MASAKIT MAGMAHAL

PAGNINILAY SA PITONG HAPIS NG MAHAL NA BIRHENG MARIA 

IKAAPAT NA HAPIS: Ang Pagtatagpo sa Daan patungong Kalbaryo 

This faithful reproduction of the painting Encuentro del Nazareno con su madre (c. 1612) by Francesc Ribalta (1565–1628), as well as the actual work of art itself from the Museu de Belles Arts de València Collection, is in the Public Domain ("No Copyright") in its country of origin and in other countries and areas where the copyright term is the author's life plus 100 years or fewer due to its age. 

Kung sa Ikatlong Hapis ng Mahal na Inang si Mariang Birhen, natagpuan sa piling ng mga guro sa Templo ang Batang Panginoong Jesus Nazareno tatlong araw matapos Siyang mawala dahil nagpaiwan Siya sa Herusalem, sa Ikaapat na Hapis, hindi Siya nawala. Sa hapis na ito, batid ng Mahal na Inang si Mariang Birhen ang kinaroroonan at kalagayan ng kanyang minamahal na Anak na si Jesus Nazareno. Subalit, bagamat batid ni Maria ang kinalalagyan ni Jesus Nazareno sa hapis niyang ito, hindi biro ang tindi ng hapis, sakit, at dalamhating idinulot ng sandaling ito sa kanyang puso. 

Bukod pa roon, kung ang unang tatlong Hapis ng Mahal na Inang si Mariang Birhen ay naganap sa iba't ibang sandali sa pagkabata ng Panginoong Jesus Nazareno, ang mga susunod na Hapis, simula sa Hapis na ito, ay naganap sa iisang araw lamang. Sa isang araw, nagkaroon ng apat na Hapis ang Mahal na Birheng Maria. Hindi biro ang hapis at dalamhating dulot ng apat na kaganapang ito. 

Ang kaganapang itinatampok sa Ikaapat na Hapis ng Mahal na Birhen ay ang simula ng pinakamatinding sakit na kanyang tiniis at dinanas. Isa lamang ang dahilan kung bakit ang Hapis na ito ay ang simula ng kanyang pagtitiis ng pinakamatinding sakit sa kanyang buhay: nasaksihan ng kanyang mga mata ang mapait na pagpapakasakit ng minamahal niyang Anak na si Kristo, ang Poong Jesus Nazareno. Nakatagpo niya sa daang patungong Kalbaryo ang Poong Jesus Nazareno na nagpapasan ng Krus. O kay sakit ng kaganapang ito sa buhay ni Maria. Hindi biro ang hapdi, kirot, at sakit na tinaglay ni Maria sa kanyang puso dahil sa mga kaganapang ito. 

Dagdag pa rito ang katotohanang walang magawa si Maria sa mga sandaling ito para sa kanyang minamahal na Anak na si Kristo. Kaya, gayon na lamang katindi ng hapdi, kirot, at sakit na binitbit ni Maria sa kanyang puso sa sandaling ito. Walang magawa ang Mahal na Birheng Maria upang itigil ang kaganapang ito. Nais man niyang itigil, iligtas, o itakas si Kristo, hindi niya ito magawa dahil ito ang kalooban ng Diyos. Kaya, tahimik na lamang siya nakiisa sa pagtitiis ng hirap at pagdurusa ni Jesus Nazareno. 

Napakahirap ng ginawa ng Mahal na Birheng Maria sa sandaling ito. Tiniis niya ang pinakamasakit na sandali para sa mga magulang, lalung-lalo na para sa isang ina. Sa katahimikan, nakiisa siya sa pagtitiis ng hirap, pagdurusa, at kamatayan ng kanyang minamahal na Anak na si Kristo, ang Nuestro Padre Jesus Nazareno. Bagamat hindi biro ang sakit na dulot nito sa kanyang puso, pinahintulutan niya ito mangyari dahil ito ang kalooban ng Diyos. 

Hindi sapat ang mga salita upang ilarawan ang hirap at sakit na tiniis at dinanas ng Mahal na Inang si Mariang Birhen sa sandaling ito. Subalit, sa kabila nito, ipinasiya pa rin niyang sundin ang kalooban ng Diyos at tahimik na makiisa sa pagpapakasakit, paghihirap, at pagdurusang dinanas ng Mahal na Poong Jesus Nazareno alang-alang sa sangkatauhang tunay Niyang iniibig at kinahahabagan.  

TATLONG ARAW NA PASULYAP

PAGNINILAY SA PITONG HAPIS NG MAHAL NA BIRHENG MARIA 

IKATLONG HAPIS: Ang Paghahanap kay Jesus Nazareno sa Templo (Lucas 2, 41-51) 

This faithful photographic reproduction of the painting Christ among the Doctors (c. 1635) by José de Avelar Rebelo, as well as the actual work of art itself from the Secretariado Nacional da Pastoral da Cultura, is in the Public Domain ("No Copyright") in its country as well as in other countries and areas where the copyright term is the author's life plus 100 years or fewer due to its age. 

Ang Batang Poong Jesus Nazareno ay nawala sa loob ng tatlong araw. Tatlong araw na nahiwalay sa piling ni San Jose at ng Mahal na Inang si Mariang Birhen ang Batang Panginoong Jesus Nazareno. Sa unang tingin, parang madali itong ipaliwanag para sa bawat magulang, lalung-lalo na para sa isang ina. Labis na mag-aalala ang bawat magulang, lalung-lalo na ang mga ina, kapag nahiwalay sila sa kanilang mga anak sa loob ng mahabang panahon, lalung-lalo na kapag ang kanilang mga anak ay bata pa. Subalit, mayroong mas malalim na katotohanang ipinahihiwatig ng tatlong araw na ito na kung kailan nahiwalay sa Mahal na Inang si Mariang Birhen at kay San Jose si Jesus Nazareno na 12 taong gulang noong naganap ang pangyayaring ito. 

Tatlong araw. Tatlong araw na nawala sa piling ng Mahal na Inang si Mariang Birhen at ni San Jose ang Batang Poong Jesus Nazareno. Tila pahiwatig ito ng tatlong araw kung kailan magaganap ang pagpapakasakit at pagkamatay ng Nuestro Padre Jesus Nazareno. Tatlong araw na nahiwalay ang Batang Nuestro Padre Jesus Nazareno sa piling ng Mahal na Inang si Mariang Birhen, tatlong araw rin ang Misteryo Paskwal ng Mahal na Poong Jesus Nazareno. Kung paanong napuspos ng hapis, dalamhati, at lumbay ang puso ng Mahal na Inang si Mariang Birhen sa tatlong araw na nahiwalay siya sa Poong Jesus Nazareno, mapupuspos rin siya ng matinding hapis, lumbay, at dalamhati sa mga huling sandali ng Poong Señor na si Jesus Nazareno sa mundong ito noong unang Biyernes Santo. 

Sabi sa huling bahagi ng salaysay ng kaganapang ito na inigatan ng Mahal na Birhen ang lahat ng ito sa kanyang puso (Lucas 2, 51). Hindi niya lubusang maunawaan kung bakit nangyari ito. Kung tutuusin, hindi nga rin niya maunawaan kung bakit bata pa lamang si Jesus Nazareno ay mayroon na'ng mga pahiwatig ng Kanyang Pasyon. Ni hindi nga siguro inasahan ni Maria na tatlong araw na mawawala si Jesus Nazareno o kaya inisip ito bilang pasulyap sa kapaitan ng Kanyang misyon bilang ipinangakong Mesiyas at Manunubos ng tanan. Kaya, iningatan na lamang niya ito sa kanyang puso upang pagbulay-bulayan ito nang mabuti at taimtim. 

Hapis, lumbay, at dalamhati ang laman ng puso ng Mahal na Inang si Mariang Birhen noong nawala sa kanyang piling ang Batang Panginoong Jesus Nazareno. Ito ay isang pasulyap ng haharapin, titiisin, at dadanasin ng Mahal na Inang si Mariang Birhen sa mga huling sandali ng Panginoong Jesus Nazareno. Bata pa lamang ang Panginoong Jesus Nazareno sa mga sandaling iyon. Iyon nga lamang, hindi Siya isang karaniwang bata. Naiiba Siya. Pagdating ng takdang oras, magbabata Siya ng matitinding hirap, sakit, pagdurusa, at kamatayan alang-alang sa sangkatauhan. Ang katotohanang ito ay ipinahiwatig ng tatlong araw na nawala Siya sa piling ni San Jose at ng Mahal na Inang si Mariang Birheng Kalinis-linisan. 

ISA SIYANG KONTRABIDA SA MATA NG MGA SAKIM

PAGNINILAY SA PITONG HAPIS NG MAHAL NA BIRHENG MARIA 

IKALAWANG HAPIS: Ang Pagtakas sa Ehipto (Mateo 2, 13-15)

This faithful photographic reproduction of the painting, The Flight into Egypt (c. 1700), as well as the work of art itself from the Yale University Art Gallery, is in the Public Domain ("No Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Hindi maipagkakaila kung gaano kasikat ang mga Koreanong awitin sa kasalukuyang panahon. Tiyak na makakarinig ng dalawa o tatlong Koreanong awitin araw-araw ang mga nakikinig sa iba't ibang mga istasyon sa radyo. Sa panahong ito, tiyak na hindi tayo makakatakas mula sa mga Koreanong awitin. Hindi makapagtataka kung mas pamilyar ang marami sa atin sa mga Koreanong awitin kaysa sa mga awitin sa sarili nating wika. Wala namang mali doon, sa totoo lamang. Ang mga Koreanong awitin ay maganda naman talaga.

Isa sa mga Koreanong awiting nakatawag ng pansin sa inyong abang lingkod ay ang awiting pinamagatang Villain na inawit ni Stella Jang. Tiyak na madaling matatatak sa mga isipan ng mga makikinig sa nasabing awitin ang mga titik ng koro nito: "I'm a villain, what makes you think otherwise? You don't know what a bad very little devil I am. So what? You're a villain, what makes you think otherwise? The little devil that you didn't know is breathing as you breathe, inside..." (Tagalog: Isa akong kontrabida, ano'ng akala mo? Hindi mo alam kung gaano ako kasama. Ano ngayon? Isa ka ring kontrabida, ano'ng akala mo? Humihinga sa kaloob-looban mo ang demonyong hindi mo napansin). Isinasalungguhit ng awiting ito na mayroong inililihim na kasamaan ang bawat tao. Tila, ipinapaalala ng awiting ito na huwag maakit at mahulog ang loob para sa isang taong hindi mo kilala. 

Maaari nating sabihing ito ang ideya ng mga salitang ito sa koro ng nasabing awitin ay pumasok sa isipan ni Haring Herodes. Sa mata ni Haring Herodes, ang Panginoong Jesus Nazareno ay isang kontrabida. Katunayan, hindi lamang Siya isang kontrabida para kay Haring Herodes. Bagkus, isa Siyang napakalaking banta o panganib para sa kanya na nais manatili sa trono bilang hari habambuhay. Kung si Jesus Nazareno ay isang biyaya mula sa Diyos para sa Mahal na Inang si Mariang Birhen at San Jose, isa Siyang masamang kontrabida para kay Haring Herodes. Ito ang tanging dahilan kung bakit binalak ni Herodes na patayin ang Poong Jesus Nazareno, kahit na kararating pa lamang Niya sa mundong ito bilang Banal na Sanggol na isinilang ni Maria. 

Dahil dito, ang pagtakas sa Ehipto ay ang ikalawang hapis ng Mahal na Birhen. Ang pangunahing dahilan ng pagtakas ng Banal na Pamilya patungong Ehipto ay walang iba kundi ang pagiging sakim ni Haring Herodes. Dahil sa kanyang pagiging sakim at gahaman, naging baluktot ang pananaw ni Haring Herodes tungkol sa ipinangakong Mesiyas at Manunubos na walang iba kundi ang Mahal na Poong Jesus Nazareno. Sa halip na makita si Jesus Nazareno bilang salamin at larawan ng pag-ibig, habag, at kagandahang-loob ng Diyos, ang tingin sa Kanya ni Haring Herodes ay kontrabida. Ito ay nagdulot ng matinding hapis at dalamhati sa Mahal na Inang si Mariang Birhen. 

Tanggap ni Haring Herodes na isa siyang masamang kontrabida. Subalit, ito rin ang dahilan kung bakit ang tingin niya kay Jesus Nazareno ay isang kapwa kontrabida na walang ibang hangad kundi agawin ang kanyang kapangyarihan bilang hari. Masama o kontrabida laban sa kapwa masama o kontrabida. Ito ang baluktot na pananaw ni Haring Herodes. Para kay Haring Herodes, hindi biyaya si Jesus Nazareno kundi isang kontrabidang sakim at gahaman katulad niya. 

Nakakalungkot, kung sino pa yaong nagmamagandang-loob at nagliligtas ng lahat ng tao sa mundo, Siya pa yung masama. Baluktot ang pag-iisip na ito. Iyon nga lamang, kahit sa kasalukuyang panahon, mayroon pa ring mga taong ginagawang modelo si Haring Herodes sa pagbuo ng mga ganitong pananaw. Nakakalungkot. 

MAPAIT NA KAPALARAN

PAGNINILAY SA PITONG HAPIS NG MAHAL NA BIRHENG MARIA

UNANG HAPIS: Ang Propesiya ni Simeon (Lucas 2, 34-35) 

This faithful photographic reproduction of the painting Simeon by Andrey Mironov is licensed under the Creative Commons Attribution-Share Alike 4.0 International (CC BY-NC-ND 4.0) license.

Isa sa mga awit para sa teleseryeng Batang Quiapo ay ang "Kapalaran". Ang nasabing awitin ay inawit ni Gary Valenciano para sa nasabing teleserye. Si Rico J. Puno ang umawit sa orihinal na bersyon ng nasabing awitin. Napakalinaw kung ano ang nais talakayin at ilarawan ng mga titik ng nasabing awitin. Ang awiting ito ay tungkol sa buhay ng tao sa mundo. Inilalarawan sa anyo ng mga tanong kung bakit ang buhay sa mundong ito ay hindi patas. Subalit, hindi naman layunin ng mga titik na ito ang humanap ng sagot. Katunayan, walang sinumang namumuhay at naglalakbay dito sa mundong ito ang makapagbibigay ng sagot sa mga tanong na ito. 

Ang unang hapis ng Mahal na Inang si Mariang Birhen ay naganap noong isang munting sanggol pa lamang ang Panginoong Jesus Nazareno. 40 araw makalipas ang Kanyang pagsilang dito sa mundo bilang ipinangakong Mesiyas at Tagapagligtas ng lahat, ang Banal na Sanggol na si Jesus Nazareno ay dinala ni San Jose at ng Mahal na Birheng Maria upang ihandog sa Diyos ayon sa Kautusan. Sa kaganapang ito, unang nahayag ang magiging kapalaran ng Poong Jesus Nazareno sa Kanyang paglaki. Ang Panginoong Jesus Nazareno ay magtitiis at dadanas ng maraming pagpapakasakit, hirap, at pagdurusa para sa ikaliligtas ng sangkatauhan. Ito ang kapalaran, misyon, at tungkulin ni Jesus Nazareno bilang ipinangakong Mesiyas at Manunubos. 

Hindi na kailangang tanungin kung bakit ito ang unang hapis ng Mahal na Ina. Sino ba naman ang hindi mapupuspos ng lungkot, hapis, at dalamhati kapag humarap sila sa isang sitwasyon katulad ng Mahal na Birhen sa kaganapang ito? Iyon nga lamang, dumagdag ang sakit at hapis sa puso ng Mahal na Birheng Maria sapagkat bata pa lamang si Jesus Nazareno ay alam niyang wala na siyang magagawa upang pigilin o maiwasan ang masakit na kapalarang ito na naghihintay para sa kanyang Anak na tunay niyang minamahal. Ang kapalarang ito ay napakasakit, hindi lamang para kay Jesus Nazareno, kundi pati na rin para sa Mahal na Inang si Mariang Birhen. 

Sa halip na tanungin kung bakit ito ang unang hapis ng Mahal na Birhen, ang dapat tanungin ay kung bakit ang inilarawan ni Simeon sa kanyang propesiya tungkol kay Kristo, ang Nuestro Padre Jesus Nazareno, sa salaysay ng mahalagang kaganapang ito ay ang kapalarang inilaan ng Diyos para sa Kanya. Bakit hindi sinubukan ng ating butihing Amang nasa langit na baguhin ang kapalaran o tadhana ng Mahal na Poong Jesus Nazareno upang hindi masaktan ang Kanyang Bugtong na Anak at ang Mahal na Inang si Maria? Isa lamang ang dahilan - pag-ibig. Oo, ilang ulit na nating narinig ang dahilang ito, subalit isa itong magandang paaalala para sa atin. Nais ng Diyos na patunayan ang Kanyang pag-ibig, kagandahang-loob, at habag para sa atin. Ito ang dahilan kung bakit hindi umatras ang Diyos sa planong ito. 

Nasaktan rin ang Diyos. Huwag nating isiping ang Mahal na Birheng Maria lamang ang bukod-tanging nasaktan sa kapalarang naghihintay para sa Banal na Sanggol na si Kristo, ang Poong Jesus Nazareno, sa Kanyang paglaki. Ang Diyos ay nasaktan rin. Katunayan, higit na nasaktan ang Diyos dahil Siya mismo ang bumuo sa planong ito para sa ikaliligtas ng sangkatauhan. Subalit, alang-alang sa ating ikaliligtas, niloob pa rin ng Diyos na masaktan. Basta maligtas lamang tayo, titiisin ito ng Diyos. 

Tunay ngang mapait at napakasakit ang kapalaran ng Nuestro Padre Jesus Nazareno bilang ipinangakong Mesiyas at Manunubos. Subalit, niloob ng Diyos na mangyari ito alang-alang sa atin. Dahil ito ang kalooban ng Diyos, gaano man ito kasakit, buong kababaang-loob at pananalig itong tinanggap ng Mahal na Inang si Maria, ang Birhen ng Hapis at Dalamhati. 

ISANG SANDALING NAPAKASAKIT AT NAPAKALUNGKOT

31 Marso 2023 

Biyernes sa Ikalimang Linggo ng 40 Araw na Paghahanda para sa Pasko ng Pagkabuhay

"Viernes de Dolores"  

Jeremias 20, 10-13/Salmo 17/Juan 10, 31-42 

This faithful photographic reproduction of the painting Christ Taking Leave of His Mother (c. Probably Before 1514) by Corregio, as well as the work of art itself from the National Gallery in London, England, is licensed for non-commercial use under a Creative Commons agreement (CC BY-NC-ND 4.0). 

Ang Biyernes bago ang mga Mahal na Araw ay kilala rin bilang Viernes de Dolores o Biyernes ng Hapis. Habang papalapit na ang pagdiriwang at paggunita sa Misteryo Paskwal ng Panginoong Jesus Nazareno na isasagawa ng Simbahan sa darating na mga Mahal na Araw na magsisimula sa darating na Linggo, ang Linggo ng Palaspas, inaanyayahan tayo ng Simbahan na samahan ang Mahal na Inang si Mariang Birhen sa kanyang pagharap sa pinakamasakit na bahagi ng kanyang misyon bilang Ina ni Kristo. Bagamat mayroong araw na inilaan ang Simbahan sa pagninilay sa mga hapis ng Mahal na Inang si Mariang Birhen (15 Setyembre), marapat lamang natin itong gawin sa araw na ito bilang paghahanda para sa Semana Santa na magsisimula sa darating na Linggo, ang Linggo ng Palaspas o Domingo de Ramos. 

Nakasentro sa pagdurusa ng mga tapat na lingkod ng Diyos ang mga Pagbasa para sa araw na ito. Marapat lamang pagnilayan ang paksang ito sapagkat inilalarawan sa mga talatang ito ang dahilan kung bakit napuno ng hapis at dalamhati ang Mahal na Birheng Maria. Ipinapahiwatig ng mga salitang itinatampok sa mga Pagbasa para sa araw na ito kung ano ang sasapitin ng Panginoong Jesus Nazareno na maghahatid ng hapis at dalamhati sa puso ng Mahal na Inang si Mariang Birhen. Kaya naman, nang dumating ang oras ng pamamaalam ng Mahal na Poong Jesus Nazareno sa Mahal na Inang si Mariang Birhen bago Siya tumungo sa banal na lungsod ng Herusalem upang tuparin ang Kanyang misyon bilang ipinangakong Mesiyas at Manunubos ng tanan, labis-labis ang hapis, sakit, at dalamhati sa puso ng Mahal na Birhen. Batid ni Maria kung ano ang sasapitin ng kanyang Anak na minamahal na si Jesus Nazareno. 

Sa Unang Pagbasa, inilarawan ni Propeta Jeremias ang pananaw o kinatatayuan ng mga tagausig ng mga tapat na lingkod ng Diyos. Ang mga naglilingkod sa Diyos nang buong katapatan ay balak nilang patahimikin at paslangin upang ang kanilang mga puso, kalooban, at isipan ay hindi na mabagabag pa. Sa Ebanghelyo, binalak ng mga tao na dakipin at batuhin si Kristo dahil sa Kanyang mga sinabi tungkol sa Kanyang ugnayan sa Ama. Hindi nila matanggap na si Jesus Nazareno ay ang Bugtong na Anak ng Diyos na dumating sa mundong ito bilang ipinangakong Mesiyas at Manunubos. 

Walang salitang sasapat para ilarawan ang sakit, hapis, at dalamhating dulot ng mga pagpapakasakit, paghihirap, at pagdurusang kaakibat ng misyon at tungkulin ni Jesus Nazareno bilang ipinangakong Mesiyas at Tagapagligtas sa puso ng Mahal na Inang si Maria. Kaya, bagamat tahimik ang Banal na Kasulatan tungkol sa pamamaalam ng ating Nuestro Padre Jesus Nazareno sa ating Mahal na Inang si Mariang Birhen bago tumungo sa Herusalem, batid natin kung gaano ka-lungkot ang sandaling ito. Nais man ni Maria na pigilin ito, hindi niya ito magawa dahil ito ang kalooban ng Diyos. 

Isang napakasakit at nakakalungkot na sandali ang pamamaalam ni Jesus Nazareno sa Mahal na Inang si Mariang Birhen. Subalit, kinailangan itong mangyari sapagkat kinailangang tuparin ng Nuestro Padre Jesus Nazareno ang kalooban ng Diyos. Kahit na puno siya ng hapis at dalamhati sa sandaling ito, buong pananalig at kababaang-loob na tinanggap ito ng Mahal na Inang si Mariang Birhen. 

PASULYAP NG KANYANG KADAKILAAN

26 Marso 2023 

Ikalimang Linggo ng 40 Araw na Paghahanda para sa Pasko ng Pagkabuhay (A) 

Ezekiel 37, 12-14/Salmo 129/Roma 8, 8-11/Juan 11, 1-45 (o kaya: 11, 3-7. 17. 20-27. 33b-45) 

This faithful photographic reproduction of the painting entitled The Raising of Lazarus (c. Between 1600 and 1651) by Cornelis de Vos (1584-1651), as well as the actual work of art itself from the Ulster Museum through Art UK, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or fewer due to its age. 

Habang papalapit ang pagdiriwang ng mga Mahal na Araw kung kailan taimtim na pagninilayan at gugunitain ng Simbahan ang Misteryo Paskwal ng Panginoong Jesus Nazareno, pinagninilayan ng Simbahan ang tema ng kadakilaan ng Diyos. Nararapat lamang itong gawin dahil ang Misteryo Paskwal ng Panginoong Jesus Nazareno ay ang pinakadakilang gawa ng Diyos. Ang kadakilaan ng Diyos ay Kanyang inihayag sa tanan sa pamamagitan ng Misteryo Paskwal ng Panginoong Jesus Nazareno. 

Bago ang mga pagbabago sa Kalendaryo ng Simbahan dulot ng Ikalawang Konsilyo ng Vaticano (na kilala rin bilang Vaticano II o Vatican II), pumapasok ang Simbahan sa isang napakaikling panahon tuwing sasapit ang mismong Linggong ito, ang Ikalimang Linggo ng 40 Araw na Paghahanda para sa Pasko ng Pagkabuhay o Kuwaresma. Ang opisyal na pangalan ng napaikling panahong ito na napapaloob pa rin ng panahon ng Kuwaresma ay Panahon ng Pagpapakasakit ng Panginoon (Ingles: Passiontide). Sa tawag pa lamang sa napakaikling panahong ito, napakalinaw kung ano ang layunin at pakay ng Simbahan. Pagsapit ng nasabing panahon, lalong pinaiigting ng Simbahan ang taimtim na pagninilay sa paghahayag ng kadakilaan ng Diyos sa pamamagitan ng Misteryo Paskwal ng Poong Jesus Nazareno, ang ipinangakong Tagapagligtas. Kaya, gayon na lamang ang pagpapahalaga ng Simbahan sa misteryong ito sa buhay ni Jesus Nazareno. Sa kasalukuyan, patuloy pa rin itong ginagawa ng Simbahan, kahit hindi na ito kilala bilang Panahon ng Pagpapakasakit ng Panginoon o Passiontide. 

Nakasentro sa tema ng kadakilaan ng Diyos ang mga Pagbasa para sa Linggong ito, ang Ikalimang Linggo ng Kuwaresma. Bagamat ang pinakadakilang tanda, sagisag, o larawan ng kadakilaan ng Diyos ay walang iba kundi ang Kabanal-Banalang Krus at Muling Pagkabuhay ng Mahal na Poong Jesus Nazareno, ipinasisilip sa atin ng Diyos sa iba pang mga kahanga-hangang gawain. Sa pamamagitan ng mga gawaing iyon, ipinapaalala sa atin ng Diyos na Siya lamang ang tunay na dakila. Kaya naman, dapat tayong manalig, sumampalataya, pumanig, at tumalima sa Kanya. 

Isinalaysay sa Banal na Ebanghelyo para sa Linggong ito kung paanong si San Lazaro ay muling binuhay ng Mahal na Poong Jesus Nazareno. Bago isinagawa ng Mahal na Poong Jesus Nazareno ang kahanga-hangang himalang ito, at bago pa nga namatay si San Lazaro, inihayag ng Mahal na Poong Jesus Nazareno na hindi magwawakas sa kamatayan ang lahat para sa Kanyang kaibigang si San Lazaro (Juan 11, 4). Ito ay muli Niyang isinalungguhit kay Santa Marta na isa rin Niyang kaibigan at isa sa dalawang babaeng kapatid ni San Lazaro noong Kanyang sinabing makikita ng lahat, pati rin si Marta, kung gaano kadakila ang Diyos kapag mananalig siya sa Kanya (Juan 11, 40). 

Sa totoo lamang, hindi natin masisisi sina Santa Marta at Santa Maria, ang dalawang kapatid na babae ni San Lazaro, sa kanilang paglabas ng kanilang sama ng loob at mga hinanakit sa Mahal na Poong Jesus Nazareno. Ipinarating nila sa Kanya ang balita tungkol sa masamang kalagayan ni San Lazaro. Kung tutuusin, isa lamang ang ibig sabihin ng balitang iyon, naghihingalo si San Lazaro. Subalit, dumating ang Poong Jesus Nazareno apat na araw makalipas ang pagpanaw ni San Lazaro. Nakalibing na noon si San Lazaro noong dumating ang Panginoong Jesus Nazareno. Bakit nga ba ito ang ipinasiyang gawin ng Panginoong Jesus Nazareno? 

Dumating ang Mahal na Poong Jesus Nazareno sa Betania apat na araw makalipas ang pagpanaw ni San Lazaro upang ipahayag ang kadakilaan ng Diyos. Ilang ulit Niya itong isinalungguhit sa Ebanghelyo. Sa pagpapahayag ng kadakilaan ng Diyos sa pamamagitan ng kahanga-hangang milagrong ito, ipinasilip Niya ang pinakadakilang gawa na magsisilbing pinakadakilang tanda o sagisag ng kadakilaan ng Diyos. Ito ay walang iba kundi ang Kanyang Misteryo Paskwal, ang Kanyang kamatayan sa Krus at Muling Pagkabuhay. Sa pamamagitan nito, mahahayag ang kadakilaan ng Diyos. 

Sa Unang Pagbasa, inutusan ng Diyos si Propeta Ezekiel na magsalita sa Kanyang bayan tungkol sa isang kahanga-hangang gawa na gagawin Niya para sa kanila. Ang pinakadakilang gawang ito ay ang pagbibigay ng buhay sa kanila. Ibubukas ng Diyos ang kanilang mga libingan at bibigyan sila ng bagong buhay. Bagong buhay sa labas ng libingan na sumasagisag sa pagkaalipin sa kasamaan at kasalanan. Tanging ang Diyos ang maghahatid ng kaligtasan at kalayaan sa kanila. Sa gawang ito ng Diyos na tunay nga namang kahanga-hanga nakasentro ang pangaral ni Apostol San Pablo sa Ikalawang Pagbasa. Isinalungguhit ni Apostol San Pablo sa kanyang pangaral na ito kung paanong biniyayaan tayo ng Diyos ng pagkakataong maging banal at kalugud-lugod sa Kanyang paningin sa pamamagitan ng Misteryo Paskwal ng Nuestro Padre Jesus Nazareno. Katulad ng nasasaad sa Salmo Responsoryo para sa Linggong ito, mayroong pag-ibig at pagtubos sa piling ng Diyos (Salmo 129, 9). 

Bagamat hindi tayo karapat-dapat dahil sa ating mga kasalanan, niloob ng Diyos na ipamalas sa atin ang Kanyang kadakilaan sa pamamagitan ng Mahal na Poong Jesus Nazareno. Ang kadakilaang ito ng Diyos ay naghatid sa atin ng kaligtasan at kalayaan mula sa kasamaan, kasalanan, kaalipinan, at kamatayan. Dahil sa kahanga-hangang gawang ito ng Diyos, mayroon tayong kalayaang mamuhay nang banal at kalugud-lugod sa paningin ng Diyos. 

BALITANG NAGHAHATID NG GALAK

25 Marso 2023 

Dakilang Kapistahan ng Pagpapahayag ng Magandang Balita tungkol sa Panginoon 

Isaias 7, 10-14; 8, 10/Salmo 39/Hebreo 10, 4-10/Lucas 1, 26-38 

This faithful photographic representation of the painting Annunciation (c. 1699) by Onorio Marinari  (1627–1715), as well as the work of art itself from the Palazzo Bianco Collection, is in the Public Domain ("No Known Copyright") in its country of origin as well as in other countries and areas where the copyright term is the author's life plus 100 years or less due to its age. 

Madalas tumapat ang Dakilang Kapistahang ito sa panahon ng Kuwaresma, bagamat pinagninilayan at ginugunita pagsapit ng Dakilang Kapistahang ito ang isang napaka-importanteng kaganapang naganap bago ang pagsilang ng ating Nuestro Padre Jesus Nazareno sa isang sabsaban sa Betlehem noong gabi ng unang Pasko. Kapag ang orihinal na petsa ng Dakilang Kapistahang ito ay tumapat sa mga Mahal na Araw o kaya naman sa isa sa mga araw sa Oktaba ng Pasko ng Muling Pagkabuhay, inililipat ang pagdiriwang ng Dakilang Kapistahang ito sa Lunes kasunod ng Ikalawang Linggo sa panahon ng Pasko ng Muling Pagkabuhay. 

Bukod sa pagiging siyam na buwan bago ang petsa ng Dakilang Kapistahan ng Pasko ng Pagsilang ng Panginoon, ang Nuestro Padre Jesus Nazareno (25 Disyembre), ang ugnayan o koneksyon ng Dakilang Kapistahang ito sa panahon ng Kuwaresma o ang 40 Araw na Paghahanda para sa Pasko ng Pagkabuhay ay napakalalim. Ang araw na ito ay isang paggunita sa paghahatid ng Arkanghel San Gabriel sa Mahal na Inang si Mariang Birhen ng Magandang Balita tungkol sa Poong Jesus Nazareno. Itinatampok sa araw na ito ang dahilan kung bakit ibinigkas ng Mahal na Inang si Mariang Birhen ang kanyang "Oo" o "Fiat" sa kalooban ng Panginoong Diyos nang may kababaang-loob at pananalig, kahit batid niya kung gaano kabigat ang pananagutang ito. Ito ay dahil ang sentro ng Mabuting Balitang ito ay ang katuparan ng pangako ng Diyos sa pamamagitan mismo ng Mahal na Poong Jesus Nazareno. 

Ang kaganapang isinalaysay sa Ebanghelyo para sa Dakilang Kapistahang ito ay may isang napakalinaw na ugnayan sa propesiya sa Unang Pagbasa. Sa Unang Pagbasa, nahayag ang kalooban ng Diyos para sa ikaliligtas ng sangkatauhan. Nakasentro sa katuparan ng pangakong ito ng Panginoong Diyos ang mga kaganapang isinalaysay sa Ebanghelyo. Hindi ito isang kaganapang nangyari nang biglaan na lamang. Bagkus, bahagi ito ng plano ng Diyos. Kaya naman, maituturing itong isang unang pahayag at paliwanag tungkol sa isinagawa ng Diyos sa Bagong Tipan sa pamamagitan ng ating Mahal na Poong Jesus Nazareno. Ipinaliwanag ng Arkanghel San Gabriel kay Maria sa tampok na salaysay sa Banal na Ebanghelyo ang kanyang tungkulin bilang babaeng hinirang ng Diyos upang maging ina ng ipinangakong Mesiyas at Tagapagligtas na walang iba kundi si Jesus Nazareno. Ang responsibilidad na ito ay buong kababaang-loob at pananalig na tinanggap ng Mahal na Inang si Mariang Birhen.

Sa Ikalawang Pagbasa, inihayag na niloob ng Diyos na dumating sa mundong ito si Jesus Nazareno bilang ipinangakong Mesiyas at Manunubos ng sangkatauhan. Ang mga salita sa Salmo para sa Dakilang Kapistahang ito ay buong kababaang-loob na isinabuhay ng Mahal na Poong Jesus Nazareno noong dumating Siya sa mundong ito bilang ipinangakong Mesiyas at Tagapagligtas. Ito ang dahilan kung bakit itinatampok ng banal na imahen ng Nazareno ang Panginoong nagpapasan ng Krus. 

Hindi ba isinaalang-alang ng Diyos kung ano ang Kanyang mararamdaman noong ipinasiya Niyang isugo ang Poong Jesus Nazareno sa mundong ito bilang Mesiyas at Manunubos? Oo, naisip iyan ng Diyos. Batid ng Ama na masasaktan Siya sa sasapitin ng Kanyang Bugtong na Anak na si Kristo, ang Nuestro Padre Jesus Nazareno, alang-alang sa atin. Subalit, sa kabila nito, ipinasiya pa rin Niya itong gawin nang kusang-loob dahil sa Kanyang pag-ibig, habag, at kagandahang-loob para sa atin. Kahit na batid Niyang masasaktan Siya nang lubos, ipinasiya pa rin Niya itong mangyari upang tubusin sa pamamagitan nito ay maligtas ang sangkatauhan.

Ito ang Mabuting Balita. Bagamat mga makasalanan tayo, patuloy tayong iniibig at kinahahabagan ng Diyos. Ang pinakadakilang biyayang Kanyang ipinagkaloob Niya sa atin na walang iba kundi ang Poong Jesus Nazareno na nagpakasakit, namatay, at nabuhay na mag-uli alang-alang sa atin, ay ang patunay nito. Kaya naman, bilang tugon, pagsisihan natin ang ating mga kasalanan, magbalik-loob tayo sa Kanya, at laging magsikap na mamuhay nang banal at kalugud-lugod sa Kanyang paningin.