DALISAY NA PAG-IBIG AT KATAPATAN

13 Setyembre 2024 

Paggunita kay San Juan Crisostomo, obispo at pantas ng Simbahan 

1 Corinto 9, 16-19. 22b-27/Salmo 83/Lucas 6, 39-42 

SCREENSHOT: #PABIHIS sa Mahal na Poong Jesus Nazareno | #QuiapoChurch - 05Agosto 2024 (Lunes) (Facebook and YouTube)

Nakasentro sa halaga ng dalisay na pag-ibig at katapatan ang mga Pagbasa para sa araw na ito. Layunin ng Simbahan na paalalahanan ang bawat isa sa atin tungkol sa dapat maging bunga ng taos-pusong debosyon at pamamanata sa Mahal na Poong Jesus Nazareno sa pamamagitan ng taimtim na pagninilay sa halaga ng dalisay na pag-ibig at katapatan sa Kaniya. Ang tunay na debosyon at pamamanata sa Mahal na Señor ay dapat maging daan tungo sa pagkakaroon ng dalisay na katapatan at pag-ibig para sa Kaniya.  

Sa Unang Pagbasa, inilarawan ni Apostol San Pablo na handa siyang gawin ang lahat upang si Kristo ay maipakilala sa lahat, kahit na nangangahulugang kailangan niyang mamuhay bilang isang alipin. Sa Salmong Tugunan, buong linaw at lakas ng loob na inihayag ng tampok na mang-aawit nito na lubos niyang pinahahalagahan at iniibig ang templo ng Diyos dahil sa presensya ng Diyos na nananahan dito. Sa Ebanghelyo, nangaral ang Poong Jesus Nazareno tungkol sa dalisay na pag-ibig at katapatan. Ang pag-ibig at katapatan sa Panginoong Diyos ay hindi dapat gawing palabas. Bagkus, dapat itong isabuhay bilang patunay ng pagiging taos-puso at dalisay nito. 

Hindi naghahanap ng Nuestro Padre Jesus Nazareno ng mga mahuhusay na alagad ng sining. Bagkus, ang hinahanap ng Nuestro Padre Jesus Nazareno ay mga pusong puspos ng dalisay na pag-ibig at katapatan sa Kaniya. 

ISANG PATUNAY

15 Setyembre 2024 

Ika-24 na Linggo sa Karaniwang Panahon [B] 

Isaias 50, 5-9a/Salmo 114/Santiago 2, 14-18/Marcos 8, 27-35 

This faithful photographic reproduction of the painting La Flagelación de Cristo by Anton Raphael Mengs (1728–1779), as well as the work of art itself from the Royal Palace of Madrid, is in the Public Domain (PDM 1.0 - Public Domain Mark 1.0 - Universal - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

"Mga kapatid, ano ang mapapala ng isang tao kung sabihin man niyang siya'y may pananampalataya, ngunit hindi naman niya [ito] pinatutunayan sa gawa? Maililigtas ba siya ng gayong pananampalataya?" (Santiago 2, 14). Sa mga salitang ito ni Apostol Santo Santiago na itinampok at inilahad sa Ikalawang Pagbasa nakatuon ang taimtim na pagninilay ng Simbahan sa Linggong ito. Isinasalungguhit sa mga salitang ito ang ugnayan ng pananamapalataya at gawa. Bilang mga bumubuo sa Simbahan tatag ni Kristo mismo, dapat nating isabuhay ang ating pananampalataya. 

Inilahad sa unang dalawang taludtod ng Salmong Tugunan ang isang maikling buod ng kasaysayan ng pagligtas at pagpapalaya ng Panginoon sa mga Israelita mula sa pagkaalipin sa Ehipto. Ang kahanga-hangang gawang ito ng Diyos ay nagpatunay ng Kaniyang pag-ibig, habag, at awa para sa Kaniyang bayan. Hindi lamang inihayag sa mga ang Kaniyang pag-ibig, habag, at awa sa pamamagitan ng Kaniyang mga salita sa Kaniyang lingkod na si Moises. Pinatunayan pa Niya ito. 

Ang Unang Pagbasa at Ebanghelyo ay tungkol sa misyon ng ipinangakong Mesiyas at Manunubos na walang iba kundi ang Panginoong Hesukristo, ang Nazareno. Inihayag sa Unang Pagbasa na si Jesus Nazareno ay magbabata ng maraming hirap, sakit, at pagdurusa bilang Mesiyas at Manunubos na bigay ng Diyos. Sa Ebanghelyo, matapos ihayag ng unang Santo Papa ng Simbahan na walang iba kundi si Apostol San Pedro na si Jesus Nazareno ay ang ipinangakong Mesiyas at Manunubos na kaloob ng Diyos para sa ikaliligtas ng sangkatauhan, inilarawan naman ng Poong Jesus Nazareno ang kailangan Niyang gawin bilang ipinangakong Mesiyas at Manunubos. Ang pag-ibig, habag, at awa ng Diyos ay patutunayan ng Mahal na Poong Jesus Nazareno sa buong sangkatauhan lahat sa pamamagitan ng Kaniyang Misteryo Paskwal. 

Pati ang Diyos, pinatutunayan ang Kaniyang mga salita. Ang mga kahanga-hangang himala ng Diyos na ginawa Niya noon, sa kasalukuyan, at maging sa kinabukasan ay mga patunay ng Kaniyang dakilang pag-ibig, habag, at awa para sa lahat. Katunayan, ang Krus at Muling Pagkabuhay ng Mahal na Poong Jesus Nazareno, ang Kaniyang Bugtong na Anak na ipinagkaloob Niya sa tanan bilang ipinangakong Mesiyas, ay ang pinakadakilang patunay ng Kaniyang dakilang pag-ibig, habag, at awa para sa lahat. Hindi lamang Niya inihayag ang Kaniyang mga salita sa pamamagitan ng mga salita lamang. Bagkus, pinatunayan Niya ito sa pamamagitan ng Kaniyang mga gawa. 

Kaya naman, ang sabi ng Poong Jesus Nazareno sa huling bahagi ng Ebanghelyo na ang mga naghahangad na maging Kaniyang mga tagasunod ay dapat kalimutan ang sarili, pasanin ang kani-kanilang mga krus, at sumunod sa Kaniya (Marcos 8, 34). Sa pamamagitan nito, mapapatunayan ang taos-pusong pananalig at pananampalataya ng bawat isa. Ito ang dapat nating gawin bilang Simbahan. 

Hindi lamang sa pamamagitan ng mga salita nahahayag ang ating pananampalataya bilang Simbahan. Bagkus, ito ay dapat nating isabuhay araw-araw. Kung paanong inihayag ng Panginoong Diyos ang Kaniyang pag-ibig, habag, at awa sa pamamagitan ng Kaniyang mga salita at gawa, dapat rin nating ihayag ang ating taos-pusong pag-ibig, pananalig, katapatan, debosyon, pamamanata, pananampalataya, at pagsamba sa Kaniya na Siyang umiibig sa atin nang buong katapatan. 

NAGAGALAK SA DIYOS ANG KANIYANG MGA TAPAT NA LINGKOD

6 Setyembre 2024 

Biyernes ng Ika-22 Linggo sa Karaniwang Panahon (II) 

1 Corinto 4, 1-5/Salmo 36/Lucas 5, 33-39 

SCREENSHOT: QUIAPO CHURCH 6AM #OnlineMass • 25 August 2024 • 21st Sunday in Ordinary Time (Facebook and YouTube)

Isinasalungguhit ng mga Pagbasa para sa araw na ito ang katotohanan tungkol sa galak ng mga naglilingkod sa Diyos nang buong katapatan. Ang Diyos lamang ay ang bukod tanging dahilan kung bakit nagagalak ang lahat ng mga naglilingkod sa Kaniya nang buong katapatan. Sa kabila ng mga hirap, pagsubok at pagdurusa sa buhay sa mundong ito, ang mga tapat na lingkod ng Diyos ay nagagalak dahil Siya lamang ang dahilan ng kanilang galak. Ang kanilang galak ay ang pinagmulan nito na walang iba kundi ang Panginoong Diyos. 

Galak para sa lahat ng mga Kristiyano ang hatid ng mga salita ni Apostol San Pablo sa Unang Pagbasa. Inihayag ni Apostol San Pablo ang dahilan kung bakit ang lahat ng mga tapat na lingkod ng Diyos ay dapat magalak. Ang Panginoon na nakakakilala sa atin ay darating muli. Sa Salmong Tugunan, inilarawan kung ano ang ipagkakaloob ng Panginoon sa lahat - kaligtasan. Ang lahat ng mga matutuwid at banal ay Kaniyang ililigtas (Salmo 36, 39a). Isa itong balitang naghahatid ng galak sa lahat. Sa Banal na Ebanghelyo, inihayag ng Mahal na Poong Jesus Nazareno sa mga eskriba at Pariseo na nagagalak at nagdiriwang ang lahat kapag sila'y nasa piling ng lalaking ikakasal na walang iba kundi Siya mismo. May galak sa piling ng Poong Jesus Nazareno. 

Ang tapat na debosyon at pamamanata sa Nuestro Padre Jesus Nazareno ay maging daan nawa patungo sa pagkamit ng tunay na kaligayahan sa Kaniyang piling. Ito ay makakamit natin kapag isinabuhay natin ang ating tapat at taos-pusong debosyon at pamamanata sa Poong Jesus Nazareno. 

SALAMIN NG PUSO

1 Setyembre 2024 

Ika-22 Linggo sa Karaniwang Panahon [B] 

Deuteronomio 4, 1-2. 6-8/Salmo 14/Santiago 1, 17-18. 21b-22. 27/Marcos 7, 1-8. 14-15. 22-23 

This faithful photographic reproduction of the painting (c. 1523) Christ before Caiaphas (from The Passion altarpiece) by Hans Holbein the Younger (1497/1498–1543), as well as the actual work of art itself from the Kunstmuseum Basel, is in the Public Domain (PDM 1.0 - Public Domain Mark 1.0 Universal - "No Copyright") in its country of origin as well as in other countries and areas, including the United States, where the copyright term is the author's life plus 100 years or fewer due to its age. 

Winika ng Poong Jesus Nazareno sa Ebanghelyo: "Hindi ang pumapasok sa bibig ng tao ang nakapagpaparumi sa kaniya sa mata ng Diyos kundi ang mga nagmumula sa kaniya" (Marcos 7, 15). Sa mga salitang ito na binigkas ng Poong Jesus Nazareno sa Ebanghelyo nakatuon ang pagninilay ng Simbahan. Buong linaw na isinasalungguhit ng Mahal na Poong Jesus Nazareno sa mga salitang ito ang ugnayan ng puso sa mga salita't gawa ng mga tao. Ang mga salitang binibigkas ng bawat tao at ang kanilang mga kilos ay sumasalamin sa tunay na laman ng kanilang mga puso at isipan. 

Buong linaw na inihayag ni Moises sa mga Israelita sa tampok na salaysay sa Unang Pagbasa na dapat nilang sundin ang mga utos ng Panginoong Diyos. Hindi nila dapat dagdagan o bawasan ang mga utos ng Panginoong Diyos (Deuteronomio 4, 2). Iyon nga lamang, ang bilin na ito ay hindi sinunod ng mga Pariseo at eskriba sa tampok na salaysay sa Ebanghelyo. Kaya, tinawag silang mapagpaimbabaw ng Mahal na Poong Jesus Nazareno sa Ebanghelyo. Sinuway nila ang bilin ni Moises sa mga Israelita sa Unang Pagbasa. Huwag dagdagan o bawasan ang mga utos ng Diyos. Pinahihirapan lamang nila ang mga tao dahil dinadagdagan nila ang mga utos ng Diyos. 

Para sa Poong Jesus Nazareno, napakalinaw na walang balak ang mga Pariseo at ang mga eskriba na tulungan ang mga tao na sundin ang mga utos ng Diyos. Sa halip na tulungan sila, pinahirapan pa nila lalo. Ang mga tao ay ipinipilit nilang gawin ang mga bagay na hindi naman kailangang gawin. 

Hindi tutol ang Mahal na Poong Jesus Nazareno sa paghuhugas ng mga kamay. Ang tinututulan ng Poong Jesus Nazareno ay ang pagiging mga pasakit sa kapwa. Labis na tinututulan at kinasusuklaman ng Panginoong Jesus Nazareno ang pang-aapi at panlalamang sa kapwa, lalung-lalo na yaong mga tinuturing na maliliit. 

Isinalungguhit sa Salmong Tugunan ang halaga ng pagiging masunurin sa mga utos ng Diyos. Sa Ikalawang Pagbasa, nakiusap si Apostol Santo Santiago sa lahat ng mga Kristiyano na sundin ang mga utos ng Diyos. Ito ang dapat nating gawin bilang mga tapat na lingkod at tagasunod ni Jesus Nazareno. Mamuhay nang banal at kalugud-lugod sa paningin ng Panginoong Diyos. 

Tayong lahat ay pinaalalahanan sa Linggong ito na dapat maghari sa ating buhay ang Diyos. Ang mga utos at tuntunin ng Mahal na Poong Jesus Nazareno ay dapat nating sundin nang buong katapatan at pananalig. 

PAGHAHANDA PARA SA BUHAY NA WALANG HANGGAN

30 Agosto 2024 

Biyernes ng Ika-21 Linggo sa Karaniwang Panahon (II) 

1 Corinto 1, 17-25/Salmo 32/Mateo 25, 1-13 

Ang Ebanghelyo para sa araw na ito ay tungkol sa talinghaga ng sampung dalaga. Sa pamamagitan ng talinghagang ito, ipinapaalala sa atin ng Poong Jesus Nazareno na lagi tayong binibigyan ng pagkakataong paghandaan ang Kaniyang pagdating. Sabi sa Kredo na muli Siyang babalik bilang Hukom ng mga nangabubuhay at nangamatay na tao. Kaya naman, habang patuloy tayong namumuhay at naglalakbay sa mundong ito nang pansamantala, dapat nating paghandaan ang ating mga sarili para sa buhay na walang hanggan sa piling ng Mahal na Poong Jesus Nazareno sa Kaniyang kaharian sa langit. Kailangang nating tahakin ang landas ng kabanalan. Dapat natin gawin ito bilang mga Kristiyano. 

Sa Unang Pagbasa, nagsalita si Apostol San Pablo tungkol sa kaniyang misyon bilang apostol at misyonero. Ang misyong ito ay ipinagpapatuloy ng Simbahan sa panahong kasalukuyan. Bilang apostol at misyonero, ipinapakilala ni Apostol San Pablo si Jesus Nazareno sa lahat. Ipinapakilala niya sa lahat si Jesus Nazareno bilang pinakadakilang biyaya ng Diyos sa tanan na nagpapatunay ng Kaniyang pag-ibig, habag, at awa. Ang pag-ibig, habag, at awa ng Diyos ay buong pananalig na pinatotohanan ng tampok na mang-aawit sa Salmong Tugunan. Sa pamamagitan ni Jesus Nazareno, ang pag-ibig, habag, at awa ng Diyos ay nahayag. 

Dahil sa pag-ibig, habag, at awa ng Diyos, tayong lahat ay lagi Niyang binibigyan ng pagkakataong paghandaan ang ating sarili para sa pagtamasa ng buhay na walang hanggan sa piling ng Poong Jesus Nazareno sa langit. Ipinagkaloob Niya sa atin ang Mahal na Poong Jesus Nazareno bilang Mesiyas at Tagapagligtas dahil sa Kaniyang awa, habag, at pag-ibig. Ang dakila Niyang awa, habag, at pag-ibig rin ay ang dahilan kung bakit lagi Niya tayong binibigyan ng pagkakataong paghandaan ang ating mga sarili para sa buhay na walang hanggan sa Kaniyang piling sa langit. 

Tayo mismo ang magpapasiya kung paano tayo tutugon sa paanyayang ito ng Diyos na paghandaan ang buhay na walang hanggan kapiling Siya sa maluwalhati Niyang kaharian sa langit. Isa lamang ang dapat nating gawin upang maihanda natin ang ating mga sarili para sa buhay na walang hanggan sa piling ng Panginoong Diyos sa langit - tahakin ang landas ng kabanalan.

KAGITINGAN NG MGA TAOS-PUSONG NANANALIG AT NAGLILINGKOD SA DIYOS

29 Agosto 2024 

Paggunita sa Pagpapakasakit ni San Juan, ang Tagapagbinyag, martir 

Jeremias 1, 17-19/Salmo 70/Marcos 6, 17-29 

This faithful photographic reproduction of the painting (c. Between 1600 and 1650) The Beheading of Saint John the Baptist by François Perrier (1594–1649), as well as the actual work of art itself from the National Trust for Places of Historic Interest or Natural Beauty, is in the Public Domain (PDM 1.0 - Public Domain Mark 1.0 Universal - "No Copyright") in its country of origin as well as in other countries and areas where the copyright term is the author's life plus 100 years or fewer because the author died in 1649. This is also in the Public Domain in the United States because it was published (or registered with the U.S. Copyright Office) before January 1, 1929.  

"Hindi ka nila matatalo sapagkat Ako ang mag-iingat sa iyo. Akong Panginoon ang nagsasabi nito" (Jeremias 1,19). Sa mga salitang ito na binigkas ng Panginoong Diyos sa wakas ng Unang Pagbasa nakatuon ang pagninilay ng Simbahan para sa araw na ito. Inilaan ng Simbahan ang araw na ito sa paggunita sa kagitingan at katapatan ng tagapaghanda ng daraanan ng Poong Jesus Nazareno na si San Juan Bautista bilang martir. Ang salaysay ng kaniyang pagkamatay bilang martir ay tampok sa salaysay sa Ebanghelyo para sa araw na ito. 

Sa salaysay ng pagkamatay ni San Juan Bautista bilang isang martir na inilahad at itinampok sa Ebanghelyo para sa araw na ito, napakalinaw na hindi natakot si Juan Bautista na harapin ang kaniyang kamatayan bilang isang martir ng Panginoon. Hindi natakot sa kapangyarihan nina Herodes Antipas at Herodias si San Juan Bautista. Sa halip na matakot kina Herodes Antipas at Herodias, ipinasiya ni San Juan Bautista na manalig sa Diyos na kaniyang pinaglingkuran nang buong katapatan. Gaya ng sabi sa unang taludtod ng Salmo para sa araw na ito: "Sa iyo lang, Panginoon, lubos akong nananalig" (Salmo 70, 1). Ang pananalig ni San Juan Bautista sa Panginoong Diyos ay ang dahilan kung bakit buong kagitingan niyang hinarap at tinanggap ang kaniyang kamatayan bilang isang martir ng Panginoong Diyos. Dahil sa kaniyang pananalig na tunay ngang taos-puso, ipinasiya ni San Juan Bautista na ialay ang kaniyang buong sarili sa Diyos na walang takot niyang pinaglingkuran. 

Mayroon ngang kabalintunaan sa tampok na salaysay sa Ebanghelyo. Ang natakot ay ang may hawak ng kapangyarihan. Dalawang beses na natakot si Herodes Antipas dahil kay San Juan Bautista. Natakot siyang patayin si San Juan Bautista dahil alam niyang propeta ang turing sa kaniya ng nakararami. Bukod pa roon, natakot rin siyang bawiin ang kaniyang pangako na kaniyang binitiwan sa anak na babae ni Herodias na sumayaw para sa kaniya sa piging na inihanda para sa kaniyang kaarawan. Subalit, sa halip na matakot kay Herodes Antipas at Herodias, ipinasiya ni San Juan Bautista na panaligan ang Mahal na Poon nang buong katapatan at kagitingan hanggang sa huli, kahit na ang kapalit nito ay ang kaniyang buhay. 

Wala tayong katatakutan sa mundo kung tunay tayong nananalig at naglilingkod sa Diyos, gaya ni San Juan Bautista. Ang taos-puso nating pananalig sa Panginoon ang tutulong sa atin na magtagumpay laban sa mga kinatatakutan natin sa buhay. Laging sinasamahan ng Panginoon ang mga nananalig at naglilingkod sa Kaniya nang taos-puso. Dahil dito, may katatagan ng loob ang mga nananalig at naglilingkod sa Kaniya nang taos-puso hanggang sa huli. 

HINDI NIYA BABAGUHIN ANG KANIYANG MGA TURO

25 Agosto 2024 

Ika-21 Linggo sa Karaniwang Panahon [B] 

Josue 24, 1-2a. 15-17.18b/Salmo 33/Efeso 5, 21-32/Juan 6, 60-69 

This faithful photographic reproduction of the painting (c. Between 1629 and 1631) The Veneration of the Eucharist by Jacob Jordaens (1593–1678) from the National Gallery of Ireland is licensed under the Creative Commons Attribution 4.0 International (CC BY 4.0) license.

"Ibig din ba ninyong umalis?" (Juan 6, 67). Ito ang tanong ng Poong Jesus Nazareno sa mga apostol matapos Siyang iwan ng Kaniyang mga tagapakinig sa huling bahagi ng salaysay sa Ebanghelyo. Alam Niya kung bakit marami sa Kaniyang mga tagapakinig ay nagpasiyang magsialisan. Alam ni Kristo na labis na nahirapan ang karamihan sa Kaniyang mga tagapakinig na unawain at tanggapin ang mga sinasabi Niya sa kanila tungkol sa Kaniyang sarili. 

Bagamat nahirapan nang labis ang karamihan sa Kaniyang mga tagapakinig sa pag-unawa, pag-intindi, at pagtanggap sa aral at katotohanang ito, hindi binago ng Mahal na Poong Jesus Nazareno ang Kaniyang mga sinabi tungkol sa Kaniyang sarili. Hindi pinalitan at binawi ng Mahal na Poong Jesus Nazareno ang Kaniyang mga inihayag sa lahat tungkol sa Kaniyang sarili upang hindi mabawasan ang bilang ng Kaniyang mga tagapakinig. Kahit na nabawasan ang bilang ng Kaniyang mga tagasunod, ang Poong Jesus Nazareno ay hindi tumalikod sa Kaniyang mga pangaral. Ang mga salitang ito ay Kaniyang pinanindigan, kahit na nabawasan ang mga sumusunod sa Kaniya. 

Hindi lamang para sa mga apostol ang tanong ni Jesus Nazareno sa huling bahagi ng tampok na salaysay sa Ebanghelyo. Ang tanong na ito ay para rin sa atin. Tatalikuran at iiwanan ba natin ang Poong Jesus Nazareno? Mananatili pa rin ba tayong tapat sa Kaniya, kahit na napakahirap intindihin, unawain, tanggapin, at sundin ang Kaniyang mga aral at turo, lalung-lalo na yaong mga aral at turo tungkol sa Kaniyang sarili? 

Sa Unang Pagbasa, inihayag ni Josue sa mga Israelita na paglilingkuran at susundin lamang niya ang Panginoong Diyos. Ito rin ang ipinangakong gawin ng mga Israelita nang buong katapatan. Sa Salmong Tugunan, inihayag ng tampok na mang-aawit kung ano ang nararapat gawin bilang mga Kristiyano. Nakatuon rin sa paksang ito ang pangaral ni Apostol San Pablo sa Ikalawang Pagbasa. Pakikinig at pagsunod sa Mahal na Poong Jesus Nazareno nang buong katapatan. 

Nasa ating mga kamay ang pasiya kung tatanggapin at susundin natin ang mga aral at turo ng Poong Jesus Nazareno nang may taos-pusong katapatan at pananalig sa Kaniya. Subalit, anuman ang ating ipasiya, hindi Niya babaguhin ang Kaniyang mga pahayag, turo, at aral, lalung-lalo na yaong mga pahayag tungkol sa Kaniyang sarili bilang Tinapay ng Buhay, ang pinakadakilang biyayang kaloob ng Diyos sa tanan. 

BAGONG BUHAY PARA SA MGA INIIBIG NG DIYOS

23 Agosto 2024 

Paggunita kay Santa Rosa de Lima, dalaga 

Ezekiel 37, 1-14/Salmo 106/Mateo 22, 34-40 

This faithful photographic reproduction of the painting (Between circa 1671 and circa 1672) Saint Rose of Lima (1586-1618), as well as the actual work of art itself from the National Trust, is in the Public Domain (PDM 1.0 - "No Copyright") in its country of origin as well as in other countries and areas where the copyright term is the author's life plus 100 years or fewer due to its age. This is also in the Public Domain in the United States because it was published (or registered with the U.S. Copyright Office) before January 1, 1929.

"Panginoo'y papurihan sa pag-ibig N'ya kailanman" (Salmo 106, 1). Nakatuon sa mga salitang ito mula sa Salmong Tugunan ang pagninilay ng Simbahan sa araw na ito. Sa totoo lamang, hindi na mabilang kung ilang ulit na nating tinalakay at pinagnilayan ang paksa o temang pinagninilayan ng Simbahan nang buong kataimtiman sa araw na ito. Iyon nga lamang, tiyak na ilang ulit rin natin ito nakakalimutan. Kaya naman, maaari itong ituring na isang mahalagang paalala para sa bawat isa. Ang Panginoong Diyos ay puspos ng pag-ibig para sa ating lahat. 

Sa Unang Pagbasa, ipinangako ng Panginoong Diyos sa Kaniyang bayan na Siya ang magbubukas ng libingan at ibabangon mula sa kadiliman nito upang pagkalooban sila ng buhay. Buong linaw na isinalungguhit ng Panginoong Diyos ang Kaniyang dakilang pag-ibig sa pahayag na ito. Hindi Niya pababayaan ang Kaniyang bayan. Sa Banal na Ebanghelyo, inihayag ng Poong Jesus Nazareno ang pinakamahalagang utos bilang tugon sa tanong ng isang dalubhasa sa Kautusan tungkol sa paksang iyon. Ang pag-ibig para sa Diyos at tao ay isinalungguhit ng pinakamahalagang utos na ito. 

Ang Panginoong Diyos ay puspos ng pag-ibig para sa ating lahat. Bagamat hindi tayo karapat-dapat dahil sa dami ng ating mga kasalanan laban sa Kaniya, ipinasiya pa rin Niya tayong mahalin. Kaya naman, bilang mga iniibig ng Diyos, tanggapin natin nang buong kababaang-loob ang biyaya ng bagong buhay na Kaniyang kaloob sa atin. Isa itong bagong buhay bilang mga tagapagpalaganap ng dakila Niyang pag-ibig para sa lahat. Tatanggapin natin ang biyayang ito na Kaniyang kaloob nang may taos-pusong pasasalamat, kababaang-loob, at pananalig kung tunay rin nating iniibig ang Diyos. 

MAGING MGA BIYAYA

18 Agosto 2024 

Ika-20 Linggo sa Karaniwang Panahon [B] 

Kawikaan 9, 1-6/Salmo 33/Efeso 5, 15-20/Juan 6, 51-58

This faithful photographic reproduction of the painting (c. 1800s) Last Communion of Saint Mary Magdalene by Domingos Sequeira (1768–1837), as well as the actual work of art itself from a Private Collection, is in the Public Domain (PDM 1.0 - "No Copyright") in its country of origin as well as in other countries and areas, including the United States, due to its age. 

"Mga kapatid, ingatan ninyo kung paano kayo namumuhay" (Efeso 5, 15). Nakatuon sa mga salitang ito mula sa simula ng pangaral ni Apostol San Pablo sa Ikalawang Pagbasa ang pagninilay ng Simbahan sa Linggong ito. Ipinagpapatuloy ng Simbahan ang pagninilay sa misteryo ng tunay na presensya ni Kristo sa Banal na Eukaristiya sa Linggong ito. Ang Mahal na Poong Jesus Nazareno ay laging dumarating sa anyo ng tinapay at alak bilang tunay na pagkain at inuming espirituwal. Dahil sa Kaniyang habag at awa, lagi Niyang ibinibigay sa atin ang Katawan at Dugo Niyang Kabanal-banalan bilang ating espirituwal na pagkain at inumin sa bawat pagdiriwang ng Banal na Misa. 

Tampok sa Ebanghelyo ang pagpapatuloy ng pagpapakilala ng Poong Jesus Nazareno sa Kaniyang mga tagapakinig bilang Tinapay ng Buhay na nagmula sa langit. Patuloy Niyang isinasalungguhit sa Kaniyang mga tagapakinig na Siya lamang at wala nang iba pa ang makakapawi ng lahat ng uri ng kagutuman at kauuhawan. Ibinigay Siya ng Amang nasa langit sa tanan bilang tunay na pagkain at inuming espirituwal. Pag-ibig, kagandahang-loob, habag, at awa ng Diyos ang dahilan kung bakit ipinagkaloob sa lahat bilang tunay na pagkain at inuming espirituwal ang Poong Jesus Nazareno. 

Ang habag at awa ng Diyos ay inilarawan ng mga salita sa Unang Pagbasa. Kahit na hindi tayo karapat-dapat sa habag at awa ng Diyos, kusang-loob Niya itong ibinibigay sa atin. Lagi Niyang ipinapakita sa atin ang Kaniyang habag at awa. Inaanyayahan ng Diyos ang bawat isa sa atin na tanggapin at ibahagi sa kapwa-tao ang lahat ng mga biyayang Kaniyang ipinagkakaloob sa atin. 

Itinuturo sa atin ng mang-aawit na itinampok sa Salmong Tugunan na dapat asamin at kamtin natin ang Panginoong Diyos na Siyang bukal ng lahat ng mga biyaya. Sabi nga sa Salmo: "Magsumikap tayong kamtin ang Panginoong butihin" (Salmo 33, 9a). Wala tayong iba pang dapat asamin, kamtin, at panaligan kundi ang Panginoon. Siya lamang ang tunay na maaasahan sa lahat ng oras. Ang Panginoon lamang ang may kapangyarihang pawiin ang lahat ng uri ng kagutuman at kauuhawan. 

Bilang mga Kristiyano, ang Tinapay ng Buhay na walang iba kundi si Jesus Nazareno ay dapat nating asamin, kamtin, tanggapin, sambahin, panaligan, at sundin sa bawat sandali ng ating buhay. Sa palagiang pagtanggap sa Kaniyang Katawan at Dugo sa tuwing ipinagdiriwang ang Banal na Misa, ipalaganap natin ang Kaniyang pag-ibig, habag, at awa sa lahat. Maging biyaya rin tayo sa iba. 

ANG LAHAT AY BIYAYA

16 Agosto 2024

Paggunita kay San Roque, nagpapagaling 

Ezekiel 16, 1-15. 60. 63 (o kaya: 16, 59-63)/Isaias 12/Mateo 19, 3-12

This faithful photographic reproduction of the painting (c. 1631) Saint Roch by Jusepe de Ribera (1591–1652), as well as the actual work of art itself from the Museo del Prado, is in the Public Domain (PDM 1.0 - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

Sa habag at awa ng Diyos nakatuon ang pansin ng pahayag ng mismong Panginoong Diyos sa Unang Pagbasa at ng mga taludtod sa Salmong Tugunan na hango mula sa ika-12 kabanata ng aklat ni Propeta Isaias. Inihayag ng Panginoon sa Unang Pagbasa na hindi Niya ipagkakait sa bayang Kaniyang hinirang itinalaga upang maging Kaniya ang Kaniyang habag at awa. Bagamat paulit-ulit na lamang ang Kaniyang bayan sa pagkakasala laban sa Kaniya, ipinasiya pa rin ng Diyos na ipakita pa rin ang Kaniyang habag at awa sa kanila. Sinasagisag ito ng Kaniyang pasiyang makipagtipan sa kanila, kahit na hindi sila karapat-dapat dahil sa dami ng kanilang mga kasalanan. Nakatuon rin ang mga salita sa Salmong Tugunan sa habag at awa ng Diyos. 

Ang Ebanghelyo ay nakasentro sa kasagraduhan ng kasal. Buong linaw na inihayag ng Nuestro Padre Jesus Nazareno sa Ebanghelyo na labag sa mga utos ng Diyos ang diborsyo. Hindi naaayon sa mga utos at loobin ng Diyos ang diborsyo. Taliwas ito sa kalooban ng Diyos sa simula pa lamang - isang lalaki at isang babae ay magiging isa bilang mga magkabiyak. Kaya nga, ang opisyal na tawag sa Sakramento ng Kasal ay Pag-Iisang-Dibdib. Nagkakaisa ang isang lalaki at isang babae sa Sakramentong ito. 

Marahil maitatanong ng marami - ano naman ang kinalaman at ugnayan ng pahayag ni Jesus Nazareno tungkol sa kasagraduhan ng Sakramento ng Pag-Iisang-Dibdib sa Ebanghelyo sa mga inilarawan sa Unang Pagbasa at Salmong Tugunan? Ang lahat ay biyaya ng Diyos. Gaya ng tipang ipinasiya buuin ng Panginoong Diyos sa pagitan Niya at ng Kaniyang bayan sa Unang Pagbasa, ang Sakramento ng Kasal ay biyaya mula sa Diyos. Ang kabiyak ng puso ay ipinagkaloob ng Diyos sa isa't isa. Kaya naman, dapat pahalagahan ng mga magkabiyak ng puso ang isa't isa. 

Isang halimbawa ng mga nagpahalaga sa mga biyaya ng Diyos si San Roque. Kilala si San Roque bilang pintakasi ng mga maysakit. Subalit, hindi niya pinagaling ang mga maysakit gamit ang kaniyang sariling kapangyarihan at kakayahan. Hindi nagmula sa kaniyang sarili ang kapangyarihan magdulot ng kagalingan sa mga maysakit. Bagkus, nagmula ito sa Diyos. Ang kapangyarihang ito ay ipinagkaloob sa kaniya ng Diyos at hindi niya ito binalewala o inabuso. Bagkus, ginamit ito ni San Roque nang nararapat bilang patunay na tunay nga niyang pinahalagahan ang biyayang ito. 

Kahit hindi tayo karapat-dapat dahil sa dami ng ating mga kasalanan, ipinasiya pa rin ng Diyos na biyayaan tayo. Ipinagkakaloob pa rin sa atin ng Diyos ang Kaniyang mga biyaya dahil sa Kaniyang pag-ibig, kagandahang-loob, habag, at awa. Dapat nating pahalagahan ang mga biyayang ito na Kaniyang kaloob sa atin. 

SANDALING MALUWALHATI AT MALIGAYA

15 Agosto 2024 

Dakilang Kapistahan ng Pag-Aakyat sa Langit sa Mahal na Birheng Maria 

Pahayag 11, 19a; 12, 1-6a.10ab/Salmo 44/1 Corinto 15, 20-27/Lucas 1, 39-56 

This faithful photographic reproduction of the painting (c. 1735) Assumption of Mary by Giovanni Battista Piazzetta (1683–1754), as well as the actual work of art itself from the National Museum in Warsaw, is in the Public Domain (PDM 1.0 - "No Copyright") in its country of origin as ell as in other countries and areas where the copyright term is the author's life plus 100 years or fewer, including the United States, due to its age. 

"Mga Anghel ay masaya nang iakyat si Maria sa langit na maligaya." Ang mga salitang ito na ipinahayag o inawit bilang Pagbubunyi sa Mabuting Balita para sa araw na ito habang inaawit o ipinapahayag ang "Aleluya" bago ipahayag ang tampok na salaysay sa Banal na Ebanghelyo ay pinagtutuunan ng pansin at pinagninilayan ng Simbahan nang buong kataimtiman sa araw na ito. Inilaan ng Inang Simbahan ang araw na ito para sa isang napakaespesyal na pagdiriwang. Bilang Simbahan, ipinagdiriwang natin ang Pag-Aakyat sa Langit sa Mahal na Birheng Maria nang buong galak. 

Isang maluwalhati at maligayang sandali sa buhay ng Mahal na Birheng Maria dito sa mundo ang Pag-Aakyat sa kaniya sa Langit. Sa wakas ng kaniyang buhay sa daigdig, hindi pinahintulutan ng Diyos na maagnas ang katawan ng Mahal na Birheng Maria. Bagkus, ipinasiya Niyang iakyat ang katawan at kaluluwa ng Mahal na Birheng Maria sa langit. Hindi umakyat ang Mahal na Birheng Maria sa langit gamit ang sarili niyang kapangyarihan dahil wala naman siyang kapangyarihan gawin iyon. Ang Diyos mismo ang nag-akyat sa kaniya sa langit. 

Nang dumating ang wakas ng buhay ng Mahal na Birheng Maria sa lupa, ang Diyos ay nagpasiyang biyayaan ng isang maluwalhati at maligayang sandali ang Mahal na Birheng Maria. Iniakyat ng Diyos ang katawan at kaluluwa ng Mahal na Birheng Maria sa langit. Gaya ng inilarawan sa Pagbubunyi sa Mabuting Balita, ang mga anghel sa langit ay napuspos ng galak sa sandaling iniakyat ng Diyos sa langit ang katawan at kaluluwa ng Mahal na Birheng Maria. 

Ang mga Pagbasa para sa araw na ito ay nakasentro sa mga kahanga-hangang gawa ng Diyos na nagdudulot ng tuwa sa lahat. Sa Unang Pagbasa, inilahad ni Apostol San Juan ang kaniyang nakita sa isang pangitain tungkol sa kaluwalhatian ng Diyos. Hindi mananaig ang demonyo laban sa Panginoon kailanman. Laging magtatagumpay ang kaluwalhatian ng Panginoong Diyos na tunay ngang kahanga-hanga. Sa Ikalawang Pagbasa, ipinasiya ni Apostol San Pablo na isentro ang kaniyang pangaral sa dakilang tagumpay ng Muling Nabuhay na si Kristo Hesus laban sa kamatayan. Hindi nanatili sa libingan ang Mahal na Poong Jesus Nazareno. Bagkus, nabuhay Siyang mag-uli. Sa Ebanghelyo, dinalaw ng Mahal na Birheng Maria si Elisabet. Matapos batiin ang isa't isa, hinandugan ng Mahal na Inang si Mariang Birhen ang Diyos ng isang awit-papuri. Buong linaw siyang nagpatotoo tungkol sa mga kahanga-hangang gawa ng Diyos na hindi mapapantayan o mahihigitan sa bawat taludtod ng awit-papuri na ito. 

Biniyayaan ng Diyos ang Mahal na Inang si Mariang Birhen ng isang maluwalhati at maligayang sandali bilang hudyat ng wakas ng kaniyang buhay sa lupa. Ang katawan at kaluluwa ng Mahal na Inang si Mariang Birhen ay Kaniyang iniakyat sa Kaniyang walang hanggan at maluwalhating kaharian sa langit. Tunay ngang napakaganda at kahanga-hanga ang huling sandali ng buhay ng Mahal na Birheng Maria sa lupa. 

TUNGKULIN NG SIMBAHAN

11 Agosto 2024 

Ika-19 na Linggo sa Karaniwang Panahon [B] 

1 Hari 19, 4-8/Salmo 33/Efeso 4, 30-5, 2/Juan 6, 41-51 

This faithful photographic reproduction of the painting (c. Unknown Date) The Communion of the Apostle James the Less by Niccolò Bambini (1651–1736), as well as the actual work of art itself from the Church of San Stae, Venice, is in the Public Domain (PDM 1.0 - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age.

Buong linaw na inilarawan ng pahayag ng Poong Jesus Nazareno sa Ebanghelyo ang temang nais pagtuunan ng pansin at pagnilayan ng Simbahan sa Linggong ito. Ang ipinangakong Mesiyas at Manunubos na walang iba kundi ang Mahal na Poong Jesus Nazareno ay ang tunay na pagkaing nagbibigay-buhay na nagmula sa maluwalhating kaharian ng Diyos sa langit. Sa pamamagitan Niya, inihayag ng Diyos ang Kaniyang pag-ibig, kagandahang-loob, habag, at awa. 

Sa Unang Pagbasa, ipinasiya ng Panginoong Diyos na ipakita kay Propeta Elias ang dakila Niyang pag-ibig, kagandahang-loob, habag, at awa. Kahit na hiniling ni Propeta Elias na bawiin ng Diyos ang kaniyang buhay, hindi ito ginawa ng Diyos. Bagkus, ang pasiya ng Panginoon ay alagaan, kalingain, at palakasin muli ang propetang Kaniyang hirang na si Propeta Elias. Ipinadala ng Diyos ang isa sa Kaniyang mga anghel upang magdala ng pagkain kay Propeta Elias. 

Pinatotohanan ng mang-aawit na itinampok sa Salmong Tugunan ang dakilang pag-ibig, kagandahang-loob, habag, at awa ng Diyos. Sa mga taludtod ng awit ng papuri na ito na inilahad sa Salmong Tugunan, inaanyayahan ng tampok na mang-aawit ang lahat na magpuri sa Diyos na puno ng pag-ibig, kagandahang-loob, habag, at awa. Ang mga taludtod sa Salmong Tugunan ay maituturing nating mga maikling buod ng mga kahanga-hangang gawa ng Panginoong Diyos. 

Muling ipinaalala ni Apostol San Pablo ang mga Kristiyanong taga-Efeso sa kaniyang pangaral sa Ikalawang Pagbasa na mayroon silang tungkulin bilang mga tagasunod ni Kristo - maging mga salamin at daluyan ng pag-ibig, kagandahang-loob, habag, at awa ng Diyos. Ang paalalang ito ni Apostol San Pablo ay hindi lamang para sa mga Kristiyano sa Efeso noon kundi para sa ating lahat na bumubuo sa tunay at kaisa-isang Simbahang itinatag ni Kristo. Ito ang ating tungkulin bilang mga Kristiyano. Ang bawat isa sa atin ay dapat maging mga salamin at daluyan ng dakilang pag-ibig, awa, habag, at kagandahang-loob ng Diyos. 

Dahil sa dakilang pag-ibig, kagandahang-loob, habag, at awa ng Diyos para sa lahat, ipinasiya Niyang ipagkaloob ang Kaniyang Bugtong na Anak na si Jesus Nazareno, ang tunay na pagkaing nagbibigay-buhay na nagmula sa langit, bilang ipinangakong Mesiyas at Manunubos. Tayong lahat na tumatanggap sa Kaniyang Katawan at Dugo sa Banal na Misa ay iniatasan Niyang maging tagapagbahagi ng Kaniyang dakilang pag-ibig, kagandahang-loob, habag, at awa para sa lahat. 

BIYAYANG IPINAHIRAM

9 Agosto 2024 

Biyernes ng Ika-18 Linggo sa Karaniwang Panahon (II) 

Nahum 2, 1. 3; 3, 1-3. 6-7/Deuteronomio 32/Mateo 16, 24-28 

SCREENSHOT: QUIAPO CHURCH 4AM #OnlineMass • 02 August 2024 • Friday of the 17th Week in Ordinary Time (Facebook and YouTube)

"Nasa pasya ng Maykapal ang buhay at kamatayan" (Deuteronomio 32, 39k). Sa mga salitang ito mula sa Salmong Tugunan nakatuon ang pagninilay ng Simbahan para sa araw na ito. Ipinapaalala sa atin ng Simbahan sa araw na ito na isang biyaya mula sa Panginoong Diyos ang ating buhay. Tayong lahat ay pansamantalang namumuhay sa mundong ito dahil ipinasiya ng Panginoong Diyos na ipahiram sa atin ang biyaya ng buhay. Darating ang panahon na lilisanin natin ang mundong ito at ibabalik natin sa Kaniya ang biyayang ito na Kaniyang ipinahiram sa atin. 

Layunin ng Panginoong Diyos na bigyan tayo ng pagkakataong makapagpasiya para sa ating mga sarili sa pamamagitan ng pagkakaloob sa atin ng biyaya ng buhay. Nais man ng Panginoong Diyos na isama tayong lahat sa langit, wala Siyang magagawa kung hindi ito ang ating pasiya. Igagalang ng Panginoong Diyos ang ating kalayaan sa pagpapasiya. Tayo mismo ang magpapasiya kung tatanggapin natin ang paanyayang ito ng Diyos. 

Sa Unang Pagbasa, inilarawan nang buong linaw kung ano ang sasapitin ng lahat ng mga magpapasiyang suwayin ang Diyos. Ang lahat ng mga magpapasiyang suwayin at itakwil ang Diyos ay parurusahan. Sa Ebanghelyo, inilarawan ng Mahal na Poong Jesus Nazareno kung ano ang dapat gawin ng mga nagnanais sumunod sa Kaniya - talikuran at limutin ang sarili, pasanin ang sariling krus, at sumunod sa Kaniya. Hindi biro ang hirap nito. Subalit, kung ito ang pipiliin nating gawin hanggang sa huli, buhay na walang hanggan sa piling ng Poong Jesus Nazareno sa Kaniyang maluwalhating kaharian sa langit ay ating matatamasa. 

Habang tayong lahat ay patuloy na naglalakbay nang pansamantala sa daigdig na ito, tayong lahat ay laging tinatanong kung paano nating gagamitin ang biyaya ng buhay na ipinahiram sa atin ng Panginoon. Gagamitin ba natin ito bilang pagsasanay para sa buhay na walang hanggan sa piling ng Diyos? 

ANG DAPAT NATING PAKINGGAN

6 Agosto 2024

Kapistahan ng Pagliliwanag sa Bagong Anyo ng Panginoon [B] 

Daniel 7, 9-10. 13-14/Salmo 96/2 Pedro 1, 16-19/Marcos 9, 2-10 

This faithful photographic reproduction of the painting (c. 1760) The Transfiguration by Johann Georg Trautmann (1713–1769), as well as the work of art itself from the Städel Museum, is in the Public Domain (PDM 1.0 - "No Copyright") in its country of origin as well as in other countries and areas where the copyright term is the author's life plus 100 years or fewer, including the United States, due to its age. 

"Ito ang minamahal Kong Anak. Pakinggan ninyo Siya!" (Marcos 9, 7). Buong linaw na binigkas ng Diyos Ama mula sa langit ang mga salitang ito matapos imungkahi ni Apostol San Pedro ang Poong Jesus Nazareno na manatili na lamang sa bundok kung saan naganap ang Kaniyang Pagbabagong-Anyo na inilahad sa salaysay sa Banal na Ebanghelyo. Sa mga mismong salitang ito na buong linaw na binigkas ng Diyos Ama mula sa langit sa salaysay ng Pagbabagong-Anyo ng Nuestro Padre Jesus Nazareno na itinampok sa Banal na Ebanghelyo para sa araw na ito nakatuon ang taimtim na pagninilay ng Simbahan.

Ang pangitain ni Propeta Daniel tungkol sa isang nabubuhay magpakailanman na paglilingkuran ng lahat ng mga tao mula sa iba't ibang lipi, wika, bayan, at bansa sa mundo ay itinampok sa Unang Pagbasa. Ipinakilala ng Diyos Ama sa Mabuting Balita kung sino ito - ang Kaniyang Bugtong na Anak na si Jesus Nazareno na ipinagkaloob Niya sa lahat bilang ipinangakong Mesiyas at Manunubos. Gaya ng buong linaw na binigkas ng mang-aawit na itinampok sa Salmong Tugunan: "Panginoo'y maghahari, lakas N'ya'y mananatili" (Salmo 96, 1a at 9a). Sa Ikalawang Pagbasa, inilarawan ng unang Santo Papa ng Simbahan na si Apostol San Pedro ang nakita nilang tatlo ng dalawang anak ni Zebedeo na sina Apostol Santo Santiago El Mayor at Apostol San Juan sa bundok na iyon noong araw na nagbagong-anyo si Kristo. 

Marahil ilang ulit na nating napakinggan at pinagnilayan ang aral na ito. Subalit, isa itong napakahalagang aral na hindi natin dapat limutin bilang mga Kristiyano. Aminin natin, madalas natin itong nakakalimutin. Kung hindi man ito nakakalimutan, gagawa tayo ng dahilan - ang madalas na dahilan ay mahirap gawin. 

Bilang mga tunay na Kristiyano, dapat nating pakinggan at sundin sa bawat sandali ng pansamantala nating paglalakbay sa daigdig na ito ang ipinangakong Mesiyas at Manunubos na walang iba kundi ang Mahal na Poong Jesus Nazareno. Gaano mang kahirap itong gawin, kung tunay tayong tapat sa ating pagmamahal at pagsamba sa Diyos, ito ang ating magiging pasiya sa lahat ng oras. Pakinggan at sundin si Hesus. 

MULA SA LANGIT

4 Agosto 2024 

Ika-18 Linggo sa Karaniwang Panahon [B] 

Exodo 16, 2-4. 12-15/Salmo 77/Efeso 4, 17. 20-24/Juan 6, 24-35 

This faithful photographic reproduction of the painting (c. Between 1629 and 1631) The Veneration of the Eucharist by Jacob Jordaens (1593–1678) is made available by the National Gallery of Ireland under a Creative Commons Attribution 4.0 International (CC BY 4.0) License. 

"Panginoon ang nagbibigay ng pagkaing bumubuhay" (Salmo 77, 24k). Inilarawan ng mga salitang ito mula sa Salmong Tugunan ang temang nais pagtuunan ng pansin ng Simbahan sa Linggong ito. Muli tayong pinaalalahanan ng Simbahan na tayong lahat ay kinaaawaan at kinahahabagan ng Diyos. Dahil sa pag-ibig, habag, at awa ng Diyos, tayong lahat ay ipinasiya Niyang kalingain, arugain, at ipagsanggalang. Lagi Niyang ipinagkakaloob sa atin ang mga kailangan natin bilang patunay nito. 

Tampok sa salaysay sa Unang Pagbasa para sa Linggong ito ang pasiya ng Panginoon na ipagkaloob sa mga Israelita sa ilang ang pagkaing mula sa langit, ang manna, sa kabila ng kanilang pagiging mareklamo. Kahit na narinig ng Panginoong Diyos mula sa langit na hinangad ng mga Israelita na hinayaan na lamang silang mamatay bilang mga alipin sa Ehipto sapagkat mayroon silang makakain roon, ipinasiya pa rin Niyang ipakita ang Kaniyang pag-ibig, habag, at awa sa kanila sa pamamagitan ng Kaniyang pasiyang ipagkaloob ang manna sa kanila. 

Sa Ebanghelyo, ipinakilala ng Panginoong Jesus Nazareno ang Kaniyang sarili bilang pagkaing nagbibigay-buhay na nagmula sa langit. Isa lamang ang dahilan kung bakit ang Poong Jesus Nazareno ay nagpasiyang magpakilala bilang pagkaing nagbibigay-buhay na nagmula sa langit. Layunin ng Poong Jesus Nazareno na isinalungguhit sa Kaniyang mga tagapakinig na tunay ngang mahabagin at maawain ang Diyos. Hindi manhid ang Diyos. Mayroon Siyang habag at awa. Ang pinakadakilang patunay ng pag-ibig, habag, at awa ng Diyos ay walang iba kundi ang pagkaing nagbibigay-buhay na nagmula sa langit na dumating sa mundong ito bilang ipinangakong Mesiyas - si Jesus Nazareno na Kaniyang Bugtong na Anak. 

Inilarawan naman ni Apostol San Pablo sa kaniyang pangaral sa Ikalawang Pagbasa ang biyayang ipinagkakaloob ng tunay na pagkaing nagbibigay-buhay na nagmula sa langit na walang iba kundi si Jesus Nazareno sa lahat ng mga tatanggap sa Kaniya sa pagdiriwang ng Banal na Eukaristiya - ang biyaya ng bagong buhay. Ang biyayang ito ay isang buhay na katulad Niya - bagong buhay na puno ng kabanalan. Hindi na tayo dapat bumalik sa dating pamumuhay. Bagkus, dapat nating tanggapin ang biyaya ng bagong buhay na ito na kaloob ni Jesus Nazareno. Sa pamamagitan nito, ipinapakilala natin si Jesus Nazareno bilang tunay na pagkaing nagbibigay-buhay na ibinigay ng Diyos sa lahat dahil sa Kaniyang pag-ibig, habag, at awa.  

Ang pagkaing nagbibigay-buhay na nagmula sa langit ay walang iba kundi ang Mahal na Poong Jesus Nazareno. Dumating Siya sa mundo upang ipagkaloob sa tanan ang biyaya ng Kaniyang pagliligtas at ang biyaya ng bagong buhay na kaloob Niya. Ito ang pinakadakilang patunay ng pag-ibig, kagandahang-loob, habag, at awa ng Diyos.