TUNAY NA MATAPAT

24 Marso 2023 

Biyernes sa Ikaapat na Linggo ng 40 Araw na Paghahanda para sa Pasko ng Pagkabuhay 

Karunungan 2, 1a. 12-22/Salmo 33/Juan 7, 1-2. 10. 25-30 

This faithful photographic reproduction of the painting Cristo con la Cruz a cuestas, encuentra a la Verónica (English: Christ Bearing the Cross Meets Veronica; c. 1659) by Antonio Arias Fernández  (1614–1684), as well as the actual work of art itself from the Museo del Prado Collection, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or less due to its age. 

Habang papalapit ang Simbahan sa pagdiriwang ng mga Mahal na Araw, ang banal na panahong inilaan para sa taimtim na pagninilay at paggunita sa Pasyong Mahal at Muling Pagkabuhay ni Kristo, ang Mahal na Poong Jesus Nazareno, muling itinutuon ang ating pansin sa tema ng pagpapakasakit at pagdurusa ng mga tapat na lingkod ng Panginoong Diyos sa kamay ng kanilang mga kaaway. Naaangkop itong gawin, lalo't higit ang araw na ito ay isang araw ng Biyernes na inilaan para sa taimtim na debosyon at pamamanata kay Kristo sa ilalim ng Kanyang titulo bilang Nuestro Padre Jesus Nazareno. Lalo itong napapanahon dahil isa itong araw ng Biyernes sa loob ng banal na panahon na kilala natin sa tawag na Kuwaresma. 

Ang mga Pagbasa para sa Misa sa araw na ito ng Biyernes, ang araw na inilaan para sa taimtim na debosyon at pamamanata sa Poong Jesus Nazareno, ay nakasentro sa pag-uusig sa mga tapat na lingkod ng Diyos. Bagamat tapat silang naglilingkod sa Diyos, hindi sila tinanggap ng ibang mga tao. Hindi ikinatuwa o tinanggap ng ibang mga tao ang tapat nilang pagpanig at paglingkod sa Panginoong Diyos. Dahil dito, ipinasiya nilang usigin ang mga lingkod na ito. Kahit na ang mismong Mesiyas na si Jesus Nazareno, ang Bugtong na Anak ng Diyos, ay hindi naging ligtas mula sa pag-uusig. Ito ang katotohanan tungkol sa mga inusig na Kristiyano. 

Tila isang buod ng mga dinanas ng mga hinirang ng Diyos upang maging Kanyang mga propeta sa Lumang Tipan ang inilarawan sa Unang Pagbasa. Inilarawan ang mga balak laban sa mga propetang buong kababaang-loob at katapatang naglingkod sa Diyos na tumawag at humirang sa kanila sa ministeryong ito. Nais nilang usigin at patayin ang mga lingkod na ito. Bakit? Para raw ito sa kanilang "ikatatahimik." Hindi nila gusto yaong tinatawag nilang pakikialam, kahit mali o kasalanan ang kanilang ginagawa. Sa wakas ng Ebanghelyo, inilarawan ang galit ng mga tao laban sa Poong Jesus Nazareno. Hindi nila matanggap ang Kanyang mga sinabi tungkol sa Kanyang sarili. Bagamat ang ating Mahal na Poong Jesus Nazareno ay tunay ngang Anak ng Diyos at Ikalawang Persona ng Banal na Santatlo, hindi matanggap ng Kanyang mga kaaway at ilan sa Kanyang mga tagapakinig ang katotohanang ito. 

Ito ang katotohanan tungkol sa paglilingkod sa Panginoong Diyos. Mayroon namang mga tatanggap sa mga tunay at tapat na lingkod ng Diyos, subalit hindi lahat. Hindi ligtas mula sa mga pag-uusig at pagpapakasakit sa buhay dito sa mundo ang lahat ng mga magpapasiyang maglingkod sa Diyos nang buong katapatan. Mismong ang Poong Jesus Nazareno ang patunay ng katotohanang ito. Ito ang dahilan kung bakit ang Banal na Krus na Kanyang kinamatayan ay Kanyang pinasan mula sa Herusalem hanggang Kalbaryo alang-alang sa atin, kahit hindi naman ito makatarungan. 

Muli tayong inaanyayahan ng Simbahan na suriin ang ating mga sarili kung handa nga ba tayong maglingkod sa Panginoon nang kusang-loob. Kung ang Diyos ay ating paglilingkuran upang makatakas o makaligtas mula sa mga pag-uusig sa buhay dito sa mundong ito, hindi tunay ang ating kapatan sa Kanya.

ARAL PARA SA LAHAT NG MGA DEBOTO

20 Marso 2023 

Dakilang Kapistahan ni San Jose, Kabiyak ng Puso ng Mahal na Birhen 

2 Samuel 7, 4-5a. 12-14a. 16/Salmo 88/Roma 4, 13. 16-18. 22/Mateo 1, 16. 18-21. 24a (o kaya: Lucas 2, 41-51a) 

This faithful photographic reproduction of the painting The Death of Saint Joseph by Bartolomeo Altomonte, as well as the original work of art, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Madalas na tumatapat sa 40 Araw na Paghahanda para sa Pasko ng Pagkabuhay na tiyak na mas kilala ng marami sa atin bilang panahon ng Kuwaresma ang petsa ng Dakilang Kapistahan ni San Jose, Kabiyak ng Puso ng Mahal na Birhen. Katunayan, kapag ang mismong araw ng nasabing Dakilang Kapistahan (19 Marso) ay tumapat sa araw ng Linggo, agad na inililipat ito sa kasunod na araw (20 Marso) sapagkat hindi maaring laktawan o hindi ipagdiwang ang mga Linggo ng Kuwaresma. Bagamat isa siya sa mga importanteng panauhin sa salaysay ng pagsilang ng Panginoong Jesus Nazareno, ang Dakilang Kapistahang ito sa karangalan ni San Jose ay lagi na lamang ipinagdiriwang pagsapit ng panahon ng Kuwaresma. Bakit kaya? 

Ano nga ba ang koneksyon o ugnayan ni San Jose sa panahon ng Kuwaresma na inilaan sa pagsisisi at pagbabalik-loob sa Diyos bilang paghahanda ng sarili para sa mga Mahal na Araw o Semana Santa na inilaan sa taimtim na pagninilay at paggunita sa pagpapakasakit, pagkamatay, at Muling Pagkabuhay ng Poong Jesus Nazareno? Hindi ba ipinahiwatig sa Banal na Kasulatan na matagal na'ng pumanaw si San Jose noong panahong sinimulan ng Poong Jesus Nazareno ang Kanyang ministeryo? Bakit hindi na lamang natin ilipat ang Dakilang Kapistahang ito? 

Bagamat hindi ito halata sa unang tingin, mayroon tayong mapupulutang aral mula kay San Jose na naaangkop para sa panahon ng Kuwaresma. Katunayan, ang aral na ito ay hindi lamang pang-Kuwaresma kundi para sa buong taon at sa bawat sandali ng ating buhay. Ano ang aral na iyon? Laging buksan ang puso, isipan, at pandinig sa Diyos. Huwag magbingi-bingihan o ipinid ang puso, isipan, at pandinig sa Diyos. Sa pamamagitan nito, mapapatunayan nating tunay at tapat ang ating pamamanata sa Mahal na Poong Nazareno. Tinuturuan tayo ni San Jose kung paanong maging mga tunay na deboto ng Mahal na Poong Jesus Nazareno. 

Sa Unang Pagbasa, nakinig si Propeta Natan sa mga ipinasabi ng Panginoong Diyos kay Haring David. Ang mga inihayag sa kanya ng Panginoong Diyos ay kanya namang ipinamalita kay Haring David. Pinakinggan ni Natan ang napakagandang pangakong binitiwan ng Panginoong Diyos para kay Haring David na kanya namang inilahad sa hari. Sa pamamagitan nito, inihayag ng propetang si Natan ang kanyang debosyon sa pamamagitan ng pagtupad sa kanyang pananagutan bilang propetang hinirang ng Diyos. Sa Ikalawang Pagbasa, inilarawan ni Apostol San Pablo kung paanong nanalig nang taos-puso at buong kababaang-loob si Abraham sa lahat ng mga pangako ng Maykapal. Isa itong pahiwatig na lagi niyang binuksan ang kanyang puso at isipan sa anumang ipinangako sa kanya ng Diyos. Matapos pakinggan nang maigi ang mga pangakong ito ng Diyos na sumasalamin sa Kanyang kalooban, ipinasiya ni Abraham na manalig sa Diyos na kanyang inihayag sa kanyang pagtalima. Sa Ebanghelyo, si San Jose ay tumulad sa halimbawang ipinakita ng kanyang mga ninunong si Abraham at Haring David. Bagamat mayroong malaking problema siyang hinarap noon, hindi niya isinara o ipininid ang kanyang puso, isipan, at pandinig sa Diyos. Mayroon ngang binuong balak o plano si San Jose upang makaalis sa problemang kanyang hinarap. Subalit, kahit nakabuo na siya ng plano, hindi niya isinara o ipininid ang pintuan ng kanyang puso, isipan, at pandinig sa Diyos. Pinakinggan pa rin niya ito, bagamat inihayag sa kanya ng anghel ang kalooban ng Diyos sa panaginip habang natutulog siya nang mahimbing. Katunayan, ang planong ito ng Diyos ay muling naihayag sa pamamagitan ni Simeon noong dinala sa Templo ang Banal na Sanggol na si Jesus Nazareno sa alternatibong Ebanghelyo para sa Dakilang Kapistahang ito. 

Kahit madalas na tumapat sa panahon ng Kuwaresma, mahalaga pa rin ang aral na itinuturo sa atin ni San Jose. Ang aral na ito na itinatampok at pinagninilayan nang buong kataimtiman sa Dakilang Kapistahan sa karangalan ni San Jose ay hindi para sa isang panahon lamang. Bagkus, para ito sa lahat ng panahon. Ang aral na ito ay para sa bawat sandali ng ating buhay dito sa mundo. Sa pamamagitan ng aral na ito, tinuturuan tayo ni San Jose kung paanong maging mga tunay na deboto ng Poong Jesus Nazareno. Ano ang aral na iyon? Pakinggan ang kalooban ng Diyos at sundin ito nang may kababaang-loob at pananalig. 

GALAK NA NAGMUMULA SA TUNAY NA LIWANAG

19 Marso 2023 

Ikaapat na Linggo ng 40 Araw na Paghahanda para sa Pasko ng Pagkabuhay (A) 

"Linggo ng Laetare" 

1 Samuel 16, 1b. 6-7. 10-13a/Salmo 22/Efeso 5, 8-14/Juan 9, 1-41 (o kaya: 9, 1. 6-9. 13-17. 34-38) 

This photographic reproduction of the 17th century painting Healing of the man born blind (Italian: Guarigione del cieco nato) by Orazio de Ferrari, as well as the actual work of art itself from the Collezione D'Arte Della Banca Carige collection, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Kilala rin bilang "Linggo ng Laetare" o "Linggo ng Kagalakan" ang Ikaapat na Linggo ng 40 Araw na Paghahanda para sa Pasko ng Pagkabuhay o Kuwaresma. Nakatuon ang ating mga pansin sa larawan ng Panginoon bilang bukal ng tunay na galak. Kung tutuusin, ipinahiwatig ito ng alternatibong pangalan ng Simbahan para sa Linggong ito. Tila, isa itong paalala para sa ating lahat na tanging sa Panginoong Diyos lamang matatagpuan ang tunay na galak sapagkat Siya mismo ang nagkakaloob nito sa atin. 

Nakasentro sa paksang ito ang mga Pagbasa para sa araw na ito. Katunayan, ang mga Pagbasa para sa Linggong ito ay tungkol sa larawan ng ating Panginoong Diyos bilang tunay na liwanag. Ang Panginoong Diyos ay naghahatid ng tunay na galak sa atin sa pamamagitan ng Kanyang ningning bilang tunay na liwanag. Pinatotohanan ito ng mga panauhing itinatampok sa mga Pagbasa para sa Linggong ito. 

Sa Unang Pagbasa, isinalaysay ang pagpahid ng langis kay David bilang patunay na hinirang nga siya ng Panginoong Diyos upang maging susunod na hari ng Israel. Ang tunay na liwanag na walang iba kundi ang Diyos ay kumilos upang pagkalooban ng galak ang bayang Israel. Pinagkalooban Niya sila ng isang panibagong hari na walang iba kundi si David. Mula sa pagpapastol ng mga tupa, itinaas ng Diyos si David bilang kahalili ni Haring Saul sa trono. Sa pamamagitan nito, ang Diyos ay nagbigay ng isang maliwanag na kinabukasan para sa bayang Israel. Bukod pa roon, binigyan rin Niya si David ng isang maningning na kinabukasan. Itinaas ng Panginoon si David mula sa pagpapastol ng mga tupa sa parang. Sa pamamagitan ng pagtampok Niya kay David, ang lingkod Niyang ito ay Kanya ring binigyan ng galak sapagkat isa itong patunay na lagi Niyang kinakalinga, kinukupkop, at kinalulugdan ang mga aba Niyang lingkod. 

Isinentro ni Apostol San Pablo ang kanyang pangaral sa Ikalawang Pagbasa para sa Linggong ito sa biyaya ng bagong buhay na kaloob sa atin ng Diyos sa pamamagitan ni Kristo, ang Mahal na Poong Jesus Nazareno. Ang bagong buhay na ipinagkaloob sa atin ng Diyos sa pamamagitan ni Kristo, aniya, ay pamumuhay nang banal at malaya mula sa mga puwersa ng kadiliman at kasalanan dahil mamumuhay tayo sa ilalim ng tunay na liwanag na walang iba kundi ang Panginoong Jesus Nazareno (Efeso 5, 8). Pinagkakalooban ng galak ng ating Panginoong Jesus Nazareno ang bawat isa sa atin sa pamamagitan ng biyayang ito ng bagong buhay sa ilalim ng tunay na liwanag na walang iba kundi Siya mismo. Hindi na ito katulad ng dati nating buhay sa ilalim ng kadiliman at kasalanan sapagkat mamumuhay tayo nang banal at malaya sa ilalim ng butihing Poong Señor Jesus Nazareno, ang tunay na liwanag. Kagalakang tunay ang dulot ni Jesus Nazareno sa atin sa pamamagitan ng biyayang ito. 

Tunay na galak ang ipinagkaloob ng ating Nuestro Padre Jesus Nazareno sa lalaking ipinanganak na bulag sa Ebanghelyo. Ang lalaking bulag mula sa kanyang pagsilang sa mundong ito ay pinagkalooban ni Jesus Nazareno ng pagkakataong masilayan ang kagandahan ng mundong ito. Sa pamamagitan ng kahanga-hangang himalang ito, nagbigay ng galak at tuwa sa lalaking ito ang Nuestro Padre Jesus Nazareno. Kahit binatikos ng marami, kabilang na rito ang mga kaaway ng Poong Jesus Nazareno, ang lalaking ito, hindi nila naipagkait o naiagaw mula sa lalaking ito na isinilang na bulag ang galak at tuwang kaloob sa kanya ni Jesus Nazareno. 

Gaya ng sabi ng mang-aawit sa Salmong Tugunan para sa Linggong ito: "Pastol ko'y Panginoong Diyos, hindi ako magdarahop" (Salmo 22, 1). Sapat na ang Panginoong Diyos. Wala na tayong hahanapin pa. Sa Panginoon lamang nagmumula ang tunay na liwanag at ang tunay na galak. Ang Panginoong Diyos ay laging nandiyan. Bakit pa ba tayo maghahanap ng iba? Kung nais nating magkaroon ng liwanag at galak, lapitan natin nang buong kababaang-loob at pananalig ang Diyos. 

Ang tunay na galak ay nagmumula lamang sa tunay na liwanag. Ito ang paalala para sa atin sa Linggong ito. Ang Panginoon mismo ay ang tunay na galak at ang tunay na liwanag. Lagi Niya tayong nililiwanagan. Ang liwanag ng Panginoon ay nagdudulot ng galak at tuwa sa lahat.

PAGKAKATAONG IPINAGKAKALOOB NG TUNAY NA NAGMAMAHAL

17 Marso 2023 

Biyernes sa Ikatlong Linggo ng 40 Araw na Paghahanda para sa Pasko ng Pagkabuhay 

Oseas 14, 2-10/Salmo 80/Marcos 12, 28b-34 

Screenshot: 02 FEB. 2020 | 5AM #HolyMass (Quiapo Church Facebook Live) 

Nakasentro sa misteryo ng pag-ibig ng Panginoong Diyos ang mga Pagbasa para sa araw na ito ng Biyernes na inilaan para sa taimtim na debosyon at pamamanata sa Mahal na Poong Jesus Nazareno. Bukod pa roon, ang araw na ito ng Biyernes ay nasa loob pa rin ng 40 Araw na Paghahanda para sa Pasko ng Pagkabuhay na tiyak na mas kilala ng maraming Katoliko bilang panahon ng Kuwaresma. Sa panahong ito na kilala sa tawag na Kuwaresma, inaanyayahan tayo ng Simbahan na magpaakit muli sa pag-ibig ng Diyos na nahayag sa pamamagitan ng Misteryo Paskwal ng Mahal na Poong Jesus Nazareno nang sa gayo'y maging kusang-loob ang ating pasiyang magbagong-buhay at magbalik-loob sa Diyos na puno ng pag-ibig, habag, at awa para sa atin. 

Sa Unang Pagbasa, inilahad ni Propeta Oseas ang panawagan ng Panginoong Diyos para sa Kanyang bayan. Sa mismong pahayag ring ito, inihayag ng Panginong Diyos na lagi Siyang handang ipagkaloob ang Kanyang kapatawaran, habag, at awa kapag kusang-loob at taos-pusong nagpakumbaba, nagsisi sa kasalanan, at nagbalik-loob ang Kanyang bayan sa Kanya. Sa kabila ng mga kasalanang kanilang ginawa laban sa Diyos at kapwa, gaano mang kalala, kalubha, o karami ang mga ito, ipagkakaloob pa rin ng Panginoong Diyos ang Kanyang habag at awa sa mga taos-pusong nagbabalik-loob sa Kanya nang may kababaang-loob. 

Ang mga salita sa Salmong Tugunan para sa araw na ito ay isang napakagandang buod ng paanyaya ng Panginoon para sa atin. Hindi lamang ito para sa mga tao noong panahon ng Lumang Tipan. Bagkus, ito ay para sa lahat ng tao, anuman ang panahong kinabibilangan. Umaalingawngaw pa rin sa kasalukuyan ang mga salitang ito ng Panginoon sa Salmong Tugunan. Lumipas man ang napakahabang panahon mula noong isinulat ang mga salitang ito sa Salmo, hindi nawawalan ng kabuluhan o saysay ang mga salitang ito. Nananatili pa rin ang saysay nito sa kasalukuyan. Ang Diyos ay patuloy na nananawagan sa atin na taos-pusong pagsisihan ang ating mga kasalanan at magbalik-loob sa Kanya nang may kababaang-loob. 

Inihayag naman ni Jesus Nazareno sa Ebanghelyo ang pinakamahalagang utos. Ang pinakamahalagang utos ay walang iba kundi buong puso at kaluluwang mahalin ang Diyos at mahalin rin ang kapwa katulad ng pagmamahal sa sarili. Sa pamamagitan nito, itinuturo sa atin ng Panginoong Jesus Nazareno kung paano magiging tunay at tapat ang pag-ibig natin para sa Diyos. Mahalin natin ang Diyos nang higit sa lahat at mahalin rin natin ang kapwa. Sa pamamagitan ng utos na ito na kaloob ng Diyos sa atin, tayong lahat ay binibigyan Niya ng pagkakataong mahalin Siya nang may taos-pusong katapatan. Ginagawa Niya ito dahil tunay Niya tayong iniibig. 

Hindi naman kinailangan ng Diyos na pagkalooban tayo ng pagkakataong ibigin Siya dahil batid naman Niyang mga makasalanan tayo. Subalit, ipinasiya pa rin Niya itong gawin dahil sa Kanyang pag-ibig, kagandahang-loob, habag, at awa para sa atin. Ang patunay niyan ay walang iba kundi si Kristo, ang ating Nuestro Padre Jesus Nazareno, na nagpakasakit at namatay sa Banal na Krus na Kanyang pinasan mula sa pretoryo tungo sa Kalbaryo alang-alang sa atin. 

DINGGIN ANG TUNAY NA MAAASAHAN AT MAPAGKAKATIWALAAN

12 Marso 2023 

Ikatlong Linggo ng 40 Araw na Paghahanda para sa Pasko ng Pagkabuhay (A) 

Exodo 17, 3-7/Salmo 94/Roma 5, 1-2. 5-8/Juan 4, 5-42 (o kaya: 4, 5-15. 19b-26. 39a. 40-42) 

This faithful photographic reproduction of the painting Woman at the Well by Carl Heinrich Bloch, as well as the work of art itself from the Chapel at Frederiksborg Palace in Copenhagen, is in the Public Domain ("No Known Copyright") in its country of origin as well as in other countries and areas where the copyright term is the author's life plus 70 years or fewer due to its age. Thus, it is therefore considered to be in the Public Domain in the United States. 

Itinutuon ng Simbahan ang ating mga pansin sa pagiging mapagkalinga sa atin ng ating mahabagin, maibigin, maawain, at mabuting Nuestro Padre Jesus Nazareno sa Linggong ito, ang Ikatlong Linggo ng Kuwaresma o ang 40 Araw na Paghahanda para sa Pasko ng Pagkabuhay. Sa mga Pagbasa para sa nasabing Linggo sa taong ito, ang katangiang ito ng ating Mahal na Poon ay itinatampok at pinagninilayan. Bakit ito ang ginagawa ng Simbahan sa Linggong ito? Layunin ng Simbahan na ipanatag ang ating mga puso at loobin at palakasin ang ating pananalig kay Kristo, ang Nuestro Padre Jesus Nazareno, na hindi titigil sa pagkalinga sa atin. Siya ang bahala sa atin. 

Sa Unang Pagbasa, isinalaysay kung paanong binigyan ng Panginoong Diyos ng tubig ang mga Israelita. Ang Diyos ay nagpabukal ng tubig mula sa isang malaking bato sa Horeb. Si Moises ay inutusan ng Panginoong Diyos na hampasin ang nasabing bato upang bumukal ang tubig mula roon. Bagamat pinatunayan na nga ng Panginoon na tunay nga Niyang kinakalinga ang mga Israelita nang sila'y Kanyang palayain mula sa Ehipto, muli Niya itong pinatunayan sa kanila sa pamamagitan ng himalang ito. Ang pagiging mapagkalinga ng Panginoong Diyos ay tinalakay rin ni Apostol San Pablo sa Ikalawang Pagbasa. Inihayag ni Apostol San Pablo na ibinuhos sa atin ng Diyos nang kusang-loob ang Kanyang pag-ibig sa pamamagitan mismo ng Espiritu Santo (Roma 5, 5). Sa Ebanghelyo, ipinakilala ng Panginoong Jesus Nazareno ang Kanyang sarili sa babaeng Samaritana sa Balon ni Jacob bilang tubig ng buhay. 

Gaya ng sabi sa Salmong Tugunan para sa Linggong ito: "Panginoo'y inyong dinggin, huwag n'yo S'yang salungatin" (Salmo 94, 8). Ito ang paanyaya ng Simbahan sa atin sa Linggong ito. Dinggin natin ang Panginoong Diyos. Buksan natin ang ating mga pandinig at pakinggan ang Kanyang tinig. Magpaakit tayo sa Kanyang kahali-halinang tinig na mapagkakatiwalaan. Hindi Siya nambubudol at hindi rin Niya tayo lolokohin kahit kailan. Bagkus, tunay ngang maaasahan at mapagkakatiwalaan ang Diyos. Lagi Niya tayong kakalingain, gagabayan, at sasaklolohan. 

Muli tayong pinaaalalahanan ng Simbahan sa Linggong ito na ang Panginoong Diyos ay tunay ngang maaasahan at mapagkakatiwalaan sa lahat ng oras. Sa pamamagitan nito, itinuturo sa atin ng ating Inang Simbahan kung kaninong tinig nga ba talaga ang dapat pakinggan at dinggin. Iyon nga lamang, tayo pa rin mismo ang magdedesisyon kung kaninong tinig ang ating pakikinggan at diringgin. Kahit ituro pa sa atin ng Simbahan ang tinig na dapat nating pakinggan at dinggin, nasa ating mga kamay ang pasiya kung gagawin natin iyon. Tayo mismo ang magpapasiya. 

Ang tinig ng Poong Jesus Nazareno, ang tunay na maaasahan at mapagkakatiwalaan sa lahat ng oras na Siyang laging kumakalinga sa atin, ay atin bang pakikinggan at diringgin? Kung hindi, kaninong tinig ang ating pakikinggan at diringgin? Isa pa, kung hindi natin pakikinggan at diringgin ang tinig ng Mahal na Poong Jesus Nazareno, para saan pa nga ba ang ating debosyon sa Kanya? 

PAGTATAKWIL SA KINALUGDAN

10 Marso 2023 

Biyernes sa Ikalawang Linggo ng 40 Araw na Paghahanda para sa Pasko ng Pagkabuhay 

Genesis 37, 3-4. 12-13a. 17b-28/Salmo 104/Mateo 21, 33-43. 45-46

This faithful photographic reproduction of the painting of Joseph being sold into slavery (c. Before 1888) by Alexander Maximilian Seitz, as well as the actual work of art itself, is in the Public Domain ("No Known Copyright") in its country of origin as well in other countries and areas where the copyright term is the author's life plus 100 years or fewer due to its age. This faithful photographic reproduction of the said work of art and the work of art itself is also in the Public Domain in the United States because it was published (or registered with the U.S. Copyright Office) before January 1, 1928. 

Ang mga Pagbasa para sa araw na ito ay napapanahon sapagkat ang araw na ito ay isang araw ng Biyernes, ang araw na inilaan ng debosyon at pamamanata sa Mahal na Poong Jesus Nazareno. Ito ang araw na isinesentro ng Simbahan ang ating mga puso at isipan sa larawan o imahen ng ating Panginoon at Manunubos na si Kristo na kusang-loob na nagpasan ng Krus patungong Kalbaryo alang-alang sa atin. Bukod pa dito, ang araw na ito ng Biyernes ay napapaloob sa 40 Araw na Paghahanda para sa Pasko ng Pagkabuhay na tinatawag ring Kuwaresma. Sa banal na panahong ito na tinatawag na Kuwaresma, habang puspusan nating pinaghahandaan ang ating mga sarili bilang mga mananampalatayang Katoliko para sa Dakilang Kapistahan ng Pasko ng Muling Pagkabuhay ng Mahal na Poong Jesus Nazareno sa pamamagitan ng taos-pusong pagsisisi sa kasalanan at pagbabalik-loob sa Diyos, inaanyayahan tayo bilang mga bumubuo ng Simbahan na lalo pang isentro ang ating mga pansin at pagnilayan nang buong kataimtiman ang misteryo ng dakilang pag-ibig ng Diyos na nahayag sa pamamagitan ng Misteryo Paskwal ng Mahal na Poong Jesus Nazareno. 

Tinalakay sa mga Pagbasa para sa araw na ito ng Biyernes sa banal na panahon na ito na tinatawag na Kuwaresma ang pagtakwil sa mga kinalugdan. Sa paksang ito nakasentro ang pagninilay ng Simbahan sa araw na ito upang lalo pang lumalim ang ating pang-unawa at pagpahalaga sa misteryo ng Mahal na Pasyon ng Mahal na Poong Jesus Nazareno. Sa Unang Pagbasa, si Jose na anak ni Jacob ay binalak patayin ng kanyang mga nakakatandang kapatid dahil sa inggit. Katunayan, si Jose ay binalak talaga nilang patayin bago ihagis ang kanyang bangkay sa balon. Umawat lamang si Ruben at hindi nila itinuloy ang planong pagpatay kay Jose bago ihagis sa nasabing balon. Si Jose ay kanilang inihagis na lamang sa balon nang buhay at kalaunan ay ibinenta sa halagang 20 pirasong pilak sa mga Ismaelitang naglalakbay patungong Ehipto. Sa Ebanghelyo, inilarawan ng ating minamahal na Poong Jesus Nazareno sa pamamagitan ng isang talinghaga ang Kanyang sasapitin sa kamay ng Kanyang mga kaaway. Walang awa Siyang papatayin ng Kanyang mga kaaway. Natupad nga ito noong unang Biyernes Santo sa bundok ng Kalbaryo kung saan Siya ipinako sa Krus. 

Sa pamamagitan ng pagtatampok sa mga sinapit ni Jose sa Unang Pagbasa at ng talinghaga ng Panginoong Jesus Nazareno sa Ebanghelyo, muling itinutuon ang ating pansin sa katotohanan tungkol sa mga lingkod ng Diyos na kinalulugdan Niya nang lubos. Hindi sila tinanggap ng marami. Marami sa kanila ang nakaranas ng pag-uusig at pagtatakwil. Katunayan, mayroon ngang mga namatay bilang mga martir dahil kay Jesus Nazareno. Si Jesus Nazareno nga, namatay bilang martir sa Banal na Krus sa bundok ng Kalbaryo upang tayo ay maligtas mula sa kasalanan at kamatayan. Hindi naging ligtas ang mga dakilang lingkod ng Diyos mula sa pagtatakwil at pag-uusig. 

Mas madaling maging bahagi ng mga nagtatakwil sa mga kinalulugdan ng Diyos, sa totoo lamang. Ligtas ka mula sa mga pagtatakwil at pag-uusig kapag ito ang ating ipinasiyang gawin. Kapag sumabay lamang tayo sa agos, hindi ka mapapahamak o uusigin ng marami. Subalit, kapag ito ang ating ginawa, lalo lamang nadadagdagan ang kawalan ng katarungan. Maaari rin tayo maligtas mula sa pagtakwil at pag-uusig ng tao, subalit, hindi natin matatakasan ang katarungan ng Panginoong Diyos. 

Itinutuon ng Simbahan ang ating mga pansin, puso, at isipan sa katotohanan tungkol sa mga sinapit ng mga dakilang lingkod ng Diyos, pati na rin ang Bugtong na Anak ng Diyos na si Kristo, ang Poong Jesus Nazareno, bilang isang uri ng pagtatanong sa atin tungkol sa ating pasiya. Saan ba tayo nais mapabilang? Nais ba nating mapabilang sa mga tapat at taos-pusong naglilingkod sa Panginoong Diyos o sa mga nagtatakwil sa kanila? Tandaan, nakasalalay sa pasiya nating ito ang ating mga kaluluwa. Nasa atin ang pasiya kung tatanggapin ba natin ang biyaya ng kaligtasang kaloob ng Nuestro Padre Jesus Nazareno sa tanan o hindi. 

ANG HALAGA NG PAKIKINIG

5 Marso 2023 

Ikalawang Linggo ng 40 Araw na Paghahanda para sa Pasko ng Pagkabuhay (A) 

Genesis 12, 12-4a/Salmo 32/2 Timoteo 1, 8b-10/Mateo 17, 1-9 

This faithful photographic reproduction of the painting The Transfiguration of Jesus (c. Between 1500 and 1505) by Gerard David (c. 1450/1460-1523), as well as the actual work of art itself from the Church of Our Lady in Bruges, Belgium, is in the Public Domain ("No Known Copyright") in its country of origin and in other countries and areas where the copyright term is the author's life plus 100 years or fewer due to its age. 

Dalawang ulit nating maririnig sa buong taon ang salaysay ng Pagbabagong-Anyo ng ating Panginoong Jesus Nazareno sa Ebanghelyo para sa pagdiriwang ng Banal na Misa. Ang unang araw sa buong taon kung kailan natin maririnig sa Ebanghelyo para sa pagdiriwang ng Banal na Misa ang salaysay ng importanteng kaganapang ito sa buhay ni Kristo ay sa Ikalawang Linggo ng 40 Araw na Paghahanda para sa Pasko ng Pagkabuhay na kilala rin ng marami sa tawag na Kuwaresma. Ang ikalawang araw ng taon kung kailan natin maririnig ang salaysay ng napakahalagang kaganapang ito sa Ebanghelyo para sa pagdiriwang ng Banal na Misa ay ang Ika-6 ng Agosto sapagkat iyon ang araw sa taon na inilaan ng Simbahan para sa maringal na pagdiriwang ng Kapistahan ng Pagliliwanag sa Bagong Anyo ng Panginoon. 

Bakit ang salaysay ng kaganapang ito ang naririnig o binabasa sa Ebanghelyo para sa pagdiriwang ng Banal na Misa ng Ikalawang Linggo ng Kuwaresma? Anong mayroon sa nasabing Linggo at ito ang isa sa dalawang araw ng bawat taon na napili ng ating Inang Simbahan upang pagtuunan ng pansin at pagnilayan nang buong kataimtiman ang mahalagang kaganapang ito sa buhay ng Panginoong Jesus Nazareno? Kung tutuusin, maaari ring tanungin ng marami sa atin kung bakit itinuturing ng Simbahan na isang napakahalagang sandali sa buhay ng Mahal na Poong Jesus Nazareno ang Kanyang Pagbabagong-Anyo sa Bundok ng Tabor, ang bundok na pinaniniwalaan ng maraming Kristiyano bilang bundok na kung saan naganap ang nasabing sandali? 

Isinalungguhit sa salaysay ng Pagbabagong-Anyo ni Jesus Nazareno sa Ebanghelyo ang dahilan kung bakit palagi itong pinagtutuunan ng pansin at pinagninilayan nang buong kataimtiman ng Simbahan tuwing sasapit ang Ikalawang Linggo ng 40 Araw na Paghahanda para sa Pasko ng Pagkabuhay. Bukod sa pagiging isang pasulyap sa tagumpay na kinamtan ng Panginoong Jesus Nazareno sa pamamagitan ng Kanyang Krus at Muling Pagkabuhay, itinuturo sa atin ng napakahalagang kaganapang ito ang halaga ng pakikinig. Sabi ng Amang nasa langit noong nagbagong-anyo ang Poong Jesus Nazareno sa bundok, "Pakinggan ninyo Siya!" (Mateo 17, 5). Katunayan, ang mga salitang ito ay ginamit rin bilang Awit-Pambungad sa Mabuting Balita para sa Linggong ito. Ang patunay ng halaga ng pakikinig ay si Jesus Nazareno mismo. 

Walang sandaling hindi pinakinggan ng Nuestro Padre Jesus Nazareno ang kalooban ng Ama. Lagi Siyang nakinig sa kalooban ng Ama bago Siya nagpasiya tungkol sa mga bagay-bagay. Habang tinupad Niya ang Kanyang misyon dito sa mundong ito, hindi kinaligtaan ng Poong Jesus Nazareno makipag-ugnayan sa Ama sa pamamagitan ng panalangin. Sa tuwing nanalangin Siya sa Ama, lagi Niya kinakausap at pinakikinggan ang Ama. Ito ang ipinahiwatig ng Amang nasa langit sa Ebanghelyo. Ang ating Poong Jesus Nazareno ay laging nakinig sa Ama bago magpasiya. Ito rin ang dapat nating gawin bilang mga Kristiyano. Bago magpasiya, dapat muna tayong makinig, lalo na sa tinig ng Diyos. 

Lagi nga nating sinasabi, "Huwag padalos-dalos." Dahan-dahan lang. Ito ang paalala sa atin ng Simbahan sa araw na ito. Buksan natin ang ating mga puso at pandinig sa Panginoon. Pakinggan natin ang kalooban ng Panginoong Diyos bago magpasiya. Ito ang lagi nating dapat gawin. Kumunsulta muna sa Diyos. Hingin natin ang gabay ng Diyos. Kapag napakinggan na natin sa katahimikan ang kalooban ng Diyos, doon pa lamang tayo magpapasiya. Bilang mga Kristiyano, nararapat lamang na lagi tayong humiling ng gabay ng Panginoon sapagkat maaasahan naman talaga Siya sa lahat ng bagay. May mga taong hindi maaasahan, subalit ang Panginoong Diyos, tunay ngang maaasahan sa lahat ng bagay. Kaya, marapat lamang pakinggan natin Siya bago tayo gumawa ng anumang pasiya sa buhay, lalo na kapag espirituwal ang pinag-uusapan. Katulad ng nasasaad sa Salmo para sa Linggong ito: "Poon, pag-asa Ka namin, pag-ibig Mo'y aming hiling" (Salmo 32, 22). Isinalungguhit sa mga salitang ito sa Salmong Tugunan para sa Linggong ito ang pagiging maaasahan ng Diyos. 

Sa Unang Pagbasa, si Abram na kilala natin ngayon bilang si Abraham ay nakinig sa pangako at kalooban ng Diyos para sa kanya bago siya nagpasiya. Sa huli, ipinasiya niyang sundin ang kalooban ng Diyos para sa kanya. Sa Ikalawang Pagbasa, muling tinalakay ni Apostol San Pablo ang pagtawag sa atin ng ating butihing Panginoong Diyos upang maging Kanya ngang tunay (2 Timoteo 1, 9). Sa pamamagitan ng mga katagang ito, muling isinalungguhit ni Apostol San Pablo ang halaga ng pakikinig. Sa bawat sandaling makikinig tayo, lalung-lalo na sa Diyos, may magandang plano tayo matutuklas. Ang pinakamagandang plano ay nanggagaling sa Panginoon. Matutuklas lamang natin ito kapag makikinig muna tayo sa Kanya. 

Ang mga tunay na deboto ng Mahal na Poong Jesus Nazareno ay marunong makinig sa kalooban ng Diyos. Dahil lagi silang nakikinig, lalung-lalo na sa Panginoong Diyos, marunong silang mangilatis at magpasiya. Hindi nila isinasara sa ating Panginoong Diyos ang kanilang mga pandinig. Bagkus, kusang-loob nila itong binubuksan. Kaya naman, lagi silang mulat sa katotohanang mas maganda 'di hamak ang kalooban ng Panginoong Diyos kaysa sa mga kalooban at plano ng tao.