Kapistahan ng Kabanal-Banalang Mukha ni Jesus Nazareno
Martes ng Ikawalong Linggo sa Karaniwang Panahon (I)
Sirak 35, 1-15 (gr. 1-12)/Salmo 49/Marcos 10, 28-31
Larawan: El Greco (1541–1614), La Verónica con la Santa Faz (c. 1580), Museum of Santa Cruz, Public Domain.
Lagi nating naririnig ang mga salitang "Mahirap ang buhay." Ang mga salitang ito na madalas nating marinig, kung hindi palagi, ay tunay ngang malaman. Buong linaw na inilarawan sa mga salitang ito ang katotohanan tungkol sa buhay dito sa daigdig. Sa paglipas ng bawat araw, lalo lamang nagiging malinaw sa atin ang katotohanang ito. Tila walang katapusan ang mga paghihirap at pagdurusa sa buhay sa lupa, maliban na lamang kung isa kang makapangyarihang tao sa lipunan. Lalo lamang yumayaman ang mga mayayaman at lalo lamang nahihirapan ang mga maralita. Bukod pa roon, lalo lamang lumalaganap at umiiral ang katiwalian at kasamaan.
'Di hamak na mas madaling tanggapin ang katotohanang ito tungkol sa buhay dito sa lupa. Wala tayong magagawa kundi pagmasdan ang kapaligiran. Ganyan ang buhay. Minsan mabilis; minsan mabagal. Ang daming kahirapan. Hindi na mabilang ang dami ng mga tukso at pagsubok. Kung mayroong mga sandali ng katuwaan, kasiyahan, at kaginhawaan sa buhay, hindi ito tumatagal. Laging may hinagpis at panaghoy - kung hindi man palagi, madalas.
Pati ang bukal ng tunay na pag-asa na walang iba kundi ang Poong Jesus Nazareno, hindi ipinagkaila ang katotohanan ng buhay sa lupa. Katunayan, ang Kaniyang tugon sa pahayag ng mga alagad sa Ebanghelyo ay sumasalungguhit sa katotohanang ito. Hindi madali ang buhay sa lupa. Mahirap ang buhay, lalung-lalo na para sa lahat ng mga tapat na tagasunod at lingkod ng Poong Jesus Nazareno. Itatakwil at uusigin ng karamihan sa lipunan ang lahat ng mga sumusunod sa Poong Jesus Nazareno nang buong katapatan. Tila lalo lamang nadadagdan ang hirap at kalupitang haharapin at dadanasin ng bawat taong magpapasiyang sumunod sa bukal ng tunay na pag-asa na walang iba kundi ang Poong Jesus Nazareno.
Sa kabila ng kalupitan at hirap ng buhay sa lupa, may pakiusap ang Inang Simbahan para sa atin. Lagi tayong pinakikiusapan at pinaalalahanan ng Inang Simbahan na manatiling tapat sa ating pagsunod sa Poong Jesus Nazareno. Sa pamamagitan ng taos-pusong pagsunod sa Mahal na Poong Jesus Nazareno nang buong katapatan, gaano mang kahirap at kalupit ang buhay sa lupa, buong linaw nating ipinapahayag na nananalig at umaaasa tayo sa Kaniya nang lubusan.
Inihayag ni Sirak sa Unang Pagbasa na nalulugod ang Panginoong Diyos sa isang uri ng handog. Ang nasabing handog ay walang iba kundi ang taos-pusong pagsunod. Sa pamamagitan ng pagsunod sa Panginoong Diyos nang taos-puso, pinatutunayan ng lahat ng mga tapat na tagasunod at lingkod ng Panginoong Diyos na nananalig at umaaasa sila sa Kaniya nang lubusan. Buong linaw na inihayag ng tampok na mang-aawit sa Salmong Tugunan na ililigtas at sasagipin ng Panginoong Diyos ang lahat ng mga susunod sa Kaniya nang taos-puso. Nagsalita rin tungkol sa pangakong ito ang bukal ng tunay na pag-asa na walang iba kundi ang Mahal na Poong Jesus Nazareno sa Ebanghelyo. Pagkakalooban Niya ang lahat ng mga mananatiling tapat sa Kaniya hanggang sa huli ng buhay na walang hanggan sa Kaniyang piling sa langit.
Tunay ngang mahirap at malupit ang buhay sa mundo. Ito ang katotohanan. Subalit, kung mananatiling tapat tayo sa Mahal na Poong Jesus Nazareno hanggang sa huling sandali ng ating buhay sa mundo, gaano mang kahirap ito, makakapiling natin Siya sa maluwalhati Niyang kaharian sa langit magpakailanman. Ang pagsunod sa Mahal na Poong Jesus Nazareno nang taos-puso hanggang sa huling sandali ng pansamantala nating pananatili sa mundong ito ang magpapatunay na lubusan tayong nananalig at umaaasa sa Kaniya.
Walang komento:
Mag-post ng isang Komento