TAGAHATID NG KANYANG PAG-IBIG AT GALAK

31 Mayo 2022 

Kapistahan ng Pagdalaw ng Mahal na Birheng Maria 

Sofonias 3, 14-18 (o kaya: Roma 12, 9-16b)/Isaias 12/Lucas 1, 39-56

Antonio de Pereda, The Visitation (1654), Public Domain

Sabi sa salaysay ng Pagdalaw ng Mahal na Birheng Maria sa kanyang kamag-anak na walang iba kundi si Santa Elisabet sa Ebanghelyo para sa araw na ito na gumalaw sa tuwa ang sanggol na si San Juan Bautista sa sinapupunan ng kanyang ina (Lucas 1, 44). Sa pamamagitan ng mga salitang ito, inilarawan ni San Lucas ang Mahal na Ina bilang tagahatid ng pag-ibig at tuwa. Hindi lamang dinala ng Mahal na Birheng Maria ang kanyang sarili noong dumalaw siya kay Elisabet. Bagkus, dinala rin niya ang pag-ibig at tuwang kaloob ng Diyos sa lahat sa pamamagitan ni Hesus, ang Sanggol na dinadala niya sa kanyang sinapupunan. Ang bukal ng pag-ibig at tuwa na walang iba kundi si Kristo Hesus ay tinaglay ni Maria sa kanyang paglalakbay at pagdalaw kay Elisabet na ina naman ni San Juan Bautista. 

Kahit na nagdadalantao sa mga sandaling iyon, ipinasiya ng Mahal na Birheng Maria na maging tagahatid ng pag-ibig at tuwang kaloob ng Diyos. Ang pagdadalantao ay hindi naging hadlang para kay Maria. Katunayan, ang dinadala ni Maria sa kanyang sinapupunan ay ang mismong bukal ng tunay na pag-ibig at tuwa na si Kristo Hesus, ang Diyos na nagkatawang-tao. Dahil ipinasiya ni Maria na maglakbay patungo sa bahay nina Zacarias at Elisabet, siya'y naging tagahatid ng pag-ibig at tuwa ng Diyos. 

Ang Diyos ay ipinakilala ni Propeta Sofonias at ni Apostol San Pablo bilang bukal ng tunay na pag-ibig at tuwa. Inilahad ni Propeta Sofonias ang pangako ng Panginoon sa Kanyang bayang Israel na makakapiling nila Siya (3, 15. 17). Mayroon namang paalala para sa lahat ng mga Kristiyano si Apostol San Pablo sa kanyang sulat sa mga taga-Roma. Sabi niya sa nasabing sulat na dapat maging tunay ang pag-ibig ng lahat ng mga Kristiyano (12, 9). Itinuro ni Apostol San Pablo sa pamamagitan ng mga salitang ito ang tungkulin ng bawat Kristiyano. Ang tungkulin ng mga bumubuo sa tunay na Simbahang itinatag ni Kristo ay maging tagahatid ng tunay na pag-ibig at galak na nagmumula sa Kanya. 

Mayroon tayong tungkulin bilang mga Kristiyano - taglayin at ipalaganap ang tunay na pag-ibig at galak na nagmumula sa Panginoong Hesukristo. Ginawa ito ng mga propeta sa Lumang Tipan katulad ni Propeta Sofonias. Ginawa rin ito ng mga apostol tulad na lamang ni Apostol San Pablo at ng mga sumunod sa kanila. Higit sa lahat, ginawa rin ito ng Mahal na Birheng Maria, ang Kaban ng Bagong Tipan, nang dalawin niya ang kanyang kamag-anak na si Elisabet. Ito rin ang ating tungkulin bilang mga Kristiyano. Ihatid at ipalaganap ang pag-ibig at galak na kaloob ng Diyos. 

HINDI ISANG PAMAMAALAM

29 Mayo 2022 

Dakilang Kapistahan ng Pag-Akyat (K)

Mga Gawa 1, 1-11/Salmo 46/Efeso 1, 17-23 (o kaya: Hebreo 9, 24-28; 10, 19-23)/Lucas 24, 46-53 

Andrea Mantegna, The Ascension of Christ (c. Between 1460 and 1464), Public Domain

もう分かっているよ この世の終わりでも年をとっても忘れられない人 (I already know, even at the end of this world, even if I grow old, you're unforgettable). Ang mga salitang ito ay mula sa awiting pinamagatang "One Last Kiss" na inawit ni Utada Hikaru para sa  Evangelion 3.0+1.0: Thrice Upon a Time, ang ikaapat at huling pelikula ng Rebuild of Evangelion. Napakalinaw sa pamagat ng nasabing awitin kung ano ang temang tinatalakay nito. Ang awiting iyon ay tungkol sa pamamaalam sa kasintahan. Subalit, sa kabila ng kanilang paghihiwalay, hindi nila malilimutan ang isa't isa. Hindi ibabaon sa limot ang mga alaala ng kanilang relasyon dahil ang taong inilalarawan ng mga titik ng awiting ito ay naniniwalang hindi dapat limutin ang mga iyon. Ipinasiya niyang sariwain ang lahat ng mga magandang alaala ng kanilang relasyon. 

Bagamat ang Pag-Akyat ni Hesus sa Langit ay hudyat ng wakas ng Kanyang misyon sa mundo bilang ipinangakong Mesiyas at Tagapagligtas na isinugo ng Ama, hindi ito isang pamamaalam. Ang Pag-Akyat ni Hesus sa Langit ay hindi dapat pagnilayan o unawain bilang pamamaalam ng isang tao sa kanyang mga minamahal. Bagkus, ang Pag-Akyat sa Langit ni Hesus ay ang sandali kung saan ipinakita Niya sa mga apostol na hindi na Siya sakop ng panahon. Ang Panginoong Hesus ay hindi magiging isang alaaala na ibabaon na lamang sa limot paglipas ng panahon. Bagkus, mananatili pa rin Siyang kasama ng mga apostol na hindi nasasakop ng panahon. Kikilos pa rin Siya mula sa Kanyang maringal na trono sa Langit, sa kanan ng Ama (Efeso 1, 20). 

Inilarawan sa Ikalawang Pagbasa ang tungkulin ni Hesus bilang Dakilang Saserdote sa Langit. Bilang Dakilang Saserdote na Siya ring nakaluklok sa kanan ng Ama, ang Panginoong Hesukristo ay patuloy na "namamagitan para sa atin" (9, 24). Subalit, sa kabila ng Kanyang tungkulin bilang Dakilang Saserdote, ang Kanyang Simbahan ay hindi Niya pinapabayaan. Patuloy Niyang sinasamahan ang Kanyang Simbahan, kahit mayroon Siyang tungkulin bilang Hari at Dakilang Saserdote. Ang Panginoong Hesus, ang Dakilang Saserdote at Haring Walang Hanggan, ay umakyat sa Langit at naluklok sa kanan ng Ama, subalit hindi Niya pinapabayaan ang Kanyang Simbahan. Gaya ng Kanyang ipinangako sa katapusan ng Ebanghelyo ni San Mateo, "Ako'y laging kasama ninyo hanggang sa katapusan ng sanlibutan" (28, 20). 

Sabi sa salaysay ng Pag-Akyat sa Langit ng Panginoong Hesukristo na mababasa sa wakas ng Ebanghelyo ni San Lucas, ang mga apostol ay bumalik sa Herusalem nang may "matinding kagalakan" (24, 52). Si Hesus na umakyat sa langit ay ang dahilan ng kanilang kagalakan. Oo, nakita nilang umakyat sa langit si Hesus. Subalit, sila'y hindi Niya pinabayaan. Hindi man ito nasasaad sa Ebanghelyo ni San Lucas, subalit may pangakong binitiwan si Hesus bago Siya umakyat sa langit. Hindi Niya pababayaan ang mga apostol. Sasamahan Niya sila, kahit na nakaluklok Siya sa kanan ng Ama. Iningatan ng mga apostol sa kanilang mga puso ang pangakong ito. 

Nasusulat rin sa salaysay ng Pag-Akyat ni Hesus sa Langit sa Unang Pagbasa na ang mga apostol ay magiging mga saksi Niya "sa Herusalem, sa buong Judea at Samaria, at hanggang sa dulo ng daigdig" (Mga Gawa 1, 8). Nasasaad rin ito sa salaysay sa Ebanghelyo ni San Lucas dahil isa lamang ang nagsulat ng dalawang aklat na ito. Sa dalawang salaysay na ito, isinalungguhit ni Hesus na magiging Kanyang mga saksi sa iba't ibang bahagi ng daigdig ang mga apostol. Sa bawat sandali ng kanilang misyon bilang Kanyang mga saksi, hindi Niya sila pababayaan. Mula sa langit, si Hesus ay kikilos. Patuloy Siyang kikilos at sasamahan ang mga apostol. 

Umakyat si Hesus sa langit at ngayo'y nakaluklok sa kanan ng Ama. Subalit, hindi ito nangangahulugang pinabayaan na Niya nang tuluyan ang Kanyang Simbahan. Mula sa langit, patuloy na kumikilos si Hesus para sa ikabubuti ng Simbahan. Hindi Niya pababayaan ang Simbahan kailanman. Si Hesus ay hindi isang alaala na ibabaon na lamang sa limot paglipas ng maraming panahon dahil patuloy Niyang sinasamahan ang Simbahan hanggang ngayon. Hindi Siya titigil kailanman.

ANG PAGTULONG NG ESPIRITU SANTO

22 Mayo 2022 

Ikaanim na Linggo ng Pasko ng Muling Pagkabuhay (K) 

Mga Gawa 15, 1-2. 22-29/Salmo 66/Pahayag 21, 10-14. 22-23/Juan 14, 21-29 

Anonymous (Unknown), The Last Supper (c. 1600-1650), Public Domain

Sa Ebanghelyo, nagsalita si Hesus sa mga apostol tungkol sa pagdating ng Patnubay, ang Espiritu Santo, upang samahan at tulungan sila sa kanilang misyon. Sabi Niya na darating ang Espiritu Santo, ang Patnubay na isusugo sa kanila ng Ama sa Ngalan ni Hesus, upang ituro sa kanila ang lahat ng bagay at ipaalala rin sa kanila ang lahat ng mga itinuro Niya sa kanila (Juan 14, 26). Sa pamamagitan nito, ang mga apostol ay tutulungan ng Espiritu Santo na tuparin ang mga utos at salita ng Panginoong Hesus bilang pagpapahayag ng kanilang pag-ibig sa Kanya. Sabi ng Panginoong Hesus, "Ang umiibig sa Akin ay tutupad sa Aking salita" (Juan 14, 23). 

Ipinahiwatig ng pasiya ng mga apostol at matatanda sa pagpupulong sa Herusalem na inilahad sa Unang Pagbasa ang tulong at gabay ng Espiritu Santo. Ang dahilan ng pagdaraos ng nasabing pagpupulong sa Herusalem ay upang talakayin ang paksa ng mga maaaring iligtas. Tinalakay sa pagpupulong kung ang mga mananampalataya ay kailangan bang magpatuli ayon sa Kautusan ni Moises upang maligtas. Nagkaroon ng 'di pagkakaunawaan dahil mayroong dalawang panig na magkaiba ang paniniwala tungkol sa usaping ito. Sabi ng mga bumuo sa isang panig na kailangang magpatuli ang mga mananampalatayang Hentil upang maligtas habang ang mga nasa kabilang panig naman ay nagsabing hindi na kailangan. Subalit, tinulungan at ginabayan sila ng Espiritu Santo sa kanilang pagpapasiya. Ang buod ng kanilang pasiya: layuan ang kasamaan at magpakabuti (Mga Gawa 15, 29). Sa tulong at gabay ng Espiritu Santo, mayroong pagkakataong maging Kristiyano ang bawat tao. 

Gaya ng sabi sa Salmong Tugunan para sa Linggong ito: "Nawa'y magpuri sa Iyo ang lahat ng mga tao" (Salmo 66, 4). Hindi lamang isa o dalawang tao o kaya naman ilang mga pangkat lamang ang makapagpupuri sa Panginoon. Lahat ng tao ay mayroong pagkakataong magpuri sa Diyos. Anuman ang lahi o liping kinabibilangan nila, hindi sila titigil sa pagpupuri sa Diyos sa tulong at gabay ng Espiritu Santo. Hindi namimili ng tutulungan at gagabayan ang Espiritu Santo na sundin ang mga utos ni Kristo. Ang bawat tao sa mundo ay Kanyang tutulungan at gagabayan. Subalit, nasa tao na ang desisyon kung tatanggapin nila ang tulong at gabay ng Espiritu Santo. 

Tinalakay ni Apostol San Pablo sa isa sa kanyang mga pangaral kung paanong ang bawat tao ay tinutulungan at ginagabayan ng Espiritu Santo upang maging mabuting Kristiyano. Sabi niya, "Hindi masasabi ninuman, 'Panginoon si Hesus' kung hindi siya pinapatnubayan ng Espiritu Santo" (1 Corinto 12, 3). Isa itong pahiwatig na walang maglalakas-loob na sumampalataya kay Kristo Hesus at sundin ang Kanyang mga utos kung hindi siya tinutulungan ng Espiritu Santo. Sa tulong ng Espiritu Santo, ang lahat ng mga Kristiyano ay nakapagpapahayag ng kanilang pag-ibig at pananalig kay Hesus sa isip, salita, at gawa. 

Mayroong gantimpala ang lahat ng mga magiging bukas sa tulong na ipagkakaloob sa kanila ng Espiritu Santo. Inilarawan ni Apostol San Juan sa Ikalawang Pagbasa ang kanyang mga nakita sa isang pangitain tungkol sa Bagong Herusalem. Sa Bagong Herusalem, makakapiling ng Panginoong Hesukristo ang bawat mananampalatayang naging tapat sa Kanya sa tulong ng Espiritu Santo, ang Patnubay na ipinagkaloob ng Ama sa Kanyang Pangalan. Iyan ang gantimpalang inilaan para sa mga nagpasiyang buksan ang kanilang mga puso sa pagtulong at pamamatnubay ng Espiritu Santo. 

Alam ng Muling Nabuhay na si Hesus na lagi tayong mahihirapan sa pagtanggap at pagsunod sa Kanyang mga utos. Kaya naman, ipinagkaloob sa atin ang Espiritu Santo upang tulungan tayong tanggapin at sundin ang Kanyang salita. Ang ating pag-ibig at pananalig kay Hesus ay maipapahayag natin sa tulong ng Espiritu Santo. 

PAG-IBIG NA NAGDUDULOT NG PAGBABAGO

15 Mayo 2022 

Ikalimang Linggo ng Pasko ng Muling Pagkabuhay (K) 

Mga Gawa 14, 21b-27/Salmo 144/Pahayag 21, 1-5a/Juan 13, 31-33a. 34-35 

Bartolomeo Schedoni, Ultima Cena Prima (c. 16th century), Public Domain

"Binabago Ko ang lahat ng bagay!" (Pahayag 21, 5a). Ito ang mga salitang binigkas ng nakaluklok sa trono ng kaharian ng Diyos sa pangitain ni Apostol San Juan sa Unang Pagbasa. Ang nakaluklok sa trono ng kaharian ng Diyos sa pangitain ni San Juan ay walang iba kundi si Kristo Hesus na Muling Nabuhay na nagpakilala bilang "Alpha at Omega" (21, 6). Sa pamamagitan ng mga salitang ito, inihayag ng Muling Nabuhay na si Hesus na hindi magtatagal ang lahat ng katiwalian at kasamaan. Magwawakas din ang lahat ng uri ng katiwalian, pang-aapi, at kasamaan na walang ibang dinulot kundi luha, dalamhati, sakit, hapis. at kamatayan. Dahil dito, mawawala ang "kamatayan, dalamhati, pag-iyak, at sakit" (21, 4). Iyan ang ipinangako ng Panginoong Hesus na Muling Nabuhay sa Unang Pagbasa. Sa pamamagitan nito, inihayag ng Panginoon na tanging Siya lamang ang may kapangyarihang gawin ito. 

Katunayan, ipinahiwatig na ito ng Panginoong Hesukristo sa Ebanghelyo. Sabi Niya sa mga apostol sa Ebanghelyo: "Isang bagong utos ang ibinibigay Ko sa inyo: mag-ibigan kayo! Kung paanong inibig Ko kayo, gayon din naman, mag-ibigan kayo" (Juan 13, 34). Sa pamamagitan ng bagong utos na ito, ipinamalas ni Hesus sa mga apostol ang kapangyarihan ng Kanyang pag-ibig. Ang pag-ibig ng Panginoong Hesukristo ay mayroong kapangyarihang magdulot ng pagbabago. Isa itong pasulyap ng Kanyang gagawin sa wakas ng panahon - ang lahat ng bagay ay Kanyang babaguhin. Sabi nga Niya sa pangitain ni San Juan sa Unang Pagbasa, pagsapit ng panahong iyon, lilipas rin "ang dating mga bagay" (Pahayag 21, 4). Ang lahat ng pang-aapi, pang-aabuso, pagsasamantala, at kasamaan ay tuluyang maglalaho na parang bula dahil paiiralin ni Hesus ang pag-ibig at habag sa Kanyang kaharian.

Ang pagbabagong dulot ng pag-ibig ng Panginoong Hesus na Muling Nabuhay ay ang paksang binigyan ng pansin sa pangaral nina Apostol San Pablo at San Bernabe sa Unang Pagbasa. Sabi nila, "Magdaranas muna tayo ng maraming kapighatian bago makapasok sa kaharian ng Diyos" (Mga Gawa 14, 22). Ibig sabihin nito, hindi iiral ang kapighatian at pagdurusang dulot ng iba't ibang uri ng pag-uusig magpakailanman sapagkat iiral ang pag-ibig at habag ng Panginoon sa Kanyang kaharian sa langit. Ang lahat ng hirap, sakit, at kapighatiang dinadanas nila ay pansamantala lamang dahil babaguhin ni Kristong Muling Nabuhay ang lahat ng iyon. 

Muling ipinapaalala sa atin sa Linggong ito na hindi mananatili magpakailanman ang iba't ibang uri ng pag-uusig, pang-aapi, pang-aabuso, katiwalian, at kasamaan dahil sa pag-ibig at habag ng Muling Nabuhay na si Hesus. Ipinangako ni Kristo Hesus na babaguhin Niya ang lahat ng bagay. Sa Kanyang kaharian, tanging pag-ibig at habag ang Kanyang paiiralin. Hindi na lalaganap ang iba't ibang uri ng pag-uusig, pang-aapi, katiwalian, at kasamaan na walang ibang idinulot kundi pighati, sakit, at hapis. 

Ipanatag natin ang ating loob! Darating ang panahong hindi na iiral ang pag-uusig, pang-aapi, katiwalian, at kasamaan. Darating din ang panahon kung kailan ang mga nagpapalaganap ng pag-uusig, pang-aapi, katiwalian, at kasamaan ay parurusahan dahil sa kanilang pasiyang ihasik ang ganitong uri ng kasamaan. Ang lahat ng bagay ay babaguhin ni Hesus. Sa Kanyang kaharian, paiiralin Niya ang Kanyang pag-ibig at habag na nagbabago sa lahat ng bagay. 

Paalala rin sa mga nagpapairal ng pang-aapi sa kapwa, nagnanakaw, at pumapatay ng mga inosente, may araw din kayo. Hindi kayo makakatakas sa pag-ibig at awa ng ipinangakong Mesiyas at Tagapagligtas na si Kristo Hesus na pupuksa sa kasamaan at katiwaliang pinaiiral ninyo sa lipunan.

ISANG KORDERO ANG MAGPAPASTOL SA ATIN

8 Mayo 2022 

Ikaapat na Linggo ng Pasko ng Muling Pagkabuhay (K) 

"Linggo ng Mabuting Pastol" 

Mga Gawa 13, 14. 43-52/Salmo 99/Pahayag 7, 9. 14b-17/Juan 10, 27-30 

Jean Baptiste de Champaigne, Good Shepherd (c. 17th century), Public Domain 

Dalawang titulo ng Panginoong Hesus na Muling Nabuhay ang binibigyan ng pansin ng Simbahan sa Linggong ito - ang Mabuting Pastol at ang Kordero ng Diyos. Ang pag-ibig at habag ni Hesus na Muling Nabuhay ay binibigyan ng pansin ng dalawang titulong ito. Bagamat tinatawag ring Linggo ng Mabuting Pastol ang Linggong ito, ang Ikaapat na Linggo ng Pasko ng Muling Pagkabuhay, nais ring bigyan ng pansin ng Simbahan ang titulong "Kordero ng Diyos." Sa pamamagitan nito, pinagninilayan ang misteryo ng pagiging Mabuting Pastol ng Kordero ng Diyos. Ang Kordero ng Diyos na walang iba kundi si Hesus ay Siya ring Mabuting Pastol na kumakalinga sa Kanyang kawan. Ang Mabuting Pastol ay ang mismong Kordero ng Diyos. 

Sa Ikalawang Pagbasa, inihayag ni Apostol San Juan na kukupkupin at kakalingain ng mismong Kordero ng Diyos ang mga Kristiyanong nagpasiyang manatiling tapat sa Kanya hanggang sa huli (7, 14b-15. 17). Ang misteryong ito na pinagninilayan nang buong kataimtiman sa araw na ito ay tunay ngang kahanga-hanga. Isang maamo't payak na Kordero ang magpapastol sa kawan ng Diyos. Ang magpapastol sa kawan ng Diyos ay hindi kamay na bakal o pasikat. Bagkus, ang magpapastol sa kawan ng Diyos ay walang iba kundi ang mababang-loob at maamong Kordero na si Hesus na taga-Nazaret. Bilang Mabuting Pastol, ang Nazarenong Muling Nabuhay na si Hesus ay laging kumikilos para sa ikabubuti ng Kanyang kawan. 

Mismong si Hesus ang nagsabi sa Ebanghelyo na pinagkakalooban Niya ng buhay na walang hanggan ang Kanyang mga tupang nakikinig sa Kanyang tinig at sumusunod sa Kanya (Juan 10, 28). Iyan ang pag-ibig at habag ni Hesus para sa Kanyang kawan. Pagkakalooban Niya ng buhay na walang hanggan ang Kanyang kawan. Ang Kanyang kawan ay nakikinig sa Kanyang tinig at sumusunod sa Kanya dahil nananalig silang hindi sila mapapahamak ng Mabuting Pastol na si Hesus. Kapag napapakinggan nila ang tinig ng Kordero na Siya ring tunay na Mabuting Pastol, ang kanilang kalooban ay tunay ngang pumapanatag dahil pawang kabutihan nila ang lagi Niyang isinasaisip. 

Napuspos ng galak ang mga Hentil sa Unang Pagbasa nang ang Banal na Ebanghelyo ay ipangaral sa kanila nina Apostol San Pablo at San Bernabe. Ang Ebanghelyo na ipinangaral ng dalawang apostol na ito ay agad nilang pinakinggan at tinanggap nang buong puso. Tinanggap nila si Hesus, ang Kordero na Siya ring Mabuting Pastol, na pinatotohanan nina Apostol San Pablo at San Bernabe nang buong sigasig. Kahit na mayroong mga Hudyong naghangad na patahimikin ang dalawang apostol, hindi sila tumigil sa pagsaksi sa Korderong Mabuting Pastol na si Kristong Muling Nabuhay. 

Iminumulat tayo ng Simbahan sa isang kahanga-hangang misteryo sa Linggong ito: ang misteryo ng Kordero ng Diyos na Mabuting Pastol. Isang kordero, ang Kordero ng Diyos, ang magpapastol sa tunay na Simbahan. Bilang tunay na Mabuting Pastol, kukupkupin at kakalingain ng Kordero ang Kanyang kawan. Ang Kanyang kawan ay hindi magkukulang sa kaliga. Lagi Niya silang aarugain. Ang Mabuting Pastol na Siya ring Kordero ng Diyos ay walang iba kundi ang Panginoong Muling Nabuhay. Tunay Niyang iniibig at kinakalinga ang Kanyang kawan. 

MAY KAGALAKAN SA PAGIGING SAKSI NG PAG-IBIG AT AWA NG PANGINOONG HESUS NA MULING NABUHAY

1 Mayo 2022 

Ikatlong Linggo ng Pasko ng Muling Pagkabuhay (K) 

Mga Gawa 5, 27b-32. 40b-41/Salmo 29/Pahayag 5, 11-14/Juan 21, 1-19 (o kaya: 21, 1-14) 

Lucas Gassel (c. 1500-1568/1569), Christ with the Disciples and the Sea of Galilee, Public Domain

Habang patuloy na nagdiriwang ang Simbahan nang buong galak sa panahong ito dahil sa paggunita sa Muling Pagkabuhay ng Panginoong Hesukristo, tinatalakay at pinagninilayan muli ng Simbahan sa Ikatlong Linggo ng Pasko ng 50 araw na ito ang galak sa pagiging saksi ng Kanyang pag-ibig at awa. Ang bawat saksi ng Panginoong Muling Nabuhay ay nagagalak dahil sa tagumpay ng Kanyang pag-ibig at awa para sa atin. Sa pamamagitan ng Krus at Muling Pagkabuhay ng Panginoong Hesukristo na nagligtas sa sangkatauhan, ang pag-ibig at awa ng Diyos ay nagtagumpay. Ito ang laging bukambibig ng mga sumasaksi sa pag-ibig at habag ng Muling Nabuhay na si Kristo Hesus nang buong galak. 

Sa Unang Pagbasa, ang mga apostol ay napuspos ng galak dahil sa kanilang misyon bilang mga saksi ng pag-ibig at awa ng Panginoong Hesus na Muling Nabuhay. Sa gitna ng pag-uusig at panganib, hindi sila pinabayaan ng kanilang pinatotohanan. Ang Panginoong kanilang pinatotohanan ay lagi nilang kasama. Nabigo ang Sanedrin sa kanilang balak sa mga apostol. Ang Sanedrin ay hindi makahanap ng kasong maaari nilang isakdal laban sa mga apostol. Sabi nga sa wakas ng Unang Pagbasa na hindi rin nila mapagbawalan ang mga apostol na sumaksi sa Muling Nabuhay na si Kristo Hesus. Sabi nina Apostol San Pedro at ng iba pang mga apostol na sinasamahan at tinutulungan sila ng Espiritu Santo sa bawat sandali ng kanilang misyon (Mga Gawa 5, 32). Ang Espiritu Santo na ipinagkaloob ng Ama at ng Anak sa mga apostol upang maging kanilang Patnubay at Kasama sa kanilang misyon ay hindi nagpapabaya. Ang Espiritu Santo ay lagi nilang kasama. Dahil palagi nilang kasama ang Espiritu Santo, ang Patnubay na ipinagkaloob sa kanila ng Ama at ng Anak, lagi silang nagagalak. Isa lamang ang dahilan kung bakit: ang Ikatlong Persona ng Banal na Santatlo na walang iba kundi ang Espiritu Santo - ang Patnubay at Gabay - ay nagsisilbing paalala ng dakilang pangako ng Panginoong Hesus na hindi Niya sila pababayaan. 

Pinatunayan ng mga apostol sa Unang Pagbasa na mayroong kagalakan sa pagiging saksi ng pag-ibig at awa ni Hesus na Muling Nabuhay. Sa gitna ng mga pag-uusig, mararamdaman ang presensya ng Panginoong Hesus sa tulong ng Espiritu Santo na hindi nagpapabaya. Pinalalakas ng Ikatlong Persona ng Banal na Santatlo na walang iba kundi ang Espiritu Santo ang lahat ng mga nananalig kay Kristo sa mga panahon ng pag-uusig. Dahil dito, ang mga saksi ng pag-ibig at awa ng Muling Nabuhay na si Hesus ay laging nagagalak sa gitna ng pag-uusig. Nararamdaman nila ang pag-ibig at awa ng Panginoong Hesus na Muling Nabuhay sa tulong ng Espiritu Santo na laging tumutulong at gumagabay sa kanila. 

Ang pag-ibig at awa ng Panginoong Hesus na Muling Nabuhay ay inilarawan ng awit ng mga anghel sa Ikalawang Pagbasa. Ang mga anghel ay umawit tungkol sa pag-ibig at awa ng Panginoong Hesus na namalas sa pamamagitan ng Kanyang Krus at Muling Pagkabuhay. Ito ang nasaksihan ni Apostol San Juan sa kanyang pangitain na kanya namang inilahad sa Ikalawang Pagbasa. Nakita't narinig niya ang koro ng mga anghel na buong galak na umaawit tungkol sa pag-ibig at habag ni Hesus. Matapos makita't marinig ang lahat ng iyon sa nasabing pangitain, inilahad niya ang mga ito sa nasabing bahagi ng aklat ng Pahayag. Sa pamamagitan nito, inilarawan ni Apostol San Juan ang dahilan kung bakit ang mga anghel ay umaawit nang buong galak sa kanyang pangitain - ang pag-ibig at awa ni Hesus. 

Naranasan ng mga apostol, lalung-lalo na si Apostol San Pedro, ang habag at pag-ibig ni Hesus na Muling Nabuhay na nagdudulot ng galak sa tampok na salaysay sa Ebanghelyo para sa Linggong ito. Sa unang bahagi ng Ebanghelyo, naranasan nila kung paano muli silang tinulungan ng Muling Nabuhay na si Kristo Hesus sa kanilang pangingisda sa Lawa ng Tiberias. Sa ikalawang bahagi ng Ebanghelyo, naranasan ni Apostol San Pedro ang pag-ibig at awa ng Panginoong Hesus na Muling Nabuhay na humihilom sa hirap at sakit dulot ng kanyang tatlong ulit na pagtatwa sa Panginoon bago Siya mamatay sa krus. Dahil dito, ang mga apostol ay patuloy na nagpatotoo tungkol sa pag-ibig at awa ni Hesus sa bawat sandali ng kanilang misyon. 

Mayroong galak sa pagiging saksi ng pag-ibig at awa ni Hesus. Kapag sumaksi tayo sa Kanyang pag-ibig at awa, ipinapalaganap natin ang Kanyang pag-ibig at awa sa lahat ng dako. Hindi rin tayo pababayaan ng Panginoon sa ating pagsaksi sa Kanya. 

BUHAY ANG MAAWAING PANGINOON AT MANUNUBOS NA ATING PINANANALIGAN

24 Abril 2022 

Ikalawang Linggo ng Pasko ng Muling Pagkabuhay (K) 

"Linggo ng Mabathalang Awa" 

Mga Gawa 5, 12-16/Salmo 117/Pahayag 1, 9-11a. 12-13. 17-19/Juan 20, 19-31 

Close-Up of the Original Image of the Divine Mercy (26 April 1935 - Eugeniusz Kazimirowski), Public Domain

Buhay ang Panginoon! Nabuhay na mag-uli ang Panginoong Hesus! Aleluya! Patuloy na tinatalakay sa mga Pagbasa para sa Linggong ito ang kagalakang kaloob ni Kristo Hesus na Muling Nabuhay. Ang dalamhati at hapis ay Kanyang pinalitan ng ngiti at galak sa pamamagitan ng Kanyang Muling Pagkabuhay. Kaya naman, hindi nagtapos ang pagdiriwang ng Pasko ng Muling Pagkabuhay noong nakaraang Linggo. Patuloy pa ring nagdiriwang ang Simbahan hanggang sa Linggo ng Pentekostes. Katunayan, lingid sa kaalaman ng marami, ang Linggong ito ay ang Ikawalong Araw ng Oktaba o Walong Araw na Pagdiriwang ng Pasko ng Muling Pagkabuhay ng Panginoon, bukod sa pagiging Ikalawang Linggo ng Pasko ng Pagkabuhay at Linggo ng Banal na Awa. 

Inilahad ni Apostol San Juan sa Ikalawang Pagbasa ang isang pangitaing tinanggap niya mula sa Diyos habang siya'y nasa Patmos. Sa nasabing pangitain, nagpakita sa kanya ang Panginoong Hesus na Muling Nabuhay na nagsabing namatay Siya ngunit buhay na Siya at mananatiling Siyang buhay magpakailanman (Pahayag 1, 18). Iyan ang misteryong ikinagagalak ng Simbahan. Si Hesus ay namatay sa Krus, ngunit muli Siyang nabuhay sa ikatlong araw, at hindi na Siya mamamatay kailanman. Iyan ang pinakamahalagang misteryo. Dahil sa misteryo ng pagpapakasakit, pagkamatay, at Muling Pagabuhay ni Hesus, nagkaroon ng saysay ang ating pananampalataya. 

Pinatunayan ni Hesus sa pamamagitan ng Kanyang Krus at Muling Pagkabuhay na totoo ang nasasaad sa Salmo para sa Linggong ito: "Ang pag-ibig ng Diyos ay hindi magmamaliw" (Salmo 117, 1). Isang Panginoon at Manunubos ay ibinigay sa atin ng Diyos dahil sa Kanyang pag-ibig at awa - ang Kanyang Bugtong na Anak na walang iba kundi si Hesus. Iyan din ang dahilan kung bakit nagpakita si Hesus kay Apostol Santo Tomas sa Ebanghelyo. Sa pamamagitan ng Kanyang dalawang pagpapakita sa mga apostol, lalung-lalo na kay Apostol Santo Tomas, pinatunayan ni Hesus na hindi kukupas ang pag-ibig at awa ng Diyos. Bagkus, mananatili ito magpakailanman. Ang pag-ibig na ito ang umaakit sa mga makasalanan na magbagong-buhay at magbalik-loob sa Diyos. Ang pag-ibig na ito, na nahayag sa pamamagitan ng mga milagrong ginawa ng mga apostol sa Kanyang Pangalan, ang umakit sa mga tao na manalig sa Kanya. Iyan ang pag-ibig at awa ng Diyos. 

Mayroong saysay ang ating pananalig at pananampalataya dahil si Hesus ay nabuhay na mag-uli. Sa pamamagitan ng Kanyang Muling Pagkabuhay, nagkaroon ng saysay ang ating pananalig sa Diyos na laging nagbibigay ng pagkakataong magbalik-loob sa Kanya ang mga makasalanan. Ang Diyos na lubos nating pinananaligan bilang mga bumubuo sa Simbahang itinatag ni Kristo ay laging handang magpakita ng Kanyang habag at awa sa mga makasalanang hihingi nito sa Kanya. 

Kaya naman, buong pananalig natin sambitin ang mga salitang nakasulat sa ibabaw ng larawan ng Mabathalang Awa: "Hesus, ako ay nananalig sa Iyo!" Manalig tayo sa habag at awa ng Panginoon. Hindi Niya ito ipagdadamot sa atin. Hindi Niya isasara ang pintuan ng Kanyang awa. Ang pintuang ito ay laging bukas para sa atin habang patuloy tayong nabubuhay at naglalakbay dito sa mundo. Ang pagpasok at pagdaan sa pintuang ito ay tanda ng taos-pusong pananalig sa habag at awa ng Panginoon. 

Nabuhay na mag-uli ang Panginoong Hesukristo. Nagtagumpay ang Kanyang habag at awa sa pamamagitan ng Kanyang Krus at Muling Pagkabuhay. Pumasok tayo sa pintuan ng Kanyang habag at awa bilang tanda ng ating buong pusong pananalig sa Kanya bilang maawain at mahabaging Panginoon at Manunubos. 

Bernardo Strozzi, Incrédulo Tomás (c. 1620), Public Domain