KASAMA ANG MAHAL NA BIRHENG MARIA, DAKILAIN NATIN ANG MAHAL NA POONG JESUS NAZARENO NANG TAOS-PUSO

01 Enero 2026 

Dakilang Kapistahan ni Maria, Ina ng Diyos 

Ikawalong Araw ng Pagdiriwang ng Pasko ng Pagsilang 

Pandaigdigang Araw ng Kapayapaan 

Ikalawang Araw ng Pagsisiyam sa Karangalan ng Nuestro Padre Jesus Nazareno 

Bilang 6, 22-27/Salmo 66/Galacia 4, 4-7/Lucas 2, 16-21 

Larawan: Anonymous. Madonna and Child (c. fourth quarter of the 17th century). National Museum in Kielce. Public Domain.

Ang unang araw ng buwan ng Enero ng bawat taon sa sekular na kalendaryo ay ang unang araw ng isang panibagong taon. Subalit, sa liturhikal na kalendaryo, ito ay ang ikawalo at huling araw ng Walong Araw ng Pagdiriwang na tinatawag ring Oktaba ng Pasko ng Pagsilang ng Panginoon, ang Nuestro Padre Jesus Nazareno. Nakasentro sa dakilang misteryo ng pagkakatawang-tao ng ipinangakong Mesiyas at Manunubos na walang iba kundi ang Nuestro Padre Jesus Nazareno ang taimtim na pagninilay ng Simbahan sa walong araw na ito. Inilaan ng Simbahan ang ikawalo at huling araw ng walong araw na ito na inilaan upang ipagdiwang ang Pasko ng Pagsilang nang buong ligaya para sa pagdiriwang ng Dakilang Kapistahan ni Maria, Ina ng Diyos. 

Bukod sa pagiging araw na inilaan ng Simbahan para sa maringal na pagdiriwang ng Dakilang Kapistahan ni Maria, Ina ng Diyos, na siya ring pang-walo at huling araw ng Walong Araw na Pagdiriwang ng Pasko ng Pagsilang, ang unang araw ng buwan ng Enero ay itinakda rin bilang Pandaigdigang Araw ng Panalangin para sa Kapayapaan. Ang araw ring ito ay ang ikalawang araw ng tradisyunal na Pagsisiyam o Nobenaryo sa karangalan ng Katamis-tamisang Panginoon at Manunubos na si Kristo Hesus sa ilalim ng Kaniyang titulong Nuestro Padre Jesus Nazareno. Dumating ang biyaya ng tunay na kapayapaan sa lupa sa pamamagitan ng Nuestro Padre Jesus Nazareno na naging Anak ng Mahal na Birheng Maria at ni San Jose noong gabi ng unang Pasko.  

Isinasalungguhit nang buong linaw ang pagka-Diyos ng Panginoong Jesus Nazareno sa titulong Ina ng Diyos (Theotokos). Ang Banal na Sanggol na isinilang ng Mahal na Birheng Maria sa isang hamak na sabsaban sa Betlehem noong sumapit ang gabi ng unang Pasko ay tunay na Diyos. Bilang tunay na Diyos, idinudulot Niya ang Kaniyang pagpapala sa lahat, gaya ng inilarawan sa mga salitang Siya mismo ang nag-utos na bigkasin nina Aaron at ng kaniyang mga anak sa rito ng pagbebendisyon sa mga tao na itinampok at inilahad sa Unang Pagbasa. Sa pamamagitan ng mga salitang ito na laging binibigkas nina Aaron at ng kaniyang mga anak sa tuwing ang mga Israelita ay kanilang binebendisyunan, ayon sa Kaniyang tagubilin at utos na ibinahagi Niya kay Moises na Kaniyang lingkod na hinirang at itinalaga bilang tagapagsalita, nagpakilala ang Diyos bilang bukal ng pagpapala. Nakatuon ang awit ng papuri ng mang-aawit na tampok sa Salmong Tugunan sa katangiang ito ng Diyos. Sa Ikalawang Pagbasa, ang pinakadakilang pagpapalang bigay ng Diyos ay ibinunyag ni Apostol San Pablo. Nang sumapit ang takdang panahon, ang Diyos ay dumating sa lupa sa pamamagitan ng Banal na Sanggol na isinilang ng Mahal na Birheng Maria sa isang sabsaban noong gabi ng unang Pasko na walang iba kundi ang Poong Jesus Nazareno. Ipinagkaloob ng Diyos ang Kaniyang sarili bilang ipinangakong Mesiyas at Manunubos. Ang Kaniyang kahanga-hangang kadakilaan ay nahayag sa pamamagitan nito. 

Dinakila nang taos-puso ang Banal na Sanggol na si Jesus Nazareno sa salaysay na itinampok at inilahad sa Ebanghelyo. Binigyan Siya ng taos-pusong pagdakila ng mga pastol na naglakbay mula sa parang patungo sa sabsaban sa lungsod ng Betlehem, ang lungsod ni Haring David, kung saan Siya isinilang ng Mahal na Birheng Maria. Ang kaniyang ama-amahan na si San Jose ay naghandog rin ng taos-pusong pagdakila sa Banal na Sanggol na si Jesus Nazareno sa pamamagitan ng kaniyang pagtupad nang taos-puso sa papel, tungkulin, at misyong bigay sa kaniya ng Diyos bilang Kaniyang minamahal na ama-amahan sa lupa. Higit sa lahat, dinakila rin Siya nang taos-puso ng Mahal na Inang si Mariang Birhen, ang tanging babaeng bukod ngang pinagpala sa lahat ng mga babae sa balat ng lupa. 

Hindi natin dinarakila nang taos-puso ang Poong Jesus Nazareno sa pamamagitan ng pagsampa sa andas sa prusisyon ng Traslacion mula sa Luneta patungong Quiapo sa araw ng Kaniyang Kapistahan. Bagkus, ang Poong Jesus Nazareno ay taos-puso nga nating dinarakila sa pamamagitan ng taos-pusong pagtalima sa Kaniya na taglay ang taos-pusong katapatan sa ating mga puso, gaya ng Mahal na Birheng Maria. Kasama rin ng Mahal na Birheng Maria, lagi natin Siyang dakilain sa bawat sandali. 

HINDI NAPILITAN ANG ATING DINARAKILA

31 Disyembre 2025 

Ikapitong Araw ng Padiriwang sa Pasko ng Pagsilang 

Unang Araw ng Pagsisiyam sa Karangalan ng Nuestro Padre Jesus Nazareno  

1 Juan 2, 18-21/Salmo 95/Juan 1, 1-18 

Larawan: Josep Vergara (1726–1799), El Niño Jesús entre los Santos Juanes niños (c. 18th century). Museu de Belles Arts de València. Public Domain.

"Naging tao ang Salita, at Siya'y nanirahan sa piling natin" (Juan 1, 14). Ito ang mga salitang pinagninilayan nang buong kataimtiman ng Simbahan sa araw na ito. Buong linaw na inilarawan sa mga salitang ito mula sa Ebanghelyo ang dakilang misteryo ng pagkakatawang-tao ng Mahal na Poong Jesus Nazareno. Ang Diyos ay nagpasiyang dumating sa daigdig bilang ipinangakong Mesiyas at Manunubos sa pamamagitan ng Mahal na Poong Jesus Nazareno na Kaniyang Bugtong na Anak. Sa pamamagitan ng kahanga-hangang gawang ito, ang kadakilaan ng Diyos ay nahayag. 

Ang tradisyunal na Pagsisiyam sa karangalan ng Panginoong Hesukristo sa ilalim ng titulong Nuestro Padre Jesus Nazareno ay nagsisimula sa huling araw ng bawat taon sa sekular na kalendaryo. Sa loob ng siyam na araw na ito, ang ating mga pansin ay itinutuon ng Simbahan sa kadakilaan ng Kaniyang pag-ibig, kagandahang-loob, awa, habag, at biyaya na Siyang bukod tanging dahilan kung bakit ang Kabanal-Banalang Krus na pinagpakuan sa Kaniya sa bundok ng Kalbaryo ay ipinasiya Niyang pasanin. 

Buong linaw na ipinahayag ni Apostol San Juan sa kaniyang pangaral na itinampok at inilahad sa Unang Pagbasa na ipinagkaloob sa lahat ng mga tunay na dumarakila sa Poong Jesus Nazareno ang Espiritu Santo. Ang Espiritu Santo ay Kaniyang isinugo sa lahat ng mga taos-pusong dumarakila sa Kaniya bilang patunay na taos-puso silang nananalig, sumasampalataya, sumusunod, at sumasamba sa Kaniya nang taos-puso hanggang sa huli upang maging kanilang Patnubay at Gabay. Patunay lamang ito na tunay nga Niya silang iniibig, pinahahalagahan, at kinahahabagan. 

Dahil sa Kaniyang dakilang pag-ibig, kagandahang-loob, habag, at awa, dumating sa lupa bilang ipinangakong Mesiyas at Manunubos na pinananabikan ng lahat sa loob ng napakahabang panahon ang Mahal na Poong Jesus Nazareno na ipinakilala bilang Salitang nagkatawang-tao sa Ebanghelyo noong gabi ng unang Pasko. Kahit na mga hirap, sakit, at pagdurusang dulot ng mabigat na kahoy na Krus na pagpapakuan sa Kaniya sa takdang panahon ang naghihintay sa Kaniya, ipinasiya pa rin Niyang gawin ito. Hindi ito sapilitan. Bagkus, bukal sa Kaniyang kalooban ang Kaniyang pagdating. 

Inaanyayahan tayo ng mang-aawit na itinampok sa Salmong Tugunan na magalak at magdiwang. Ang Poong Jesus Nazareno ay ang dahilan kung bakit ang lahat ng mga debotong misyonerong bumubuo sa tunay at nag-iisang Simbahang Siya mismo ang nagtatag ay laging nagdiriwang nang may galak. Dinarakila nila Siya nang taos-puso hanggang sa huli, kahit na napakahirap itong gawin. Pinatutunayan nilang bukal sa kanilang kalooban ang kanilang pasiyang manalig, umasa, sumampalataya, makinig, tumalima, at sumamba sa Kaniya sa pamamagitan ng pagdakila sa Kaniya gamit ang bawat salitang kanilang binibigkas at ang mga bagay na ginagawa nila araw-araw. 

Kung ang Salitang nagkatawang-tao na walang iba kundi ang Poong Jesus Nazareno ay taos-puso nga nating dinarakila, ang Kaniyang mga utos at loobin ay tutuparin at susundin natin sa bawat sandali ng ating pansamantalang paglalakbay sa lupa. Hindi natin dinarakila nang taos-puso ang Panginoong Jesus Nazareno sa pamamagitan ng pagsampa sa andas sa maringal na prusisyon na isinasagawa sa araw ng Kaniyang maringal na Kapistahan. Magmumukha pa tayong mga hambog at mayabang kapag iyan ang ating ginawa dahil lalabas na itinataas at dinarakila ang ating mga sarili. Sa halip na dakilain ang Mahal na Poong Jesus Nazareno, sarili ang dinarakila. Mamuhay tayo ayon sa mga utos at loobin ng Nuestro Padre Jesus Nazareno bilang patunay na umaaasa, nananalig, sumasampalataya, tumatalima, at sumasamba sa Kaniya. Ito ay dahil ang mga tapat at masunurin sa Poon ay dumarakila sa Kaniya nang taos-puso. 

PAGSAKSI SA DINARAKILA NANG TAOS-PUSO

30 Disyembre 2025 

Ikaanim na Araw ng Pagdiriwang sa Pasko ng Pagsilang 

1 Juan 2, 12-17/Salmo 95/Lucas 2, 36-40 

Larawan: Alonso del Arco (1635–1704), El Niño Dios dormido sobre la cruz (c. 1681). Royal Academy of Fine Arts of San Fernando. Public Domain.

Ang Ebanghelyo ay bahagi ng salaysay ng pagdadala sa Banal na Sanggol na isinilang ng Mahal na Birheng Maria sa isang hamak na sabsaban sa Betlehem noong gabi ng unang Pasko na walang iba kundi ang Panginoong Jesus Nazareno sa Templo upang ihandog sa Diyos. Ito ang huling bahagi ng salaysay ng nasabing kaganapan. Tampok sa nasabing bahagi ang propetang babae na si Ana na nagpatotoo tungkol sa Poong Jesus Nazareno sa mga tao. Buong galak at tuwa na nagpatotoo si Ana sa mga tao tungkol sa walang maliw na katapatan ng Diyos na Kaniyang ipinamalas nang buong linaw sa pamamagitan ng Nuestro Padre Jesus Nazareno. 

Ipinapaalala sa atin ng Simbahan kung ano ang dapat nating gawin bilang kawan ng Poong Jesus Nazareno na naglalakbay nang pansamantala sa daigdig. Dapat natin Siyang ipakilala sa lahat. Sa pamamagitan ng tapat na pagsaksi sa Kaniya, ang Poong Jesus Nazareno ay ating dinarakila nang taos-puso. 

Nakatuon sa pinakamabisang paraan ng pagsaksi sa Panginoong Jesus Nazareno ang pangaral ni Apostol San Juan sa Unang Pagbasa. Dapat nating tuparin at sundin ang Kaniyang kalooban. Lagi tayong mamuhay ayon sa Kaniyang mga utos at loobin. Ito ang pinakamabisang paraan ng pagsaksi sa Kaniya. Kapag ito ang ating ginawa, ang dakilang biyaya ng buhay na walang hanggan sa piling Niya sa Kaniyang kaharian sa langit ay matatamasa natin. 

Buong linaw na inilarawan sa Salmong Tugunan kung ano ang ginagawa ng lahat ng mga dumarakila sa Panginoong Jesus Nazareno nang taos-puso sa bawat sandali ng kanilang pansamantalang paglalakbay sa daigdig. Lagi silang nagdiriwang nang may tuwa sa kabila ng mga kapighatian, tukso, at pagsubok sa buhay sa daigdig dahil sa Panginoong Jesus Nazareno. Hinahanda nila para sa pagtamasa ng dakilang biyayang ito na kusang-loob na ipagkakaloob ng Panginoong Jesus Nazareno. 

Dinarakila ng lahat ng mga sumasaksi sa Mahal na Poong Jesus Nazareno nang may taos-pusong katapatan ang Kaniyang Kabanal-Banalang Ngalan. Ginagawa nila ito sa pamamagitan ng kanilang mga salita at gawa. Lagi nilang inilalaan ang bawat sandali ng kanilang pansamantalang paglalakbay sa daigdig sa pagsasagawa nito. 

LIWANAG NA DULOT NG ATING DINARAKILA

29 Disyembre 2025 

Ikalimang Araw ng Pagdiriwang sa Pasko ng Pagsilang 

1 Juan 2, 3-11/Salmo 95/Lucas 2, 22-35 

Larawan: Franz Anton Maulbertsch (1724–1796), Study for "The Presentation of Christ in the Temple" (for Saint Ulrich, Vienna) (c. 1745). Cleveland Museum of Art. Public Domain.

Nakasentro sa tunay na liwanag ang mga Pagbasa. Hindi ito isang hiwalay na paksa, usapin, at konsepto sa dakilang misteryong pinagninilayan ng Simbahan nang buong kataimtiman sa panahong ito. Bagkus, naka-ugat sa nasabing misteryo ang nasabing paksa. Sa pamamagitan ng Salita ng Diyos na nagkatawang-tao na walang iba kundi ang Mahal na Poong Jesus Nazareno, dumating sa daigdig ang tunay na liwanag. Ang tunay na liwanag ay nagmula sa langit. 

Sa salaysay ng Pagdadala sa Banal na Sanggol na si Jesus Nazareno sa Templo upang ihandog sa Diyos na itinampok at inilahad sa Ebanghelyo, ipinakilala Siya nang buong linaw ni Simeon bilang liwanag. Nang ang Poong Jesus Nazareno ay dumating sa lupa bilang Banal na Sanggol na ipinanganak ng Mahal na Birheng Maria sa isang hamak na sabsaban noong gabi ng unang Pasko, ang tunay na liwanag ay dumating sa lupa. Dahil sa Poong Jesus Nazareno, may liwanag. Katunayan, ang Poong Jesus Nazareno mismo ay ang liwanag na iyon. Ipinagkaloob Niya ang Kaniyang sarili bilang liwanag. Pinawi ng Poong Jesus Nazareno ang kadiliman. 

Dahil pinawi ng tunay na liwanag na walang iba kundi ang Poong Jesus Nazareno ang kadiliman, itinuon ni Apostol San Juan ang kaniyang pangaral na itinampok at inilahad sa Unang Pagbasa sa pamumuhay sa ilalim ng tunay na liwanag. Hindi na tayo dapat mamuhay bilang mga alipin ng kadiliman. Bagkus, dapat mamuhay tayo bilang mga pinalaya ng tunay na liwanag. Ang kabanalan ay dapat nating piliin. Sa pamamagitan nito, dinarakila natin ang tunay na liwanag.

Inilahad sa Salmong Tugunan ang isang paanyaya. Tayong lahat ay inaanyayahan ng mang-aawit na tampok sa Salmong Tugunan na magalak at magdiwang. Ang dahilan kung bakit dapat lagi tayong magalak at magdiwang bilang mga bahagi ng tunay na Simbahan ay walang iba kundi ang Kataas-taasang Diyos. 

Ang Mahal na Poong Jesus Nazareno ay ang tunay na liwanag. Dumating Siya sa lupa upang pawiin ang kadilimang bumalot at umalipin sa atin. Bilang tugon sa Kaniyang pasiyang pawiin ang kadilimang bumalot at umalipin sa atin, dakilain natin Siya nang taos-puso sa pamamagitan ng pagtupad at pagsunod sa Kaniyang kalooban. 

ANG KABABAANG-LOOB NG ATING DINARAKILA

28 Disyembre 2025 

Kapistahan ng Banal na Mag-Anak Hesus, Maria, at Jose (A) 

Sirak 3, 3-7. 14-17a (gr. 2-6. 12-14)/Salmo 127/Colosas 3, 12-21/Mateo 2, 13-15. 19-21

Larawan: Jacob van Oost (1603–), Flight into Egypt (c. Between 1623 and 1671). Sint-Salvatorskathedraal. Public Domain.

Napapaloob sa kapanahunan ng Pasko ng Pagsilang ng Panginoong Jesus Nazareno ang pagdiriwang ng Kapistahan ng Banal na Mag-Anak Hesus, Maria, at Jose. Buong linaw na pinagtutuunan ng pansin ng Simbahan sa pagsapit ng nasabing Kapistahan taun-taon ang dakilang misteryo ng pagkakatawang-tao ng ipinangakong Mesiyas at Manunubos na walang iba kundi ang Panginoong Jesus Nazareno. Kusang-loob ang pasiya ng Diyos na maging bahagi ng isang pamilya sa Kaniyang pagparito sa mundo bilang ipinangakong Mesiyas at Manunubos sa pamamagitan ng Kaniyang Anak na si Jesus Nazareno, ang Ikalawang Persona ng Banal na Santatlo. 

Sa kabila ng Kaniyang kadakilaan bilang Diyos, ipinasiya ng Poong Jesus Nazareno na mapabilang sa isang pamilya. Naging anak Siya ng Mahal na Birheng Maria at ni San Jose. Bilang kanilang anak, tinupad at sinunod ng Poong Jesus Nazareno nang buong kababaang-loob ang mga tagubilin sa Unang Pagbasa. Ito ang tanging dahilan kung bakit ang mga tagubiling ito sa Unang Pagbasa mula sa aklat ni Sirak ay ibinahagi rin ni Apostol San Pablo sa kaniyang pangaral sa Ikalawang Pagbasa. Katunayan, sa mga tagubilin sa Unang Pagbasa naka-ugat ang mga tagubilin sa pangaral ni Apostol San Pablo sa Ikalawang Pagbasa. 

Batid ng Mahal na Poong Jesus Nazareno na hindi magiging madali ang pamumuhay sa piling ng isang pamilya sa lupa dahil sa mga kaganapang katulad ng kaganapang itinampok at inilahad sa salaysay sa Ebanghelyo. Ang Kaniyang buhay ay nalagay sa matinding panganib, kahit na isang sanggol pa lamang Siya sa panahong yaon. Ito ay dahil hindi isang karaniwang sanggol na lalaki ang Mahal na Poong Jesus Nazareno kundi ang tunay at walang hanggang Hari na kusang-loob na bumaba mula sa langit at naparito sa lupa bilang Mesiyas at Manunubos. Kahit na alam Niyang malalagay sa panganib ang Kaniyang buhay nang hindi pa sumasapit ang panahong itinakda Niya upang ang tanan ay iligtas sa pamamagitan ng Kaniyang Misteryo Paskwal, pinili pa rin Niyang mapabilang sa isang pamilya katulad natin. 

Dahil sa Kaniyang pag-ibig, kagandahang-loob, habag, at awa, ipinasiya ng Diyos na maging bahagi ng isang pamilya sa pamamagitan ng Poong Jesus Nazareno. Buong kababaang-loob Niyang ibinilang ang Kaniyang sarili sa isang pamilya alang-alang sa ating lahat na lubos Niyang iniibig at kinahahabagan. 

INIIBIG TAYO NG ATING DINARAKILA

27 Disyembre 2025 

Kapistahan ni Apostol San Juan, Manunulat ng Mabuting Balita 

1 Juan 1, 1-4/Salmo 96/Juan 20, 2-8 

Larawan: Peter Paul Rubens (1577–1640), Saint John the Evangelist (c. Between 1610 and 1612). Museo del Prado. Public Domain.

Itinatampok at pinararangalan ng Simbahan sa araw na ito si Apostol San Juan. Kilala si Apostol San Juan bilang alagad na minamahal ng Mahal na Poong Jesus Nazareno. Dahil dito, inaanyayahan tayo ng Simbahan sa araw na ito na pagnilayan nang buong kataimtiman ang ugnayan ng pag-ibig ng Diyos at ng misteryo ng pagkakatawang-tao ng Mahal na Poong Jesus Nazareno. Sa kabila ng Kaniyang kadakilaan, ipinasiya ng Diyos na magkatawang-tao sa pamamagitan ng Kaniyang Bugtong na Anak na walang iba kundi ang Mahal na Poong Jesus Nazareno. Nahayag sa pamamagitan ng pagkakatawang-tao ng Mahal na Poong Jesus Nazareno ang pag-ibig ng Diyos. 

Ang pangaral ni Apostol San Juan sa Unang Pagbasa na mula sa simula ng kaniyang unang sulat ay nakasentro sa dahilan kung bakit lagi siyang nagpapatotoo tungkol sa dakilang pag-ibig ng Diyos. Katulad ng kaniyang mga kapwa niyang alagad at apostol, nasaksihan ni Apostol San Juan ang mga kahanga-hangang gawa ng Mahal na Poong Jesus Nazareno at napakinggan ang Kaniyang mga pangaral. Ito ang ibinabahagi niya sa mga bumubuo sa tunay na Simbahang tatag ng Mahal na Poong Jesus Nazareno para sa ikabubuti nila. Tampok naman sa Ebanghelyo ang salaysay ng pagtuklas sa libingang walang laman. Walang laman ang libingan dahil nabuhay na mag-uli ang Mahal na Poong Jesus Nazareno. Patunay ito na hindi isang karaniwang sanggol ang isinilang ng Mahal na Birheng Maria sa isang hamak na sabsaban sa Betlehem noong gabi ng unang Pasko. Bagkus, Siya ay ang Diyos na tunay ngang dakila. 

Hinihimok ng mang-aawit sa Salmong Tugunan ang lahat ng mga tapat at masunurin sa Panginoon na magalak sa Kaniya. Siya ang dahilan kung bakit mayroong galak ang lahat ng mga dumarakila sa Kaniya sa pamamagitan ng kanilang pagsunod sa Kaniya nang may taos-pusong katapatan hanggang sa huli. 

Dahil sa Kaniyang dakilang pag-ibig, ipinasiya ng Diyos na ating dinarakila na iligtas tayo sa pamamagitan ng Mahal na Poong Jesus Nazareno. Ito ang dahilan kung bakit mayroong Pasko. 

SA BAWAT SANDALI NG ATING BUHAY, ANG DIYOS AY DAPAT DAKILAIN

26 Disyembre 2025 

Kapistahan ni San Esteban, Unang Martir 

Mga Gawa 6, 8-10; 7, 54-59/Salmo 30/Mateo 10, 17-22 

Larawan: Denys Calvaert (circa 1540–1619), The Holy Family with Saint Stephen (c. 1596). Sotheby's via RKD Research. Public Domain.

Ang unang martir ng Simbahan na walang iba kundi si San Esteban ay itinatampok at pinararangalan ng Inang Simbahan sa araw na kasunod ng maringal na pagdiriwang ng Dakilang Kapistahan ng Pasko ng Pagsilang ng Panginoon. Habang buong tuwang ipinagpapatuloy ng Simbahan ang pagdiriwang ng Pasko ng Pagsilang ng Panginoon, tayong lahat ay pinaalalahanan tungkol sa dapat nating gawin bilang mga Kristiyano. Dapat nating ilaan ang bawat sandali ng ating buhay sa pagdakila sa Diyos, kahit na mahirap itong gawin. 

Itinampok at inilahad ang salaysay ng pagkamartir ng unang martir ng Simbahan na si San Esteban sa Unang Pagbasa. Sa kabila ng walang awang pag-uusig sa kaniya sa kamay ng Sanedrin hanggang sa sandaling ang kaniyang hininga ay malagot dulot ng walang tigil na pagbabato sa kaniya, ipinasiya pa rin ni San Esteban na ang Diyos ay dakilain. Ang mga salita ng mang-aawit na itinampok sa Salmong Tugunan ay buong giting niyang isinabuhay. Kahit na naranasan niya ang mga inilarawan ng Poong Jesus Nazareno, hindi nagpatinag si San Esteban. Dinakila pa rin niya ang Diyos. 

Bilang mga bumubuo sa tunay na Simbahang itinatag ng Poong Jesus Nazareno, lagi natin dapat Siyang dakilain. Ang bawat sandali ng ating pansamantalang paglalakbay sa daigdig ay dapat nating ilaan sa pagdakila sa Kaniya taglay sa ating mga puso ang taos-pusong pananalig sa pamamagitan ng ating mga salita at gawa. 

DAKILAIN ANG SALITANG NAGKATAWANG-TAO

25 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Araw] 

Isaias 52, 7-10/Salmo 97/Hebreo 1, 1-6/Juan 1, 1-18 (o kaya: 1, 1-5. 9-14) 

Larawan: Anonymous (German), Christi Geburt mit Anbetung der Hirten und Engel (c. 17th century). Hampel Auctions. Public Domain.

Tuwing sasapit ang taunang maringal na pagdiriwang ng Kapaskuhan na buong galak at ligayang idinadaos tuwing sasapit ang ika-25 araw ng Disyembre, ang ating mga pansin ay itinutuon sa dakilang misteryo ng pagkakatawang-tao ng Mahal na Poong Jesus Nazareno. Sa pamamagitan ng Mahal na Poong Jesus Nazareno, ang Diyos ay dumating sa daigdig upang iligtas ang sangkatauhan. Kahit na hindi naman Niya ito kailangang gawin, ipinasiya pa rin ng Diyos na gawin ito. 

Buong linaw na inihayag sa Unang Pagbasa na idudulot ng Diyos ang dakilang biyaya ng Kaniyang pagliligtas. Ang biyaya ng kaligtasan ay magmumula lamang sa Kataas-taasang Diyos ng mga Hukbo. Ipinaliwanag ng manunulat sa Sulat sa mga Hebreo sa kaniyang pangaral na inilahad at itinampok sa Ikalawang Pagbasa na naisakatuparan ang mga pahayag tungkol sa pagdulot ng Diyos ng biyaya ng Kaniyang pagliligtas sa Lumang Tipan, gaya na lamang ng pahayag sa Unang Pagbasa, sa pamamagitan ng ipinangakong Mesiyas at Tagapagligtas na walang iba kundi ang Bugtong na Anak ng Diyos na si Jesus Nazareno. Tinupad ni Jesus Nazareno ang mga pahayag tungkol sa pagligtas ng Diyos sa tanan na ibinahagi sa Lumang Tipan. Sa Ebanghelyo, ipinakilala si Jesus Nazareno bilang Salita ng Diyos na nagkatawang-tao. Nang dumating Siya sa mundo, natupad ang mga salita ng mang-aawit sa Salmong Tugunan. Naipamalas ni Jesus Nazareno ang kahanga-hangang tagumpay ng Diyos (Salmo 96, 3k). Dahil may habag, awa, kagandahang-loob, at pag-ibig ang Diyos, niloob Niyang mangyari ito. 

Ang Salita ng Diyos na nagkatawang-tao noong gabi ng unang Pasko na walang iba kundi ang Poong Jesus Nazareno ay dapat nating dakilain. Ipinamalas Niya sa atin sa pamamagitan ng Kaniyang pagdating sa lupa bilang Banal na Sanggol na isinilang ng Mahal na Birheng Maria sa isang hamak na sabsaban sa lungsod ng Betlehem noong gabi ng unang Pasko ang Kaniyang kabutihan. Mayroong Pasko dahil sa Kaniya. 

ANG KADAKILAAN NG DIYOS NA NAGLILIGTAS

25 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Bukang-Liwayway] 

Isaias 62, 11-12/Salmo 96/Tito 3, 4-7/Lucas 2, 15-20 

Larawan: Francesco Frigimelica il vecchio (1570–1649), Nativity (c. 17th century). Santo Stefano (Belluno). Public Domain.

Nakasentro sa tanging dahilan kung bakit ang Banal na Sanggol na si Jesus Nazareno ay isinilang ng Mahal na Birheng Maria sa isang sabsaban sa Betlehem noong gabi ng unang Pasko ang mga Pagbasa para sa solemneng pagdiriwang ng Banal na Misa sa Bukang-Liwayway ng Pasko ng Pagsilang ng Panginoon. Bagamat ang mga Pagbasa para sa mga Misa na idinadaos sa nasabing oras ng nasabing Dakilang Kapistahan ay napakaikli kung ang mga Pagbasang ito ay ikukumpara sa haba ng mga Pagbasa para sa mga Misa na idinadaos sa ibang mga oras ng nasabing Dakilang Kapistahan, hindi ito nangangahulugang walang maitutulong ang mga nasabing Pagbasa para sa mga pagdiriwang ng Banal na Misa na isinasagawa sa nasabing oras ng nasabing Dakilang Kapistahan sa pagpapalalim ng ating taimtim na pagninilay sa dakilang misteryo na itinatampok sa tuwing ang nasabing Dakilang Kapistahan ay sasapit. Alang-alang sa ating lahat, ang Diyos ay nagakatawang-tao sa pamamagitan ni Jesus Nazareno. 

Buong linaw na ipinahayag sa mga Pagbasa na isinilang ang Poong Jesus Nazareno sa isang hamak na sabsaban sa Betlehem noong gabi ng unang Pasko upang iligtas ang sangkatauhan. Ang ating mga pansin ay itinutuon ng mga Pagbasa sa Kaniyang misyon at tungkulin bilang ipinangakong Mesiyas at Manunubos. Sa pamamagitan ng pagdating ng Poong Jesus Nazareno bilang ipinangakong Mesiyas at Manunubos na nagmula sa langit, ang kadakilaan ng Diyos ay nahayag sa lahat. 

Ang pangako ng Diyos ay inilahad ni Propeta Isaias sa Unang Pagbasa. Buong linaw na ipinahayag ng Diyos sa  pamamagitan ni Propeta Isaias na ipagkakaloob Niya sa Kaniyang bayan na walang iba kundi ang Israel ang biyaya ng Kaniyang pagliligtas sa panahong itinakda Niya. Ipinaliwanag ni Apostol San Pablo sa Ikalawang Pagbasa ang dahilan kung bakit ipinasiya ng Diyos na gawin ito. Dahil sa Kaniyang habag para sa sangkatauhan, ipinasiya ng Diyos na ipagkaloob sa Kaniyang bayan. Noong gabi ng unang Pasko, ang biyayang ito ay dumating sa pamamagitan ng Banal na Sanggol na walang iba kundi ang Panginoong Jesus Nazareno. Sa Ebanghelyo, ang mga pastol ay tumungo sa Betlehem upang dakilain at sambahin ang Banal na Sanggol. 

Inihayag ng Diyos ang Kaniyang kadakilaan sa pamamagitan ng Banal na Sanggol na si Jesus Nazareno. Sa pamamagitan ng Banal na Sanggol na si Jesus Nazareno, ang dakilang biyaya ng pagliligtas ng Diyos ay dumating sa lupa. Ginawa Niya ito dahil sa Kaniyang pag-ibig, kagandahang-loob, habag, at awa para sa ating lahat. Dahil diyan, bilang tugon, buong galak natin Siyang dakilain at sambahin. 

HATID NG ATING DINARAKILA: PAG-IBIG, TUWA, PAG-ASA

25 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Hatinggabi] 

Isaias 9, 1-6/Salmo 95/Tito 2, 11-14/Lucas 2, 1-14 

Larawan: Juan de Flandes (1450–1519), La Natividad (c. 1508-1519). Samuel H. Kress Collection of the National Gallery of Art. Public Domain.  

"Sa ati'y sumilang ngayon, Manunubos, Kristong Poon" (Lucas 2, 11). Ito ang balitang inihatid ng anghel ng Panginoon na nagpakita sa mga pastol na nagbabantay ng mga tupa sa parang noong gabi ng unang Pasko. Nakatuon sa mga salitang ito na binigkas nang buong linaw ng anghel ng Panginoon sa mga pastol sa parang noong gabi ng unang Pasko ang maringal na pagdiriwang ng Kapaskuhan. Ang Diyos ay pumarito sa lupa upang ang sangkatauhang nalugmok sa kasalanan ay iligtas sa pamamagitan ng Banal na Sanggol na isinilang ng Mahal na Birheng Maria na si Jesus Nazareno. Dahil kusang-loob na ipinasiya ng Diyos na tubusin ang sangkatauhan sa pamamagitan ng Mesiyas at Manunubos na ipinangako na si Jesus Nazareno, mayroong Pasko. 

Habang ipinagdiriwang natin nang buong galak at tuwa bilang isang sambayanan ang maringal na pagdiriwang ng Kapaskuhan, inaanyayahan tayo ng Simbahan na buong kataimtimang pagnilayan ang misteryo ng pagkakatawang-tao ni Jesus Nazareno. Sa pamamagitan ng pagsilang ni Jesus Nazareno, ang pinakadakilang biyaya ng Diyos ay dumating sa daigdig. Ito ang biyaya ng Kaniyang pagliligtas. Ang bunga ng dakilang biyayang ito ay pag-ibig, tuwa, at pag-asa. 

Buong linaw na inihayag sa Unang Pagbasa na isang sanggol na lalaki ang isisilang sa takdang panahon. Ang nasabing sanggol ay isisilang para sa lahat ng tao. Inihayag ni Apostol San Pablo sa Ikalawang Pagbasa na nahayag sa lahat ang kagandahang-loob ng Kataas-taasang Diyos ng mga Hukbo sa pamamagitan ng sanggol na ito na buong linaw na ipinakilala sa pahayag ni Propeta Isaias na itinampok at inilahad sa Unang Pagbasa. Katunayan, ipinakilala ni Apostol San Pablo sa kaniyang pangaral na ito na inilahad sa Ikalawang Pagbasa kung sino nga ba ang sanggol na lalaki sa propesiya sa Unang Pagbasa - ang Poong Jesus Nazareno. 

Ang salaysay ng pagsilang ng Poong Jesus Nazareno noong gabi ng unang Pasko ay itinampok at inilahad sa Ebanghelyo. Sa pamamagitan nito, buong linaw na nahayag sa lahat ng tao ang kadakilaan ng Diyos na sumasalamin sa Kaniyang kagandahang-loob. Dahil sa Kaniyang kagandahang-loob, idinulot ng Diyos ang tunay na pag-ibig, tuwa, at pag-asa sa pamamagitan ng pagkakaloob ng biyaya ng Kaniyang pagliligtas na dumating sa daigdig noong sumapit ang takdang panahon, ang banal at dakilang gabi ng unang Pasko, sa pamamagitan ng Banal na Sanggol na walang iba kundi ang Poong Jesus Nazareno na isinilang ng Mahal na Birheng Maria. 

Isang paanyaya para sa ating lahat ay inilahad sa Salmong Tugunan. Buong galak at tuwang inaanyayahan ng mang-aawit sa Salmong Tugunan na dakilain ang Diyos na puspos ng kabutihan. Pinatotohanan pa nga ng mang-aawit sa Salmong Tugunan sa kaniyang paanyaya para sa lahat ang kabutihan ng Diyos na isinasalamin nang buong linaw ng Kaniyang mga gawa na tunay ngang kahanga-hanga at dakila. 

Noong gabi ng unang Pasko, idinulot sa atin ng Diyos ang tunay na pag-ibig, ligaya, tuwa, galak, at pag-asa. Ginawa Niya ito sa pamamagitan ng pagkakaloob sa atin ng pinakadakilang biyaya na walang iba kundi ang biyaya ng Kaniyang pagliligtas. Ito ay dumating sa daigdig sa pamamagitan ng Banal na Sanggol na walang iba kundi ang Mahal na Poong Jesus Nazareno. Sa pamamagitan nito, ang Kaniyang kadakilaan na sumasalamin sa Kaniyang kagandahang-loob ay Kaniyang naipamalas. 

NAGKATAWANG-TAO ANG ATING DINARAKILA NANG TAOS-PUSO DAHIL SA KANIYANG DAKILANG PAG-IBIG

24 Disyembre 2025 

Dakilang Kapistahan ng Pasko ng Pagsilang ng Panginoon 

[Pagmimisa sa Bisperas] 

Isaias 62, 1-5/Salmo 88/Mga Gawa 13, 16-17. 22-25/Mateo 1, 1-25 (o kaya: 1, 18-25) 

Larawan: Louis Cretey (–1713), The Nativity (c. Between 17th century and 18th century). Detroit Institute of Arts. Public Domain.

Ang dakilang misteryo ng pagkakatawang-tao ng Panginoong Jesus Nazareno ay ang sentro ng pagdiriwang ng Dakilang Kapistahan ng Pasko ng Pagsilang. Noong gabi ng unang Pasko, sa isang hamak na sabsaban sa lungsod ni Haring David na walang iba kundi ang lungsod ng Betlehem, ang ipinangakong Mesiyas at Manunubos na walang iba kundi ang Panginoong Jesus Nazareno ay isinilang ng Mahal na Birheng Maria. Sa pamamagitan ng Banal na Sanggol na ipinanganak ng Mahal na Birheng Maria noong gabi ng unang Pasko na walang iba kundi ang Panginoong Jesus Nazareno, nahayag nang buong linaw ang dakilang pag-ibig ng Diyos. Tinupad ng Diyos ang pangakong binitiwan Niya sa pamamagitan ng mga propeta sa Lumang Tipan bilang patunay na dakila ngang lubos ang Kaniyang pag-ibig sa pamamagitan nito. 

Sa Unang Pagbasa, si Propeta Isaias ay nagsalita nang buong linaw tungkol sa pag-ibig ng Diyos para sa bayang Kaniyang hinirang na walang iba kundi ang Israel. Hindi pababayaan ng Diyos ang Kaniyang bayan na manatiling alipin ng kadiliman. Bagkus, ang biyaya ng kaligtasan ay ipagkakaloob ng Diyos sa Kaniyang bayan. Mahahayag sa tanan sa pamamagitan ng pagligtas ng Diyos sa bayang Israel na Kaniyang hinirang upang maging Kaniya dahil sa Kaniyang pag-ibig ang Kaniyang kadakilaan.

Nakasentro sa pagsasakatuparan ng pangako ng Diyos na inilahad sa Unang Pagbasa ang pangaral ni Apostol San Pablo sa Ikalawang Pagbasa. Ipinamalas ng Diyos nang buong linaw sa tanan ang Kaniyang kadakilaan sa pamamagitan ng Mahal na Poong Jesus Nazareno. Ang Mahal na Poong Jesus Nazareno ay pumarito sa daigdig bilang ipinangakong Mesiyas at Manunubos upang isakatuparan ang inilarawan ng dakilang propetang si Isaias sa Unang Pagbasa. 

Tampok sa Ebanghelyo ang talaan ng angkang kinabilangan ng ipinangakong Mesiyas at Manunubos na walang iba kundi ang Poong Jesus Nazareno at ang pagsilang Niya noong gabi ng unang Pasko. Sa kabila ng Kaniyang kadakilaan bilang tunay na Diyos, kusang-loob na ipinasiya ng Poong Jesus Nazareno na mapabilang sa angkan ng mga makasalanan. Halimbawa ng mga kasalanang nagawa ng Kaniyang mga ninuno ay pakikipagsiping sa iba, gaya na lamang ng ginawa ni Abraham kay Agar dahil sa pag-uudyok ng kaniyang kabiyak na si Sara at ng ginawa ni Haring David kay Bat-seba na kabiyak ng puso ni Urias. Dahil sa Kaniyang pag-ibig na tunay ngang dakila, ipinasiya ng Poong Jesus Nazareno na mapabilang sa angkang ito upang ang lahat ng tao sa daigdig ay iligtas mula sa kasalanan, kasamaan, at kadiliman. 

Gaya ng ipinahayag nang buong linaw ng mang-aawit sa Salmong Tugunan: "Pag-ibig Mong walang maliw ay lagi kong sasambitin" (Salmo 88, 2a). Ito ang tanging dahilan kung bakit may Pasko. May Pasko dahil lubos tayong iniibig ng ating dinarakila nang taos-puso na walang iba kundi ang Kataas-taasang Diyos. Buong linaw na nahayag sa pamamagitan ng Banal na Sanggol na si Jesus Nazareno ang misteryong ito. 

Dahil sa dakilang pag-ibig ng Diyos para sa tanan, ang Pasko ay ating ipinagdiriwang nang buong galak. Pinatunayan ng Banal na Sanggol na isinilang ng Mahal na Inang si Mariang Birhen sa isang hamak na sabsaban noong gabi ng unang Pasko na walang iba kundi ang Poong Jesus Nazareno na tunay ngang dakila ang pag-ibig ng Diyos. 

DAKILAIN ANG TUNAY NA MAPAGMAHAL

24 Disyembre 2025 

Ikasiyam at Huling Araw ng Simbang Gabi 

2 Samuel 7, 1-5. 8b-12. 14a. 16/Salmo 88/Lucas 1, 67-79 

Larawan: Rosso Fiorentino (1494–1540), Saint John the Baptist as a Boy (c. 1521). Uffizi Gallery via Apollo Magazine. Public Domain. 

Nakatuon sa pag-ibig ng Diyos ang mga Pagbasa. Ito ang tanging dahilan kung bakit ang Diyos ay gumawa ng maraming mga kahanga-hangang bagay. Ang lahat ng mga kahanga-hangang gawa ng Diyos ay sumasalamin sa Kaniyang pag-ibig na dakila. Sa pamamagitan ng Kaniyang mga kahanga-hangang gawa na hindi na mabilang dahil sa dami ng mga ito, ipinapamalas ng Diyos sa tanan ang Kaniyang dakilang pag-ibig. Dahil dito, nararapat lamang na dakilain natin Siya bilang pahayag ng ating pasiyang manalig, sumampalataya, umasa, mahalin, at sambahin Siya. 

Sa Unang Pagbasa, inihayag ng Panginoong Diyos kay Propeta Natan ang Kaniyang pangako para kay Haring David. Ipinangako ng Panginoong Diyos na mananatili ang trono, angkan, at lahi ni Haring David. Magiging kahalili ni Haring David sa sandali ng kaniyang pagpanaw sa daigdig ang isa sa kaniyang mga anak. Tinupad nga ng Diyos ang Kaniyang pangakong ito kay Haring David na Kaniyang hirang. Nang sumapit ang oras at sandali ng kaniyang pagpanaw sa daigdig, ang humalili kay Haring David ay walang iba kundi ang kaniyang anak kay Bat-seba na si Solomon. Kalaunan, nagmula rin sa angkan ni Haring David ang tunay na Hari na walang iba kundi ang Poong Jesus Nazareno, ang ipinangakong Mesiyas at Manunubos. 

Pinatunayan ng Diyos sa pamamagitan ng Kaniyang pagtupad sa Kaniyang pangako kay Haring David ang Kaniyang tapat na pag-ibig para sa Kaniyang lingkod. Hindi Niya nilimot ang Kaniyang pangako kay Haring David kailanman. Ang Kaniyang lingkod na hinirang na si Haring David ay Kaniyang minahal sa kabila ng kaniyang mga kahinaan at kasalanan laban sa Kaniya. 

Itinuon ng mang-aawit na tampok sa Salmong Tugunan ang kaniyang awit ng papuri sa pag-ibig ng Diyos. Sa pamamagitan nito, ang Diyos ay kaniyang dinakila. Hindi siya nahiyang dakilain ang Diyos na puno ng dakilang pag-ibig. Ang Diyos na kailanman ay hindi nagsasawang ipakita ang Kaniyang dakilang pag-ibig sa pamamagitan ng mga kahanga-hangang gawa na hindi na mabilang ay buong sigasig na pinatotohanan ng mang-aawit na tampok sa Salmong Tugunan. Dinakila ng mang-aawit na tampok ang Diyos nang buong puso sa pamamagitan ng pagpapatotoo tungkol sa Kaniyang walang maliw na pag-ibig. 

Ang ama ni San Juan Bautista na walang iba kundi si Zacarias ay nagpatotoo tungkol sa dakilang pag-ibig ng Diyos sa kaniyang awit ng papuri na itinampok at inilahad sa Ebanghelyo. Sa pamamagitan ng pagpapatotoo tungkol sa dakilang pag-ibig ng Diyos na isinasalamin ng Kaniyang mga kahanga-hangang gawa na hindi na mabilang, ang Diyos ay dinakila ni Zacarias nang taos-puso. Ito ang tugon ni Zacarias sa pag-ibig na ipinakita ng Diyos sa pamamagitan ng Kaniyang mga kahanga-hangang gawa. 

Hindi lamang pagpapamalas ng kapangyarihan ang mga kahanga-hangang bagay na ginawa ng Diyos. Bagkus, ang mga kahanga-hangang gawa ng Diyos ay patunay ng Kaniyang dakilang pag-ibig. Ito ang dahilan kung bakit hindi Siya nakakalimot sa mga pangakong binitiwan kailanman. Dahil dito, marapat lamang na ilaan ang bawat oras at sandali ng ating pansamantalang paglalakbay sa daigdig sa pagdakila sa Kaniya. 

ANG UGNAYAN NG KABUTIHAN NG DIYOS AT NG KANIYANG KADAKILAAN

23 Disyembre 2025 

Ikawalong Araw ng Simbang Gabi 

Malakias 3, 1-4. 23-24/Salmo 24/Lucas 1, 57-66 

Larawan: Giuliano Bugiardini (1475–), The Birth of John the Baptist (c. 16th century). Galleria Estense via Bridgeman Art Library. Public Domain.

Nakasentro sa ugnayan ng kadakilaan at kabutihan ng Diyos ang mga Pagbasa. Ang kabutihan ng Diyos at ang Kaniyang kadakilaan ay hindi mga katangian o konseptong hiwalay sa isa't isa. Magkaugnay at magkaakibat ang dalawang ito. Ipinapamalas ng Diyos ang Kaniyang kadakilaan sa pamamagitan ng Kaniyang kabutihan. Palagi itong ginagawa ng Diyos noon pa man una. Buong linaw na ipinapakita ng Diyos sa lahat ang ugnayan ng Kaniyang kabutihan at kadakilaan. 

Sa Unang Pagbasa, buong linaw na inihayag ng Diyos sa pamamagitan ng Kaniyang hirang na propetang si Malakias na darating Siya sa takdang panahon. Ngunit, bago dumating ang Panginoon sa panahong Kaniyang itinakda, isusugo Niya si Elias upang ihanda ang lahat para sa pagsasakatuparan ng pahayag na ito ng Panginoon. Buong linaw namang inilarawan sa Salmong Tugunan ang dahilan kung bakit ang Diyos ay nagpasiyang dumating. Darating Siya sa pamamagitan ng ipinangakong Mesiyas at Manunubos upang ang biyaya ng kaligtasan ay idulot sa lahat. Sa Ebanghelyo, ang tagapagpauna ng Mahal na Poong Jesus Nazareno, ang Mesiyas at Tagapagligtas, na walang iba kundi si San Juan Bautista na Kaniyang kamag-anak ay isinilang. Nahayag ang kadakilaan ng Diyos sa pamamagitan nito. Ipinamalas ng Diyos sa mag-asawang Zacarias at Elisabet ang Kaniyang kabutihan sa pamamagitan ni San Juan Bautista. 

Pinatutunayan ng Diyos ang Kaniyang kadakilaan sa pamamagitan ng pagpapamalas ng Kaniyang kabutihan. Bilang tugon, dapat lagi natin Siyang dakilain. Huwag tayong tumigil sa pagdakila sa Kaniya sapagkat hindi Siya nagsasawang ipamalas sa atin ang Kaniyang kahanga-hangang kabutihan. 

PAGDAKILA SA NAGDUDULOT NG GALAK

22 Disyembre 2025 

Ikapitong Araw ng Simbang Gabi 

1 Samuel 1, 24-28/1 Samuel 2/Lucas 1, 46-56 

Larawan: Cristoforo Gherardi (1508–1556), Visitation of Mary to Saint Elizabeth (c. 1541). Musée des Augustins. Public Domain. 

Buong linaw na ipinapaalala sa atin ng mga Pagbasa kung saan ang tunay na galak ay nagmumula. Nagmumula lamang sa Diyos ang tunay na galak. Ang biyayang ito ay kusang-loob Niyang idinudulot sa atin. Sa pamamagitan ng Kaniyang mga kahanga-hangang gawa na nagpapahayag ng Kaniyang kadakilaan, idinudulot Niya sa atin ang tunay na galak. Tunay ngang napakabuti ang ating dinarakila nang taos-puso. 

Sa Unang Pagbasa, buong galak na dinala ni Ana ang kaniyang anak na si Samuel sa Templo upang ihandog siya sa Panginoong Diyos. Para kay Ana, isang biyaya mula sa Panginoong Diyos ang kaniyang anak na si Samuel. Matapos manalangin nang buong kataimtiman habang pumapatak sa lupa ang mga luha mula sa kaniyang mga mata, ipinagkaloob ng Panginoong Diyos si Samuel kay Ana bilang kaniyang anak. Ang mga luha at mga panalangin ni Ana ay hindi nauwi sa wala. Biniyayaan ng Diyos si Ana ng anak. Dinulutan ng Diyos si Ana ng tunay na galak sa pamamagitan ng kaniyang anak na walang iba kundi si Samuel. Ito ang tanging dahilan kung bakit ang Diyos ay buong galak niyang dinakila sa kaniyang panalangin na inilahad sa Salmong Tugunan. 

Itinampok at inilahad sa Ebanghelyo ang papuring awit ng Mahal na Birheng Maria na kilala natin sa tawag na "Magnificat." Mula sa simula hanggang sa wakas ng nasabing papuring awitin, ang Diyos ay buong galak na dinakila ng Mahal na Birheng Maria na hinirang at itinalaga upang maging ina ng ipinangakong Mesiyas at Tagapagligtas na walang iba kundi ang Mahal na Poong Jesus Nazareno. Buong galak na nagpatotoo tungkol sa kadakilaan ng Diyos na tunay nga namang kahanga-hanga ang Mahal na Birheng Maria sa bawat titik ng papuring awiting ito. Sa pamamagitan ng Kaniyang mga kahanga-hangang gawa na nagpapahayag ng Kaniyang kadakilaan, idinulot ng Diyos sa tanan ang tunay na galak. 

Ang tunay na galak ay nagmumula lamang sa lagi nating dinarakila nang taos-puso sa bawat oras at sandali ng ating pansamantalang paglalakbay sa lupa na walang iba kundi ang Diyos. Huwag nating itigil ang taos-pusong pagdakila sa Kaniya. Mayroon tayong kasama sa taos-pusong pagdakila sa Diyos - ang Mahal na Birheng Maria na Reyna at Ina nating lahat. 

SA PAMAMAGITAN NG KANIYANG WALANG MALIW NA KATAPATAN, IPINAHAYAG NIYA ANG KANIYANG KADAKILAAN

21 Disyembre 2025 

Ikaapat na Linggo sa Panahon ng Pagdating ng Panginoon 

Ikaanim na Araw ng Simbang Gabi 

Isaias 7, 10-14/Salmo 23/Roma 1, 1-7/Mateo 1, 18-24 

Larawan: Simone Cantarini (1612–1648), The dream of St Joseph (c. first half of 17th century). Public Domain.

Nakasentro sa ugnayan ng katapatan ng Diyos at ang Kaniyang kadakilaan. Tiyak na hindi lingid sa kaalaman ng karamihan ang katotohanan tungkol sa ugnayang ito. Ang katapatan ng Diyos at ang Kaniyang kadakilaan ay magkaugnay. Hindi naman malayo at magkaiba ang dalawang ito sa isa't isa. Sa pamamagitan ng Kaniyang katapatang walang maliw, ang Kaniyang kahanga-hangang kadakilaan ay ipinapamalas Niya sa tanan nang buong linaw. 

Sa Unang Pagbasa, buong linaw na inihayag ng Diyos kung paano Niya tutubusin ang lahat ng tao mula sa kasalanan. Ang planong ito ng Diyos na tunay ngang dakila at kahanga-hanga ay isasakatuparan Niya sa panahong mismong Siya ang nagtakda sa pamamagitan ng ipinangakong Mesiyas at Tagapagligtas. Sa Ebanghelyo, ibinalita ng isang anghel ng Panginoon na nagpakita kay San Jose sa kaniyang panaginip habang buong ligalig at balisa niyang pinag-isipan at pinagplanuhan ang kaniyang planong makipaghiwalay sa Mahal na Birheng Maria na sumapit ang takdang panahon. Hindi anak ng ibang lalaki ang Sanggol sa sinapupunan ng Mahal na Birheng Maria. Ang dinadala ng Mahal na Birheng Maria sa kaniyang sinapupunan ay walang iba kundi si Jesus Nazareno, ang Bugtong na Anak ng Diyos na darating sa daigdig pagsapit ng takdang panahon bilang ipinangakong Mesiyas at Manunubos. 

Dahil sa katapatang ito ng Diyos na tunay ngang walang maliw, buong linaw Siyang ipinakilala ng mang-aawit sa Salmong Tugunan bilang dakilang Hari ng lahat (Salmo 23, 7k at 10b). Bukod pa roon, ipinahayag nang buong linaw ni Apostol San Pablo sa kaniyang pangaral sa Ikalawang Pagbasa na si Jesus Nazareno ang tumupad sa mga pangakong binitiwan ng Diyos sa Lumang Tipan. Sa pamamagitan nito, nahayag sa tanan ang katapatan ng Diyos. Naipahayag rin naman ng Diyos sa pamamagitan nito ang Kaniyang kadakilaan. 

Hindi nakakalimot ang Diyos sa mga pangakong binitiwan. Lagi Niyang tinutupad ang mga ito. Patunay lamang ito ng Kaniyang walang maliw na katapatan. Ang Kaniyang walang maliw na katapatan ay patunay ng Kaniyang kahanga-hangang kadakilaan. Bilang tugon, ilaan natin ang bawat oras, minuto, at sandali ng ating pansamantalang paglalakbay sa daigdig na ito sa taos-pusong pagdakila sa Kaniya sa pamamagitan ng ating mga salita at gawa. 

TAOS-PUSONG PAGDAKILA SA TUNAY NA HARI

20 Disyembre 2025 

Ikalimang Araw ng Simbang Gabi 

Isaias 7, 10-14/Salmo 23/Lucas 1, 26-38 

Larawan: Maarten Pepyn (1575–1643), Annunciation (c. Between 1600 and 1643). Hampel Auctions. Public Domain.

Nakatuon sa halaga ng taos-pusong pagdakila sa Diyos ang mga Pagbasa. Hindi Niya ipinagkait sa atin ang Kaniyang kabutihan kailanman. Lagi Niya itong ipinapamalas sa atin sa pamamagitan ng Kaniyang mga kahanga-hangang gawa. Kaya naman, bilang mga bumubuo ng Kaniyang sambayanang naglalakbay sa lupa, nararapat lamang na dakilain natin ang Diyos nang may taos-pusong pananalig at katapatan. Ang bawat oras, minuto, at sandali ng ating pansamantalang paglalakbay sa lupang ibabaw ay lagi nating dapat ilaan upang dakilain ang Diyos. 

Sa Unang Pagbasa, buong linaw na ipinahayag ng Diyos kung paano Niya ipapamalas ang Kaniyang kabutihan. Ang kabutihan ng Diyos ay mahahayag sa pamamagitan ng ipinangakong Mesiyas at Manunubos na isisilang ng isang dalaga. Ipinakilala Siya ng mang-aawit na tampok sa Salmong Tugunan bilang Dakilang Hari ng lahat (Salmo 23, 7k at 10b). Sa salaysay na tampok sa Ebanghelyo, ang Arkanghel na si San Gabriel ay nagpakita sa Mahal na Birheng Maria upang iparating sa kaniya ang magandang balita tungkol sa paghirang sa kaniya ng Diyos bilang ina ng ipinangakong Mesiyas na walang iba kundi ang Mahal na Poong Jesus Nazareno. Isasakatuparan ng Diyos ang Kaniyang pahayag sa Unang Pagbasa sa pamamagitan ng Poong Jesus Nazareno na dumating sa daigdig bilang Banal na Sanggol na isinilang ng Mahal na Birheng Maria. 

Gaya ng Mahal na Birheng Maria, lagi nating dakilain ang Diyos. Tanggapin at sundin natin nang taos-puso ang Kaniyang kalooban. Sa pamamagitan nito, magiging taos-puso ang ating pagdakila sa Diyos. Ang mga tumatalima sa Diyos nang taos-puso ay dumarakila sa Kaniya nang taos-puso. 

DAKILAIN ANG BUKAL NG PAGPAPALA

19 Disyembre 2025 

Ikaapat na Araw ng Simbang Gabi 

Mga Hukom 13, 2-7. 24-25a/Salmo 70/Lucas 1, 5-25 

Larawan: Massimo Stanzione (1585–1656), The Birth of John the Baptist announced to Zacharias (c. 1635). Museo del Prado. Public Domain. 

Ang pagiging mapagpala ng Diyos ay binibigyan ng pansin sa mga Pagbasa. Sa Diyos lamang nagmumula ang tunay na pagpapala. Lagi Niya tayong pinagpapala, kahit na hindi na mabilang ang ating mga nagawang kasalanan laban sa Kaniya dahil sa dami ng mga ito. Patunay lamang ito ng Kaniyang kabutihan. Kaya naman, bilang tugon sa Kaniyang pasiyang lagi tayong pagpalain, dapat lagi rin natin Siyang dakilain, purihin, ipagbunyi, at sambahin nang taos-puso bilang Kaniyang sambayanang taos-pusong umaaasa, nananalig, at sumasampalataya sa Kaniya. 

Sa Unang Pagbasa, ibinahagi ng anghel ng Panginoon sa asawa ni Manoa ang balita tungkol sa pagkahirang sa kanila ng Diyos upang maging mga magulang ni Samson, ang Hukom na itinalaga ng Diyos upang simulan ang proseso ng pagligtas sa bayang Israel mula sa mga Filisteo. Ipinakita ng Diyos kay Manoa at sa kaniyang asawa na hindi magkaanak sa loob ng mahabang panahon ang Kaniyang dakilang kabutihan sa pamamagitan ng pagkakaloob kay Samson sa kanila bilang anak. Sa Ebanghelyo, ang balita ng pagkahirang ng Diyos sa magkabiyak ng pusong sina Zacarias at Elisabet upang maging mga magulang ng tagapagpauna ng ipinangakong Mesiyas na si Jesus Nazareno na walang iba kundi ang Kaniyang kamag-anak na si San Juan Bautista ay ibinahagi nang buong galak ni Arkanghel San Gabriel kay Zacarias. Kahit na ang mag-asawang sina Zacarias at Elisabet ay napakatanda na noong mga araw na yaon, ang Diyos ay kusang-loob na nagpasiyang ipakita kina Zacarias at Elisabet ang Kaniyang kabutihan sa pamamagitan ng pagkaloob Niya kay San Juan Bautista sa kanila upang maging kanilang anak. 

Sa pamamagitan ng Kaniyang pagiging mapagpala, ipinapakita ng Diyos sa lahat ng nilalang ang Kaniyang kabutihan. Isinasalamin ng Kaniyang pagpapala ang Kaniyang kabutihan. Kaya naman, bilang tugon, nararapat lamang na lagi natin Siyang dakilain. 

ANG DAKILANG KATAPATAN NG DIYOS

18 Disyembre 2025 

Ikatlong Araw ng Simbang Gabi 

Jeremias 23, 5-8/Salmo 71/Mateo 1, 18-24 

Larawan: Stefano Maria Legnani (1660–1715), The dream of St. Joseph (c. 1708). Museo Civico, Novara. Public Domain. 

Nakasentro sa pagiging tapat ng Diyos ang mga Pagbasa. Hindi nakakalimot sa mga pangako ang Diyos. Laging inaalala ng Diyos ang mga pangakong Kaniyang binitiwan sa Kaniyang mga lingkod. Ang mga nasabing pangako ay lagi Niyang tinutupad. Kung atin itong papansinin nang maigi, pinagpaplanuhan at pinaghahandaan rin Niya nang mabuti ang pagsasakatuparan ng Kaniyang mga pangako. Mayroong mga panahong itinakda ang Diyos para sa pagsasakatuparan ng Kaniyang mga pangakong binitiwan. Buong linaw Niyang inihayag sa pamamagitan nito ang Kaniyang katapatan. 

Sa Unang Pagbasa, ang Diyos ay nagbitiw ng isang dakilang pangako. Magmumula sa lahi ni Haring David ang ipinangakong Mesiyas at Manunubos. Sa Ebanghelyo, isang anghel ng Panginoon ay nagpakita sa panaginip ni San Jose upang ibalita sa kaniya na niloob mismo ng Diyos na magdalantao ang Mahal na Birheng Maria. Ang Sanggol na dinadala ng Mahal na Birheng Maria sa kaniyang sinapupunan ay ang ipinangakong Mesiyas at Manunubos na walang iba kundi ang Mahal na Poong Jesus Nazareno. 

May paanyaya para sa lahat ang mang-aawit na tampok sa Salmong Tugunan. Ang Diyos ay dapat nating purihin, dakilain, at sambahin. Hinding-hindi Siya nakakalimot. Lagi Niyang tinutupad ang Kaniyang mga pangako. 

Tunay ngang walang maliw at walang kapantay ang dakilang katapatan ng Diyos. Sa pamamagitan ng Kaniyang walang maliw na katapatan, ipinapamalas ng Diyos ang Kaniyang kadakilaan. 

KABABAANG-LOOB NA NAGHAHAYAG NG KADAKILAAN

17 Disyembre 2025 

Ikalawang Araw ng Simbang Gabi 

Genesis 49, 2. 9-10/Salmo 71/Mateo 1, 1-17 

Larawan: The Christ Child (c. 1480). National Museum in Warsaw via Pinterest. CC0. 

Tampok sa Ebanghelyo ang talaan ng angkang kinabilangan ng ipinangakong Mesiyas at Manunubos na walang iba kundi ang Mahal na Poong Jesus Nazareno. Layunin ng Manunulat ng Mabuting Balitang si Apostol San Mateo sa pamamagitan ng kaniyang pasiyang itampok at ilahad ang talaang ito na tunay ngang napakahaba sa simula ng kaniyang salaysay ng Mabuting Balita ay isalungguhit nang buong linaw ang pagiging dakila ng Diyos. Sa pamamagitan ng Kaniyang pasiyang ibilang ang Mahal na Poong Jesus Nazareno sa isang angkan at lahing puno ng mga makasalanan, nahayag nang buong linaw ang kadakilaan ng Diyos. 

Ang pasiya ng Diyos na ibilang ang Kaniyang sarili sa lahi at angkang binubuo ng mga taong Kaniyang nilikha, hinirang, at itinalaga bilang Kaniyang mga tapat na lingkod sa kabila ng kanilang mga kahinaan, pagkukulang, at kasalanan nang buong kababaang-loob sa pamamagitan ng ipinangakong Mesiyas at Manunubos na walang iba kundi si Jesus Nazareno ay tunay nga namang kahanga-hanga. Sa pamamagitan ng Kaniyang kababaang-loob na inihayag Niya sa pamamagitan ni Jesus Nazareno, ipinamalas ng Diyos ang Kaniyang kahanga-hangang kadakilaan. Kahit na ang Diyos mismo ay ang pinakadakila sa lahat, ipinasiya pa rin Niyang maging mababang-loob. 

Sa pamamagitan ng Kaniyang kababaang-loob na naghayag ng Kaniyang kadakilaan, natupad ang pahayag ni Jacob sa kaniyang mga anak sa Unang Pagbasa. Nahayag sa pamamagitan ng Poong Jesus Nazareno ang pahayag ni Jacob sa kaniyang mga anak tungkol sa tunay na Hari sa Unang Pagbasa. Katunayan, ang kadakilaan ng Diyos ay buong linaw na pinatotohanan ng mang-aawit na tampok sa Salmong Tugunan. Ang Diyos ay tunay ngang dakila. Pinatunayan ito ng Poong Jesus Nazareno. 

Ipinamalas ng Diyos sa lahat ang Kaniyang kadakilaan sa pamamagitan ng Kaniyang kababaang-loob. Bagamat Siya ang pinakadakila sa lahat, ipinasiya pa rin ng Diyos na maging mababang-loob.