ANG PAG-ASANG TUNAY AY BUNGA NG MABATHALANG AWA

27 Abril 2025 

Ikalawang Linggo ng Pasko ng Muling Pagkabuhay (K) 

Kapistahan ng Mabathalang Awa 

Mga Gawa 5, 12-16/Salmo 117/Pahayag 1, 9-11a. 12-13. 17-19/Juan 20, 19-31 

Larawan: The Incredulity of Saint Thomas (c. Between 1600 and 1641). National Trust. Public Domain. 

Inilaan ng Simbahan ang Ikalawang Linggo ng Pasko ng Muling Pagkabuhay para sa pagdiriwang ng Kapistahan ng Mabathalang Awa. Sa pamamagitan nito, ipinapaalala sa atin ng Simbahan na ang tunay na pag-asa ay bunga ng Mabathalang Awa. Hindi magkahiwalay at magkaiba ang habag at awa ng Diyos. at ang tunay na pag-asa. Ang biyaya ng tunay na pag-asang nagmumula lamang sa Diyos at ang Kaniyang habag at awa na kahanga-hangang totoo ay magkarugtong, magkaakibat, at magkaugnay. Dahil sa dakilang habag at awa ng Diyos, ipinasiya Niyang idulot sa atin ang biyaya ng tunay na pag-asang sa Kaniya lamang nagmumula sa pamamagitan ng Panginoong Hesukristo, ang Nazarenong Muling Nabuhay. 

Buong lakas at linaw na inihayag sa Salmong Tugunan: "Butihing Poo'y purihin, pag-ibig N'ya'y walang maliw" (Salmo 117, 1). Ipinaliwanag ng mang-aawit na tampok sa Salmong Tugunan kung bakit ipinasiya ng Diyos na gawin ang lahat ng mga kahanga-hangang bagay na Kaniyang ginawa sa pamamagitan ng mga salitang ito na binigkas niya nang buong linaw. Maikli ngunit malaman, malinaw, at diretsyo sa punto. Ang dahilan kung bakit ipinasiya ng Diyos na gumawa ng mga kahanga-hangang bagay sa kabila ng pagiging makasalanan ng sangkatauhan ay walang iba kundi ang Kaniyang pag-ibig, habag, at awa na tunay ngang dakila. 

Tampok sa salaysay sa Ebanghelyo ang dalawang pagpapakita ng Muling Nabuhay na Poong Jesus Nazareno sa mga apostol. Dalawang ulit Siyang nagpakita sa kanila, kahit na iniwan at pinabayaan nila Siya sa mga sandali ng Kaniyang pagpapakasakit at pagkamatay sa Krus sa bundok ng Kalbaryo. Wala si Apostol Santo Tomas noong unang nagpakita sa mga apostol ang Muling Nabuhay na Poong Jesus Nazareno sa silid na kanilang pinagtitipunan ngunit nandoon siya noong magpakita uli ang Poon. Hindi nagpakita ng galit at poot ang Muling Nabuhay na Poong Jesus Nazareno sa mga apostol. Bagkus, ang ipinakita ng Muling Nabuhay na Poong Jesus Nazareno ay walang iba kundi ang Kaniyang walang hanggan at dakilang pag-ibig, habag, at awa. Dinulutan ng Muling Nabuhay na Poong Jesus Nazareno ng tunay na kapayapaan at tunay na pag-asa ang mga apostol sa pamamagitan ng Kaniyang pasiyang ipakita sa kanila ang Kaniyang dakilang pag-ibig, habag, at awa. 

Ang biyaya ng tunay na kapayapaan at ang biyaya ng tunay na pag-asang kusang-loob na idinulot ng Muling Nabuhay na Poong Jesus Nazareno ay ibinahagi naman ng mga apostol sa kanilang pagmimisyon at pagmiministeryo bilang Kaniyang mga saksi sa bawat sulok ng daigdig. Sa Unang Pagbasa, inilarawan kung paanong ang Muling Nabuhay na Poong Jesus Nazareno ay patuloy na kumilos mula sa Kaniyang dakilang kaharian sa langit sa pamamagitan ng mga apostol. Gumawa Siya ng mga himala sa pamamagitan ng mga apostol na Kaniyang hinirang at itinalaga bilang Kaniyang mga instrumento. Hindi nagmula sa kanilang mga sarili ang kapangyarihang gumawa ng himala. Bagkus, nagmula ito sa Muling Nabuhay na Poong Jesus Nazareno. Ito rin ang ginawa ni Apostol San Juan sa Ikalawang Pagbasa noong kaniyang ibinahagi ang mga nakita niya sa isang pangitain habang nasa isla ng Patmos kung saan siya itinapon dahil hindi siya mapatay ng mga Romano. Sa nasabing pangitain, nagpakita muli ang Muling Nabuhay na Poong Jesus Nazareno sa kaniya upang idulot muli ang biyaya ng tunay na pag-asang nagmumula lamang sa Kaniya. Dahil dito, lalo pang lumakas ang loob ni Apostol San Juan na manalig at umasa sa Muling Nabuhay na Nuestro Padre Jesus Nazareno sa kabila ng pagkakatapon sa kaniya sa isla ng Patmos. 

Maraming ulit na nagpakita ang Muling Nabuhay na Nuestro Padre Jesus Nazareno sa isang madreng taga-Polonya na si Santa Faustina na Kanyang hinirang at itinalaga upang maging Apostol ng Mabathalang Awa. Sa Kanyang mga pagpapakita kay Santa Faustina, ang Muling Nabuhay na Nuestro Padre Jesus Nazareno ay laging nagsalita tungkol sa Kaniyang habag at awa. Isa lamang ang hangarin ng Muling Nabuhay na Nuestro Padre Jesus Nazareno, ang Panginoon at Hari ng Mabathalang Awa - buong pusong manalig at umasa sa Kaniya ang lahat ng tao. Nais Niyang makilala Siya ng lahat ng tao bilang maawain at mahabaging Panginoon at Manunubos at ihandog sa Kaniya ang kanilang taos-pusong pananalig at pag-asa. Gaya ng sabi sa mga larawan ng Mabathalang Awa: "Hesus, ako ay nananalig sa Iyo." 

Dahil sa Kaniyang Banal na Awa, idinulot ng Muling Nabuhay na Jesus Nazareno ang biyaya ng tunay na kapayapaan at ang biyaya ng tunay na pag-asa sa lahat ng tao. Sa pamamagitan nito, inihayag ng Muling Nabuhay na Jesus Nazareno, ang maawain at mahabaging Panginoon, na sa Kaniya dapat manalig at umasa nang taos-puso ang lahat ng tao sa daigdig.