PAGBABAGONG KANIYANG HATID

5 Hulyo 2024 

Biyernes ng Ika-13 Linggo sa Karaniwang Panahon (II) 

Amos 8, 4-6.9-12/Salmo 118/Mateo 9, 9-13

SCREENSHOT: QUIAPO CHURCH 12:15PM #OnlineMass • 24 June 2024 • Solemnity of the Nativity of #SaintJohnTheBaptist (Facebook and YouTube) 

Tila magkasalungat ang pahayag ng Panginoong Diyos na inilahad ni Propeta Amos sa Unang Pagbasa at ang kaganapang itinampok sa salaysay sa Ebanghelyo para sa araw na ito. Sa Unang Pagbasa, inihayag ng Panginoong Diyos ang Kaniyang galit sa mga mapang-api at mapagsamantala. Inihayag naman ng Poong Jesus Nazareno sa Ebanghelyo na naparito Siya para sa mga makasalanan matapos Niyang tawagin at hirangin ang maniningil ng buwis na si Apostol San Mateo upang sumunod sa Kaniya bilang isa sa Kaniyang mga alagad at apostol. 

Paano natin maiuugnay ang dalawang pahayag na ito ng Panginoon? Hindi ba Diyos rin si Jesus Nazareno? Bakit iba ang pahayag ng Mahal na Poong Jesus Nazareno sa tampok na salaysay sa Ebanghelyo sa pahayag ng Panginoong Diyos na buong linaw na inilahad ni Propeta Amos sa Unang Pagbasa? Ano ba ang ugnayan o koneksyon ng dalawang pahayag na ito, kung mayroon man? 

Hindi naman galit ang Panginoong Diyos sa sangkatauhan. Bagkus, puspos Siya ng pag-ibig, kagandahang-loob, habag, at awa para sa sangkatauhan. Nagagalit lamang Siya sa kasalanan. Kinasusuklaman ng Diyos ang mga masasamang gawain gaya na lamang ng pang-aapi sa tao, lalung-lalo na ang pang-aapi sa mga dukha. Subalit, sa kabila nito, iniibig pa rin Niya ang bawat tao. Gaano man kasama ang isang tao, sila pa rin ay iniibig at kinahahabagan ng Diyos. Dahil dito, hindi sila sinusukuan ng Diyos habang patuloy silang namumuhay at naglalakbay sa daigdig na ito. Lagi Niya silang binibigyan ng pagkakataong magbagong-buhay habang patuloy silang namumuhay at naglalakbay nang pansamantala sa mundong ito. 

Nais ng Panginoong Diyos na matularan ng bawat isa sa atin, lalung-lalo na ng mga makasalanan, ang tampok na mang-aawit sa Salmong Tugunan na nagpasiya nang buong pananalig at katapatan sa Kaniya na maging masunurin sa Kaniyang mga utos at loobin (Salmo 118,30). Ang pasiya ng tampok na mang-aawit sa Salmong Tugunan para sa araw na ito ay naging pasiya rin ni Apostol San Mateo sa tampok na salaysay sa Ebanghelyo para sa araw na ito. Tinalikuran ang makasalanang pamumuhay at si Jesus Nazareno ay sinundan nang buong pananalig at katapatan. 

Bilang mga deboto ng Nuestro Padre Jesus Nazareno, sikapin natin laging makinig at sumunod sa mga utos at loobin ng Diyos. Sa pamamagitan nito, pinatutunayan natin ang ating katapatan sa ating debosyon at pamamanata sa Kaniya. 

BIYAYANG KANIYANG LIKHA

30 Hunyo 2024 

Ika-13 Linggo sa Karaniwang Panahon [B] 

Karunungan 1, 13-15; 2, 23-24/Salmo 29/2 Corinto 8, 7-9. 13-15/Marcos 5, 21-43 (o kaya: 5, 21-24. 35b-43) 

This faithful photographic reproduction of the painting (c. 1871) Ressurection of Jairus' daughter by Vasily Polenov (1844–1927), as well as the actual work of art itself from the Scientific-research Museum of the Russian Academy of Arts, is in the Public Domain ("No Copyright") ("No Copyright") in its country of origin as well as in other countries and areas where the copyright term is the author's life plus 95 years or fewer because the author died in 1927. This is also in the Public Domain in the United States because it was published (or registered with the U.S. Copyright Office) before January 1, 1929.

Dalawang himala ng Poong Jesus Nazareno ang itinampok sa mahabang bersyon ng tampok na salaysay sa Ebanghelyo para sa Linggong ito. Ang unang himala ng Mahal na Poon ay ang pagkakagaling ng isang babaeng 12 taong dinudugo matapos niyang hipuin ang damit ng Mahal na Poon. Habang papunta sa bahay ni Jairo ang Nuestro Padre Jesus Nazareno upang pagalingin ang kaniyang anak, isang babaeng 12 taong dinudugo ang nagpasiyang hipuin ang damit ni Jesus Nazareno sa paniniwalang titigil ang kaniyang pagdurugo at tuluyan siyang gagaling mula sa kaniyang karamdaman kapag ginawa niya ito. Ang ikalawang himala ng Poong Jesus Nazareno ay ang muli Niyang pagbuhay sa anak ni Jairo. 

Ano naman ang ugnayan ng dalawang himalang ito ng Panginoong Jesus Nazareno sa isa't isa? Ipinapaalala sa atin ng dalawang himalang ito ng Mahal na Poong Jesus Nazareno sa Ebanghelyo na isang biyaya mula sa Diyos ang buhay. Nabubuhay tayo dito sa mundong ito sapagkat niloob ito ng Panginoong Diyos. Bagamat hindi naman tayo karapat-dapat sa biyayang ito, niloob ng Diyos na ipahiram sa atin ang biyayang ito. Nais ng Diyos na maranasan natin ang biyaya ng buhay dito sa mundo, kahit na hiram lamang ang biyayang ito. 

Isinalungguhit sa Unang Pagbasa para sa Linggong ito ang katotohanang nagmula sa Diyos ang buhay. Katunayan, nilikha ng Diyos ang biyaya ng buhay. Siya mismo ang bukod tanging dahilan kung bakit mayroong biyaya ng buhay. Ang biyaya ng buhay na kusang-loob Niyang ipinahiram Niya sa atin ay Kaniyang nilikha. Kung hindi ipinasiya ng Diyos na likhain ang biyaya ng buhay, walang nabubuhay ngayon. Walang laman ang daigdig na ito kung hindi nilikha ng Diyos ang buhay. Ito ang dahilan kung bakit malakas na inihayag sa Unang Pagbasa na nilikha ng Diyos ang tao upang "maging larawan Niyang buhay" (Karunungan 2, 23). Nakasentro rin sa katotohanang ito ang isa sa mga taludtod sa Salmong Tugunan para sa Linggong ito. Ang buhay ay isang biyaya mula sa Diyos na kusang-loob Niyang ipinahiram sa atin. 

Sa Ikalawang Pagbasa, inilarawan ni Apostol San Pablo kung ano ang dapat nating gawin. Dahil ipinahiram sa atin ng Diyos ang biyaya ng buhay na Kaniyang likha, ang bawat isa sa atin ay dapat maging mga salamin ng Kaniyang biyaya. Ipalaganap natin ang biyaya, pag-ibig, habag, at awa ng Diyos. Maging daluyan tayo ng mga biyaya ng Diyos. Ang Panginoong Diyos na pinagmulan ng buhay ay ipinapakilala natin sa tanan kapag ipinasiya nating maging mga daluyan ng Kaniyang mga biyaya. 

Niloob ng Diyos na ipahiram sa atin ang biyaya ng buhay na Kaniyang likha dahil sa Kaniyang pag-ibig, kagandahang-loob, habag, at awa para sa atin. Ipakilala natin Siya sa lahat. Maging biyaya tayo para sa kapwa. Ipalaganap natin ang kagandahang-loob, pag-ibig, habag, at awa sa lahat. 

MABIGAT NA RESPONSIBILIDAD

29 Hunyo 2024 

Dakilang Kapistahan nina Apostol San Pedro at San Pablo 

[Pagmimisa sa Araw ng Dakilang Kapistahan] 

Mga Gawa 12, 1-11/Salmo 33/2 Timoteo 4, 6-8. 17-18/Mateo 16, 13-19 

This faithful photographic reproduction of the painting (c. 18th century) San Pedro y San Pablo by Pablo Rabiella (–1719), as well as the actual work of art itself, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

Matapos ipahayag ni Apostol San Pedro na si Jesus Nazareno ay ang Anak ng Diyos at ang ipinangakong Mesiyas, inihayag sa kaniya ng Señor ang mga salitang ito sa Ebanghelyo para sa Dakilang Kapistahang ipinagdiriwang ng Simbahan nang buong ringal sa araw na ito: "At sinasabi Ko naman sa iyo, ikaw ay Pedro, at sa ibabaw ng batong ito ay itatayo Ko ang Aking Simbahan, at hindi makapananaig sa kaniya kahit ang kapangyarihan ng kamatayan. Ibibigay Ko sa iyo ang mga susi sa kaharian ng langit; anuman ang ipagbawal mo sa lupa ay ipagbabawal sa langit at ang ipahintulot mo sa lupa ay ipahihintulot sa langit" (Mateo 16, 18-19). Nakasentro sa mga salitang ito na binigkas ng Poong Jesus Nazareno sa Ebanghelyo ang Dakilang Kapistahang buong ringal na ipinagdiriwang ng Simbahan sa araw na ito. Inilaan ng Simbahan ang araw na ito sa pagpapasalamat sa Diyos sa biyaya ng dalawang dakilang santo na sina Apostol San Pedro at San Pablo na ating pinararangalan at itinatampok sa araw na ito. Ang dalawang dakilang santong ito ay pinagkalooban ng mga mabibigat na pananagutan na kanilang tinupad nang buong katapatan hanggang sa huli. 

Hindi biro ang mga pananagutang inatasan sa dalawang dakilang apostol na ito na sina Apostol San Pedro at San Pablo. Itinalaga ng Mahal na Poong Jesus Nazareno bilang unang Santo Papa ng Simbahan si Apostol San Pedro habang si Apostol San Pablo ay Kaniya namang hinirang at itinalaga bilang apostol, misyonero, at saksi sa mga Hentil. Bagamat karangalan para sa kanila na mapili, mahirang, at maitalaga ng ipinangakong Mesiyas at Manunubos na si Jesus Nazareno, isa rin itong napakabigat na pananagutan para sa dalawang dakilang apostol na ito. Marami silang hinarap at tiniis na hirap, sakit, at pag-uusig habang tinutupad nila ang kanilang misyon. 

Tampok sa Unang Pagbasa para sa araw na ito ang pagtakas ni Apostol San Pedro mula sa bilangguan sa tulong ng isang anghel ng Panginoon na nagpakita sa kaniya. Sa Ikalawang Pagbasa, si Apostol San Pablo ay nagbigay ng isang maikling buod ng kaniyang buhay bilang apostol, saksi, at misyonero ng Nazareno sa mga Hentil. Isang bagay lamang ang nais isalungguhit ni Apostol San Pablo. Hindi biro ang mga pag-uusig, hirap, at sakit na kanilang pinagdaanan bilang mga apostol at saksi ni Kristo. 

Paano sila nagkaroon ng lakas na manatiling tapat sa Panginoon? Inilarawan ng mga salitang binigkas ng tampok na mang-aawit sa Salmong Tugunan. Isinalungguhit ng tampok na mang-aawit sa Salmong Tugunan ang walang maliw na katapatan, pag-ibig, habag, at awa ng Panginoong Diyos. Dahil sa walang maliw na katapatan, awa, habag, at pag-ibig ng Panginoong Diyos, lagi Niyang tinutulungan ang Kaniyang mga lingkod. Dahil dito, nagkaroon ng lakas ng loob ang mga apostol gaya na lamang nina Apostol San Pedro at San Pablo na manatiling tapat sa Panginoong Diyos na buong katapatan nilang iniibig, pinaglilingkuran, at sinasamba. 

Ang pananagutang inatasan ng Poong Jesus Nazareno sa dalawang dakilang apostol na sina Apostol San Pedro at San Pablo ay napakabigat at hindi madaling gawin. Ang katotohanang ito ay batid rin ng Mahal na Poong Jesus Nazareno. Kailangan nila ng tulong sa bawat sandali ng kanilang misyon. Kaya naman, hindi Niya pinabayaan ang mga apostol gaya na lamang nina Apostol San Pedro at San Pablo at pati na rin ang iba pang mga bumubuo sa Kaniyang Simbahan. Hanggang ngayon, lagi pa rin Niyang sinasamahan at tinutulungan ang Kaniyang Simbahan. Hindi Niya pinababayaan ang Kaniyang Simbahan dahil tunay Niyang minamahal ang Kaniyang Simbahan. 

KAHIT MAHIRAP GAWIN

28 Hunyo 2024 

Dakilang Kapistahan nina Apostol San Pedro at San Pablo 

[Pagmimisa sa Bisperas] 

Mga Gawa 3, 1-10/Salmo 18/Galacia 1, 11-20/Juan 21, 15-19 

This faithful photographic reproduction of the painting (c. 17th century) Separazione di san Pietro e di san Paolo by Giovanni Lanfranco (1582–1647), as well as actual work of art itself from the Louvre Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

"Laganap na sa daigdig ang kanilang mga tinig" (Salmo 18, 5a). Sa mga salitang ito na binigkas ng mang-aawit sa Salmong Tugunan nakatuon ang maringal na pagdiriwang ng Bisperas ng Dakilang Kapistahan nina Apostol San Pedro at San Pablo. Inilaan ang pagdiriwang ng Dakilang Kapistahan nina Apostol San Pedro at San Pablo para sa taimtim na pagninilay at paggunita sa kagitingan ng dalawang dakilang apostol na ito. Buong galak nating pinasasalamatan ang Diyos sa biyaya ng dalawang dakilang apostol na ito na sina Apostol San Pedro at San Pablo dahil ipinagkaloob Niya silang dalawa sa Simbahan. Ang unang Santo Papa ng Simbahan na si Apostol San Pedro at si Apostol San Pablo na siyang apostol at misyonero sa mga Hentil ay mga biyayang ipinagkaloob ng Panginoon sa Kaniyang Simbahan. Hindi kinalimutan ng dalawang dakilang apostol na ito na sina Apostol San Pedro at San Pablo ang katotohanang ito tungkol sa kanilang misyon bilang mga apostol, saksi, at misyonero ng Panginoong Jesus Nazareno kailanman. 

Sa Unang Pagbasa, ang biyaya ng kagalingang kaloob ng Poong Jesus Nazareno ay inihatid nina Apostol San Pedro at San Juan sa isang lalaking ipinanganak na lumpo. Nagsilbing mga daluyan ng biyaya ng Poong Jesus Nazareno si Apostol San Pedro na unang Santo Papa ng Simbahan at ang alagad na minamahal na si Apostol San Juan. Kumilos ang Poong Jesus Nazareno sa pamamagitan ng dalawang apostol na ito na sina Apostol San Pedro at San Juan. Itinuon ni Apostol San Pablo ang pansin ng mga Kristiyano sa Galacia sa katotohanan tungkol sa kaniyang misyon bilang isa sa mga apostol at saksi ng Panginoong Jesus Nazareno sa kaniyang pangaral na inilahad sa Ikalawang Pagbasa. Gaya ng iba pang mga apostol, si Apostol San Pablo ay dumating bilang isang biyaya ng Diyos. Ang pinakadakilang biyayang ipinagkaloob ng Diyos na walang iba kundi ang Panginoong Jesus Nazareno ay kaniyang ipinakilala sa kanila. Habang ipinakilala niya sa kanila si Jesus Nazareno, naging daluyan rin ng Kaniyang mga biyaya para sa kanila si Apostol San Pablo. Sa Ebanghelyo, si Apostol San Pedro ay itinalaga ni Jesus Nazareno bilang tagapag-alaga ng Kaniyang mga tupa matapos bigyan ang Kaniyang apostol na ito ng pagkakataong ipahayag ang kaniyang taos-pusong pag-ibig at katapatan para sa Kaniya. 

Napakalaki at napakabigat ng pananagutang inatasan ng Poong Jesus Nazareno sa dalawang dakilang apostol na kinikilala at pinararangalan bilang dalawang dakilang haligi ng Simbahan na sina Apostol San Pedro at San Pablo. Bilang mga misyonero, saksi, at apostol ni Kristo, kinailangan ng dalawang dakilang apostol na ito na sina Apostol San Pedro at San Pablo na maglakbay nang napakalayo upang ipakilala sa tanan ang ipinangakong Mesiyas at Manunubos si Jesus Nazareno. Maraming pag-uusig silang hinarap at tiniis alang-alang sa Mahal na Poong Jesus Nazareno. Subalit, ipinasiya pa rin ng dalawang dakilang apostol na ito na manatiling tapat sa kanilang misyon bilang apostol, saksi, at misyonero ng Panginoon, gaano man kahirap itong gawin, hanggang sa huling sandali ng kanilang buhay. 

Ipinagpapatuloy ng Simbahan sa kasalukuyan ang misyon at tungkuling tinupad ng dalawang dakilang apostol na ito na sina Apostol San Pedro at San Pablo at ng iba pang mga apostol. Hindi titigil ang Simbahan sa pagpapalaganap ng Mabuting Balita kailanman. Lagi siyang mananatiling tapat sa Nuestro Padre Jesus Nazareno. Gaano mang kahirap itong gawin, lagi pa ring pipiliin ng Simbahan ang Nuestro Padre Jesus Nazareno. Ang Mahal na Poong Jesus Nazareno lamang ang pipiliin, mamahalin, at sasambahin ng Simbahan magpakailanman. Ito ang dapat nating tandaan at gawin bilang mga bumubuo sa Simbahan. 

DAPAT PAHALAGAHAN

28 Hunyo 2024 

Paggunita kay San Ireneo, obispo at martir 

Biyernes ng Ika-12 Linggo sa Karaniwang Panahon (II) 

2 Hari 25, 1-12/Salmo 136/Mateo 8, 1-6 

SCREENSHOT: QUIAPO CHURCH • 3PM Balangay Novena Mass - IKA-6 NA ARAW ng Misa-Nobenaryo kay San Juan Bautista (Facebook and YouTube) 

Ang Ebanghelyo para sa araw na ito ng Biyernes, ang araw na inilaan ng Simbahan para sa taimtim na debosyon at pamamanata sa Nuestro Padre Jesus Nazareno, ay tungkol sa pagpapagaling sa isang ketongin. Ipinasiya ng Poong Jesus Nazareno na ipakita sa isang ketonging nanikluhod at nagmakaawa sa Kaniya nang may tapat at dalisay na pananalig at kababaang-loob ang Kaniyang habag at awa sa pamamagitan ng pagpapagaling sa nasabing ketongin. Subalit, tampok sa Unang Pagbasa para sa araw na ito ang salaysay ng pagsakop ng mga taga-Babilonia sa Herusalem. Parang walang ugnayan ang dalawang kaganapang ito. Taliwas nga ito sa isa't isa. Kung ang salaysay sa Unang Pagbasa para sa araw na ito ay tungkol sa isang nakakalungkot at napakadilim na sandali, tungkol naman sa isang sandali kung saan umiral ang pag-asang kaloob ng Panginoon ang salaysay sa Ebanghelyo para sa araw na ito. 

Sa unang tingin, mukhang mahirap iugnay ang kaganapang itinampok sa salaysay sa Unang Pagbasa para sa araw na ito at ang kaganapang tampok sa salaysay sa Banal na Ebanghelyo para sa araw na ito. Magkaiba nga rin ang temang pinagtuunan ng pansin at isinalungguhit sa dalawang kaganapang ito. Pananakop sa Herusalem ang isa habang ang isa naman ay tungkol sa isang himala ng Panginoong Jesus Nazareno. Subalit, isang napakahalagang aral ang nais pagtuunan ng pansin at isalungguhit ng dalawang kaganapang ito, sa kabila ng pagkakaiba ng mga tema nito. Dapat nating pahalagahan ang habag at awa ng Panginoong Diyos. 

Hindi pinahalagahan ng mga Israelita noong panahon ni Propeta Jeremias ang habag at awa ng Diyos. Dahil dito, pinahintulutan ng Panginoong Diyos na masakop ng mga taga-Babilonia sa pangunguna ng haring si Nabucodonosor ang Herusalem, gaya ng inilarawan sa Unang Pagbasa para sa araw na ito kung saan itinampok ang simula ng pagkakatapon sa Babilonia. Taliwas ito sa pasiya ng ketongin sa Ebanghelyo. Lubos niyang pinahalagahan ang habag at awa ng Panginoong Diyos na inihayag ng Poong Jesus Nazareno. Dahil dito, pinagaling siya mula sa kaniyang ketong. 

"Kung Ika'y aking limutin, wala na 'kong aawitin (Salmo 136, 6a). Ang mga salitang ito na buong pananalig at katapatang binigkas ng mang-aawit na itinampok sa Salmong Tugunan para sa araw na ito ay sumasalamin sa kaniyang pagpapahalaga sa habag at awa ng Diyos. Inilalarawan sa mga salitang ito ang pananaw ng mga nagbibigay ng halaga sa habag at awa ng Panginoong Diyos. 

Pahalagahan ang habag at awa ng Panginoong Diyos. Huwag natin itong sayangin at balewalain. Sa pamamagitan ng pagpapahalaga sa habag at awa ng Diyos, ang ating debosyon at pamamanata sa Poong Jesus Nazareno ay ating ipinapahayag. 

HINDI TAYO PABABAYAAN

27 Hunyo 2024

Kapistahan ng Ina ng Laging Saklolo 

Isaias 7, 10-17/Salmo 71/Pahayag 12, 1-6. 10/Juan 19, 25-27 

Tampok sa mga Pagbasa para sa araw na ito ang papel ng isang babaeng itinalaga ng Diyos para sa isang napakahalagang gampanin sa kasaysayan ng Kaniyang dakilang pagtubos sa sangkatauhan. Sa Unang Pagbasa, inihayag ng Panginoong Diyos nang buong linaw sa pamamagitan ng Kaniyang lingkod na si Propeta Isaias na darating sa mundong ito ang ipinangakong Mesiyas sa pamamagitan ng isang babae. Itinampok ang isang babae sa pangitain ni San Juan sa Ikalawang Pagbasa. Ang babaeng ito ay nakatuntong sa buwan at may suot na koronang binubuo ng 12 bituin (Pahayag 12, 1). Sa Ebanghelyo, itinampok ng Poong Jesus Nazareno na nakabayubay sa Krus ang isang dakilang babae. Ang babaeng ito ay walang iba kundi ang Birheng Maria. 

Itinutuon ng Simbahan ang ating mga pansin sa titulo ng Mahal na Inang si Mariang Birhen bilang Ina ng Laging Saklolo. Sa pamamagitan nito, ang napakahalagang papel ng Mahal na Birheng Maria sa buhay ng lahat ng mga Kristiyano ay buong linaw na pinagtutuunan ng pansin at pinagninilayan ng Simbahan sa araw na ito. Bilang mga kaanib ng tunay at nag-iisang Simbahang itinatag ng Poong Jesus Nazareno, tayong lahat ay mga anak rin ng Mahal na Birheng Maria. Hindi lamang Ina ni Jesus Nazareno ang Mahal na Birheng Maria. Ina rin siya ng lahat ng mga Kristiyano. 

Bilang ating Ina, hindi tayo pababayaan ng Mahal na Inang si Mariang Birhen. Lagi niya tayong sinasamahan upang tulungan, ipagsanggalang, at alagaan tayo. Ito ang dahilan kung bakit tinatawag natin siyang Ina ng Laging Saklolo. Lagi siyang handang sumaklolo sa atin dahil tunay niya tayong iniibig bilang kaniya ring mga anak. Ganyan tayo ka-mahal ng Mahal na Birheng Maria. Hinding-hindi niya tayo pababayaan. 

Ang Mahal na Inang si Mariang Birhen ay ipinagkaloob sa atin ng Mahal na Poong Jesus Nazareno upang maging atin ring Ina. Bagamat hindi tayo karapat-dapat dahil sa dami ng ating mga kasalanan, ipinasiya pa rin ng Panginoong Jesus Nazareno na regaluhan tayo ng isang Ina - ang Kaniyang Inang si Maria. Isa lamang itong patunay na tayong lahat ay tunay na iniibig at kinahahabagan ng Panginoon. Dahil sa pag-ibig, habag, at awa ng Mahal na Poon para sa bawat isa sa atin, ang bawat isa sa atin ay inaanyayahan Niyang maging bahagi ng Kaniyang pamilya. 

PALAGANAPIN ANG KANIYANG BIYAYA

24 Hunyo 2024 

Dakilang Kapistahan ng Pagsilang ni San Juan Bautista 

Isaias 49, 1-6/Salmo 138/Mga Gawa 13, 22-26/Lucas 1, 57-65. 80

This faithful photographic reproduction of the painting (c. 1640) San Juan Bautista niño servido por dos ángeles by Juan del Castillo (1584–1640), as well as the actual work of art itself from the Museo de Bellas Artes de Sevilla, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang araw na ito ay isang napakahalagang araw sa Kalendaryo ng Simbahan sapagkat inilaan ng Simbahan ang araw na ito upang buong galak na ipagdiwang ang Pagsilang ni San Juan Bautista. Sa araw na ito, itinutuon ng Simbahan ang ating mga pansin sa papel na ginanap ni San Juan Bautista sa buhay ni Kristo. Napakahalaga ng papel ni San Juan Bautista sa buhay ng Poong Jesus Nazareno. Isinilang si San Juan Bautista upang maging tagapaghanda ng daraanan ng ipinangakong Mesiyas at Manunubos. Dahil dito, ang araw ng kaniyang pagsilang sa mundo ay napakahalaga. 

Tampok sa Ebanghelyo ang salaysay ng kaganapang ipinagdiriwang ng Simbahan sa araw na ito na walang iba kundi ang Pagsilang ni San Juan Bautista. Nanggilalas ang lahat sa pagiging mapagpala ng Diyos. Isa lamang patunay ng pagiging mapagpala ng Diyos si San Juan Bautista. Katunayan, ito ang kahulugan ng pangalang "Juan." Ang biyaya ng Diyos ay salamin ng Kaniyang pag-ibig, kagandahang-loob, habag, at awa. Pinatunayan Niya ito sa pamamagitan ni San Juan Bautista na Kaniyang ipinagkaloob kina Zacarias at Elisabet upang maging kanilang anak bagamat napakatanda na sila sa mga sandaling yaon. Sa kabila ng katandaan ng magkabiyak na sina Zacarias at Elisabet, niloob pa rin ng Diyos na pagkalooban sila ng isang anak. Ang hinirang at inatasang maging tagapaghanda ng daraanan ng Panginoon ay Kaniyang ibinigay sa mag-asawang Zacarias at Elisabet upang maging kanilang anak. 

Sa Unang Pagbasa, ang katotohanan ng pagkahirang at pagkatalaga ng Panginoong Diyos sa Kaniyang mga lingkod ay binigyan ng pansin. Bago pa man isilang sa mundo ang Kaniyang mga lingkod, mayroon na Siyang mga plano para sa kanila. Katunayan, mayroon na Siyang mga plano para sa ating lahat bago pa tayo isinilang sa mundong ito. Mayroong papel at misyong ibinigay sa atin ng Diyos. Kapag ang misyong ito ay buong katapatan nating tatanggapin at tutuparin sa bawat sandali ng ating buhay sa lupa, ipinalaganap natin ang biyaya ng Diyos.  

Nakasentro rin sa katotohanang pinagtuunan ng pansin sa Unang Pagbasa ang mga salita sa Salmong Tugunan. Sabi sa Salmong Tugunan: "Pinupuri Kita, D'yos ko, dahil ako'y nilikha Mo" (Salmo 138, 14a). Ang pasiya ng Panginoong Diyos na likhain ang bawat tao upang hirangin at italaga bilang Kaniyang mga lingkod ay pinagtuunan ng pansin sa mga taludtod sa Salmong Tugunan. Sa pamamagitan ng pasiyang ito na likhain tayo, binibigyan tayo ng Panginoong Diyos ng pagkakataong ipalaganap ang Kaniyang biyaya sa lahat, gaya ng Kaniyang nais para sa atin. 

Habang inilarawan ni Apostol San Pablo sa kaniyang pangaral sa Ikalawang Pagbasa kung paanong ipinagkaloob ang Diyos ang pinakadakilang biyaya na walang iba kundi si Jesus Nazareno, ang papel at misyon ni San Juan Bautista bilang tagapaghanda ng daraanan ng ipinangakong Mesiyas at Manunubos na si Jesus Nazareno ay kaniya ring binanggit. Isinalungguhit ni Apostol San Pablo kung paanong hindi lumihis si San Juan Bautista mula sa misyong ibinigay sa kaniya ng Diyos. Bagkus, ipinasiya niyang manatiling tapat sa misyong ipinagkaloob sa kaniya ng Diyos. Sa pamamagitan ng pasiyang ito, naging tagapagpalaganap ng biyaya ng Diyos si San Juan Bautista. 

May dahilan kung bakit mayroong misyong inilaan ang Diyos para sa atin. Ang bawat isa sa atin ay may mga misyon sa buhay. Galing sa Diyos ang ating mga misyon sa buhay. Kung tatanggapin at tutuparin natin ang misyong ibinigay ng Panginoon sa atin nang buong katapatan sa bawat sandali ng ating buhay, ipinapalaganap natin sa lahat ng ating mga patutunguhan ang Kaniyang biyaya. 

SA MGA SANDALI NG TAKOT AT PANGAMBA

23 Hunyo 2024 

Ika-12 Linggo sa Karaniwang Panahon [B] 

Job 38, 1. 8-11/Salmo 106/2 Corinto 5, 14-17/Marcos 4, 35-41

This faithful photographic reproduction of the painting (c. 1596) Christ in the Storm on the Sea of Galilee by Jan Brueghel the Elder (1568–1625), as well as the actual work of art itself from the Thyssen-Bornemisza Museum via the Web Gallery of Art, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1625. This is also in the Public Domain in the United States because it was published (or registered with the U.S. Copyright Office) before January 1, 1929.

"Bakit kayo natatakot? Wala pa ba kayong pananalig?" (Marcos 4, 40). Ito ang mga salitang binigkas ng Poong Jesus Nazareno sa mga apostol matapos patahimikin ang napakalakas na unos sa Ebanghelyo. Sa mga salitang ito nakasentro ang taimtim na pagninilay ng Simbahan sa Linggong ito. Pananalig sa Diyos sa mga sandali ng takot at pangamba. Mahirap pero hindi imposible. 

Hindi natin mapagkakailang bahagi ng buhay natin dito sa mundong ito ang takot at pangamba. Normal lamang sa buhay ng bawat isa sa atin dito sa mundong ito kung saan pansamantala lamang ang buhay. Mayroong tayong mga kinatatakutan bilang mga taong naglalakbay sa mundong ito nang pansamantala. Ito ang katotohanan ng buhay natin bilang tao. Gaano pa katapang ang isang tao, mayroon pa rin siyang mga kinakatakutan at pinangangambahan. Bahag iyan ng buhay. 

Pinaalalahanan tayo ng mga Pagbasa sa Linggong ito na mayroon tayong maaaring lapitan sa mga sandali ng matitinding takot at pangamba. Maaasahan Siya sa lahat ng oras. Lagi Siyang kasama natin. Ang bawat isa sa atin ay Kaniyang tutulungan at ipagsasanggalang. Palalakasin Niya ang ating mga puso at loobin. Isa lamang ang makakagawa noon - ang Panginoong Diyos. Walang sandaling pababayaan tayo ng Diyos. Lumapit lamang tayo sa Kaniya. Tumungo tayo sa Kaniya. Papawiin Niya ang ating mga takot at pangamba. 

Sa Unang Pagbasa, buong linaw na isinalungguhit ng Panginoong Diyos sa Kaniyang pahayag kay Job ang Kaniyang kapangyarihan sa kalikasan. Inilarawan ng Diyos nang buong linaw kung paano Niya nilikha ang kalikasan. Dahil ang kalikasan ay Kaniyang nilikha, nasa ilalim ng Kaniyang kapangyarihan ang kalikasan. Ang kapangyarihan ng Diyos sa kalikasan ay pinatotohanan rin sa Salmong Tugunan para sa araw na ito. Sa biyaya ng pagbabagong kaloob ng Diyos sa pamamagitan ng Mahal na Poong Jesus Nazareno nakasentro ang pangaral ni Apostol San Pablo sa Ikalawang Pagbasa. Lagi tayong inaanyayahan ng Diyos na tanggapin ang biyayang ito na Kaniyang kaloob sa pamamagitan ng Poong Jesus Nazareno. 

Ipinahiwatig ng Poong Jesus Nazareno ang bagong buhay na Kaniyang kaloob sa tanan sa pamamagitan ng mga salitang Kaniyang binigkas sa mga apostol matapos patahimikin ang napakalakas na bagyo sa Ebanghelyo. Sa piling ng Mahal na Poon, wala tayong dapat ikatakot at ikapangamba. Katunayan, ipinahiwatig rin ito ng Mahal na Poong Jesus Nazareno sa pamamagitan ng Kaniyang pagtulog sa gitna ng bagyo. Gaya ng sabi sa isa sa mga masisikat na Salmo: "Kahit na ang daang iyo'y tumatahak sa karimlan, hindi ako matatakot pagkat Ikaw'y kaagapay; ang tungkod Mo at pamalo ang gabay ko at sanggalang" (Salmo 23, 4). 

Lumapit tayo sa Mahal na Poong Jesus Nazareno sa mga sandali ng matitinding takot at pangamba. Papawiin Niya ang ating mga takot at pangamba. Bukod pa roon, ang mga puso at loobin natin ay Kaniya ring palalakasin. 

MGA PINAHAHALAGAHAN NATIN SA BUHAY

21 Hunyo 2024

Paggunita kay San Luis Gonzaga, namamanata sa Diyos 

Biyernes ng Ika-11 Linggo sa Karaniwang Panahon (II) 

2 Hari 11, 1-4. 9-18. 20/Salmo 131/Mateo 6, 19-23

SCREENSHOT: QUIAPO CHURCH • 6AM #OnlineMass • 02 June 2024 #CorpusChristi Sunday (YouTube and Facebook)

"[K]ung nasaan naroon ang inyong kayamanan, naroon din naman ang inyong puso" (Mateo 6, 21). Sa mga salitang ito na binigkas ng Mahal na Poong Jesus Nazareno sa Ebanghelyo nakasentro ang pagninilay ng Simbahan sa araw na ito. Tayong lahat ay inaanyayahan ng Simbahan na pagnilayan kung ano nga ba ang ating mga tunay na naisin at hangarin sa buhay. Ano nga ba ang ating mga pinapahalagahan sa buhay at bakit nga ba natin pinapahalagahan ang mga ito? 

Sa Unang Pagbasa, isinalungguhit na mayroon pa ring nagpahalaga sa Panginoong Diyos sa kabila ng hirap nito noon dulot ng pamumuno ni Atalia bilang reyna. Noong namuno bilang reyna si Atalia, ang pagsamba kay Baal ay umiral. Ipinahiwatig ito sa wakas ng tampok na salaysay sa Unang Pagbasa. Napakalinaw na walang puwang sa puso ni Atalia na sakim sa kapangyarihan ang Panginoong Diyos. Bukod sa ipinapatay niya ang mga kamag-anak ng hari noon, ang pagsamba sa diyus-diyusang si Baal ay kaniya ring ipinalaganap. Hindi mahalaga para kay Atalia, ang umagaw sa trono sa bayan ng Israel noon, ang Panginoong Diyos. Sa Salmong Tugunan, isinalungguhit ng tampok na mang-aawit ang ilan sa mga dahilan kung bakit ang Panginoong Diyos ay dapat pahalagahan ng lahat. Maraming mga dahilan kung bakit dapat pahalagahan, naisin, at hangarin ng bawat isa sa atin ang Panginoong Diyos. Kung ito ang magiging taos-pusong pasiya ng bawat isa sa atin, mapapatunayan nating tunay at tapat ang ating debosyon at pamamanata sa Nuestro Padre Jesus Nazareno.

Inihayag ng Poong Jesus Nazareno na nasa puso ng bawat isa sa atin ang mga tunay nating pinahahalagahan. Ano nga ba ang ating mga pinahahalagahan? 

KALUGUD-LUGOD SA KANIYANG PANINGIN

16 Hunyo 2024 

Ika-11 Linggo sa Karaniwang Panahon [B] 

Ezekiel 12, 22-24/Salmo 91/2 Corinto 5, 6-10/Marcos 4, 26-34

This faithful photographic reproduction of the painting (c. 1505) Christ blessing by Giovanni Battista Cima da Conegliano (1459–1517) as well as the actual work itself from the Staatliche Kunstsammlungen Dresden via Gemäldegalerie Alte Meister, Dresda, is in the Public Domain ("No Copyright") under the Public Domain Mark 1.0 (PDM 1.0) Universal deed in its country of origins as well as in other countries and areas where the copyright term is the author's life plus 100 years or fewer, including the United States, due to its age. 

Tampok sa salaysay sa Ebanghelyo para sa Linggong ito ang dalawang talinghaga ng Mahal na Poong Jesus Nazareno. Sa pamamagitan ng dalawang talinghagang ito, ang halaga ng kababaang-loob ay isinalungguhit ng Nuestro Padre Jesus Nazareno. Gaya ng butil na inihasik sa bukid sa unang talinghagang itinampok sa Ebanghelyo at ang butil ng mustasa sa ikalawang talinghagang itinampok sa Ebanghelyo, itinatampok at dinadakila ng Diyos ang mga mababang-loob. Kinalulugdan ng Diyos ang mga may kababaang-loob. Ang aral na ito ay ang nais isalungguhit ng dalawang talinghagang ito na inilahad ng Poong Jesus Nazareno sa Ebanghelyo. 

Nakasentro rin sa katotohanang kinalulugdan ng Diyos ang mga mababang-loob ang pahayag na itinampok sa Unang Pagbasa para sa Linggong ito. Katunayan, nagmula mismo sa Panginoong Diyos ang pahayag na inilahad ni Propeta Ezekiel sa Kaniyang bayan sa Unang Pagbasa. Buong linaw na isinalungguhit ng Panginoon sa pahayag na ito na inilahad ng Kaniyang propetang si Propeta Ezekiel sa Kaniyang bayan sa Unang Pagbasa na kinalulugdan Niya ang mga mababang-loob. Sa pahayag na ito na inilahad sa Unang Pagbasa, inilarawan ng Panginoong Diyos kung ano ang Kaniyang gagawin sa mga mababang-loob sa pamamagitan ng paggamit ng larawan ng isang mababang punongkahoy. Ang mga mababang-loob ay Kaniyang itataas, itatampok, at dadakilain pagdating ng panahong Kaniyang itinakda. 

Isa lamang ang aral na nais isalungguhit ng pahayag ng Panginoong Diyos na inilahad ng Kaniyang lingkod na si Propeta Ezekiel sa Kaniyang bayan sa Unang Pagbasa at ng dalawang talinghagang isinalaysay ng Nuestro Padre Jesus Nazareno sa Ebanghelyo. Ang kababaang-loob ay kinalulugdan ng Diyos. Kinalulugdan ng Diyos ang mga may kababaang-loob. Labis Niyang kinalulugdan ang mga nagpapasiyang mamuhay nang may kababaang-loob. Natutuwa Siya sa mga mababang-loob. 

Sa Salmong Tugunan, inilarawan ang mga katangian ng mga mababang-loob. Buong linaw na isinalungguhit sa mga salitang inihayag sa Salmong Tugunan kung bakit ang mga mababang-loob ay kinalulugdan ng Diyos. Ang mga mababang-loob ay tunay at tapat sa kanilang pananalig, pananampalataya, pag-ibig, at pagsamba sa Diyos. Hindi nila ipinagkakait sa Diyos ang taos-pusong pananalig, pananampalataya, pag-ibig, at pagsamba sa Kaniya. Dahil dito, kinalulugdan sila ng Diyos. 

Hindi madaling maging mababang-loob. Inilarawan ni Apostol San Pablo sa kaniyang pangaral sa Ikalawang Pagbasa kung gaano kahirap mamuhay nang may kababaang-loob bilang saksi ni Kristo. May mga pagkakataon sa buhay kung saan haharap tayo sa mga matitinding pagsubok sa buhay. Subalit, ang mga may kabaabang-loob ay mananatili pa ring tapat sa Diyos dahil sa Kaniya lamang sila nananalig at umaasa. Kahit anuman ang mangyari, sa Panginoon pa rin ang kanilang katapatan sapagkat buong puso silang naniniwalang hindi sila bibiguin ng Panginoon.

Ang kababaang-loob ay kinalulugdan ng Diyos. Kung tunay tayong tapat sa ating debosyon at pamamanata sa Poong Jesus Nazareno, lagi nating dapat pagsikapang mamuhay nang may kababaang-loob sapagkat ito ay tunay ngang kalugud-lugod sa Kaniyang paningin. Gaano man kahirap itong gawin, ito ang dapat lagi nating gawin sa bawat sandali ng ating buhay sa daigdig sapagkat ito ang magpapatunay ng ating taos-pusong pananalig at katapatan sa Kaniya. 

HINDI NIYA PINABABAYAAN ANG MGA TAPAT SA KANIYA

14 Hunyo 2024 

Biyernes ng Ika-10 Linggo sa Karaniwang Panahon (II) 

1 Hari 19, 9a. 11-16/Salmo 26/Mateo 5, 27-32 

SCREENSHOT: #PABIHIS sa Mahal na Poong Jesus Nazareno | 01 Hunyo 2024 (Facebook at YouTube) 

Isinalungguhit sa Unang Pagbasa para sa araw na ito ang temang nais pagtuunan ng pansin at pagnilayan ng Simbahan sa araw na ito. Sa Unang Pagbasa, nagtungo sa Horeb na bundok ng Diyos si Propeta Elias at iniulat sa mismong Panginoong Diyos ang kaniyang kalagayan sa mga sandaling yaon. Noon, si Propeta Elias lamang ang natira sa lahat ng mga propetang hinirang ng Panginoong Diyos upang iparating sa Kaniyang bayan ang Kaniyang mga salita. Mahirap ang kalagayan ni Propeta Elias sa mga sandaling yaon dahil siya lamang ang natira sa lahat ng propetang hinirang ng Panginoong Diyos. Hindi biro ang hirap at pagod ni Propeta Elias sa mga sandaling yaon. Katatapos lamang ng pagtutuos ng Panginoong Diyos at ng diyus-diyusang si Baal sa Bundok ng Carmelo kung saan nagtagumpay ang Panginoon laban kay Baal sa pamamagitan ng pagbaba ng apoy mula sa langit bilang tugon sa panalangin ni Elias. Sa pamamagitan nito, pinatunayan ng Panginoon na Siya lamang ang Diyos. 

Nagdulot ng kapanatagan ng loob kay Propeta Elias ang tugon ng Panginoong Diyos sa wakas ng tampok na salaysay sa Unang Pagbasa. Bilang tugon sa ulat ni Propeta Elias tungkol sa kaniyang kalagayan noon, inihayag ng Panginoon na may mga hari at propeta Siyang hinirang. Hinirang ng Panginoong Diyos si Jazael bilang hari ng Siria, si Jehu bilang hari ng Israel, at si Eliseo bilang propetang hahalili kay Propeta Elias na buong katapatang naglingkod sa Kaniya sa gitna ng mga pagod, hirap, at pag-uusig (1 Hari 19, 16). Ito ay isa lamang patunay na hindi Niya pinababayan ang Kaniyang mga tapat na lingkod. Mayroong plano ang Panginoong Diyos para sa kanila. 

Buong linaw na isinalungguhit ng mga salita sa Salmong Tugunan para sa araw na ito na hindi pinababayaan ng Diyos ang Kaniyang mga tapat na lingkod. Lagi Niya silang kinakalinga, sinasamahan, at tinutulungan. Ang Kaniyang aruga, kagandahang-loob, awa, biyaya, habag, at pag-ibig ay laging ipinapakita, ipinaparamdam, at ibinubuhos sa kanila. Kung paanong ipinasiya ng mga tapat na lingkod ng Diyos na manatiling tapat sa Kaniya, gayon din naman, ipinasiya rin Niyang manatili tapat sa kanila. Hindi ipagkakait ng Diyos sa Kaniyang mga tapat na lingkod ang Kaniyang kagandahang-loob, aruga, pag-ibig, biyaya, habag, at awa. 

Sa Ebanghelyo, isinentro ng Poong Jesus Nazareno ang katapatan ng magkabiyak ng puso sa isa't isa. Hindi dapat makiapid ang mga magkabiyak ng puso sapagkat ang mga magkabiyak ng puso ay isa lamang salamin ng pag-ibig ng Nuestro Padre Jesus Nazareno para sa Kaniyang Simbahan. Katunayan, ang mga salitang ito ni Kristo na inilahad sa Ebanghelyo ay maaari nating ituring na isang pasilip tungkol sa Kaniyang pahayag tungkol sa kasagraduhan ng Sakramento ng Pag-Iisang-Dibdib na kilala rin bilang Kasal kung saang buong linaw Niyang inihayag hindi dapat paghiwalayin ng sinumang tao dito sa mundo ang pinag-isa ng Diyos (Mateo 19, 6). Ito ang dahilan kung bakit sagrado ang Sakramento ng Pag-Iisang-Dibdib. 

Ang Diyos ay hindi pabaya. Lagi Siyang tapat. Maging mga larawan at salamin nawa tayo ng Kaniyang walang maliw na katapatan sa atin. Ito ang dapat nating gawin sa bawat sandali ng ating buhay sa mundong ito bilang mga tapat na deboto ng Mahal na Poong Jesus Nazareno. 

MGA MASUNURING TAGA-AKAY

13 Hunyo 2024 

Paggunita kay San Antonio de Padua, pari at pantas ng Simbahan 

Huwebes ng Ika-10 Linggo sa Karaniwang Panahon (II) 

1 Hari 18, 41-46/Salmo 64/Mateo 5, 20-26 

This faithful photographic reproduction of the painting (c. 18th century) Saint Anthony by Joaquim Manuel da Rocha (1727-1786) from the Museu de Lisboa is in the Public Domain ("No Copyright") ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Sinasabi Ko sa inyo: kung ang pagsunod ninyo sa kalooban ng Diyos ay tulad lamang ng pagsunod ng mga eskriba at mga Pariseo, hindi kayo makapapasok sa kaharian ng Diyos" (Mateo 5, 20). Ang pagninilay ng Simbahan sa araw na ito na inilaan para sa pagdiriwang ng Paggunita kay San Antonio de Padua, pari at pantas ng Simbahan, ay nakatuon at nakasentro sa mga salitang ito na binigkas ng Poong Jesus Nazareno sa simula ng Ebanghelyo para sa araw na ito. Dapat maging taos-puso ang ating pag-ibig para sa Diyos na pinatutunayan ng taos-puso nating pagtanggap at pagsunod sa Kaniyang kalooban. Katulad ng iba pang mga Santo at Santa sa kasamahan ng mga banal sa langit, ang mga salitang ito ng Poong Jesus Nazareno ay laging isinabuhay ni San Antonio de Padua nang buong katapatan sa bawat sandali ng kaniyang buhay dito sa lupa. 

Tampok sa salaysay sa Unang Pagbasa para sa araw na ito ang muling pagpatak ng ulan sa Israel matapos ang tagumpay ng Panginoong Diyos laban kay Baal sa Bundok ng Carmelo. Dahil ipinasiya ng buong bayan ng Israel sa pangunguna ng hari nitong si Acab at ng kaniyang asawang si Jezebel na suwayin, talikuran, at itakwil ang Diyos at sambahin ang diyus-diyusang si Baal, sa loob ng mahabang panahon, hindi umulan o nagkahamog sa Israel. Subalit, matapos ang tagumpay ng Panginoon laban kay Baal, ang buong bayan ng Israel ay nagbalik-loob sa Panginoon. Ito ang dahilan kung bakit ipinasiya ng Panginoong Diyos na umulan at magkahamog muli sa Israel. 

Inilahad sa Salmong Tugunan para sa araw na ito ang ilan sa mga dahilan kung bakit ang Diyos lamang ang dapat paurihan, pasalamatan, ibigin, at sambahin ng lahat sa daigdig. Walang ibang diyos maliban sa Panginoon. Ang tunay na Diyos ay walang iba kundi ang Panginoong Diyos. Binubuo ng Tatlong Persona - Ama, Anak, at Espiritu Santo - ang tunay at nag-iisang Diyos na ating minamahal, pinararangalan, pinupuri, pinasasalamatan, pinaglilingkuran, pinananaligan, sinasampalatayan, at sinasamba nang buong katapatan bilang Simbahan. 

Ang kakaibang talino at ang kakaibang galing at husay sa pagsasalita sa mga tao ay ilan lamang sa mga biyayang ipinagkaloob ng Panginoong Diyos kay San Antonio de Padua. Subalit, bagamat ipinagkaloob sa kaniya ng Panginoong Diyos ang biyaya ng kakaibang talino at ang biyaya ng kakaibang galing at husay sa pagsasalita sa mga tao, ipinasiya ni San Antonio de Padua na hindi gamitin ang mga biyayang iyon para sa sarili niyang kapakanan. Bagkus, ipinasiya ni San Antonio de Padua na gamitin ang mga biyayang ito na kaloob sa kaniya ng Diyos upang ang lahat ng mga makikinig sa kaniya noong namumuhay siya sa mundo patungo sa Diyos na buong kababaang-loob at pinaglingkuran sa bawat sandali ng kaniyang buhay sa mundo. Ito ang laging ipinasiya ni San Antonio de Padua sa bawat sandali ng kaniyang buhay sa mundo. Akayin ang lahat ng mga makikinig sa kaniya patungo sa Panginoong Diyos para sa lalong ikadarakila ng Kaniyang Kabanal-Banalang Pangalan. 

Gaya ni San Antonio de Padua, akayin natin ang ating kapwa patungo sa Diyos. Ang daan patungo sa Diyos ay dapat nating ituro at ipakita sa kanila. Sa pamamagitan ng pagiging mga salamin at daluyan ng mga biyaya ng Diyos, magagawa natin ito. 

BUNGA NG KANIYANG PAG-IBIG

9 Hunyo 2024 

Ika-10 Linggo sa Karaniwang Panahon [B] 

Genesis 3, 9-15/Salmo 129/2 Corinto 4, 13-5, 1/Marcos 3, 20-35 

This faithful photographic reproduction of the painting (c. 16th/17th century) Christ Speaking to the Faithful, by Fernão Gomes (1548-1612), as well as the actual work of art itself from the Leiloeira São Domingos, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Sa piling ng Poong D'yos may pag-ibig at pagtubos" (Salmo 139, 7). Buong linaw na inilarawan sa mga salitang ito na binigkas ng tampok na mang-aawit sa Salmong Tugunan ang temang nais talakayin at pagnilayan ng Simbahan sa Linggong ito. Ang ating mga pansin ay itinutuon ng Simbahan sa biyaya ng pagliligtas ng Panginoong Diyos na bunga ng Kaniyang dakilang pag-ibig para sa ating lahat. Dahil sa dakilang pag-ibig ng Diyos, tayong lahat ay ipinasiya Niyang iligtas sa pamamagitan ng Mahal na Poong Jesus Nazareno, ang Kaniyang Bugtong na Anak. 

Ipinapaalala sa atin ng mga Pagbasa para sa Linggong ito ang dahilan kung bakit lagi tayong nagkakatipon-tipon bilang Simbahan linggo-linggo. Kahit napapaloob tayo sa Karaniwang Panahon, lagi pa rin tayong nagkakatipon-tipon bilang Simbahan upang mag-alay ng taos-pusong papuri, pasasalamat, at pagsamba sa Banal na Santatlo. Hindi lamang tayo nagkakatipon-tipon bilang Simbahan sa mga espesyal na panahon lamang gaya na lamang ng Adbiyento, Pasko ng Pagsilang, Kuwaresma, mga Mahal na Araw, Pasko ng Muling Pagkabuhay, at Kapistahan ng mga Santong Pintakasi ng iba't ibang mga pamayanan. Bagkus, bilang mga bumubuo sa tunay at nag-iisang Simbahang itinatag ng Poong Jesus Nazareno, linggo-linggo tayo nagkakatipon-tipon upang handugan Siya ng taos-pusong papuri, pasasalamat, at pagsamba. Dahil dito, mayroon tayong obligasyon bilang mga Katoliko na magsimba tuwing Linggo. Kahit isang beses lamang sa loob ng sanlinggo, dapat natin itong ilaan para sa Poong Jesus Nazareno sa pamamagitan ng pagsisimba. Ito nga ang dahilan kung bakit ang Linggo ay tinatawag na araw ng Panginoon. 

Dakilang pag-ibig ang dahilan kung bakit ipinangako ng Panginoong Diyos na ililigtas Niya ang sangkatauhan sa Unang Pagbasa. Bilang tugon sa pagkalugmok ng tao sa kasalanan, ipinasiya ng Panginoong Diyos na tubusin at palayain mula sa kasalanan ang sangkatauhan. Hindi Niya ipinasiyang pabayaan na lamang ang sangkatauhan na tuluyang mapahamak sapagkat ipinasiya nilang talikuran at suwayin Siya, kahit na ito mismo ang magiging dahilan ng kanilang pagkalugmok sa kasalanan. Ang pangakong binitiwan ng Diyos sa tampok na salaysay sa Unang Pagbasa para sa Linggong ito ay sumasalamin sa Kaniyang pasiyang ibigin pa rin ang sangkatauhan. 

Hindi ikinubli ni Apostol San Pablo ang mga hirap, sakit, at pagdurusang hinarap at tiniis niya sa bawat sandali ng kaniyang misyon bilang apostol at saksi ng Mahal na Poong Jesus Nazareno. Nakasentro sa ilan sa mga hirap, sakit, pagdurusa, pagsubok, at pag-uusig na kaniyang hinarap at tiniis sa bawat sandali ng kaniyang tungkulin at misyon bilang isang apostol at saksi ng Poong Jesus Nazareno ang kaniyang pangaral sa Ikalawang Pagbasa. Buong kababaang-loob na inihayag ni Apostol San Pablo na napakahirap ang kaniyang ginagawa bilang apostol at saksi ni Kristo. Subalit, dahil sa kaniyang tapat at dalisay na pananalig at pananampalataya sa Panginoon, nanatili pa rin siyang tapat sa kaniyang misyon. Isa lamang ang dahilan nito - naakit siya sa pag-ibig ng Diyos na tunay ngang dakila na inihayag sa kaniya ni Jesus Nazareno. 

Mayroong dalawang bahagi ang tampok na salaysay sa Ebanghelyo. Sa unang bahagi ng salaysay sa Ebanghelyo, ang Mahal na Poong Jesus Nazareno ay nagsalita nang patalinghaga tungkol sa Kaniyang misyon. Hindi Siya dumating sa mundong ito bilang kampon ng demonyo. Bagkus, ang Poong Jesus Nazareno ay dumating bilang ipinangakong sugo ng Diyos. Dumating sa daigdig na ito ang Bugtong na Anak ng Diyos na si Jesus Nazareno upang tuparin ang kalooban ng Ama. Sa ikalawang bahagi naman ng salaysay sa Ebanghelyo, ang Nuestro Padre Jesus Nazareno ay nagsalita tungkol sa pagiging bahagi ng Kaniyang pamilya. Kung nais nating maging bahagi ng pamilya ng Panginoong Jesus Nazareno, sundin rin natin ang kalooban ng Diyos. 

Niloob ng Diyos na iligtas at palayain tayo mula sa kasalanan sa pamamagitan ng ipinangakong Mesiyas at Manunubos na si Jesus Nazareno, ang Kaniyang Bugtong na Anak. Kusang-loob Niya itong ipinasiyang gawin dahil tunay nga Niya tayong iniibig at kinahahabagan. Sa pamamagitan nito, pinagkakalooban Niya tayo ng pagkakataong makapiling Siya magpakailanman. Ito ang dahilan kung bakit mayroong Simbahan. 

Kusang-loob na ibinigay ng Poong Jesus Nazareno ang Kaniyang sarili upang tayong lahat ay mailigtas. Ihandog rin natin ang ating mga sarili sa Kaniya nang taos-puso. Ang ating taimtim na debosyon, pamamamanata, panananalig at pananampalataya sa Kaniya na nagligtas sa atin nang kusang-loob ay lagi nating isabuhay.