debosyon at pamamanata sa Poong Jesus Nazareno. 

Sa Unang Pagbasa, inihayag ni Moises sa mga tao ang tungkulin ng mga propetang hinirang ng Panginoong Diyos at ang dapat maging tugon ng mga tao sa kanila. Ang tungkulin ng mga propetang hinirang ng Diyos ay iparating sa mga tao ang lahat ng mga mensahe ng Diyos sa Kaniyang bayan. Bilang mga bumubuo sa bayan ng Diyos, kailangang pakinggan at dinggin ng mga tao ang mga mensahe ng Panginoong Diyos na inilalahad sa kanila ng mga propetang Kaniyang hirang. Gaya ng sabi ng mang-aawit sa Salmo: "Panginoo'y inyong dinggin, huwag n'yo S'yang salungatin" (Salmo 94, 8). Hindi lamang para sa mga Israelita sa Unang Pagbasa ang mga salitang buong lakas na binigkas ni Moises sa Unang Pagbasa. Bagkus, ito rin ay para sa lahat na buong pusong sumasamba, nananalig, at sumasampalataya sa Panginoon.

Isa lamang ang nais ituro ni Apostol San Pablo sa Ikalawang Pagbasa. Ang tagubilin at aral na nais ituro ni Apostol San Pablo sa kaniyang pangaral sa Ikalawang Pagbasa para sa Linggong ito ay laging piliin ang Diyos at unahin ang Kaniyang kalooban. Hindi galit si Apostol San Pablo sa mga magkabiyak ng puso. Bagkus, tinutulungan pa nga niya ang mga magkabiyak ng puso kung paano pa rin silang maging tapat bilang mga Kristiyanong bumubuo sa Simbahan. Unahin ang kalooban ng Diyos. Para sa lahat ng mga bumubuo sa tunay na Simbahang itinatag ni Kristo ang tagubiling ito ni Apostol San Pablo sa Ikalawang Pagbasa. Dapat maging una ang Panginoong Diyos sa mga buhay natin. Katunayan, dapat natin itong piliin sa lahat ng oras. 

Tampok sa Ebanghelyo para sa Linggong ito ang pangaral ni Jesus Nazareno sa isang sinagoga at ang isinagawa Niyang pagpapalayas ng masasamang espiritu o demonyo mula sa isang lalaking sinasapian nito. Sa pamamagitan ng himalang ito, ang lalaking ito ay pinalaya ng Nuestro Padre Jesus Nazareno mula sa mga tanikala ng demonyo. Binigyan ng Panginoong Jesus Nazareno ang lalaking ito ng pagkakataong piliin Siya, ang Diyos na nagkatawang-tao upang iligtas ang lahat ng mga tao, na naghatid ng kagalingan at kalayaan sa kaniya. Ginawa Niya ito dahil sa Kaniyang awa, habag, at pag-ibig para sa lalaking ito. 

Dumating ang Mahal na Poong Jesus Nazareno upang iligtas tayo mula sa kasalanan at kamatayan. Ang ating debosyon at pamamanata sa Kaniya na nagligtas sa atin sa pamamagitan ng Kaniyang Banal na Krus at Muling Pagkabuhay ay ang ating tugon sa Kaniya. Mapapatunayan natin ito sa pamamagitan ng ating mga salita at gawa.

ANG KAHALAGAHAN NG PANANATILING TAPAT SA DIYOS

26 Enero 2024 

Paggunita kina San Timoteo at San Tito, mga obispo

2 Timoteo 1, 1-8 (o kaya: Tito 1, 1-5)/Salmo 95/Marcos 4, 26-34 

SCREENSHOT: #QuiapoChurch Official • 4AM #OnlineMass • 19 JAN 2024 • FRIDAY of the 2nd Week in Ordinary Time (Facebook and YouTube)

Dalawang obispo ng sinaunang Simbahan ay ginugunita ng Simbahan sa araw na ito ng Biyernes, ang araw na inilaan para sa taimtim na debosyon at pamamanata sa Poong Jesus Nazareno. Maraming mga sinaunang Kristiyano ay nakaranas, humarap, at nagtiis ng mga matitinding pag-uusig sa kamay ng iba't ibang mga autoridad dahil ipinasiya nilang maging bahagi ng tunay na Simbahan at manatiling tapat sa Poong Jesus Nazareno na taos-puso nilang pinanaligan at sinampalatayanan. Ang dalawang obispong ito ay dalawang tagasunod at kasama ni Apostol San Pablo na walang iba kundi sina San Timoteo at San Tito. 

Tampok sa Unang Pagbasa at sa alternatibong Unang Pagbasa ang payo, pakiusap, at bilin ni Apostol San Pablo para kina San Timoteo at San Tito. Isa lamang ang payo, pakiusap, at bilin ni Apostol San Pablo na isinalungguhit sa Unang Pagbasa at pati na rin sa alternatibong Unang Pagbasa. Manatiling tapat kay Kristo. Kahit napakahirap dahil sa iba't ibang mga tukso, pagsubok, at maging ang mga pag-uusig sa buhay sa mundong ito, bilang mga bumubuo sa tunay na Simbahang itinatag ng Panginoong Jesus Nazareno, dapat manatili tayong tapat sa Kaniya. Ang tagubilin at pakiusap na ito ay hindi lamang para kina San Timoteo at San Tito. Para rin ito sa lahat na bumubuo sa Simbahan hanggang sa kasalukuyang panahon.

Inilarawan sa Salmong Tugunan ang dahilan kung bakit napakahalaga para sa atin na manatiling tapat sa pananalig at pananampalataya sa Panginoong Diyos hanggang sa huli. Sabi ng mang-aawit sa Salmong Tugunan: "Sa lahat ay pinahayag gawa ng Poong nagligtas" (Salmo 95, 3). Ang lahat ng mga kahanga-hangang gawa ng Diyos ay ating pinatotohanan sa pamamagitan ng ating katapatan sa Diyos. Pinatutunayan natin ang ating taos-pusong pananalig at pananampalataya sa Panginoong Diyos na tunay ngang makapangyarihan at dakila sa pamamagitan ng ating katapatan. 

Sa Ebanghelyo, itinuro ng Mahal na Poong Jesus Nazareno sa pamamagitan ng dalawang talinghaga ang kahalagahan ng paglago ng pananampalataya. Kapag ang ating pananalig at pananampalataya sa Diyos ay pinahintulutan nating lumago, ang kadakilaan ng kaharian ng Diyos ay mahahayag sa pamamagitan natin. Isasalamin natin ang kadakilaan ng Diyos sa pamamagitan ng ating katapatan. 

Bakit tayo dapat manatiling tapat sa Panginoon? Ito ay dahil mahahayag natin sa pamamagitan ng ating katapatan sa Diyos ang Kaniyang kadakilaan. 

BIYAYA NG PAGBABAGONG-BUHAY

25 Enero 2024 

Kapistahan ng Pagbabagong-Buhay ni Apostol San Pablo 

Mga Gawa 22, 3-16 (o kaya: Gawa 9, 1-22)/Salmo 116/Marcos 16, 15-18 

This faithful photographic reproduction of the painting (c. Between 1651 and 1670) La Conversion de Saint Paul by Giovanni Battista Gaulli (1639–1709), as well as the actual work of art itself from the Musée des Augustins, is in the Public Domain ("No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age.

Ang Kapistahang ipinagdiriwang ng Simbahan sa araw na ito ay isang paggunita sa isang sorpresa mula sa Diyos. Isang dating masigasig na taga-usig ng Simbahan ay nagbagong-buhay. Dahil sa habag at awa ng Diyos, nagbagong-buhay ang dating taga-usig na ito ng Simbahan. Hindi na niya inilaan ang kaniyang sigasig at lakas sa pag-uusig ng mga sinaunang Kristiyano. Bagkus, inilaan na niya ito sa pagiging isang misyonero at apostol sa mga Hentil. Si Apostol San Pablo ang dating taga-usig na ito. 

Inilahad sa Unang Pagbasa kung paanong si Apostol San Pablo ay nagbagong-buhay at naging bahagi ng Simbahan. Mula sa pagiging taga-usig ng mga Kristiyano, naging bahagi ng Simbahan at isa ring apostol at misyonero si Apostol San Pablo. Ang lahat ng ito ay nangyari dahil sa habag at awa ng Panginoong Diyos. Niloob ng Panginoong Diyos na si Apostol San Pablo ay maging isang apostol at misyonero. Kahit na buong sigasig niyang inusig ang mga sinaunang Kristiyano noon, hindi ito naging dahilan na pagbawalan ng Diyos si Apostol San Pablo na maging bahagi ng Simbahan. Dahil sa habag at awa ng Diyos, ang Muling Nabuhay na si Jesus Nazareno ay nagpakita sa kaniya sa daan patungong Damasco. 

Nang magbagong-buhay si Apostol San Pablo, binuksan niya nang buong pananalig at kababaang-loob ang kaniyang sarili sa kalooban ng Diyos para sa kaniya. Buong pananalig at kababaang-loob niyang tinanggap ang misyon at tungkuling ibinigay sa kaniya ng Nuestro Padre Jesus Nazareno. Inilarawan ng Muling Nabuhay na Poong Jesus Nazareno sa mga apostol ang kanilang misyon sa Ebanghelyo. Sa mga salitang ito na binigkas ng Muling Nabuhay na Poong Jesus Nazareno sa Ebanghelyo ang mga salita sa Salmong Tugunan. Ang kanilang misyon ay ipakilala sa lahat ng mga tao ang Mahal na Poong Jesus Nazareno. Tinanggap rin ni Apostol San Pablo ang misyong ito bilang apostol at misyonero ng Mahal na Poon at ibinuhos ang buo niyang sigasig at lakas sa pagtupad nito hanggan sa huli. 

Sinong mag-aakalang isang dating taga-usig ng Simbahan ay magbabagong-buhay at magiging isa sa mga apostol at misyonerong sumasaksi kay Kristo? Wala. Subalit, nangyari pa rin iyon dahil sa habag at awa ng Poong Jesus Nazareno. Maging bukas rin nawa tayo sa biyayang ito ng Poong Jesus Nazareno, gaya ni Apostol San Pablo. 

NAGING BATA DAHIL SA KANIYANG PAG-IBIG AT KABUTIHAN

21 Enero 2024 

Kapistahan ng Panginoong Jesus Nazareno, ang Banal na Sanggol [B] 

Isaias 9, 1-6/Salmo 97/Efeso 1, 3-6. 15-18/Marcos 10, 13-16 

This faithful photographic reproduction of the painting (c. Between 1635 and 1640) The Infant Christ by Francisco de Zurbaran (1598 - 1664), as well as the actual work of art itself from the Pushkin Museum of Fine Arts, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1664. This work is in the Public Domain in the United States because it was published (or registered with the U.S. Copyright Office) before January 1, 1929.

"Kahit saa'y namamalas tagumpay ng Nagliligtas" (Salmo 97, 3k). Inilarawan ng mga salitang ito mula sa Salmong Tugunan ang tema ng Kapistahang ipinagdiriwang nang buong ringal ng Simbahan sa Pilipinas sa Linggong ito. Ang Ikatlong Linggo ng Enero ay inilaan ng Simbahan para sa taunang pagdiriwang ng Kapistahan ng Panginoong Jesus Nazareno, ang Banal na Sanggol, na mas kilala ng lahat bilang Santo Niño. Sa mga Simbahan sa Pilipinas lamang ipinagdiriwang ang Kapistahang ito taun-taon sa tuwing sasapit ang Ikatlong Linggo ng buwan ng Enero. 

Ang mga imahen ng Panginoong Jesus Nazareno sa ilalim ng titulong Santo Niño ay sumasagisag sa pagligtas ng Diyos sa tanan. Katulad ng mga imahen ng Nazareno na naglalarawan sa pagpapakasakit ni Kristo, inilalarawan ng mga imahen ng Batang si Kristo sa ilalim ng titulong Santo Niño kung paanong ang buong sangkatauhan ay iniligtas ng Diyos. Hindi Siya dumating agad taglay ang buo Niyang kapangyarihan bilang Diyos. Bagkus, ipinasiya ng Diyos na yakapin at tanggapin ang ating pagkatao, maliban sa kasalanan, nang buong kababaang-loob sa pamamagitan ng Panginoong Jesus Nazareno. Hinarap ni Jesus Nazareno nang buong kababaang-loob ang bawat yugto ng buhay ng bawat tao upang taos-puso Niyang maipahayag ang Kaniyang pagyakap, pagtanggap, at pag-ako sa buo nating pagkatao, maliban sa kasalanan, upang tayong lahat ay Kaniyang mailigtas. 

Nakasentro sa biyaya ng pagliligtas ng Diyos sa sangkatauhan na ipinagkaloob Niya sa pamamagitan ng Nuestro Padre Jesus Nazareno, ang Banal na Sanggol na tiyak na mas kilala ng maraming mga Katolikong Pilipino sa tawag na Santo Niño, ang mga Pagbasa para sa Linggong ito na inilaan ng Simbahan para sa pagdiriwang ng Pistang ito sa karangalan ng Panginoong Jesus Nazareno sa ilalim ng titulong Santo Niño. Sa Unang Pagbasa, inilarawan ang pinakadakilang biyayang ipagkakaloob ng Diyos sa lahat ng mga tao. Ang pinakadakilang biyayang kaloob ng Diyos sa lahat ng mga tao ay walang iba kundi ang sanggol na lalaki sa propesiyang inilahad sa Unang Pagbasa. Katunayan, hindi lamang ito isang propesiya kundi isang pangako mula sa Diyos. Sa pamamagitan ng propesiyang ito ng propetang Kaniyang hirang na si Propeta Isaias na inilahad at itinampok sa Unang Pagbasa, ang Panginoong Diyos ay nagbitiw ng isang pangako sa lahat ng mga tao. Hindi nakalimot ang Diyos sa pangakong ito na binitiwan Niya sa pamamagitan ni Propeta Isaias. Ang pangakong ito ay Kaniyang tinupad sa pamamagitan ng Nuestro Padre Jesus Nazareno, ang Banal na Sanggol na isinilang ng Mahal na Inang si Mariang Birhen sa isang sabsaban sa Betlehem noong gabi ng unang Pasko. 

Isang patotoo tungkol sa dahilan kung bakit ipinasiya ng Diyos na ipagkaloob sa lahat ang biyaya ng Kaniyang pagliligtas sa pamamagitan ng Poong Jesus Nazareno, ang Santo Niño, ay ibinahagi ni Apostol San Pablo sa Ikalawang Pagbasa. Sa pangaral na ito na isa ring patotoo, buong linaw na inihayag ni Apostol San Pablo ang tanging dahilan kung bakit ipinasiya ng Diyos na iligtas ang sangkatauhan sa pamamagitan ng Kaniyang Bugtong na Anak na si Jesus Nazareno. Ang pag-ibig ng Diyos ay ang bukod-tanging dahilan kung bakit ipinasiya Niyang ipagkaloob sa atin ang buo Niyang sarili upang tayong lahat ay Kaniyang mailigtas sa pamamagitan ni Jesus Nazareno. Katunayan, isa itong pahiwatig ng Kaniyang kalooban at naisin para sa atin. Dahil sa pag-ibig ng Diyos, niloob Niyang italaga tayong lahat bilang Kaniyang mga anak na tunay nga Niyang iniibig at kinakalinga sa pamamagitan rin ni Jesus Nazareno (Efeso 1, 5). Upang mangyari ito, niyakap, tinanggap, inako, at hinarap ng Diyos ang bawat yugto ng buhay ng bawat tao sa mundong ito nang hindi nagkakasala kailanman sa pamamagitan ng Kaniyang Bugtong na Anak na si Kristo. 

Sa Ebanghelyo, pinagsabihan ng Poong Jesus Nazareno ang mga apostol sapagkat buong higpit nilang pinagbawalan ang mga bata na lumapit sa Kaniya. Inihayag rin ng Mahal na Poong Jesus Nazareno sa pamamagitan ng mga salitang ito na bukas sa lahat ang Diyos. Ang Diyos ay hindi ekslusibo sa isang grupo ng mga tao, sa isang lipi, wika, bayan, at bansa. Bagkus, ang Diyos ay para sa lahat, anumang lahi, lipi, bayan, o bansang kinabibilangan, bata man o matanda. Laging ibinabahagi at ibinubuhos ng Diyos sa lahat ng mga tao ang Kaniyang biyaya. Hindi ipagkakait ng Diyos mula sa sinuman ang Kaniyang biyaya dahil sa lahi, lipi, bayan, bansa, o grupong kaniyang kinabibilangan. Patunay lamang ito na ang Diyos ay Diyos ng lahat. 

Tunay nga tayong mapalad sapagkat ang Panginoong Diyos ay tunay ngang mabuti at mapagmahal sa ating lahat, kahit na hindi tayo karapat-dapat dahil sa ating mga kasalanang hindi na mabilang. Ang patunay nito ay walang iba kundi ang Banal na Sanggol na si Jesus Nazareno, ang Santo Niño. 

IBAHAGI ANG KANIYANG HABAG AT AWA

19 Enero 2024 

Biyernes ng Ikalawang Linggo sa Karaniwang Panahon (II) 

1 Samuel 24, 3-21/Salmo 56/Marcos 3, 13-19 

SCREENSHOT: #QuiapoChurch Official • 7PM #OnlineMass • 12 January 2024 • FRIDAY #QuiapoDay (Facebook and YouTube)

"Poon, kami'y kaawaan at lagi Mong kahabagan" (Salmo 56, 2a). Inilarawan sa mga salitang ito mula sa tampok na mang-aawit sa Salmong Tugunan ang temang nais bigyan ng pansin at pagnilayan ng Simbahan sa araw na ito ng Biyernes, ang araw na inilaan para sa taimtim na debosyon at pamamanata sa Poong Jesus Nazareno, sa tulong ng mga Pagbasa para sa araw na ito. Sa habag at awa ng Diyos nakasentro ang mga Pagbasa para sa araw na ito. Muli tayong pinaalalahanan ng Simbahan na mapalad tayong lahat dahil ang Diyos ay tunay ngang maawain at mahabagin. 

Ang mga Pagbasa para sa araw na ito ng Biyernes ay nakasentro sa habag at awa. Sa pamamagitan nito, ipinapaalala sa atin ng Simbahan na mayroon tayong misyon at tungkulin bilang mga Kristiyano. Bilang mga Kristiyano, tungkulin nating ipakilala ang Diyos bilang Panginoon at Haring maawain at mahabagin. Ito ang dahilan kung bakit muling ipinapaalala sa atin ng Simbahan ang katotohanang ito. Dapat nating ibahagi sa kapwa-tao ang habag at awa ng Diyos. 

Sa Unang Pagbasa, si David ay nagpakita ng awa kay Haring Saul na walang ibang hinangad at binalak kundi ipapatay si David. Bagamat nagkaroon ng pagkakataon si David na si Haring Saul ay patayin, ipinasiya pa rin ni David na magpakita ng awa sa kaniya sa pamamagitan ng pagputol sa laylayan ng kaniyang kasuotan. Ang hangarin ni Haring Saul ay patayin si David upang hindi siya mapalitan bilang hari. Subalit, hindi iyon ang hinangad ni David. Kahit siya yaong inatasan upang maging kasunod ni Saul bilang hari ng Israel, hindi niya binalak patayin si Saul kailanman upang mapabilis ang pagluklok sa kaniya bilang hari. Sa Salmong Tugunan, ang mang-aawit ay nagpatotoo tungkol sa habag at awa ng Diyos. Ang kaniyang dalangin ay isang patotoo ng habag at awa ng Diyos. Sa Ebanghelyo, isinalaysay ang pagkahirang ng Nuestro Padre Jesus Nazareno sa labindalawang alagad, kabilang na rito si Hudas Iskariote na tatalikod at magkakanulo sa Kaniya. Ang pagkahirang ng Poong Jesus Nazareno sa labindalawa, lalung-lalo na sa magkakanulo sa Kaniya na si Hudas Iskariote, ay bunga ng Kaniyang walang hanggang habag at awa na tunay ngang dakila. 

Dahil sa habag at awa ng Diyos, dumating ang Poong Jesus Nazareno upang iligtas tayo sa pamamagitan ng Kaniyang Krus at Muling Pagkabuhay. Hindi ipinagkait sa atin ng Diyos ang Kaniyang habag at awa. Ang Mahal na Poong Jesus Nazareno nga mismo ay ang pinakadakilang larawan ng habag at awa ng Diyos para sa atin. Kaya naman, bilang mga Kristiyanong kinaawaan at kinahabagan ng Diyos, ang Kaniyang habag at awa ay dapat nating ibahagi at ipalaganap. 

SINAUNANG HANGARIN

14 Enero 2024 

Ikalawang Linggo sa Karaniwang Panahon [B] 

1 Samuel 3, 3b-10. 19/Salmo 39/1 Corinto 6, 13k-15a. 17-20/Juan 1, 35-42 

SCREENSHOT: 09 January 2024 (Tuesday) 11PM #FiestaMass #NuestroPadreJesusNazareno #QuiapoChurch #Nazareno2024 (Facebook and YouTube)

"Handa Akong naririto upang sundin ang loob Mo" (Salmo 39, 8a at 9b). Inilahad sa mga salitang ito ang temang nais pagtuunan ng pansin at pagnilayan ng Simbahan sa Linggong ito. Ang mga Pagbasa para sa Linggong ito ay nakasentro sa mga salitang ito na nakasentro sa kalooban ng Diyos. Katunayan, ito ang natatanging dahilan kung bakit dumating sa mundong ito ang Panginoong Jesus Nazareno. Nang sumapit ang takdang panahon, niloob ng Diyos na dumating sa mundong ito upang tubusin ang sangkatauhan sa pamamagitan ng Kaniyang Bugtong na Anak na si Jesus Nazareno. 

Isinalaysay sa Unang Pagbasa para sa Linggong ito ang pagkahirang ng Panginoon kay Samuel. Bagamat ang Panginoong Diyos ay hindi nakilala ng batang si Samuel sa mga unang pagkakataong tinawag siya, hindi ito naging dahilan para sa Panginoong Diyos na tawagin at hirangin ang batang ito para sa isang napakahalagang misyon at tungkulin. Kahit bata pa noon si Samuel, mayroong nakalaang misyon para sa kaniya. Buong akala ng batang si Samuel na ang saserdoteng si Eli ang tumatawag sa kaniya noong una. Subalit, sa tulong na rin ni Eli, nakilala ni Samuel ang Diyos at binuksan ang buo niyang sarili sa Diyos at sa Kaniyang kalooban. 

Sa Ebanghelyo, itinuro at ipinakilala ni San Juan Bautista ang Poong Jesus Nazareno bilang Kordero ng Diyos (Juan 1, 36). Ang misyon ng Mahal na Poong Jesus Nazareno ay inilarawan ni San Juan Bautista sa pamamagitan ng mga salitang ito. Oo, maikli, ngunit detalyado. Kahit limang salita ang ginamit ni San Juan Bautista sa talatang ito kung saan ipinakilala si Jesus Nazareno bilang Kordero ng Diyos, detalyado pa rin ang paglalarawan ni San Juan Bautista ng misyon at tungkuling ito ni Jesus Nazareno. Isa lamang ang dahilan kung bakit dumating ang Poong Jesus Nazareno sa mundong ito - maging Kordero ng Diyos. Bilang Kordero ng Diyos, buong sarili ay iaalay ng Poong Jesus Nazareno para sa ikaliligtas ng sangkatauhan. 

Dahil sa biyayang ipinagkaloob sa atin ng Diyos sa pamamagitan ni Jesus Nazareno, ang Kordero ng Diyos, ipinagkaloob rin sa atin ng Diyos ang biyayang maging bahagi ng Katawan ni Jesus Nazareno, gaya ng inilarawan ni Apostol San Pablo sa kaniyang pangaral sa Ikalawang Pagbasa. Kaya naman, ang pakiusap ni Apostol San Pablo sa Ikalawang Pagbasa para sa lahat ng mga Kristiyano ay maging banal. Ipinagkaloob sa atin ng Diyos ang biyayang maging bahagi ng Katawan ni Kristo dahil ito mismo ang Kaniyang niloob para sa atin noon pa mang una. Ang Panginoong Jesus Nazareno ay dumating sa mundong ito bilang ipinangakong Mesiyas at Manunubos ng tanan nang sa gayon ay gawin tayong bahagi ng Kaniyang Katawan dahil ito ang Kaniyang nais noon pa mang una. Gaya ng sabi sa isa sa mga awiting ginagamit ng mga koro bilang Pambungad na Awit sa Misa sa mga Linggo sa Karaniwang Panahon: "Sinauna Mong hangarin ang tao ay tubusin" (mula sa unang taludtod ng "Bayan, Magsiawit Na!"). 

Niloob ng Diyos na iligtas tayo mula sa kasalanan. Kaya, ipinasiya Niyang ipagkaloob sa atin ang Kordero ng Diyos na walang iba kundi ang Poong Jesus Nazareno bilang ipinangakong Mesiyas at Tagapagligtas. Hindi Niya hinangad at niloob kailanman na mapahamak ang sangkatauhang nalugmok sa kasalanan. Bagkus, niloob ng Diyos na tubusin sila. Dahil dito, dumating sa mundong ito ang Kordero ng Diyos na si Kristo, ang Nuestro Padre Jesus Nazareno. 

HARING MAPAGMAHAL AT MABUTI

12 Enero 2024 

Biyernes ng Unang Linggo sa Karaniwang Panahon (II) 

1 Samuel 8, 4-7. 10-22a/Salmo 88/Marcos 2, 1-12

SCREENSHOT: 08 January 2024 (Monday) 10PM #FiestaMass #NuestroPadreJesusNazareno #QuiapoChurch #Nazareno2024 (Facebook and YouTube)

"Pag-ibig Mong walang maliw ay lagi kong sasambitin" (Salmo 88, 2a). Nakasentro sa mga salitang ito mula sa Salmong Tugunan ang mga Pagbasa para sa araw na ito ng Biyernes, ang araw na inilaan ng Simbahan para sa taimtim na debosyon kay Kristo sa ilalim ng Kaniyang titulong Nuestro Padre Jesus Nazareno. Muling ipinapaalala sa atin ng Simbahan sa araw na ito na isinasalamin ng mga dakilang gawa ng Diyos na tunay nga namang kahanga-hanga ang Kaniyang kabutihan at pag-ibig. Ang Mahal na Poong Jesus Nazareno ay ang pinakadakilang larawan at tanda ng dakilang pag-ibig at kabutihan ng Diyos para sa atin. Dahil sa dakilang pag-ibig at kabutihan ng Diyos, ipinasiya Niya tayong iligtas sa pamamagitan ng Poong Jesus Nazareno. 

Sa Unang Pagbasa, inilarawan kung paanong binigyan ng Panginoong Diyos ng isang hari ang bayang Israel. Dahil sa Kaniyang kabutihan at pag-ibig, kahit napakasakit ito para sa Panginoong Diyos, ipinasiya pa rin Niya itong gawin. Pinahintulutan ng Diyos na magkaroon ng isang hari ang bayang Israel, kahit labag ito sa Kaniyang kalooban, dahil sa Kaniyang pag-ibig at kabutihan. Bagamat alam ng Panginoong Diyos na may mga haring nagiging tiwali habang tumatagal, hindi Niya pinilit ang Kaniyang nais sa Kaniyang bayan. Kahit napakasakit ito para sa Kaniya dahil tunay Niyang iniibig ang bayang Kaniyang hirang, ginalang pa rin ng Diyos ang kanilang pasiya at pinagbigyan ito. Sa Ebanghelyo, pinagaling ng Diyos na nagkatawang-tao na walang iba kundi si Jesus Nazareno ang isang paralitiko. Ipinakita ng Mahal na Poong Jesus Nazareno sa paralitikong ito ang Kaniyang pag-ibig at kabutihan. Dahil sa Kaniyang pag-ibig at kabutihan, pinagaling ng Poong Jesus Nazareno ang paralitiko. 

Mapalad tayo sapagkat mayroon tayong Haring mapagmahal at mabuti. Kahit na batid Niya kung ano ang mas nakabubuti sa atin, pinagkakalooban pa rin Niya tayo ng kakayahan at kapangyarihang magpasiya para sa ating mga sarili. Hindi Niya ipipilit ang Kaniyang kalooban sa atin sapagkat hindi Siya katulad ng mga diktador na uhaw sa kapangyarihan at kayamanang kaakibat ng kanilang posisyon. Ang Haring ito ay walang iba kundi ang Nuestro Padre Jesus Nazareno, ang tunay na Diyos, Panginoon, Hari, at Manunubos na walang hanggan. 

IBIG NGA BA NATING MAKITA SI JESUS NAZARENO?

9 Enero 2024 

Kapistahan ng Nuestro Padre Jesus Nazareno 

Mga Bilang 21, 4b-9/Salmo 77/Filipos 2, 6-11/Juan 3, 13-17 

SCREENSHOT: #QuiapoChurch • 5AM #OnlineMass • 04 January 2024 (Thursday) Weekday of the Christmas Season (Facebook and YouTube) 

"Ibig po naming makita si Hesus" (Juan 12, 21). Ang mga salitang ito ay buong linaw na binigkas ng mga Griegong nagtungo sa Herusalem para sa Pista ng Paskuwa kay Apostol San Felipe. Bagamat mga dayuhan sila, ipinahiwatig ng mga salitang ito na buong linaw nilang binigkas kay Apostol San Felipe na marami silang narinig tungkol sa Nazarenong nagngangalang Hesus na kilala ng nakararami noon dahil sa Kaniyang talino at husay sa pagbabahagi ng Kaniyang karunungan sa mga tao. Sa konteksto ng mga salitang binigkas ng mga Griego, nais nilang makita si Hesus upang marinig ang Kaniyang mga pangaral at matuto sa Kaniya. Kahit na sila'y mga dayuhan, ang mga puso at isipan ng mga Griegong ito ay bukas sa mga aral ni Hesus. 

Tiyak na lingid sa kaalaman ng mga Griegong ito na ang mga salitang ito na kanilang binigkas sa isa sa mga apostol na si Apostol San Felipe ay pagtutuunan ng pansin at pagninilayan bilang tema para sa Kapistahan ng Panginoong Hesukristo sa ilalim ng Kaniyang titulong Nuestro Padre Jesus Nazareno. Ang mga salitang ito na binigkas ng mga Griego kay Apostol San Felipe sa ika-12 kabanata ng Ebanghelyo ni San Juan ay ipinasiyang gamitin at bigyan ng pansin ng Simbahan ng Quiapo bilang tema para sa Kapistahan ng Nuestro Padre Jesus Nazareno para sa kasalukuyang taon, 2024. Sa pamamagitan nito, tinutulungan ng buong Simbahan, hindi lang ang mga pamunuan ng Simbahan ng Quiapo, ang lahat ng mga deboto at namamanata sa Nuestro Padre Jesus Nazareno sa paglago ng debosyon at pamamanata sa Kaniya. Hindi lamang ito tuwing sasapit ang Pista ng Nazareno na ipinagdiriwang taun-taon tuwing sasapit ang ikasiyam na araw ng Enero kundi sa bawat sandali ng ating buhay dito sa lupa.

Nakasentro sa mga kahanga-hangang gawa ng Panginoong Diyos ang mga Pagbasa para sa Kapistahan ng Nuestro Padre Jesus Nazareno. Sa pamamagitan nito, tayong lahat ay pinaalalahanan ng Simbahan kung ano ang dapat nating gawin bilang mga  Kristiyanong nagdedebosyon at namamanata sa Nuestro Padre Jesus Nazareno nang buong katapatan. Lagi nating dapat alalahanin ang dahilan kung bakit dumating sa mundong ito bilang ipinangakong Mesiyas at Manunubos na kaloob ng Diyos sa lahat ang Nuestro Padre Jesus Nazareno. Gaya ng inihayag ng tampok na mang-aawit sa Salmong Tugunan nang buong lakas, sigla, linaw, at tiwala: "Hindi nila malilimot ang dakilang gawa ng Diyos" (Salmo 77, 7k). 

Sa Unang Pagbasa, isinalaysay kung paanong ipinagkaloob ng Panginoong Diyos sa mga Israelita ang biyaya ng kagalingan sa pamamagitan ng ahas na tanso. Iniutos ng Panginoong Diyos si Moises na gumawa ng isang ahas na tanso na nakasabit sa isang tikin upang gumaling at makaligtas mula sa kamatayan ang sinumang tumingin dito, kahit na tinuklaw sila ng makamandag na ahas (Mga Bilang 21, 8-9). Bagamat hindi sila karapat-dapat dahil sa ginawa nilang pagkalimot sa mga ginawa ng Diyos para sa kanila, ipinasiya pa rin ng Diyos na kahabagan at patawarin sila. Ang ahas na tanso ay sagisag ng habag, pag-ibig, at awa ng Diyos para sa Kaniyang bayan. Sa Ikalawang Pagbasa, nagsalita si Apostol San Pablo tungkol sa pinakadakilang gawa ng Diyos na sumasalamin sa kadakilaan ng Kaniyang biyaya, kagandahang-loob, awa, habag, pag-ibig, at kabutihan para sa buong sangkatauhan. Ipinagkaloob ng Diyos sa lahat bilang ipinangakong Mesiyas at Manunubos ang Panginoong Jesus Nazareno, ang Kaniyang Bugtong na Anak at Pangalawang Persona ng Banal na Santatlo. Ang misyong ito ay buong kababaang-loob na tinupad ng Panginoong Jesus Nazareno. Sa Ebanghelyo, inilarawan ang dahilan kung bakit ipinasiya itong gawin ng Diyos nang sumapit ang takdang panahon sa pamamagitan ng Panginoong Jesus Nazareno. Isa lamang ang dahilan - ang Kaniyang dakilang pag-ibig. 

Ano naman ang ugnayan ng hindi pagkalimot sa mga dakilang gawa ng Diyos, lalung-lalo na ang pinakadakilang gawa ng Diyos na sinasagisag ng bawat imahen ng Poong Jesus Nazareno, at ang hangaring makita Siya? Kababaang-loob. Ito ang susi upang tunay nga nating makita si Jesus Nazareno. Hindi makikita ng bawat isa sa atin ang Mahal na Poong Jesus Nazareno kung wala tayong kababaang-loob. Sinasagisag ng kababaang-loob ang taos-pusong pananalig, tiwala, pag-ibig, at pagsamba sa Mahal na Poong Jesus Nazareno. Tunay at taos-puso ang pagtanggap at pagkilala ng mga mayroong kababaang-loob ang Panginoong Jesus Nazareno bilang tunay na Diyos at Hari magpakailanman. Ang kalooban ng Nuestro Padre Jesus Nazareno ay taos-puso ring tinatanggap at sinusunod ng mga may kababaang-loob. Ito ay isang patunay na tapat at taos-puso ang pagtanggap at pagkilala sa Mahal na Poong Jesus Nazareno bilang tunay na Diyos, Hari, Panginoon, at Manunubos. 

Kung tunay nga nating ibig makita si Jesus Nazareno, magkaroon tayo ng kababaang-loob. Noong dumating sa mundong ito ang Poong Jesus Nazareno bilang Mesiyas at Manunubos na ipinangakong ipagkakaloob ng Diyos, hindi Siya namuhay bilang isang pinunong mapagmataas. Bagkus, namuhay Siya nang may kababaang-loob. Ito ang dapat nating gawin bilang Kaniyang mga tapat na deboto. Sa pamamagitan nito, ang taos-puso nating pananalig, pagsamba, pagkilala, pagtanggap, pagsunod, debosyon, at pamamanata sa Kaniya na nag-alay ng sarili para sa ating ikaliligtas dahil sa pag-ibig Niyang tunay ngang dakila at kahanga-hanga ay ating mahahayag. 

VIVA NUESTRO PADRE JESUS NAZARENO!

BIYAYANG INIBIG NIYANG IPAGKALOOB

8 Enero 2024 

Kapistahan ng Pagbibinyag sa Panginoon, ang Nuestro Padre Jesus Nazareno [B] 

Ikasiyam na Araw ng Pagsisiyam sa Karangalan ng Nuestro Padre Jesus Nazareno 

Isaias 55, 1-11 (o kaya: 42, 1-4. 6-7)/Isaias 12 (o kaya: Salmo 28)/1 Juan 5, 1-9 (o kaya: Mga Gawa 10, 34-38)/Marcos 1, 7-11 

This faithful photographic reproduction of the painting (c. 1630/1635) The Baptism of Christ, attributed to Emilio Savonanzi (1580–1660), as well as the actual work of art itself from the Museum of Fine Arts of Lyon, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States of America, due to its age. 

Ang pagdiriwang para sa araw na ito sa Kalendaryo ng Simbahan ay nakasentro sa kaganapang isinalaysay sa Ebanghelyo para sa araw na ito. Bukod sa pandaigdigang pagdiriwang ng Simbahan sa araw na ito na nakasentro sa kaganapang isinalaysay sa Ebanghelyo, ang araw na ito ay siya ring Ikasiyam at Huling Araw ng Pagsisiyam o Nobenaryo sa karangalan ng Panginoong Hesukristong nagpasan ng Banal na Krus mula sa Herusalem patungong Kalbaryo sa ilalim ng Kaniyang titulong Nuestro Padre Jesus Nazareno. Katunayan, ang Bisperas ng Kapistahan ng Poong Jesus Nazareno ay tumapat sa araw na ito sa kasalukuyang taon, 2024. 

Sa araw na ito, nakasentro ang pagdiriwang ng Simbahan sa muling pagpapakilala sa ipinangakong Mesiyas at Manunubos na walang iba kundi ang Mahal na Poong Jesus Nazareno. Pagkaahon ni Jesus Nazareno mula sa tubig ng Ilog Jordan matapos Siyang binyagan ng Kaniyang kamag-anak na si San Juan Bautista, bumaba sa Kaniya ang Espiritu Santo sa anyo ng kalapati at nagsalita mula sa langit ang Ama. Ipinakilala sa lahat sa sandaling ito ang ipinangakong Mesiyas at Manunubos na kaloob ng Diyos para sa kaligtasan ng sangkatauhan. Gaya ng nasasaad sa salaysay ng Pagbibinyag kay Jesus Nazareno sa Ebanghelyo, ang Bugtong na Anak ng Diyos na lubos na iniibig at kinalulugdan ng Amang nasa langit ay dumating upang iligtas ang sangkatauhan (Marcos 1, 11). 

Bilang ipinangakong Mesiyas at Manunubos, ang pangunahing misyon at tungkulin ng Mahal na Poong Jesus Nazareno ay magpakasakit at mamatay sa Krus na Banal alang-alang sa tanan. Sa pamamagitan ng Krus na Banal at Muling Pagkabuhay, ang sangkatauhan ay Kaniyang ililigtas. Ito ang inilalarawan ng mga imahen ni Kristo sa ilalim ng Kaniyang titulong Nuestro Padre Jesus Nazareno. Ang mabigat na kahoy na Krus ay pasan-pasan pa rin ni Kristo, bagamat nahihirapan at nagdurusa Siya nang labis-labis sa mga sandaling yaon. Kahit na ilang ulit na nasubasob ang Panginoong Jesus Nazareno dahil sa bigat ng Krus, ipinasiya pa rin Niyang tumayo at ipagpatuloy ang pagpasan ng Krus hanggang sa Kaniyang marating ang bundok ng Kalbaryo kung saan namatay Siya bilang handog alang-alang sa atin. 

Inilarawan sa Unang Pagbasa, Salmong Tugunan, at Ikalawang Pagbasa kung bakit niloob ng Diyos na ipagkaloob ang Kaniyang Bugtong na Anak na si Jesus Nazareno bilang hain para sa kaligtasan ng sangkatauhan. Sa Unang Pagbasa, inanyayahan ng Panginoong Diyos ang lahat na lumapit sa Kaniya upang makinabahagi sa Kaniyang kabutihan. Nais Niyang ibahagi sa lahat ang Kaniyang kabutihan. Dagdag pa Niya sa wakas ng Kaniyang pahayag na inilahad ni Propeta Isaias sa lahat sa Unang Pagbasa: "Ganyan din ang Aking mga salita. Magaganap nito ang lahat Kong nasa" (Isaias 55, 11). Ang kabutihang-loob na ito ng Panginoong Diyos ay pinagtuunan rin ng pansin sa Salmong Tugunan na hango sa aklat ni Propeta Isaias. Malinaw na inilarawan kung paanong naging mabuti ang Diyos sa lahat. Nakasentro sa pinakadakilang gawa ng Diyos na sumasalamin sa dakila Niyang kabutihang-loob para sa lahat ang pangaral ni Apostol San Juan sa Ikalawang Pagbasa. Dahil sa kabutihang-loob na ito ng Diyos, ipinasiya ng Diyos na ipagkaloob ang Kaniyang Bugtong na Anak bilang ipinangakong Mesiyas at Manunubos na magliligtas sa sangkatauhan. Sa pamamagitan nito, ang biyaya ng pagliligtas ng Diyos, ang Kaniyang pinakadakilang biyaya, ay dumating sa daigdig. Kahit hindi naman Niya kinailangang gawin iyon, ipinasiya pa rin ng Diyos na gawin iyon dahil sa Kaniyang kabutihang-loob. 

Dahil sa kabutihang-loob ng Diyos, ipinagkaloob Niya sa atin ang biyaya ng Kaniyang pagliligtas sa pamamagitan ng Kaniyang Bugtong na Anak na si Jesus Nazareno, ang ipinangakong Mesiyas at Manunubos. Kahit batid Niya kung gaano katindi at kasakit ang hirap, sakit, pagdurusa, at kamatayang kailangan Niyang harapin, tiisin, at batain bilang ipinangakong Mesiyas at Manunubos, hindi ipinagdamot ng Mahal na Poong Jesus Nazareno ang buo Niyang sarili sa atin. Bagkus, buong kababaang-loob Niyang tinanggap at tinupad ang misyong ito bilang ipinangakong Mesiyas at Tagapagligtas, kahit na ang katumbas nito ay ang sarili Niyang buhay. Hindi rin Niya ito ginawa nang sapilitan. Ginawa Niya ito nang kusang-loob. 

Huwag nawa nating kalimutan ang bukod tanging dahilan kung bakit inilalarawan ng mga imahen ng Panginoong Hesukristo sa ilalim ng Kaniyang titulong Nuestro Padre Jesus Nazareno. Inilalarawan ng lahat ng mga imahen ni Hesus sa ilalim ng Kaniyang titulong Nuestro Padre Jesus Nazareno kung gaano kabuti sa atin ang Diyos. Dahil sa kabutihan ng Diyos, ipinagkaloob Niya sa atin ang Mahal na Poong Jesus Nazareno na Bugtong Niyang Anak upang iligtas tayo. Inibig ng Diyos na iligtas tayo. Kaya naman, dumating Siya sa mundong ito bilang ipinangakong Mesiyas at Manunubos ng tanan sa pamamagitan ng Nuestro Padre Jesus Nazareno na Kaniyang Bugtong na Anak at Pangalawang Persona ng Banal na Santatlo. 

VIVA POONG JESUS NAZARENO! 

SUSUNDIN BA NATIN SIYA?

7 Enero 2024 

Dakilang Kapistahan ng Pagpapakita ng Panginoong Jesus Nazareno 

Ikawalong Araw ng Pagsisiyam sa Karangalan ng Nuestro Padre Jesus Nazareno 

Isaias 60, 1-6/Salmo 71/Efeso 3, 2-3a. 5-6/Mateo 2, 1-12 

This faithful photographic reproduction of the painting (c. 16th century) Adoración de los Reyes Magos by Francesco Bassano the Younger (1549–1592), as well as the original work of art itself from the Museo del Prado collection, is in the Public Domain ("No Copyright") in its country of origin as well as in other countries and areas, including the United States of America, where the copyright term is the author's life plus 100 years or fewer due to its age.

Nang dumating sa Herusalem ang mga Pantas mula sa Silangan, ang kanilang unang itinanong sa lahat ay: "Nasaan ang ipinanganak na Hari ng mga Hudyo? Nakita namin sa Silangan at naparito kami upang sambahin Siya" (Mateo 2, 2). Ang paglalakbay ng mga Pantas na nagmula sa Silangan patungo sa Betlehem upang hanapin, dalawin, at sambahin ang Banal na Sanggol na si Jesus Nazareno ay ang sentro ng solemneng pagdiriwang ng Simbahan sa araw na ito, ang unang Linggo pagkalipas ng Bagong Taon. Katunayan, ang Ebanghelyo para sa araw na ito ay tungkol sa kaganapang nais bigyan ng pansin, pagnilayan, at ipagdiwang ng Simbahan sa araw na ito. Bagamat dayuhan ang turing sa kanila, ang mga Pantas na mula sa Silangan ay nagpasiyang maglakbay nang napakalayo patungo sa Betlehem upang dalawin at sambahin ang tunay at walang hanggang Haring si Jesus Nazareno. 

Ang mga salitang ito na binigkas ng mga Pantas na mula sa Silangan nang dumating sila sa Herusalem ay napapanahon rin sapagkat ang tema ng Kapistahan ng Nuestro Padre Jesus Nazareno para sa taong 2024 ay "Ibig naming makita si Hesus" (Juan 12, 21). Katulad ng mga Pantas na nagpasiyang maglakbay patungong Betlehem upang dalawin at sambahin ang Banal na Sanggol na si Jesus Nazareno, kahit na isa itong napakahabang paglalakbay dahil napakalayo ng Betlehem mula sa lugar o pook na kanilang pinanggalingan, ang mga nagbigkas ng mga salitang ito ay mga dayuhan rin. Mga Griyego ang nagbigkas ng mga salitang ginamit bilang tema para sa Kapistahan ng Nazareno (Juan 12, 20). Bagamat itinuturing silang mga dayuhan ng mga Israelita, ibig pa rin nilang makita ang Panginoong Jesus Nazareno. Ang dahilan ng kanilang paglalakbay nang napakalayo at napakahaba mula sa kani-kanilang mga pinagmulan ay walang iba kundi ang Mahal na Poong Jesus Nazareno. 

Ipinapaalala sa atin ng maringal na pagdiriwang ng Simbahan para sa araw na ito, ang Dakilang Kapistahan ng Pagpapakita ng Panginoon, na para sa lahat ang dakilang biyaya ng pagliligtas na kaloob ng Diyos sa pamamagitan ng Poong Jesus Nazareno. Hindi lamang Siya Mesiyas at Manunubos ng isang lahi, bayan, bansa, o pangkat ng mga tao ang Poong Jesus Nazareno. Bagkus, Tagapagligtas Siya ng lahat ng mga tao. Kaya naman, ang Banal na Sanggol na si Jesus Nazareno ay pinahintulutan ng Diyos na dalawin Siya ng mga dayuhan, ang mga Pantas mula sa Silangan. 

Maituturing na isang alok at paanyaya para sa mga Pantas ang Tala ng Panginoon, ang Nuestro Padre Jesus Nazareno. Sa pamamagitan ng talang ito, inanyayahan ng Panginoong Jesus Nazareno ang mga Pantas na ito dalawin Siya, kilalanin Siya, at sambahin Siya bilang tunay at walang hanggang Hari. Ang dahilan kung bakit ito ang naging pasiya ng Poong Jesus Nazareno ay inilarawan sa Ikalawang Pagbasa. Sabi ni Apostol San Pablo na kagandahang-loob ng Diyos ay ang bukod-tanging dahilan kung bakit ang biyaya ng Kaniyang pagliligtas ay para sa lahat, Hudyo man o Hentil. Dahil sa kagandahang-loob ng Diyos, niloob Niyang ipagkaloob sa lahat ang dakilang biyaya ng Kaniyang pagliligtas sa pamamagitan ng Mahal na Poong Jesus Nazareno. Sa pamamagitan nito, tinupad ng Panginoong Diyos ang pangakong binitiwan Niya sa pamamagitan ni Propeta Isaias sa Unang Pagbasa. Darating sa Kaniyang bayan ang Kaniyang liwanag. 

Tayong lahat ay inaanyayahan ng Banal na Sanggol ng Betlehem na walang iba kundi ang Panginoong Jesus Nazareno na dalawin, kilalanin, parangalan, at sambahin Siya bilang tunay na Hari, Mesiyas, at Manunubos. Inilarawan ng tampok na mang-aawit sa Salmong Tugunan kung paano natin ito magagawa. Paglingkuran natin ang Poong Jesus Nazareno nang buong puso, pananalig, at katapatan sa pamamagitan ng ating mga salita at gawa (Salmo 71, 11). Sa pamamagitan nito, isinasabuhay natin bilang Kaniyang mga deboto ang ating debosyon at pamamanata sa Kaniya. Kapag ito ang ipinasiya nating gawin, kalulugdan tayo ng Poong Jesus Nazareno. 

Sinundan ng mga Pantas ang Tala ng Poong Jesus Nazareno. Gaya ng mga Pantas, ang landas patungo sa Poong Jesus Nazareno ay susundan rin ba natin?