TAPAT PA RIN

2 Agosto 2024

Biyernes ng Ika-17 Linggo sa Karaniwang Panahon (II) 

Jeremias 26, 1-9/Salmo 69/Mateo 13, 54-58 

SCREENSHOT: Daily Mass at the Manila Cathedral - January 05, 2023 (12:10 pm) - YouTube

Ang mga Pagbasa para sa araw na ito ay nakasentro sa hindi pagtanggap ng marami sa mga banal na tao. Ipinapaalala sa atin ng Simbahan sa araw na ito na hindi ligtas mula sa napakasakit na karanasang ito ang mga banal na tao. Maaaring sabihing isa itong pangkaraniwang karanasan para sa mga banal na tao. Hindi sila pakikinggan at tatanggapin ng nakararami. Kahit sumusunod lamang nila sa kalooban ng Panginoon, hindi sila pakikinggan at tatanggapin ng nakararami. 

Sa wakas ng salaysay sa Unang Pagbasa, si Propeta Jeremias ay hindi tinanggap ng mga nakarinig sa kaniya. Bagkus, labis na nagalit sa kaniya ang mga tao. Nalagay sa panganib ang buhay ni Propeta Jeremias. Katunayan, binalak pa nga siyang patayin ng marami sa kanila. Gaya ni Propeta Jeremias sa salaysay sa Unang Pagbasa, ang Bugtong na Anak ng Diyos na si Jesus Nazareno ay hindi tinanggap ng Kaniyang mga kababayan sa Nazaret. Ang mismong Bugtong na Anak ng Diyos na kusang-loob na dumating sa mundong ito bilang ipinangakong Mesiyas at Manunubos ng tanan ay hindi tinanggap. 

Inilarawan sa unang taludtod sa Salmong Tugunan ang katotohanan ng pagiging mga tapat na lingkod ng Diyos. Ang mga lingkod ng Panginoong Diyos gaya na lamang ng mga propeta, mga apostol, at ang mga sumunod sa kanila bilang mga misyonero at saksi ng Panginoon ay hindi tinanggap. Pati nga ang mismong Bugtong na Anak ng Diyos na si Jesus Nazareno ay hindi tinanggap ng marami. 

Mahirap maging banal at kalugud-lugod sa paningin ng Diyos. Subalit, ang mga tunay na umiibig, nananalig, sumasampalataya, nagpupuri, at sumasamba sa Diyos ay hindi tumitigil sa tapat at taos-pusong paglilingkod at pagsunod sa Kaniya, kahit na hindi sila tanggapin ng nakararami. Anuman ang mangyari, sa hirap at ginhawa, mananatili pa rin silang tapat sa Panginoong Diyos. 

BUKAS SA PAKIKIPAGRELASYON KAY JESUS NAZARENO

29 Hulyo 2024 

Paggunita kina Santa Marta, Santa Maria, at San Lazaro 

1 Juan 4, 7-16/Salmo 33/Juan 11, 19-27 (o kaya: Lucas 10, 38-42) 

This faithful photographic reproduction of the painting (c. 1517-1519) The Raising of Lazarus by Sebastiano del Piombo (1485–1547), as well as the actual work of art itself from the National Gallery, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age.

"Mag-ibigan tayo sapagkat mula sa Diyos ang pag-ibig" (1 Juan 4, 7). Sa mga salitang ito mula sa pangaral ni Apostol San Juan na itinampok at inilahad sa Unang Pagbasa nakasentro ang pagninilay ng Simbahan para sa araw na ito. Inilaan ng Simbahan ang araw na ito upang parangalan ang tatlong banal na tao na naging mga malapit na kaibigan ng Poong Jesus Nazareno - sina Santa Marta, Santa Maria, at San Lazaro ng Betania. Binuksan nila ang kanilang mga sarili sa paanyaya ng Poong Jesus Nazareno upang maging Kaniyang mga kaibigan at lagi nilang ipinakita sa Kaniya ang kanilang tapat at taos-pusong pag-ibig para sa kanilang kaibigang mahal ng Mahal na Poong Jesus Nazareno.  

Itinuturo ng magkapatid na sina Santa Marta, Santa Maria, at San Lazaro ng Betania sa bawat isa sa atin kung paanong maging mga minamahal na kaibigan ng Mahal na Poong Jesus Nazareno. Katunayan, ipinapaalala sa atin ng magkapatid na ito na nais makipag-ugnayan sa atin ang Mahal na Poong Jesus Nazareno. Ang kailangan nating gawin ay maging bukas at tanggapin ang paanyayang ito. Sa pamamagitan nito, ang ating tapat at taos-pusong pananalig at pananampalataya sa Mahal na Poong Jesus Nazareno ay ating pinapatunayan. 

Buong linaw na inihayag ng tampok na mang-aawit sa Salmong Tugunan; "Palagi kong pupurihin ang Dakilang Poon natin" (Salmo 33, 2a). Tanging mga tapat at taos-puso sa kanilang pananalig at pananampalataya sa Mahal na Poon ang makagagawa nito. Ang mga tapat at taos-pusong nananalig at sumasampalataya sa Panginoong Jesus Nazareno ay tunay ngang nag-aalay ng tapat at taos-pusong pasasalamat, papuri, at pagsamba sa Kaniya. Sabi nga rin sa alternatibong Salmong Tugunan na galing rin sa isa sa mga taludtod nito: "Magsumikap tayong kamtin ang Panginoong butihin" (Salmo 33, 9a). Ang magkapatid mula sa Betania na sina Santa Marta, Santa Maria, at San Lazaro na kilala rin bilang mga minamahal na kaibigan ni Kristo ay mga halimbawa nito. 

Tampok sa Ebanghelyo ang tapat at taos-pusong pananalig ng magkapatid mula sa Betania sa kanilang minamahal na kaibigang si Kristo. Sa isa sa dalawang tampok na salaysay sa Ebanghelyo, inihayag ni Santa Marta sa Panginoong Jesus Nazareno ang kaniyang tapat at taos-pusong pananalig sa Kaniya bilang Anak ng Diyos at Mesiyas na kaloob ng Diyos sa tanan. Sa alternatibong Ebanghelyo, ibinigay ng kapatid nina Santa Marta at San Lazaro na si Santa Maria ang kaniyang atensyon kay Kristo Hesus habang nangangaral Siya sa kanilang bahay sa Betania. Ang buo niyang atensyon ay buong puso niyang inihandog sa Mahal na Poong Jesus Nazareno. Isinantabi niya ang lahat para lamang sa Poong Jesus Nazareno. 

Nais ng Mahal na Poong Jesus Nazareno na makipag-ugnayan sa atin. Inaanyayahan tayo ni Jesus Nazareno na makipagrelasyon sa Kaniya. Maging bukas nawa tayo sa paanyayang ito ng Poong Jesus Nazareno, gaya ng magkapatid na sina Santa Marta, Santa Maria, at San Lazaro ng Betania.

ALAM NIYA KUNG ANO ANG GAGAWIN

28 Hulyo 2024 

Ika-17 Linggo sa Karaniwang Panahon [B] 

2 Hari 4, 42-44/Salmo 144/Efeso 4, 1-6/Juan 6, 1-15

This faithful photographic reproduction of the painting (c. Between 1580 and 1590) Feeding the Five Thousand (July) by Marten van Valckenborch (1535–1612), as well as the actual work of art itself from the Kunsthistorisches Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang pagninilay ng Simbahan para sa araw na ito ay nakasentro sa mga salitang ito mula sa Mabuting Balita: "Tumanaw si Hesus, at nakita Niya ang napakaraming tao. Tinanong Niya si Felipe, 'Saan tayo bibili ng tinapay upang makakain ang mga taong ito?' Sinabi Niya ito . . . [dahil] alam ni Hesus kung ano ang Kaniyang gagawin" (Juan 6, 5-6). Isinalungguhit sa mga salitang ito mula sa Ebanghelyo na laging may plano ang Poong Jesus Nazareno sa lahat ng oras. Lagi Siyang may plano para sa ikabubuti ng lahat at lagi Siyang handang isakatuparan ang mga nasabing plano sa takdang oras. 

Walang sandaling hindi naging handa ang Panginoon. Sa kasaysayan ng pagligtas sa atin ng Diyos sa pamamagitan ng ipinangakong Mesiyas at Tagapagligtas na walang iba kundi ang Nuestro Padre Jesus Nazareno, ang Diyos ay laging handa. Lagi Siyang may plano. Alam ng Diyos kung ano ang Kaniyang gagawin. Ni minsan ay nagkaroon ng pagkakataon o sandaling hindi alam ng Diyos kung ano ang Kaniyang gagawin. Sa bawat sandali at pagkakataon, alam lagi ng Diyos kung ano ang Kaniyang gagawin at lagi rin Siyang handang kumilos. 

Pinatunayan ng Mahal na Poong Jesus Nazareno sa pamamagitan ng pagpaparami sa mga tinapay at isda sa Ebanghelyo na totoo ngang mapagkalinga ang Diyos. Ang himala ng Mahal na Poong Jesus Nazareno sa Ebanghelyo ay katulad rin ng himalang ginawa ng Panginoong Diyos sa Unang Pagbasa. Maaari ngang sabihin inulit lamang ng Diyos ang himalang ginawa Niya sa Unang Pagbasa sa pamamagitan ng Poong Jesus Nazareno sa Ebanghelyo. Sa pamamagitan ng dalawang kababalaghang ito sa mga tampok na salaysay sa Unang Pagbasa at Ebanghelyo, pinatunayan ng Diyos sa lahat ng mga tao ang Kaniyang pagiging mapagkalinga. Katulad ng sabi sa Salmong Tugunan, "Pinakakain Mong tunay kaming lahat, O Maykapal" (Salmo 144, 16). 

Buong linaw na isinalungguhit ni Apostol San Pablo sa kaniyang pangaral na inilahad sa Ikalawang Pagbasa na tayong lahat ay bahagi ng kawan ng Diyos. Dahil dito, dapat tayong mamuhay banal at kalugud-lugod dahil ito ang nararapat gawin bilang kawan ng Diyos. Tayong lahat ay laging kinakalinga ng Panginoon. Kaya naman, dapat nating ipakilala ang Panginoon sa lahat bilang mapagkalingang pastol at tagapag-alaga. Ang pagiging mapagkalinga, mahabagin, maawain, at mapagmahal ng Panginoong Diyos ay dapat nating ipalaganap sa pamamagitan ng pamumuhay nang banal at kalugud-lugod sa Kaniyang paningin. 

Ipinapaalala sa atin ng Simbahan sa araw na ito na maaasahan natin ang Diyos sa bawat sandali ng ating buhay. Lagi Siyang handang kumilos. Alam Niya kung ano ang kailangan Niyang gawin. Manalig lang tayo sa Kaniya na laging kumakalinga sa atin. Sa pamamagitan ng pamumuhay nang banal at kalugud-lugod sa Kaniyang paningin, pinatutunayan natin ang ating taos-pusong pananalig sa tunay na kumakalinga sa atin na walang iba kundi ang Panginoon. 

BUKAS SIYA SA LAHAT

26 Hulyo 2024 

Paggunita kina San Joaquin at Santa Ana, mga magulang ng Mahal na Birheng Maria 

Jeremias 3, 14-17/Jeremias 31/Mateo 13, 13-17

SCREENSHOT: QUIAPO CHURCH 4AM #OnlineMass #QuiapoDay • 19 July 2024 • FRIDAY of the 15th Week in Ordinary Time (Facebook and YouTube) 

Sa unang tingin, parang mahirap iugnay ang aral na nais isalungguhit ng pahayag ng Panginoong Diyos na inilahad ni Propeta Jeremias sa Unang Pagbasa at sa Salmong Tugunan sa aral na nais isalungguhit ng Mahal na Poong Jesus Nazareno sa Banal na Ebanghelyo. Tampok sa Unang Pagbasa para sa araw na ito ang panawagan ng Diyos para sa Kaniyang bayan. Ang Panginoong Diyos ay nanawagan sa Kaniyang bayan na magbalik-loob sa Kaniya na tunay na mapagmahal at mapagkalinga. Nakasentro ang awit ng papuri ng tampok na mang-aawit sa Salmong Tugunan sa habag, awa, pag-ibig, at pagiging mapag-aruga ng Diyos. Ipinaliwanag naman ni Jesus Nazareno ang talinghaga tungkol sa manghahasik sa Ebanghelyo. Paano maiuugnay ang mga aral na nais isalungguhit sa Unang Pagbasa at Salmong Tugunan sa aral na tinalakay at sinaliksik sa Ebanghelyo? 

Madalas na tinatalakay kung anong uri ng lupang inilarawan ng Nuestro Padre Jesus Nazareno sa Ebanghelyo ang bawat isa sa atin sa tuwing pinagninilayan natin nang buong kataimtiman ang pangaral Niyang ito na inilahad sa Ebanghelyo. Anong uri ng lupa tayo? Subalit, maganda ring pagnilayan ang paliwanag ng Poong Jesus Nazareno tungkol sa talinghaga ng manghahasik sa bukid na inilahad sa Ebanghelyo mula sa prespektibo ng manghahasik na sumasagisag sa Panginoon. Bakit Niya ipinasiyang gawin iyon? Hindi ba dapat iningatan Niya ang mga binhi upang maihasik ang mga ito sa mabuting lupa upang magkaroon ng bunga? Gaya ng manghahasik sa talinghaga, hindi ba dapat itinuon na lamang ng Panginoon sa mga talagang makikinig sa Kaniya at susunod sa Kaniya nang buong katapatan hanggang sa huli? 

Oo, mas madali para sa Poong Jesus Nazareno na ituon na lamang sa mga tunay na makikinig at susunod sa Kaniya nang buong katapatan at pananalig hanggang sa huli ang Kaniyang pansin at atensyon. Kung susundin Niya ang lohika o pag-iisip ng tao, hindi mag-aaksaya ng panahon ang Poong Jesus Nazareno sa mga hindi makikinig at susunod sa Kaniya nang buong katapatan. Sayang lang ang oras at panahon. 

Bagamat alam ng Poong Jesus Nazareno na hindi lahat ay magiging tapat sa Kaniya, ipinasiya pa rin Niyang ipalaganap ang Kaniyang Salita sa lahat. Nais Niyang bigyan ng pagkakataon ang lahat ng mga tao na makinig at sumunod sa Kaniyang Salita. Sa pamamagitan nito, ipinapakita ng Poong Jesus Nazareno na tunay Siyang mahabagin, maawain, mapagmahal, at mapagkalinga, kahit may mga hindi magpapahalaga nito. 

Nais ng Mahal na Poong Jesus Nazareno na maranasan nating lahat ang Kaniyang habag, awa, pag-ibig, at kalinga. Subalit, nasa atin ang pasiya kung magiging bukas tayo sa pagkakataong ito na laging ibinibigay Niya sa atin sa bawat sandali ng ating pansamantalang paglalakbay sa mundong ito. 

KATAPATAN DAHIL SA PAG-IBIG

25 Hulyo 2024 

Kapistahan ni Apostol Santiago 

2 Corinto 4, 7-15/Salmo 125/Mateo 20, 20-28 

This faithful photographic reproduction of the painting (c. 17th century) Santiago Apóstol which is attributed to Juan Martín Cabezalero (1633–1673), as well as the actual work of art itself from the Royal Academy of Fine Arts of San Fernando, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Ang pagninilay ng Simbahan sa araw na ito ay nakatuon sa mga salitang binigkas ng Mahal na Poong Jesus Nazareno sa dalawang anak ni Zebedeo na sina Apostol Santo Santiago at Apostol San Juan sa salaysay na itinampok sa Banal na Ebanghelyo: "Ang hirap na babatahin Ko'y babatahin nga ninyo. Ngunit wala sa Akin ang pagpapasiya kung sino ang mauupo sa Aking kanan at sa Aking kaliwa" (Mateo 20, 23). Inihayag nang buong linaw ng Poong Jesus Nazareno sa pamamagitan ng mga salitang ito na binigkas Niya sa dalawang apostol na ito sa Mabuting Balita na hindi posisyon ang dapat maging dahilan ng tapat na pagsunod sa Kaniya hanggang sa huli. Bagkus, ang pagsunod sa Poong Jesus Nazareno ay dapat maging taos-puso. 

Inilaan ng Simbahan ang araw na ito upang ipagdiwang ang kagitingan, kabanalan, at katapatan ni Apostol Santo Santiago Mayor. Gaya ng kaniyang kapatid at ng iba pang mga apostol, natutunan ni Apostol Santo Santiago Mayor na dalisay na pag-ibig ang dapat maging dahilan ng pagsunod sa Panginoong Jesus Nazareno. Kung posisyon sa langit ang dahilan ng pagsunod sa Nuestro Padre Jesus Nazareno, nagkamali tayo ng sinundan. Hindi mga ganyang tagasunod ang hanap ni Jesus Nazareno. 

Nagsalita si Apostol San Pablo tungkol sa kaniyang misyon bilang apostol at saksi ng Mahal na Poong Jesus Nazareno sa Ikalawang Pagbasa. Sa kabila ng mga hirap, pag-uusig, at sakit na kaakibat nito, ipinasiya pa rin ni Apostol San Pablo na magsalita pa rin sa tanan tungkol sa Poong Jesus Nazareno hanggang sa huli. Ang dahilan nito ay ang kaniyang pananampalataya sa Panginoon (2 Corinto 4, 13). Pananampalataya na bunga ng taos-pusong katapatan at pag-ibig sa Nuestro Padre Jesus Nazareno. Dahil dito, gaya ng inihayag ng tampok na mang-aawit sa Salmong Tugunan, napuspos ng tuwa't galak ang mga apostol, kabilang na rito si Apostol San Pablo, sa kabila ng iba't ibang mga hirap, sakit, at pag-uusig na kaakibat ng kanilang misyon. 

Hindi paghahangad para sa posisyon ang dapat maging dahilan ng ating pananalig, pagsunod, at pananampalataya sa Poong Jesus Nazareno. Bagkus, ang dapat maging dahilan nito ay ang pag-ibig. Dalisay at taos-pusong pag-ibig para sa Nuestro Padre Jesus Nazareno ang magpapalakas ng loob ng Kaniyang mga tapat na tagasunod na sumasampalataya, nananalig, at sumasamba sa Kaniya nang taos-puso.  

PANANABIK SA ISA'T ISA

22 Hulyo 2024 

Kapistahan ni Santa Maria Magdalena 

Awit ni Solomon 3, 1-4a (o kaya: 2 Corinto 5, 14-17)/Salmo 62/Juan 20, 1-2. 11-18 

This faithful photographic reproduction of the painting (Between circa 1525 and 1530) Noli me tangere by Benvenuto Tisi (1481–1559), as well as the actual work of art itself from the Kunsthistorisches Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1559. This is also in the Public Domain in the United States because it was published (or registered with the U.S. Copyright Office) before January 1, 1929. 

"Aking kinasasabikan, Panginoon, Ikaw lamang" (Salmo 62, 2b). Sa mga salitang ito nakasentro ang pagninilay ng Simbahan sa araw na ito. Itinatampok ng Simbahan sa Kapistahang ipinagdiriwang sa araw na ito ang isa sa napakaraming banal na tao na walang ibang pinanabikan kundi ang Panginoon na walang iba kundi si Santa Maria Magdalena. Magmula sa sandaling baguhin ng Poon ang kaniyang buhay, wala nang iba pang hinangad at pinanabikan si Santa Maria Magdalena kundi ang Poon. 

Dalawang beses tinanong si Santa Maria Magdalena kung bakit siya umiyak sa labas ng libingan ng Mahal na Poong Jesus Nazareno. Ang unang nagtanong sa kaniya kung bakit siya umiyak sa labas ng Banal na Libingan ay dalawang anghel. Sinundan agad ito ng pangalawang nagtanong sa kaniya kung bakit siya umiyak sa labas ng Banal na Libingan - ang Muling Nabuhay na Poong Jesus Nazareno na napagkamalan niyang tagapag-alaga ng halamanan. Nang makilala Siya ni Santa Maria Magdalena, naging galak ang lungkot, hapis, at luha ni Santa Maria Magdalena. 

Sa Unang Pagbasa, itinampok ang mga salita ng isang tunay na nananabik para sa Panginoong Diyos. Inihayag ni Apostol San Pablo sa kaniyang pangaral na inilahad sa alternatibong Unang Pagbasa na nananabik rin para sa atin ang Panginoon. Dahil sa dakila Niyang pag-ibig para sa ating lahat, ipinasiya ni Kristo na maghirang at magtalaga ng mga sasaksi sa Kaniya sa iba't ibang bahagi ng daigdig. Ang misyong ito, na unang ibinigay at ipinatupad ni Kristo sa mga apostol, ay ipinagpapatuloy pa rin ng Simbahan sa kasalukuyang panahon. 

Tayong lahat ay pinananabikan ng Mahal na Poong Jesus Nazareno. Pinananabikan rin ba natin Siya? 

TAGAPAG-ALAGA NATIN

21 Hulyo 2024 

Ika-16 na Linggo sa Karaniwang Panahon [B] 

Jeremias 23, 1-6/Salmo 22/Efeso 2, 13-18/Marcos 6, 30-34 

This faithful photographic reproduction of the painting (c. Between 1886 and 1894) Jesus Preaches in a Ship by James Tissot (1836–1902), as well as the actual work of art itself from the European Art collection of the Brooklyn Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

Itinutuon ng Simbahan ang ating mga pansin sa mga salitang ito na matatagpuan sa wakas ng Mabuting Balita para sa Linggong ito: "Paglunsad ni Hesus, nakita Niya ang napakaraming tao; nahabag Siya sa kanila sapagkat para silang mga tupang walang pastol. At sila'y tinuruan Niya ng maraming bagay" (Marcos 6, 34). Tiyak na hindi na mabilang kung ilang ulit na nating pinagtuunan ng pansin, tinalakay, at pinagnilayan bilang Simbahan ang misteryo ng dakilang habag at awa ng Diyos na inihayag Niya sa lahat sa pamamagitan ng Mahal na Poong Jesus Nazareno. Katunayan, maaari nating sabihing madalas natin itong gawin bilang Simbahan. Parang pinaalalahanan tayo na tunay ngang mahabagin at maawain ang Panginoong Diyos. 

Sa konteksto ng Ebanghelyo, balak sana ng Poong Jesus Nazareno na magtungo sa isang ilang na pook kasama ang mga apostol upang magpahinga. Isinalungguhit ito nang buong linaw sa simula ng salaysay sa Ebanghelyo (Marcos 6, 32). Nagbago ang plano ng Panginoong Jesus Nazareno nang makita Niyang nagsidagsaan sa nasabing lugar ang napakaraming tao dahil nakilala nila Siya (Marcos 6, 33). Dahil sa dami ng mga taong nagpasiyang sumunod sa Kaniya sa lugar na yaon, napuspos ng habag at awa si Jesus Nazareno at binago ang Kaniyang plano. Ipinamalas ng Nuestro Padre Jesus Nazareno ang Kaniyang habag at awa sa kanila sa pamamagitan ng Kaniyang kusang-loob na pagmiministeryo sa kanila. 

Buong linaw na inihayag ng Panginoong Diyos sa pamamagitan ni Propeta Jeremias sa Unang Pagbasa na magtatalaga Siya ng mga pastol na may habag at malasakit para sa Kaniyang bayang nagkawatak-watak. Ang mga pastol na ito na itatalaga ng Diyos ay magiging mga salamin at daluyan ng Kaniyang habag at malasakit. Gaya ng inihayag ng tampok na mang-aawit sa Salmong Tugunan, ang Panginoong Diyos ay ang tunay na Pastol ng tanan. Inihayag naman ni Apostol San Pablo na dumating si Kristo sa mundong ito alang-alang sa Kaniyang mga tupa. Sa Ebanghelyo, habag ang dahilan kung bakit ang Poong Jesus Nazareno ay nagministeryo sa mga tao, kahit na tumungo Siya sa lugar na iyon upang magpahinga kasama ang mga apostol. 

Ang Mahal na Poong Jesus Nazareno ay ang ating tagapag-alaga. Kusang-loob na ipinasiya Niyang maging ating tagapag-alaga dahil sa Kaniyang habag at awa.

PUSPOS NG HABAG AT AWA

19 Hulyo 2024 

Biyernes ng Ika-15 Linggo sa Karaniwang Panahon (II) 

Isaias 38, 1-6. 21-22. 7-8/Isaias 38/Mateo 12, 1-8

SCREENSHOT: QUIAPO CHURCH 4AM #OnlineMass •  12 July 2024 • FRIDAY of the 14th Week in Ordinary Time (Facebook and YouTube)

 

"Sinasabi Ko sa inyo, naririto ang isang higit na dakila kaysa templo . . . Sapagkat ang Araw ng Pamamahinga ay nasa ilalim ng kapangyarihan ng Anak ng Tao" (Mateo 12, 6. 8). Buong linaw na isinalungguhit ng Poong Jesus Nazareno ang habag at awa ng Diyos sa pamamagitan ng mga salitang ito na Kaniyang binigkas sa huling bahagi ng Ebanghelyo para sa araw na ito. Ipinakilala ng Mahal na Poong Jesus Nazareno ang Kaniyang sarili bilang tunay na Diyos na puspos ng habag at awa para sa lahat. 

Ang habag at awa ng Panginoong Diyos para sa tanan ay ang paksang pinagtutuunan ng pansin at pinagninilayan ng Simbahan sa araw na ito. Sa Unang Pagbasa, isang pangako ang binitiwan ng Panginoong Diyos kay Haring Ezequias. Inilahad ni Propeta Isaias kay Haring Ezequias ang pangakong ito ng Panginoong Diyos. Gaya ng sabi sa wakas ng salaysay sa Unang Pagbasa, tinupad ng Panginoong Diyos ang pangakong Kaniyang binitiwan. Hindi Niya kinalimutan ang Kaniyang pangako bilang patunay na tunay nga Siyang mahabagin at maawain. Laging tinutupad ng Diyos ang Kaniyang mga pangako bilang patunay ng Kaniyang habag at awa. Dahil sa Kaniyang dakilang habag at awa, laging ipinapasiya ng Diyos na tuparin ang Kaniyang mga pangako. 

Pinatotohanan ni Haring Ezequias sa kaniyang awit ng papuri sa Diyos na inilahad at itinampok sa Salmong Tugunan ang habag at awa ng Diyos. Bilang pasasalamat sa Diyos, naghandog si Haring Ezequias ng isang awit ng papuri sa Panginoong Diyos kung saan nagpatotoo siya tungkol sa habag at awa ng Diyos na nagdulot sa kaniya ng kagalingan. Ipinasiya niyang ipaalam sa lahat sa pamamagitan ng awit na ito na tunay ang habag at awa ng Diyos. 

Nagpakita ng habag at awa sa mga apostol ang Mahal na Poong Jesus Nazareno sa tampok na salaysay sa Ebanghelyo. Binigyan Niya sila ng pahintulot na mangitil ng uhay at kumain ng mga butil sa triguhan, kahit Araw ng Pamamahinga. Ipinagtanggol pa nga Niya sila mula sa mga Pariseo sa pamamagitan ng pagpapalala sa kanila sa ginawa ni Haring David at ng kaniyang mga kasama (1 Samuel 21). Ang Panginoong Jesus Nazareno, ang Diyos na totoo, ay nagpasiyang magpakita ng habag at awa. 

Hindi pusong bato ang Puso ng Mahal na Poong Jesus Nazareno. Ang Puso ng Mahal na Poong Jesus Nazareno ay isang pusong puspos ng habag at awa para sa lahat. 

BUNGA NG KANIYANG PAKIKINIG AT PAGSUNOD SA KALOOBAN NG DIYOS

16 Hulyo 2024 

Paggunita sa Mahal na Birheng Maria ng Bundok del Carmen 

Zacarias 2, 14-17/Lucas 1/Mateo 12, 46-50 

This faithful photographic reproduction of the painting (c. 1500) The Virgin of the Carmelitas by unknown artist, as well as the actual work of art itself from the Museo Lázaro Galdiano via Google Arts & Culture, is in the Public Domain ("No Copyright") ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

"Ito ang Aking ina at mga kapatid! Sapagkat ang sinumang sumusunod sa kalooban ng Aking Amang nasa langit ang siya Kong ina at mga kapatid" (Mateo 12, 50. Sa mga salitang ito na binigkas ng Poong Jesus Nazareno sa wakas ng tampok na salaysay sa Ebanghelyo para sa araw na ito nakatuon ang pansin ng Simbahan. Ang araw na ito ay inilaan upang parangalan ang Mahal na Inang si Mariang Birhen bilang Birhen ng Bundok del Carmen o Bundok ng Carmelo. Sa kasaysayan ng kaligtasan, ang Bundok del Carmen o Bundok ng Carmelo ay isang napakahalagang pook dahil sa lugar na ito, pinatunayan ng Panginoong Diyos na Siya lamang ang tunay ng Diyos at wala nang iba pa sa pamamagitan ng pagbaba ng apoy mula sa langit bilang tugon sa dalangin ni Propeta Elias (1 Hari 18). Nang sumapit ang takdang panahon, dumating sa daigdig bilang ipinangakong Mesiyas at Manunubos ang tunay na Diyos sa pamamagitan ng Poong Jesus Nazareno na dinala ng Mahal na Inang si Mariang Birhen sa kaniyang sinapupunan sa loob ng siyam na buwan bago ang Kaniyang pagsilang sa mundo.

Sa pamamagitan ng mga salitang binigkas Niya sa wakas ng tampok na salaysay sa Ebanghelyo, inihayag ng Panginoong Jesus Nazareno na maaaring maging bahagi ng Kaniyang pamilya ang bawat isa sa atin. Isa lamang ang kailangang gawin ng mga nagnanais maging bahagi ng pamilya ng Mahal na Poong Jesus Nazareno. Tuparin at sundin ang kalooban ng Diyos. Sa pamamagitan ng taos-pusong pakikinig, pagtupad, at pagsunod sa kalooban ng Diyos, ipinapakilala't ipinagmamalaki natin ang tunay na Diyos na ating sinasamba, iniibig, pinananaligan, at sinasampalatayanan nang buong katapatan. Pinapatunayan nating taos-puso ang ating pagpanig, panananalig, pag-ibig, at pagsamba sa tunay na Diyos. Ito ang ginawa ng Mahal na Birheng Maria sa bawat sandali ng kaniyang buhay sa mundo. Tinupad at sinunod niya nang taos-puso ang kalooban ng Diyos. 

Nagbitiw ng isang pangako ang Panginoong Diyos sa Kaniyang bayan sa pahayag na inilahad ni Propeta Zacarias sa Unang Pagbasa. Darating ang Panginoon na Siyang tunay na Diyos upang makapiling ang Kaniyang bayan. Tinupad nga ng Panginoong Diyos ang pangakong ito sa pamamagitan ng Mahal na Poong Jesus Nazareno. Ang pinakadakilang patunay ng walang maliw na katapatan ng Diyos ay walang iba kundi ang Mahal na Poong Jesus Nazareno. Sa Salmong Tugunan, inilahad ang kantikulo ng Mahal na Birheng Maria - ang Magnificat. Inilarawan ng Mahal na Birheng Maria sa bawat titik ng kaniyang awit-papuri o kantikulo na itinampok sa bawat taludtod ng Salmong Tugunan ang katapatan ng tunay na Diyos sa Kaniyang pangako. Tunay ang katapatan ng Diyos na totoo. Pinatunayan ito ng Banal na Sanggol, ang Panginoong Jesus Nazareno, na dinala ng Mahal na Birheng Maria sa kaniyang sinapupunan sa loob ng siyam na buwan bago Siya isilang sa mundo. 

Ang Mahal na Inang si Mariang Birhen ay naging Ina ng Diyos dahil ipinasiya niyang pakinggan, tuparin, at sundin nang taos-puso ang kalooban ng Diyos para sa kaniya. Sa pamamagitan ng kaniyang taos-pusong pagtanggap sa ipinangakong Mesiyas na walang iba kundi ang Poong Jesus Nazareno, ang Ikalawang Persona ng Kabanal-Banalang Santatlo, bilang kaniyang Anak na minamahal, naging bahagi ng pamilya ng tunay na Diyos ang Mahal na Birheng Maria. 

Katulad ng Mahal na Birheng Maria, maaari rin tayong maging bahagi ng pamilya ng tunay na Diyos. Makinig at sumunod sa Kaniya. Ang Kaniyang kalooban ay dapat nating pakinggan, tuparin, at sundin nang taos-puso. Ito ang magpapatunay na taos-puso ang ating pagmamahal, pananalig, pananampalataya, pagpanig, at pagsamba sa Kaniya, ang tunay na Diyos. Sa pamamagitan nito, ang tunay na Diyos na walang iba kundi ang Panginoon ay ating ipinapakilala't ipinagmamalaki. 

Habang patuloy tayong namumuhay at naglalakbay nang pansamantala sa daigdig na ito, lagi tayong binibigyan ng Panginoong Diyos ng pagkakataong ipakilala Siya sa lahat bilang tunay na Diyos na puspos ng pag-ibig, kagandahang-loob, habag, at awa para sa tanan. Sa pamamagitan nito, tayong lahat ay inaaanyayahan rin ng Diyos na maging bahagi ng Kaniyang pamilya. 

ANG KANIYANG PASIYA

14 Hulyo 2024 

Ika-15 Linggo sa Karaniwang Panahon [B] 

Amos 7, 12-15/Salmo 84/Efeso 1, 3-14 (o kaya: 1, 3-10)/Marcos 6, 7-13

This faithful photographic reproduction of the painting (c. Between 1886 and 1884) The Exhortation to the Apostles by James Tissot (1836–1902), as well as the actual work of art itself from the European Art Collection of the Brooklyn Museum, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Maituturing na isang pagsasanay para sa mga apostol ang ipinagawa ng Poong Jesus Nazareno sa kanila sa Ebanghelyo. Ang mga apostol ay isinasanay na ng Panginoong Jesus Nazareno para sa buhay misyonero. Isa itong pagsasanay para sa mga apostol dahil ito ang magiging buhay nila pagdating ng araw. Tutuparin muna ng Nazareno ang Kaniyang misyon bilang ipinangakong Mesiyas at Manunubos. Pagkatapos nito, si Jesus Nazareno ay aakyat sa langit. Kasunod nito, ang Espiritu Santo ay bababa sa kanila mula sa langit upang puspusin sila ng Kaniyang mga biyaya. Matapos ito, ang misyon ng mga apostol ay magsisimula. Ang misyon ng mga apostol ay ipakilala sa lahat ng mga tao ang Mahal na Poong Jesus Nazareno bilang ipinangakong Mesiyas na kaloob ng Diyos para sa ikaliligtas ng lahat. 

Hindi madali ang misyong ito na ibinigay ng Nuestro Padre Jesus Nazareno sa mga apostol. Bilang mga saksi ng Poong Jesus Nazareno, haharap at titiis ng maraming mga pagsubok at pag-uusig ang mga apostol. Mayroon pa ring mga magsasara ng pintuan ng kanilang mga puso at isipan sa Mahal na Poong Jesus Nazareno. Pati nga si Jesus Nazareno mismo ay hindi tinanggap ng nakararami, lalung-lalo na sa mga huling sandali ng Kaniyang buhay sa mundo noong nagpakasakit at namatay Siya sa Banal na Krus. Subalit, sa kabila nito, ipinasiya pa rin ng Panginoong Jesus Nazareno na isugo ang mga apostol bilang Kaniyang mga saksi sa bawat sulok ng daigdig. Ang pagsugo Niya sa mga apostol sa iba't ibang lugar sa tampok na salaysay sa Banal na Ebanghelyo ay isang pagsasanay para sa misyong tutuparin nila pagdating ng araw. 

Sa Unang Pagbasa, si Propeta Amos ay nagpakilala kay Amasias bilang propeta o tagapagsalita ng Panginoong Diyos. Bagamat isa lamang siya pastol ng mga tupa, si Amos ay hinirang pa rin ng Panginoong Diyos upang magsalita sa Kaniyang bayang hinirang, ang bayang Israel, bilang Kaniyang propeta. Ipapahayag ni Propeta Amos sa mga taga-Israel ang mga ipinasasabi sa kaniya ng Panginoong Diyos. Mas mahirap ito kaysa sa pagpapastol at pag-aalaga ng mga tupa. Subalit, ipinasiya ni Amos na buksan ang kaniyang puso at loobin sa Panginoong Diyos at sa Kaniyang kalooban. Dahil dito, buong sigasig niyang inilahad ang mga pahayag ng Panginoon sa Israel, kahit na nangangahulugang manganganib ang kaniyang buhay. 

Nagsalita tungkol sa pag-ibig ng Panginoong Diyos para sa lahat si Apostol San Pablo sa kaniyang pangaral na itinampok sa Ikalawang Pagbasa. Katunayan, sa simula ng kaniyang pangaral na inilahad at itinampok sa Ikalawang Pagbasa, hinikyat niya ang lahat ng mga Kristiyano, lalung-lalo na sa mga Kristiyano sa Efeso, na magalak at magpasalamat sa Diyos na nagpasiyang ipakita sa tanan ang Kaniyang dakilang pag-ibig. Ang pinakadakilang patunay ng dakilang pag-ibig ng Diyos ay walang iba kundi si Jesus Nazareno, ang ipinangakong Mesiyas at Tagapagligtas. Sa kabila ng mga tiisin, hirap, sakit, at pag-uusig na kaniyang dinanas bilang apostol at saksi ng Panginoon, ang lahat ng mga Kristiyano ay hinikayat pa rin niyang magalak at magpasalamat sa Diyos dahil sa dakilang pag-ibig na Kaniyang ipinasiyang ipakita sa lahat. 

Gaya ng sabi sa Salmong Tugunan: "Pag-ibig Mo'y ipakita, iligtas kami sa dusa (Salmo 84, 8). Ito ang ipinasiya ng Panginoong Diyos. Ang Poong Jesus Nazareno mismo ay ang pinakadakilang larawan at patunay ng pag-ibig ng Diyos para sa lahat. Dahil sa dakilang pag-ibig ng Diyos, ipinasiya Niyang ipagkaloob ang Poong Jesus Nazareno sa sangkatauhan bilang ipinangakong Mesiyas at Manunubos. Ito rin ang dahilan kung bakit patuloy na sumasaksi sa Poong Jesus Nazareno ang Simbahan sa kasalukuyan. Laging handang humarap at magtiis ng maraming pagsubok, hirap, tiisin, sakit, at pag-uusig ang Simbahan alang-alang sa Poong Jesus Nazareno. Ang pag-ibig ng Diyos na inihayag ng Poong Jesus Nazareno ay laging pinatotohanan ng Simbahan nang buong pananalig at katapatan sa Kaniya, gaano mang kahirap gawin ito. 

Dahil sa pag-ibig ng Diyos para sa lahat, ang Poong Jesus Nazareno ay dumating sa mundo bilang ipinangakong Mesiyas at Manunubos. Ito rin ang dahilan kung bakit si Jesus Nazareno ay nagpasiyang italaga ang mga apostol bilang Kaniyang mga saksi sa bawat panig at sulok ng daigdig na ito. Ang misyong ito na unang tinupad ng mga apostol ay ipinagpapatuloy ng Simbahang Siya mismo ang nagtatag dahil sa dakila Niyang pag-ibig para sa lahat. Nais Niyang makilala Siya ng lahat bilang Diyos na tunay na maawain, mahabagin, at mapagmahal. 

NAIS NIYANG MAGPAKILALA

12 Hulyo 2024 

Biyernes ng Ika-14 na Linggo sa Karaniwang Panahon (II) 

Oseas 14, 2-10/Salmo 50/Mateo 10, 16-23 

SCREENSHOT: Enero 29, 2024 | Maringal na Pagkilala bilang Pambansang Dambana ni Jesus Nazareno (Quiapo Church Facebook and YouTube)

Ang mga salitang binigkas ng Mahal na Poong Jesus Nazareno sa mga apostoles sa simula ng Ebanghelyo para sa araw na ito ay ang paksang nais bigyan ng pansin at pagnilayan ng Simbahan nang buong kataimtiman sa araw na ito. Isinalungguhit ang katotohanan tungkol sa pagiging isang apostol, tagasunod, misyonero, at saksi ng Mahal na Poong Jesus Nazareno. Napakahirap gawin ito dahil hindi magiging bukas sa Panginoon ang lahat. Katunayan, ang katotohanang ito ay nababatid rin ng Poong Jesus Nazareno. Subalit, sa kabila nito, ipinasiya pa rin ng Poong Jesus Nazareno na isugo ang mga apostol sa iba't ibang mga lugar upang ipakilala Siya sa lahat ng mga tao sa iba't ibang bahagi ng daigdig. 

Layunin ng Poong Jesus Nazareno sa pamamagitan ng pagbigkas sa mga salitang ito sa simula ng Ebanghelyo na patuloy Niyang ipinaliwanag sa mga sumunod na bahagi nito na bigyan ng isang ideya o larawan ang mga alagad tungkol sa kanilang gagawin bilang Kaniyang mga apostol, misyonero, at saksi pagdating ng araw. Sisimulan nila itong tuparin matapos tuparin ng Mahal na Poong Jesus Nazareno ang sarili Niyang misyon bilang ipinangakong Mesiyas at Manunubos. Ipapakilala nila sa lahat ng mga tao sa bawat panig at sulok ng daigdig ang Nuestro Padre Jesus Nazareno. Iyon nga lamang, hindi ito magiging madali para sa kanila dahil hindi tatanggapin ng ilan ang kanilang mga ipinangangaral at ipinapahayag tungkol kay Jesus Nazareno. 

Tiyak na iisipin ng marami na nag-aaksaya lamang ng panahon si Jesus Nazareno sa pagtalaga sa Kaniyang mga apostol bilang Kaniyang mga saksi sa iba't ibang bahagi ng daigdig. Hindi naman sila tatanggapin ng lahat. May mga magbabalak na usigin sila dahil sa kanilang mga ipinapangaral at pinananaligan. Katunayan, maski nga Siya, hindi Siya tinanggap ng mga sarili Niyang kababayan. Bakit ito ang ipinasiya Niyang gawin? Ano nga ba ang dahilan kung bakit nais ni Jesus Nazareno na makilala Siya ng lahat ng mga tao sa mundo? 

Sa pananaw ng mundo, si Jesus Nazareno ay nag-aaksaya lamang ng panahon. Hindi magiging bukas sa Kaniya at sa Kaniyang mga aral at utos ang lahat. Mayroong mga taong magsasara ng kanilang mga puso at isipan. Alam iyan ni Jesus Nazareno. Iyon nga lamang, ipinasiya pa rin ni Jesus Nazareno na hirangin at italaga ang mga apostol bilang Kaniyang mga saksi sa lahat ng mga bansa. Kagandahang-loob, awa, habag, at pag-ibig ang dahilan kung bakit ito ang ipinasiyang gawin ni Jesus Nazareno. Dahil sa Kaniyang pag-ibig, kagandahang-loob, habag, at awa, nagpakilala Siya sa lahat. 

Inilahad ni Propeta Oseas ang pahayag ng Panginoong Diyos para sa Kaniyang bayan sa Unang Pagbasa. Sa pahayag na ito, nakiusap ang Panginoong Diyos sa Kaniyang bayan na pagsisihan ang kanilang mga kasalanan at magbalik-loob sa Kaniya. Kahit na alam ng Panginoong Diyos na matitigas ang mga puso at ulo ng mga Israelita, ang Panginoong Diyos ay nagpasiya pa ring makiusap sa bayang Israel dahil sa Kaniyang kagandahang-loob, pag-ibig, habag, at awa. Ang pag-ibig, kagandahang-loob, habag, at awa ng Panginoon ay inilarawan sa mga taludtod sa Salmong Tugunan. Nais ng Diyos na magkaroon ng pagkakataon ang lahat na makinabang sa Kaniyang pag-ibig, habag, kagandahang-loob, at awa. 

Bagamat ayon sa pananaw ng mundo ay nag-aaksaya lamang ng oras at panahon ang Nuestro Padre Jesus Nazareno sa pagpapakilala sa lahat, ipinasiya pa rin Niyang magpakilala sa lahat. Hinirang at inatasan rin Niya ang mga apostol na ipakilala Siya sa lahat, kahit na napakahirap itong gawin dahil sa iba't ibang mga pagsubok at pag-uusig. Sa pamamagitan nito, binibigyan Niya ng pagkakataon ang lahat ng mga tao sa daigdig na maranasan ang Kaniyang pag-ibig, kagandahang-loob, habag, at awa. 

HINDI PARA SA MGA NAGHAHANAP NG KAGINHAWAAN

7 Hulyo 2024 

Ika-14 na Linggo sa Karaniwang Panahon [B] 

Ezekiel 2, 2-5/Salmo 122/2 Corinto 12, 7-10/Marcos 6, 1-6 

Ang mga Pagbasa para sa Linggong ito ay tungkol sa katotohanan ng misyon. Hindi tatanggapin ng lahat ang Salita ng Diyos. Mayroong mga taong hindi magbubukas ng kanilang mga puso at isipan sa Salita ng Diyos. Isasara nila ang pintuan ng kanilang mga puso at isipan sa Panginoong Diyos. Dahil sa katigasan ng kanilang mga puso at isipan, ang Panginoong Diyos ay hindi tatanggapin ng ilan. Kaya naman, ang pagsaksi sa Panginoon ay napakahirap gawin. 

Madalas isipin ng marami na kapag ipinasiya nilang maging mga saksi ng Panginoon, ang bawat sandali ng kanilang buhay sa mundo ay magiging maginhawa. Iniisip nila na magiging ligtas sila mula sa iba't ibang mga pagsubok sa buhay sa mundong ito. Layunin nilang makatakas at maging ligtas mula sa mga pagsubok sa buhay. Dahil sa paniniwalang hindi sila haharap sa mga pagsubok sa buhay dito sa mundong ito at tiisin ang mga ito, ipinapasiya nilang sumunod at sumaksi sa Panginoon. 

Ipinapaalala sa atin ng mga Pagbasa para sa Linggong ito na hindi ligtas mula sa mga pagsubok sa buhay ang mga lingkod ng Diyos na sumusunod at sumasaksi sa Kaniya. Sa Unang Pagbasa, inihayag ng Panginoong Diyos ang pagkahirang Niya kay Ezekiel upang maging Kaniyang propeta. Habang ipinapahayag Niya nang buong linaw ang Kaniyang pasiyang ito, hindi ikinubli ng Diyos kay Ezekiel ang katotohanang hindi siya tatanggapin ng nakararami dahil sa katigasan ng kanilang mga ulo, bagamat hinirang siya ng Diyos upang maging Kaniyang propeta (Ezekiel 2, 3-5). Nagsalita tungkol sa katotohanan ng kaniyang misyon si Apostol San Pablo sa Ikalawang Pagbasa. Buong linaw na isinalungguhit ni Apostol San Pablo ang kaniyang punto tungkol sa pagiging mga tagasunod at saksi ng Panginoong Diyos sa Ikalawang Pagbasa. Ang pagsunod at pagsaksi sa Panginoong Diyos ay hindi para sa mga naghahanap ng ginhawa. Kung tutuusin, pati ang mismong Bugtong na Anak ng Diyos at Pangalawang Persona ng Banal na Santatlo na walang iba kundi ang Poong Jesus Nazareno ay hindi tinanggap ng Kaniyang mga kababayan sa Nazaret sa tampok na salaysay sa Ebanghelyo. 

Napakahirap maging mga tapat na tagasunod at saksi ng Panginoong Diyos. Subalit, sa kabila nito, bakit may mga nagpasiyang manatiling tapat sa Kaniya hanggang sa huli, gaya ng mga banal sa langit? Inihayag ng tampok na mang-aawit sa Salmong Tugunan ang dahilan kung bakit mayroon pa ring mga nagpasiyang maging tapat sa kanilang pasiyang sumunod at sumaksi sa Panginoon hanggang sa huli. Ang awa ng Diyos ay ang bukod-tanging dahilan kung bakit ipinasiya ng mga banal sa langit na manatiling tapat sa kanilang pananalig, pagsunod, at pagsaksi kay Kristo, ang Poong Jesus Nazareno hanggang sa huli, gaano man kahirap gawin ito dahil sa mga hirap, pagsubok, sakit, at tiisin sa buhay. Dahil sa awa ng Diyos, ang lahat ng mga banal sa langit ay nagkaroon ng lakas na manatiling tapat sa Kaniya hanggang sa huli. 

Walang ligtas mula sa mga pagsubok sa buhay sa mundong ito, kahit ang mga tapat na tagasunod at saksi ng Mahal na Poong Jesus Nazareno. Subalit, kung ang ating mga puso at isipan ay taos-puso nating bubuksan sa pag-ibig, kagandahang-loob, habag, at awa ng Mahal na Poong Jesus Nazareno, magkakaroon tayo ng lakas ng loob upang manatiling tapat sa Kaniya hanggang sa huli.