PAG-ASANG KALOOB NG BANAL NA SANTATLO

15 Hunyo 2025 

Dakilang Kapistahan ng Tatlong Persona sa Isang Diyos (K) 

Kawikaan 8, 22-31/Salmo 8/Roma 5, 1-5/Juan 16, 12-15 

Larawan: Hendrick van Balen the Elder (1573–1632), Holy Trinity (c. 1620s). St. James' Church in Antwerp. Web Gallery of Art. Public Domain.

"Maningning ang Iyong Ngalan, Poon, sa sangkalupaan" (Salmo 8, 2a). Ang pagiging isa ng Diyos ay isinalungguhit ng mga salitang ito na inihayag ng tampok na mang-aawit sa Salmong Tugunan. Isa lamang ang Diyos. Walang ibang bathala maliban sa Kaniya. Tanging Siya lamang ang maluwalhati sa lahat. Subalit, ang nag-iisang Diyos na tunay ngang maluwalhati sa lahat ay binubuo ng Tatlong Persona - Ama, Anak, at Espiritu Santo. Lagi nating itong ipinapahayag bilang mga bumubuo sa Simbahan sa tuwing nagsisimula tayong manalangin sa pamamagitan ng Tanda ng Krus. 

Ang maringal na pagdiriwang ng Simbahan sa Linggong ito ay nakatuon sa tunay na pagkakilanlan ng Diyos. Ipinapaalala sa atin kung sino ang Diyos. Bagamat ang tunay na Diyos ay isa lamang, hindi Siya nag-iisa. May Tatlong Persona sa isang Diyos. Isa itong napakahalagang katotohanan ng ating pananampalataya bilang mga bumubuo sa tunay na Simbahang tatag mismo ng Ikalawang Persona ng Banal na Santatlo na walang iba kundi ang Bugtong na Anak ng Diyos na si Jesus Nazareno. Sa tunay na Diyos na isa lamang, mayroong Tatlong Persona - ang Ama, Anak, at Espiritu Santo. 

Sa Banal na Santatlo rin mismo nagmula ang ating pag-asa. Katunayan, ang bukal ng tunay na pag-asa ay ang Banal na Santatlo. Patunay lamang ito ng dakilang pag-ibig, kagandahang-loob, habag, at awa ng Banal na Santatlo. Bukal sa puso at kalooban ang pasiyang ito ng Banal na Santatlo na ipagkaloob sa atin ang biyaya ng tunay na pag-asa. Ibang-iba ito sa pag-asang mula sa daigdig na ito. Ang pag-asang dulot ng Banal na Santatlo ay walang hanggan. 

Buong linaw na inihayag sa Unang Pagbasa na bago pa man nagsimula ang panahon ay naroon na ang Diyos. Ang unang nilikha ng Diyos ay ang Karunungan. Nagpatotoo tungkol sa presensya ng Diyos sa simula pa lamang ang Karunungan. Sa Ikalawang Pagbasa, nagsalita si Apostol San Pablo tungkol sa dakilang pag-ibig, kagandahang-loob, habag, at awa ng Banal na Santatlo na nahayag sa lahat sa pamamagitan ng Mahal na Poong Jesus Nazareno. Ang pangaral ng Mahal na Poong Jesus Nazareno sa salaysay na tampok sa Ebanghelyo ay nakasentro sa kaloob ng Banal na Santatlo. 

Hindi matatagpuan sa mundo ang tunay na pag-asa. Bagkus, matatagpuan lamang natin ito sa Banal na Santatlo, ang bukal ng tunay na pag-asa. 

HANDOG NA NARARAPAT IALAY SA BUKAL NG TUNAY NA PAG-ASA

13 Hunyo 2025 

Paggunita kay San Antonio de Padua, pari at pantas ng Simbahan 

2 Corinto 4, 7-15/Salmo 115/Mateo 5, 27-32 

Larawan: Saint Anthony with the Infant Jesus, surrounded by Cherubs (c. 18th century). Public Domain. 

"Maghahandog ako sa D'yos ng pagpupuring malugod" (Salmo 115, 17a). Nakasentro sa mga katagang ito na binigkas ng mang-aawit na itinampok sa Salmong Tugunan ang taimtim na pagninilay ng Simbahan sa araw na ito. Buong linaw na ipinahayag ng nasabing mang-aawit ang kaniyang pasiyang manalig at umasa sa Diyos nang taos-puso. Hindi lamang niya gagamitin ang kaniyang salita. Pati na rin ang kaniyang mga gawa ay magpapatunay na taos-puso ang kaniyang pasiya. Isasabuhay ng mang-aawit na ito ang kaniyang pasiyang manalig at umasa sa Diyos. 

Ang pangaral ng Poong Jesus Nazareno sa Ebanghelyo ay nakasentro sa pakikiapid at pakikipag-isang-dibdib. Sa nasabing pangaral, inihayag ng Poong Jesus Nazareno na napakahalaga sa paningin ng Diyos ang ugnayan ng mga magkabiyak ng puso. Dahil dito, ang Diyos ay lubos na nasusuklam sa diborsyo, pakikiapid, at kahalayan. Labag sa puso at loobin ng Panginoong Diyos ang pagbabalewala ng tao sa kahalagahan at kasagraduhan ng pakikipag-isang-dibdib. Noon pa man, niloob at hinangad Niyang mamulat ang tao sa kasagraduhan ng pakikipag-isang-dibdib. Sagrado ito para sa bukal ng tunay na pag-asa na walang iba kundi ang Panginoong Diyos. 

Inihayag sa Unang Pagbasa ang dahilan kung bakit nating dapat sundin ang lahat ng mga utos at loobin ng Diyos. Matatamasa ng lahat ng mga tapat na susunod sa mga utos at loobin ng Diyos ang buhay na walang hanggan sa Kaniyang piling sa langit. Sa pamamagitan ng kanilang taos-pusong pagsunod sa mga utos at loobin ng Diyos, ang kanilang pasiyang manalig at umasa sa Kaniya nang taos-puso ay ipinapahayag nila. Dahil ang Diyos ay ipinagmalaki nila sa pamamagitan ng kanilang mga salita at gawa, magiging maluwalhati katulad ng Katawan ng Muling Nabuhay na Panginoong Jesus Nazareno ang kanilang mga katawan at kaluluwa sa Kaniyang piling sa langit. 

Kung tunay ngang taos-puso ang ating pasiyang manalig at umasa sa Diyos, dapat nating sundin ang Kaniyang mga utos at loobin. Ito ang handog na nararapat na ialay sa Kaniya. Lubos Niya itong kalulugdan. 

ANG BUKAL NG TUNAY NA PAG-ASA AY ANG WALANG HANGGAN AT ANG DAKILANG PARI

12 Hunyo 2025

Kapistahan ng Panginoong Hesukristo, Walang Hanggan at Dakilang Pari (K) 

Isaias 6, 1-4. 8/Salmo 23/Juan 17, 11-28 

Larawan: John Roddam Spencer Stanhope (1829–1908), The Wine Press (c. 1864). Tate Britain. Public Domain.

Ang Kapistahang ipinagdiriwang ng Inang Simbahan sa araw na ito ay inilaan para sa taimtim na pagninilay sa pagiging pari ng Mahal na Poong Jesus Nazareno. Tiyak na lingid sa kaalaman ng marami ang pagkapari ng Mahal na Poong Jesus Nazareno. Isa ring pari ang Mahal na Poong Jesus Nazareno. Katunayan, isa sa Kaniyang mga titulo na hindi na mabilang dahil sa dami nito ay ang titulo ng Walang Hanggan at Dakilang Pari. Dahil inihandog ng Mahal na Poong Jesus Nazareno ang pinakadakilang hain o handog, kinikilala Siya bilang Walang Hanggan at Dakilang Pari. 

Sa Unang Pagbasa, ibinahagi ni Propeta Isaias kung paanong hinirang siya ng Diyos upang maging Kaniyang propeta. Nagpakita kay Propeta Isaias ang Panginoong Diyos taglay ang buo Niyang kaluwalhatian at kadakilaan. Ang Panginoong Diyos mismo ay ang humirang kay Propeta Isaias upang maging Kaniyang propeta sa Kaniyang hirang na bayan dahil sa Kaniyang pag-ibig, kagandahang-loob, habag, at awa. Ipinakilala ng mang-aawit na tampok sa Salmong Tugunan ang Panginoon bilang Mabuting Pastol. Buong linaw na inilarawan sa bawat taludtod ang Kaniyang pag-ibig, habag, at awa para sa Kaniyang kawan. Sa Ebanghelyo, ang Poong Jesus Nazareno ay nanalangin sa Unang Persona ng Banal na Santatlo na walang iba kundi ang Ama sa langit para sa lahat ng mga taos-pusong nananalig at umaaasa sa Kaniya. 

Dahil sa Kaniyang pag-ibig, kagandahang-loob, habag, at awa para sa ating lahat, ipinasiya ng Mahal na Poong Jesus Nazareno na maging Walang Hanggan at Dakilang Pari. Ang tunay na pag-asang nagmumula lamang sa Kaniya ay Kaniyang idinulot sa atin sa pamamagitan ng Kaniyang pagkapari. 

INIBIG NG BUKAL NG TUNAY NA PAG-ASA

8 Hunyo 2025 

Linggo ng Pentekostes (K) 

Mga Gawa 2, 1-11/Salmo 103/1 Corinto 12, 3b-7. 12-13 (o kaya: Roma 8, 8-17)/Juan 20, 19-23 (o kaya: 14, 15-16. 23b-26) 

Larawan: Pentecostés (c. 1776). Taken by Veneranda Tertulia. Public Domain. 

Ang pagpanaog ng Espiritu Santo sa mga apostol noong araw ng Pentekostes dahil niloob ng Diyos na mangyari. Kung paanong inibig at niloob ng Diyos na maligtas ang lahat ng tao sa daigdig sa pamamagitan ng Krus at Muling Pagkabuhay ng Ikalawang Persona ng Banal na Santatlo na walang iba kundi ang Poong Jesus Nazareno, gayon din naman, inibig at niloob rin Niyang pumanaog sa mga apostol noong Pentekostes, isang araw na tunay na napakahalaga at dakila para sa lahat ng mga Hudyo gaya nila, sa pamamagitan ng Ikatlong Persona ng Banal na Santatlo na walang iba kundi ang Espiritu Santo. Niloob ng Diyos na maging kaarawan ng tunay na Simbahang tatag mismo ng Poong Jesus Nazareno ang Pentekostes. Ito ang dahilan kung bakit buong galak nating ipinagdiriwang bilang Simbahan ang Pentekostes. Para sa ating lahat na bumubuo sa Simbahan, ang Pentekostes ay isang napakahalagang araw. 

Itinampok at inilahad sa Unang Pagbasa ang salaysay ng kaganapang ipinagdiriwang ng Simbahan nang buong galak sa Linggong ito. Ang Espiritu Santo ay pumanaog sa mga apostol. Nang pumanaog ang Espiritu Santo sa mga apostol, ipinagkaloob Niya sa kanila ang Kaniyang mga biyaya na nagdulot sa kanila ng lakas ng puso at loobin upang ang misyong ibinigay sa kanila ng Muling Nabuhay na Poong Jesus Nazareno bago Siya umakyat sa langit na taglay ang buo Niyang kaluwalhatian bilang tunay na Diyos ay kanilang magampanan. Dahil dito, nagbago ang mga apostol. Buong giting at sigla nilang ipinalaganap ang tunay na pag-asang nagmumula lamang sa Diyos sa pamamagitan ng pagsaksi sa Muling Nabuhay na Poong Jesus Nazareno na kusang-loob na naghatid ng kapayapaan sa kanila sa salaysay na tampok sa Ebanghelyo. 

Gaya nga ng sabi sa panalangin ng mang-aawit sa Salmong Tugunan: "Espiritu Mo'y suguin, Poon, tana'y 'Yong baguhin" (Salmo 103, 30). Ito nga ang naranasan ng mga apostol noong araw ng Pentekostes, gaya ng buong linaw na inilarawan sa tampok na salaysay sa Unang Pagbasa. Ang lahat ng mga biyayang tinanggap nila mula sa Espiritu Santo ay sari-sari, gaya ng buong linaw na inilarawan ng dakilang apostol at misyonerong si Apostol San Pablo sa kaniyang pangaral na itinampok at inilahad sa Ikalawang Pagbasa. 

Sa alternatibong Ikalawang Pagbasa, inihayag ni Apostol San Pablo na dapat maging bukas tayo sa pamamatnubay at paggabay ng Espiritu Santo. Ito ang magpapatunay na tunay nga tayong nananalig at umaaasa sa Diyos nang taos-puso. Sa Ebanghelyo, ipinakilala ng Mahal na Poong Jesus Nazareno ang Espiritu Santo bilang Patnubay na kaloob Niya at ng Amang nasa langit. Darating Siya upang maging Patnubay ng tunay at nag-iisang Simbahang tatag mismo ng Mahal na Poong Jesus Nazareno.  

Ninanais ng bukal ng tunay na pag-asa na walang iba kundi ang Panginoong Diyos na ipalaganap natin ang biyayang ito sa lahat. Tanggapin natin nang taos-puso ang mga biyayang Kaniyang kaloob upang matupad Niya sa pamamagitan natin ang Kaniyang hangarin at naisin. 

IPALAGANAP ANG BIYAYA NG TUNAY NA PAG-ASA

7 Hunyo 2025 

Linggo ng Pentekostes 

[Pagmimisa sa Sabado ng Hapon] 

Genesis 11, 1-9 (o kaya: Exodo 19, 3-8a. 16-20b; o kaya: Ezekiel 37, 1-14; o kaya: Joel 3, 1-5)/Salmo 103/Roma 8, 22-27/Juan 7, 37-39 

Larawan: Grão Vasco (1475–1542), Pentecost (c. 1534). Monastery of Santa Cruz. Public Domain. 

Inilaan ng Simbahan ang Bisperas ng Pentekostes para sa mabusising pagtalakay at taimtim na pagninilay sa natatanging dahilan kung bakit dumating at pumanaog sa mga apostol noong dakilang araw ng Pentekostes ang Ikatlong Persona ng Banal na Santatlo na walang iba kundi ang Espiritu Santo. Dahil sa pasiya ng Espiritu Santo na kusang-loob na pumanaog sa mga apostol sa silid na kanilang pinagtitipunan noong araw ng Pentekostes, sinimulan ng mga apostol ang pagtupad sa misyong ibinigay ng Muling Nabuhay na Poong Jesus Nazareno sa kanila bago Siya umakyat sa langit. 

Buong linaw na inihayag sa wakas ng Ebanghelyo na ipagkakaloob sa lahat ng mga taos-pusong nananalig sa Panginoong Jesus Nazareno ang Espiritu Santo matapos ang Kaniyang Misteryo Paskwal o ang Kaniyang pagpapakasakit, pagkamatay, at ang maluwalhati Niyang Muling Pagkabuhay. Ang lahat ng mga nananalig sa Panginoong Jesus Nazareno nang taos-puso ay taos-puso ring umaaasa sa Kaniya. Ipinapahayag nila ito sa pamamagitan ng kanilang taos-pusong pagsunod sa Kaniya. Kaya naman, hinirang, inatasan, at itinalaga sila ng mismong bukal ng tunay na pag-asa na walang iba kundi ang Panginoong Jesus Nazareno upang ipalaganap sa lahat ng tao sa bawat sulok ng sansinukob ang dakilang biyaya ng tunay na pag-asang ipinagkaloob Niya sa kanila nang kusang-loob. Kung paano nilang tinanggap mula sa Kaniya ang nasabing pagpapala, kailangan rin nila itong ipalaganap. 

Nais ng Mahal na Poong Jesus Nazareno na maipalaganap sa lahat ng tao sa mundo ang biyaya ng tunay na pag-asang nagmumula lamang sa Kaniya. Kaya naman, ang Espiritu Santo ay dumating sa piling ng mga apostol noong araw ng Pentekostes.

PAG-ASANG KALOOB NG MULING NABUHAY NA PANGINOON

6 Hunyo 2025 

Biyernes sa Ikapitong Linggo ng Pasko ng Pagkabuhay 

Mga Gawa 25, 13b-21/Salmo 102/Juan 21, 15-19 

Larawan: James Tissot (1836–1902), Feed My Lambs (c. Between 1886 and 1894). Brooklyn Museum. Public Domain. 

Ang Muling Nabuhay na Poong Jesus Nazareno lamang ang nagdudulot ng tunay na pag-asa. Ito ang aral na pinagtutuunan ng pansin sa mga Pagbasa. Laging puspos ng galak ang bawat isa sa atin na bumubuo sa Simbahang Kaniyang tatag dahil lagi Niya tayong dinudulutan ng tunay na pag-asa. 

Sa Unang Pagbasa, si Festo ay nagsalita kay Haring Agripa tungkol kay Apostol San Pablo na nakabilanggo sa mga sandaling yaon. Inilarawan ni Festo kay Haring Agripa kung paanong si Apostol San Pablo ay puspos ng galak. Bagamat nagbabata siya ng mga matitinding pag-uusig dahil sa kaniyang masigasig at magiting na pagsaksi sa bukal ng tunay na pag-asa na walang iba kundi ang Muling Nabuhay na Panginoong Jesus Nazareno, ang kaniyang puso ay puspos pa rin ng tunay na galak. Ang Muling Nabuhay na Panginoong Jesus Nazareno mismo ay ang dahilan kung bakit puspos pa rin ng galak si Apostol San Pablo sa gitna ng mga pag-uusig na kaniyang binabata.

Tampok sa Ebanghelyo ang salaysay ng tatlong ulit na pagpapahayag ng pag-ibig at katapatan ni Apostol San Pedro sa Muling Nabuhay na Poong Jesus Nazareno. Dahil sa Kaniyang dakilang pag-ibig, kagandahang-loob, habag, at awa, ipinasiya ng Muling Nabuhay na Poong Jesus Nazareno na pagkalooban ang apostol na Kaniyang hinirang at itinalaga bilang unang Santo Papa ng tunay at nag-iisang Simbahang tanging Siya mismo ang nagtatag na si Apostol San Pedro ng pagkakataong ipahayag nang buong puso ang kaniyang pag-ibig at katapatan upang magkaroon siya ng lakas ng loob na gampanan ang pananagutang inatasan sa kaniya. Ito ang nagagawa ng dakilang biyaya ng tunay na pag-asang kaloob lamang ng Muling Nabuhay na Nuestro Padre Jesus Nazareno. Nagdudulot ito ng galak at katatagan sa lahat. 

Buong linaw na ipinakilala ng mang-aawit na tampok sa Salmong Tugunan kung sino ang nagbibigay ng galak at katatagan sa kaniya. Ang dahilan kung bakit palagi siyang puspos ng galak at katatagan ay walang iba kundi ang Panginoong Diyos. Lagi siyang dinudulutan ng Panginoong Diyos ng tunay na pag-asa. Sa pamamagitan ng pagdulot ng tunay na pag-asa sa mang-aawit na tampok sa Salmong Tugunan, nagdudulot ng tunay na galak at lakas ng loob ang Panginoong Diyos. 

Dahil sa Muling Nabuhay na Panginoong Jesus Nazareno, tayong lahat na bumubuo sa tunay at nag-iisang Simbahang Siya mismo ang nagtatag ay puspos ng tunay na galak at katatagan ng loob. Ito ay bunga ng dakilang biyayang kaloob Niya sa atin na walang iba kundi ang tunay na pag-asa. 

PAG-ASANG NAGMUMULA SA LANGIT

1 Hunyo 2025 

Dakilang Kapistahan ng Pag-Akyat (K) 

Mga Gawa 1, 1-11/Salmo 46/Efeso 1, 17-23 (o kaya: Hebreo 9, 24-28; 10, 19-23)/Lucas 24, 46-53 

Larawan: Artus Wolffort (1581–1641), Ascension of Jesus Christ (c. 1617). St. Paul's Church in Antwerp, Belgium. Belgian Art Links and Tools. Public Domain.

Ang Pag-Akyat sa Langit ng Nuestro Padre Jesus Nazareno ay isang napakahalagang kaganapan sa Kaniyang buhay at pati na rin sa kasaysayan ng Simbahang Kaniyang itinatag. Bahagi ng Misteryo Paskwal ng Nuestro Padre Jesus Nazareno ang Kaniyang maringal at maluwalhating Pag-Akyat sa Langit. Katunayan, ito ang huling bahagi o yugto ng Kaniyang Misteryo Paskwal. Sa pamamagitan ng maringal na Pag-Akyat ng Nuestro Padre Jesus Nazareno sa Langit, nagwakas ang Kaniyang dakilang tungkulin bilang ipinangakong Mesiyas at Manunubos na kaloob ng Amang nasa langit.  

Tampok sa Unang Pagbasa at Ebanghelyo ang salaysay ng maluwalhating Pag-Akyat sa Langit ng Panginoong Jesus Nazareno. Sa salaysay ng kaganapang ito sa buhay ng ipinangakong Mesiyas at Tagapagligtas na walang iba kundi ang Muling Nabuhay na Panginoong Jesus Nazareno na inilahad sa Unang Pagbasa, inihayag na naganap ito 40 araw makalipas ang Kaniyang Muling Pagkabuhay. Sa salaysay ng kaganapang ito na itinampok at inilahad sa Ebanghelyo, buong linaw na inihayag na binasbasan ng Muling Nabuhay na Panginoong Jesus Nazareno ang Kaniyang mga apostoles habang umaakyat sa langit taglay ang buo Niyang kadakilaan.

Inilarawan sa Salmong Tugunan ang galak at tuwa ng lahat ng mga anghel sa langit habang ang Panginoong Diyos ay umaakyat sa Kaniyang tronong maringal sa langit. Ang pag-akyat ng Diyos sa Kaniyang maringal na trono sa langit ay ikinagagalak nang lubos ng mga anghel. Kinikilala, pinararangalan, at sinasamba ng lahat ng mga anghel sa kalangitan ang Mahal na Poon bilang tunay na walang hanggan at dakilang Hari. Walang humpay ang kanilang pagpaparangal at pagsamba sa Panginoon.

Buong linaw na isinalungguhit sa Ikalawang Pagbasa na dumating sa daigdig na ito ang Muling Nabuhay na Panginoong Jesus Nazareno bilang pinakadakilang biyayang kaloob ng Amang nasa langit. Sa Ikalawang Pagbasa, buong linaw na inihayag na ang Panginoong Jesus Nazareno ay nakaluklok sa kanan ng Ama. Ang pagiging walang hanggan at dakilang saserdote ng Muling Nabuhay na Panginoong Jesus Nazareno ay inilarawan sa alternatibong Ikalawang Pagbasa. Nang matapos ang Kaniyang misyon sa sanlibutan bilang ipinangakong Mesiyas, bumalik Siya sa Kaniyang pinagmulan na walang iba kundi ang langit. 

Mayroong nais ipaalala sa atin ng Simbahan sa pagdiriwang ng Dakilang Kapistahan ng Pag-Akyat sa Langit ng Panginoong Hesukristo, ang Nazareno. Ang tunay na pag-asa ay isang biyayang mula sa langit. Dumating ang dakilang biyayang ito na sa langit lamang nagmula sa pamamagitan ng Muling Nabuhay na Poong Jesus Nazareno, ang ipinangakong Mesiyas at Manunubos. Kahit na nakaluklok na Siya sa kanan ng Ama sa langit, patuloy pa rin Niyang ipinagkakaloob ang biyayang ito sa atin. 

Hindi natin matatagpuan ang tunay na pag-asa dito sa daigdig. Bagkus, matatagpuan lamang natin ang biyayang ito sa nakaluklok sa kanan ng Ama na walang iba kundi si Jesus Nazareno, ang Muling Nabuhay na Panginoong umakyat sa langit.

PAG-ASANG MAGPAPALAKAS NG LOOB AT MAGDUDULOT NG TUWA AT GALAK

31 Mayo 2025 

Kapistahan ng Pagdalaw ng Mahal na Birheng Maria 

Sofonias 3, 14-18 (o kaya: Roma 12, 9-16b)/Isaias 12/Lucas 1, 39-56 

Larawan: Sebastiano del Piombo (1485–1547), Mary's Visitation (c. 1540s). Alnwick Castle. Public Domain.

Dalhin ang bukal ng tunay na pag-asa. Ito ang aral na isinasalungguhit ng Simbahan sa Kapistahang ipinagdiriwang sa araw na ito na walang iba kundi ang Kapistahan ng Pagdalaw ng Mahal na Birheng Maria. Ang pagdalaw ng Mahal na Birheng Maria sa kaniyang kamag-anak na si Elisabet ay pinagninilayan ng Simbahan sa araw na ito na inilaan para sa Kapistahang ito. Sa kabila ng kaniyang pagdadalantao, ipinasiya pa rin ng Mahal na Birheng Maria na dalawin ang kaniyang kamag-anak na nagdadalantao rin sa mga sandaling yaon na walang iba kundi si Elisabet. Nang ipinasiya ni Maria na gawin ito, inihatid niya sa kaniyang kamag-anak na si Elisabet ang dakilang biyaya ng tunay na pag-asang nagmumula lamang sa Diyos na inihayag ni Jesus Nazareno. 

Ang salaysay ng pagdalaw ng Mahal na Birheng Maria sa kaniyang kamag-anak na sa mga sandaling yaon ay nagdadalantao rin katulad niya na si Elisabet ay itinampok at inilahad sa Ebanghelyo. Sa pamamagitan ng kaniyang pasiyang dalawin si Elisabet na nagdadalantao rin gaya niya sa mga sandaling yaon, ibinahagi ng Mahal na Birhen sa kamag-anak niyang si Elisabet ang dakilang biyaya ng tunay na pag-asang kaniyang tinanggap mula sa Diyos. Tinanggap niya ito nang tanggapin niya ang misyong bigay sa kaniya ng Diyos na maging ina ng Poong Jesus Nazareno, ang Banal na Sanggol na dinadala niya sa kaniyang sinapupunan. 

Gaya ng buong linaw na inihayag sa Unang Pagbasa at sa Salmong Tugunan, ang bukal ng tunay na pag-asa na walang iba kundi ang Panginoong Diyos ay mananahan sa piling ng Kaniyang bayang hinirang. Natupad ang mga pahayag na ito sa Lumang Tipan sa pamamagitan ng Banal na Sanggol na dinala ng Mahal na Birheng Maria sa kaniyang sinapupunan na walang iba kundi ang ipinangakong Mesiyas at Manunubos - ang Mahal na Poong Jesus Nazareno. 

Sa alternatibong Unang Pagbasa, inilarawan ni Apostol San Pablo nang buong linaw kung ano ang dapat nating gawin. Isa lamang ang nais iparating ng pangaral na ito ni Apostol San Pablo na itinampok at inilahad sa alternatibong Unang Pagbasa para sa pagdiriwang ng Simbahan sa araw na ito. Kailangan nating ibahagi sa kapwa-tao ang dakilang biyaya ng tunay na pag-asang tinanggap natin mula sa Diyos. 

Bilang mga bumubuo sa tunay na Simbahang itinatag mismo ni Kristo, dapat nating ibahagi ang tunay na pag-asang kusang-loob Niyang ipinagkaloob sa ating lahat. Ang dakilang biyayang ito ay magpapalakas sa ating mga puso at loobin at magbibigay ng tuwa at galak sa ating lahat. 

NANANALIG AT UMAAASA NANG BUONG GALAK SA GITNA NG KALUPITAN NG BUHAY

30 Mayo 2025 

Biyernes sa Ikaanim na Linggo ng Pasko ng Pagkabuhay 

Mga Gawa 18, 9-18/Salmo 46/Juan 16, 20-23a 

Larawan: Master of the Třeboň Altarpiece (fl. 1380–1390), The Resurrection (c. 1380s). National Gallery Prague. Public Domain. 

Hindi laging puno ng tuwa, kulay, sarap, at ginhawa ang buhay sa mundong ito. Ang buhay sa mundong ito ay napakalupit. Mayroong mga pagkakataon sa buhay dito sa mundong ito kung kailan dadanas tayo ng kagipitan, kalupitan, at kalungkutan. Iyan ang katotohanan tungkol sa buhay sa mundong ito. Tiyak na alam natin ito dahil ilang ulit na nating narinig ang aral na ito tungkol sa katotohanan ng buhay sa lupa. 

Mayroong mahalagang aral para sa atin ang mga Pagbasa para sa araw na ito. Oo, hindi na natin maitatanggi ang katotohanan tungkol sa kalupitan ng buhay sa mundo. Subalit, kung taos-puso tayong nananalig at umaaasa sa Diyos, ang ating mga puso at loobin ay mapupuspos ng tunay na galak. Ang galak ng lahat ng mga taos-pusong nananalig at umaaasa sa Diyos ay walang iba kundi tanging Siya mismo. Gaya nga ng buong linaw na sambit ng mang-aawit sa Salmong Tugunan: "Hari ng sangkalupaan, D'yos na Makapangyarihan" (Salmo 46, 8a). 

Sa Unang Pagbasa, pinalakas ng Panginoon ang puso at loobin ng dakilang apostol at misyonero sa mga Hentil na si Apostol San Pablo. Dahil dito, buong galak at siglang ipinagpatuloy ni Apostol San Pablo ang kaniyang pangangaral tungkol sa pagtubos ng Diyos sa lahat ng mga tao sa pamamagitan ng Muling Nabuhay na Nuestro Padre Jesus Nazareno. Ang tunay na galak at pag-asang kaloob ng Diyos sa lahat ng mga taos-pusong nananalig at umaaasa sa Kaniya ay inilarawan ng Muling Nabuhay na Poong Jesus Nazareno sa Ebanghelyo. Kahit nararanasan nila ang kalupitan ng buhay dito sa mundong ito, puspos pa rin sila ng galak dahil taos-puso silang nananalig at umaaasa sa bukal ng tunay na pag-asa na walang iba kundi ang Diyos. 

Kung pipiliin nating manalig at umasa sa Diyos sa bawat sandali ng ating buhay sa lupa, mapupuspos ng tunay na galak at pag-asa ang ating mga puso at loobin, kahit sa mga sandali ng kalupitan. Ang pasiyang ito ay dapat nating isabuhay araw-araw. 

ANG LAHAT AY INAAANYAYAHANG MANALIG AT UMASA SA DIYOS

25 Mayo 2025 

Ikaanim na Linggo ng Pasko ng Muling Pagkabuhay (K) 

Mga Gawa 15, 1-2. 22-29/Salmo 66/Pahayag 21, 10-14. 22-23/Juan 14, 23-29 

Larawan: Nikolaus Obilman, Resurrection of Christ (c. 1466). National Museum in Warsaw. Public Domain.

"Nawa'y magpuri sa Iyo ang lahat ng mga tao" (Salmo 66, 4). Sa mga salitang ito na binigkas ng mang-aawit na tampok sa Salmong Tugunan nakatuon ang pagninilay ng Simbahan sa Linggong ito. Hindi ekslusibo sa isang pangkat o grupo ng mga tao ang pananalig sa Diyos. Ang lahat ng tao ay inaaanyayahang manalig at umasa sa Diyos, ang bukal ng tunay na pag-asa. Lagi tayong inaanyayahan ng Panginoong Diyos na manalig at umasa sa Kaniya nang taos-puso, anuman ang ating lahi. Hindi para sa isang lipi o lahi lamang ang paanyaya ng Panginoong Diyos na manalig at umasa sa Kaniya nang taos-puso. 

Isinalungguhit ng mga taludtod ng awit ng papuring tampok sa Salmong Tugunan na ang lahat ay inaaanyayahang manalig at umasa sa Diyos nang taos-puso. Ang lahat ng mga gawa ng Diyos na tunay ngang dakila at kahanga-hanga ay hindi Niya ginawa para sa isang lipi, pangkat, grupo, lahi, o bansa lamang. Bagkus, ipinasiya ng Diyos na gawin ang mga kahanga-hangang bagay na ito para sa buong sangkatauhan. Dahil sa dakilang pag-ibig ng Diyos, ang mga bagay na iyon ay kusang-loob Niyang ginawa. Sa lahat ng mga kahanga-hangang gawang ito, ang pinakadakila sa lahat ay walang iba kundi ang pagligtas sa lahat ng tao sa pamamagitan ng Misteryo Paskwal ng Poong Jesus Nazareno, ang ipinangakong Mesiyas at Manunubos. 

Sa Unang Pagbasa, ang mga apostol at ang iba pang mga pinuno ng Simbahan noong panahong yaon ay nagpadala ng isang liham sa mga Kristiyano sa Antioquia. Hindi na kailangang magpatuli ayon sa Kautusan ni Moises ang mga Kristiyano sa Antioquia, gaya ng nakasaad sa nasabing liham. Bagkus, ang kailangan lamang nilang gawin ay magsumikap maging banal at kalugud-lugod sa paningin ng Diyos. Iyan lamang ang dapat nilang pagbuhusan ng atensyon at lakas. Ang lahi, kultura, pangkat, grupo, at bansang kinabibilangan ay hindi hadlang. Para sa lahat ng tao ang paanyaya ng Diyos na manalig at umasa sa Kaniya nang taos-puso. 

Inihayag ng Poong Jesus Nazareno sa Ebanghelyo kung paano nating maipapahayag at mapapatunayan ang ating taos-pusong pasiyang manalig at umasa sa Kaniya. Ang lahat ng mga atas, tuntunin, aral, at utos ng Poong Jesus Nazareno ay dapat nating sundin. Huwag nating sayangin ang mga pagkakataong kaloob Niya sa ating lahat na makinig at sumunod sa Kaniya. Sa pamamagitan nito, ipinapahayag nating sa Kaniya tayo nananalig at umaaasa nang lubusan. Kapag ito ang ating ginawa, matatamasa natin ang dakilang biyayang inilarawan ni Apostol San Juan sa Ikalawang Pagbasa. Sa Banal na Lungsod na nakita ni Apostol San Juan sa pangitain sa Ikalawang Pagbasa, walang sandaling ang Diyos ay hindi natin makakapiling. Lagi natin Siya makakapiling roon. Kay sarap makapiling magpakailanman ang bukal ng tunay na pag-asa. 

Tayong lahat ay laging inaaanyayahan ng Diyos na manalig at umasa sa Kaniya. Ang lahi, pangkat, grupo, lipi, at bansang kinabibilangan ay hindi hadlang. Kung ang ating pasiyang manalig at umasa sa Kaniya ay bukal sa ating mga puso at kalooban, ito ay Kaniyang tatanggapin nang buong tuwa at galak. 

KAILANGANG ISABUHAY ANG PASIYANG UMASA SA DIYOS

23 Mayo 2025 

Biyernes sa Ikalimang Linggo ng Pasko ng Pagkabuhay 

Mga Gawa 15, 22-31/Salmo 56/Juan 15, 12-17 

Larawan: Bartholomaeus Bruyn the Elder (1493–1555), Resurrection of Christ (c. 16th century). Royal Museum of Fine Arts Antwerp. CC0 1.0 Universal. 

Nakasentro sa pamumuhay nang banal at kalugud-lugod sa paniningin ng Diyos ang mga Pagbasa. Ito ay ang pinakamahalagang bagay na dapat nating gawin bilang mga bumubuo sa tunay na Simbahang tatag mismo ng ipinangakong Mesiyas na walang iba kundi ang Muling Nabuhay na Panginoong Jesus Nazareno. Sa pamamagitan nito, ating isinasabuhay ang ating taos-pusong pasiyang manalig at umasa sa Diyos. 

Sa Unang Pagbasa, nagpadala ng isang sulat sa mga Kristiyano sa Antioquia ang mga apostol at ang iba pang mga pinuno ng Simbahan. Buong linaw na inihayag ng mga pinuno ng Simbahan sa mga Kristiyano sa Antioquia sa nasabing liham na kailangan lamang nilang ibuhos ang kanilang buong puso at isipan sa pinakamahalagang bagay na walang iba kundi ang pagiging banal at kalugud-lugod sa paningin ng Panginoong Diyos. Walang gawang hihigit pa sa halaga ng pagsisikap na mamuhay nang banal at kalugud-lugod sa paningin ng Poong Diyos. Ang pamumuhay nang banal at kalugud-lugod sa paningin ng Panginoon ay ang pangunahing katangiang dapat isabuhay ng mga nananalig at sumusunod sa Kaniya. Ito ang katangiang magpapatunay na taos-puso nga silang nananalig at umaaasa nga sila sa Diyos. 

Ang mga salitang binigkas ng mang-aawit na tampok sa Salmong Tugunan ay laging isinasabuhay ng lahat ng mga nananalig at umaaasa sa Diyos. Sa pamamagitan ng kanilang mga salita at gawa, ang Diyos ay kanilang ipinagmamalaki at binibigyan ng higit na kaluwalhatian. Patunay lamang ito na tunay ngang taos-puso ang kanilang pasiyang manalig at umasa sa Diyos. 

Ibinigay ng Muling Nabuhay na Poong Jesus Nazareno sa Kaniyang mga alagad ang pinakamahalagang utos sa tampok na salaysay sa Ebanghelyo. Ang nasabing utos ay walang iba kundi ang mag-ibigan katulad Niya na nagpasiyang tubusin ang lahat ng tao sa pamamagitan ng Kabanal-Banalan Niyang Krus at Muling Pagkabuhay dahil sa Kaniyang pag-ibig na dakila para sa kanila. Sa pamamagitan nito, ang ating pasiyang manalig at umasa sa Kaniya nang taos-puso ay mapapatunayan. 

Hindi lamang ipinapahayag sa pamamagitan ng ating mga salita ang ating pasiyang manalig at umasa sa Diyos. Ang pasiyang ito ay dapat nating isabuhay.  

HINDI MAGPAPATINAG ANG MGA TUNAY NA UMAAASA SA DIYOS

18 Mayo 2025 

Ikalimang Linggo ng Pasko ng Muling Pagkabuhay (K) 

Mga Gawa 14, 21b-27/Salmo 144/Pahayag 21, 1-5a/Juan 13, 31-33a. 34-35 

Larawan: Benjamin Gerritsz Cuyp (1612–1652), The Angel Is Opening Christ's Tomb (c. 1640). Museum of Fine Arts, Budapest. Web Gallery of Art. Public Domain.

"Kung paanong iniibig Ko kayo, gayon din naman, mag-ibigan kayo. Kung kayo'y mag-iibigan, makikilala ng lahat na kayo'y mga alagad Ko" (Juan 13, 34-35). Ang pagninilay ng Simbahan sa Linggong ito ay nakasentro sa mga salitang ito ay nakatuon sa mga salitang ito na binigkas ng Nuestro Padre Jesus Nazareno sa Kaniyang mga alagad sa wakas ng tampok na salaysay sa Mabuting Balita. Ang mga salitang ito ay bahagi ng pamamaalam ng Nuestro Padre Jesus Nazareno sa Kaniyang mga alagad bago Niya maisakatuparan ang Kaniyang misyon bilang Mesiyas at Manunubos na ipinangako - ang Kaniyang pagpapakasakit, pagkamatay, at Muling Pagkabuhay na alam rin nating lahat sa tawag na Misteryo Paskwal. 

Sa pamamagitan ng Misteryo Paskwal ng Poong Jesus Nazareno, ang dakilang pag-ibig, kagandahang-loob, habag, at awa ng Diyos ay nahayag sa lahat ng tao. Dahil sa dakilang pag-ibig, kagandahang-loob, habag, at awa ng Diyos, ipinasiya Niyang idulot ang biyaya ng tunay na pag-asang nagmumula lamang sa Kaniya sa lahat ng tao sa mundo. Hindi Siya napilitang gawin ito. Kusang-loob Niya itong ginawa. 

Muling ipinapaalala sa atin ng Simbahan na hindi napilitang dumating sa daigdig na ito ang Mahal na Poong Jesus Nazareno bilang ipinangakong Mesiyas at Manunubos. Kusang-loob Niyang ipinasiyang dumating sa daigdig na ito upang idulot sa bawat isa sa atin ang dakilang biyaya ng tunay na pag-asang sa Kaniya lamang nagmumula sa pamamagitan ng Kaniyang Misteryo Paskwal. Ang dahilan kung bakit Niya ginawa ito nang kusang-loob ay dahil sa Kaniyang dakilang pag-ibig, habag, at awa. 

Buong linaw na inilarawan sa mga Pagbasa kung ano ang dapat gawin bilang tugon sa kusang-loob na pagpapakita ng Panginoong Diyos ng Kaniyang dakilang pag-ibig, kagandahang-loob, habag, at awa sa atin sa pamamagitan ng pagdulot ng biyaya ng tunay na pag-asang nagmumula lamang sa Kaniya. Sa Unang Pagbasa, inihayag nina Apostol San Pablo at San Bernabe na bahagi ng paglalakbay ng Simbahan sa daigdig na ito ang kapighatian at pag-uusig. Hindi magiging ligtas mula sa mga kapighatian, hirap, sakit, at pag-uusig ang lahat ng mga bumubuo sa Simbahang naglalakbay sa daigdig. Ngunit, hindi magtatagal ang mga ito. Pansamantala lamang ang mga pag-uusig, hirap, sakit, at kapighatian sa daigdig na ito. Matatamasa natin ang biyaya ng buhay na walang hanggan sa piling ng Panginoong Diyos sa Kaniyang maluwalhating kaharian sa langit kung ipapasiya nating manalig at umasa sa Kaniya nang may taos-pusong katapatan hanggang sa huli. Ito ang katotohanang isinalungguhit nang buong linaw sa pangitain ni Apostol San Juan, ang minamahal na alagad ng Mahal na Poong Jesus Nazareno, habang nakatapon sa Patmos na inilahad sa Ikalawang Pagbasa. Sa tulong ng pangitaing ito, lalong pang lumakas ang loobin at puso ni Apostol San Juan na panindigan ang kaniyang pasiyang manalig at umasa sa Panginoon hanggang sa huli, sa gitna ng mga hirap, sakit, pag-uusig, at kapighatian sa daigdig. 

Gaya ng sabi ng mang-aawit na tampok sa Salmong Tugunan: "Diyos ko at aking Hari, pupurihin Kitang lagi" (Salmo 144, 1). Inilarawan rin niya sa mga taludtod ng kaniyang awit ng papuri na itinampok at inilahad sa Salmong Tugunan ang ilan sa mga dahilan kung bakit niya ito ipinasiyang gawin. Sa pamamagitan ng nasabing awit ng papuri, inihayag ng mang-aawit na itinampok sa Salmong Tugunan ang kaniyang pasiyang manalig at umasa sa Diyos nang taos-puso. 

Dahil sa Kaniyang dakilang pag-ibig, kagandahang-loob, habag, at awa, kusang-loob na ipinasiya ng Muling Nabuhay na Panginoong Jesus Nazareno na idulot sa atin ang biyaya ng tunay na pag-asang nagmumula lamang sa Kaniya. Hindi Siya nagpatinag sa mga hirap, sakit, pag-uusig, kapighatian, at pagdurusa sa daigdig, lalung-lalo na sa mga sandali ng Kaniyang Pasyon. Kaya naman, huwag rin tayong magpatinag sa mga hirap, sakit, pag-uusig, kapighatian, at pagdurusa sa daigdig na ito. Ang lahat ng mga tunay na nananalig at umaaasa sa Muling Nabuhay na Panginoong Jesus Nazareno ay hinding-hindi magpapatinag at magpapansindak sa lahat ng mga hirap, sakit, pag-uusig, kapighatian, at pagdurusa sa daigdig na ito kailanman. Bagkus, mananatili pa rin silang matapat hanggang sa huli. 

UMAAASA SA DAAN, KATOTOHANAN, AT BUHAY

16 Mayo 2025 

Biyernes sa Ikaapat na Linggo ng Pasko ng Pagkabuhay 

Mga Gawa 13, 26-33/Salmo 2/Juan 14, 1-6 

Larawan: Albrecht Altdorfer (1480–1538). The Resurrection of Christ (c. 1518). Kunsthistorisches Museum in Vienna, Austria. Public Domain.

Ang mga Pagbasa para sa araw na ito ay muling nakatuon sa tunay na pagkakilanlan ng Muling Nabuhay na Poong Jesus Nazareno, ang bukal ng tunay na pag-asa. Ito ay isa sa mga pangunahing katotohanang pinapahalagahan at sinasampalatayanan ng Simbahan. Tunay na Diyos at tunay na tao ang Poong Jesus Nazareno. Hindi isang tao lamang ang Poong Jesus Nazareno. Bagkus, ang Poong Jesus Nazareno ay tunay na Diyos na nagpasiyang maging tunay na tao nang sumapit ang takdang panahon. Ang pinakadakilang patunay nito ay ang Kaniyang Krus at Muling Pagkabuhay. 

Sa Unang Pagbasa, nangaral si Apostol San Pablo sa mga taga-Antioquia tungkol sa tunay na pagkakilanlan ng Muling Nabuhay na Panginoong Jesus Nazareno. Ito ang katotohanang lubos na pinapahalagahan at sinasampalatayanan ng Inang Simbahan mula noon hanggang ngayon. Ang Muling Nabuhay na Panginoong Jesus Nazareno ay ang Bugtong na Anak ng Diyos. Bilang Bugtong na Anak ng Diyos, tunay rin Siyang Diyos gaya ng Amang nasa langit at ng Espiritu Santo. Noong sumapit ang takdang panahon, ipinasiya Niyang maging tunay na tao katulad natin, maliban sa kasalanan, upang iligtas tayo sa pamamagitan ng Kaniyang Krus at Muling Pagkabuhay. 

Ipinakilala ng Muling Nabuhay na Poong Jesus Nazareno ang Kaniyang sarili sa mga apostol sa Ebanghelyo bilang Daan, Katotohanan, at Buhay. Sa pamamagitan ng mga salitang ito, buong linaw na inihayag ng Muling Nabuhay na Poong Jesus Nazareno na sa Kaniya tayo dapat manalig at umasa. Bilang mga bumubuo sa Simbahang Siya mismo ang nagtatag, dapat manalig at umasa tayo sa bukal ng tunay na pag-asa na walang iba kundi Siya, ang Daan, Katotohanan, at Buhay. 

Tayong lahat ay pinaalalahanan sa araw na ito na ang bukal ng tunay na pag-asa ay ang Daan, Katotohanan, at Buhay. Sa Kaniya tayo manalig at umasa. Ipagkatiwala natin sa Kaniya ang lahat ng mga nauukol sa atin. 

TUNAY NA PAG-ASA MULA SA TUNAY NA DIYOS NA NAGING TUNAY NA TAO

13 Mayo 2025 

Paggunita sa Mahal na Birhen ng Fatima 

Martes sa Ikaapat na Linggo ng Pasko ng Pagkabuhay 

Mga Gawa 11, 19-26/Salmo 86/Juan 10, 22-30 

"Ako at ang Ama ay iisa" (Juan 10, 30). Sa mga salitang ito na buong linaw na binigkas ng Mahal na Poong Jesus Nazareno sa mga tao sa wakas ng salaysay na tampok sa Ebanghelyo nakatuon ang pagninilay ng Simbahan sa araw na ito. Nagpakilala Siya sa pamamagitan ng paglalarawan ng Kaniyang ugnayan sa Amang nasa langit. Diyos rin katulad ng Amang nasa langit at ng Espiritu Santo ang Poong Jesus Nazareno. Hindi itinanggi, inilihim, o ipinagkaila ng Panginoong Jesus Nazareno ang katotohanang ito tungkol sa sarili bilang tunay na Diyos at tunay na tao. 

Bagamat hindi kabilang sa salaysay na itinampok sa Ebanghelyo, inilarawan sa mga kasunod na talata na binalak ng mga Hudyo na batuhin si Jesus Nazareno hanggang sa Siya'y mamatay dahil sa mga salitang ito na buong linaw Niyang binigkas. Hindi nila matanggap na ang taong kanilang kilala bilang si Hesus na taga-Nazaret ay ang tunay na Diyos. Sa kanilang paningin, ang Nazarenong ito na nangangalang Hesus ay isang tao lamang. Para sa kanila, isa Siyang kapwa-Hudyo na nagmula sa Nazaret sa Galilea. Walang espesyal na bagay tungkol sa Kaniya. Dahil diyan, isang napakalaking eskandalo at kalapastanganan ang mga salitang buong linaw na binigkas ng Poong Jesus Nazareno tungkol sa Kaniyang sarili. 

Hindi matanggap ng mga Hudyo sa Ebanghelyo na si Jesus Nazareno mismo ay ang tinutukoy ng mang-aawit na tampok sa Salmong Tugunan. Kaya, binalak nila Siyang batuhin hanggang sa malagutan Siya ng hininga. Subalit, ang dakilang katotohanang ito tungkol sa tunay na pagkakilanlan ni Jesus Nazareno ay taos-pusong tinanggap at sinampalatayanan ng Simbahan, gaya na lamang ng inilarawan sa Unang Pagbasa. Mula noon hanggang ngayon, ang Simbahan ay sumasaksi at sumasampalataya sa pagiging tunay na Diyos at tunay na tao ni Kristo Hesus. Ang bukal ng tunay na pag-asa na walang iba kundi ang Muling Nabuhay na Poong Jesus Nazareno ay tunay na Diyos at tunay na tao. 

Pinatunayan ng Krus at Muling Pagkabuhay ng Mahal na Poong Jesus Nazareno ang lahat ng Kaniyang mga sinabi tungkol sa Kaniyang sarili. Sa pamamagitan nito, ang buong sangkatauhan ay dinulutan Niya ng tunay na pag-asang nagmumula lamang sa Kaniya. Nagmula sa tunay na Diyos na nagpasiyang maging tunay na tao rin nang ang takdang panahon ay sumapit na walang iba kundi ang Poong Jesus Nazareno ang dakilang biyaya ng tunay na pag-asa. 

KAWANG PUSPOS NG TUNAY NA PAG-ASA

11 Mayo 2025 

Ikaapat na Linggo ng Pasko ng Muling Pagkabuhay (K) 

Linggo ng Mabuting Pastol 

Mga Gawa 13, 14. 43-52/Salmo 99/Pahayag 7, 9. 14b-17/Juan 10, 27-30 

Larawan: Lucas Cranach the Younger (1515–1586), Christ as the good shepherd (c. 1540). Angermuseum. Public Domain.

Tuwing sasapit ang Ikaapat na Linggo ng Pasko ng Muling Pagkabuhay, nakasentro ang taimtim na pagninilay ng Simbahan sa titulo ng Muling Nabuhay na Poong Jesus Nazareno bilang Mabuting Pastol. Bilang Mabuting Pastol, hindi iniiwan, tinatalikdan, o pinababayaan ng Muling Nabuhay na Poong Jesus Nazareno ang Kaniyang kawan kailanman. Lagi Niya silang inaaruga, kinakalinga, iniibig, sinasamahan, ginagabayan, inaakay, at kinahahabagan. Mapag-aruga, mapagmahal, maawain, at mahabagin ang Muling Nabuhay na Poong Jesus Nazareno bilang Mabuting Pastol. 

Ang mga salita ng Mabuting Pastol na si Jesus Nazareno sa Ebanghelyo ay bahagi ng Kaniyang pangaral tungkol sa Mabuting Pastol. Katunayan, sa pangaral na ito, buong linaw na ipinakilala ni Jesus Nazareno ang Kaniyang sarili bilang Mabuting Pastol. Sa pamamagitan ng pagpapakilala ng Kaniyang sarili bilang Mabuting Pastol, inilarawan ni Jesus Nazareno ang Kaniyang pag-ibig, kagandahang-loob, habag, at awa. Walang ibang hangad si Jesus Nazareno kundi ang ikabubuti ng Kaniyang kawan. Lagi Siyang handang gawin ang lahat para sa Kaniyang mga tupa. Hindi Niya sila pababayaang mapahamak kailanman. 

Inihayag nang buong linaw ng mang-aawit na itinampok sa Salmong Tugunan: "Lahat tayo'y Kaniyang bayan, kabilang sa Kaniyang kawan" (Salmo 99, 3k). Bilang Kaniyang kawan, dapat lagi tayong makinig sa tinig ng Muling Nabuhay na Nuestro Padre Jesus Nazareno, ang Mabuting Pastol. Sa pamamagitan ng palagiang pakikinig sa Kaniya, buong linaw nating ipinapahayag na lubos na nananalig at umaaasa tayo sa Kaniya. Hindi tayo katulad ng mga Hudyong binanggit nina Apostol San Pablo at San Bernabe sa Unang Pagbasa na nagtakwil sa Kaniya. Bagkus, dapat manalig at umasa tayo sa Muling Nabuhay na Nuestro Padre Jesus Nazareno, ang Mabuting Pastol na Siya ring pinagmulan at bukal ng tunay na pag-asa. 

Kapag buong katapatan tayong nakinig at sumunod sa tinig ng Muling Nabuhay na Panginoong Jesus Nazareno, ang Mabuting Pastol na bukal ng tunay na pag-asa, na tanda na lubos tayong nananalig at umaaasa sa Kaniya, mapapabilang tayong lahat sa korong nakita ni Apostol San Juan sa isang pangitaing kaniyang inilarawan habang nakatapon sa isla ng Patmos na inilahad sa Ikalawang Pagbasa. Ang mga papuring inaawit nila nang buong lakas at nang walang humpay ay pagpapahayag ng buong pusong pananalig at pagsamba sa bukal ng tunay na pag-asa na walang iba kundi ang Muling Nabuhay na Panginoong Jesus Nazareno, ang Mabuting Pastol. 

Huwag nating patigasin ang ating mga puso at loobin sa Mabuting Pastol na walang iba kundi ang Muling Nabuhay na Nuestro Padre Jesus Nazareno, ang bukal ng tunay na pag-asa. Bagkus, dapat lagi tayong makinig at sumunod sa Kaniya. Ito mismo ang magpapatunay na nananalig at umaasa tayo sa Kaniya nang lubos. Sa Kaniya tayo dapat manalig at umasa sa bawat sandali ng ating buhay. 

DAHILAN KUNG BAKIT SIYA NAGDUDULOT NG PAG-ASA

9 Mayo 2025 

Biyernes sa Ikatlong Linggo ng Pasko ng Pagkabuhay 

Mga Gawa 9, 1-20/Salmo 116/Juan 6, 52-59 

Larawan: Jean Restout (1692–1768), Ananias Restoring the Sight of St Paul (c. 1719). Louvre Museum. Public Domain. 

Tampok sa Ebanghelyo ang paliwanag ng Mahal na Poong Jesus Nazareno tungkol sa nagaganap sa pagdiriwang ng Banal na Eukaristiya. Ipinapaliwanag Niya sa mga tao kung bakit ang pinakamahalagang Sakramento ng Simbahang Kaniyang itinatag ay walang iba kundi ang Sakramento ng Banal na Eukaristiya. Sa tuwing idinadaos ang pagdiriwang ng Sakramento ng Banal na Eukaristiya, dumarating sa piling ng tao ang Mahal na Poong Jesus Nazareno sa anyo ng tinapay at alak upang kusang-loob na ibigay ang Kaniyang sarili bilang espirituwal na pagkain at inumin para sa lahat. Hindi sinasagisag ng Katawan at Dugo ng Mahal na Poong Jesus Nazareno ang tinapay at alak sa Eukaristiya. Bagkus, Siya mismo iyon. 

Isa lamang ang dahilan kung bakit kusang-loob itong ginagawa ng Muling Nabuhay na Poong Jesus Nazareno. Kung paanong ang sangkatauhan ay Kaniyang binigyan ng tunay na pag-asang nagmumula lamang sa Kaniya sa pamamagitan ng pagligtas sa kanila na Kaniyang isinagawa sa pamamagitan ng Kaniyang Banal na Krus at Muling Pagkabuhay, gayon din naman, ang Mahal na Poong Jesus Nazareno ay dumarating sa ating piling sa tuwing idinadaos ang pagdiriwang ng Banal na Misa upang idulot sa atin ang dakilang biyayang ito sa pamamagitan ng pagbigay ng Kaniyang Katawan at Dugo bilang espirituwal na pagkain at inumin.

Sa salaysay na itinampok sa Unang Pagbasa, nagpakita kay Saulo na kilala natin sa kasalukuyan bilang si Apostol San Pablo ang Muling Nabuhay na Nuestro Padre Jesus Nazareno sa daan patungong Damasco. Dahil sa nasabing tagpo na naganap sa daan patungong Damasco, nagbago ang buhay ni Saulo na kilala ng lahat sa kasalukuyan bilang si Apostol San Pablo. Mula sa pagiging isang masugid at masigasig na taga-usig ng mga sinaunang Kristiyano, si Saulo na kilala ng marami sa Simbahan bilang si Apostol San Pablo ay naging isang masugid, masigasig, at magiting na tagasunod, misyonero, apostol, at saksi ng Muling Nabuhay na Nuestro Padre Jesus Nazareno. Hindi nahiya o natakot si Apostol San Pablo na sumaksi sa bukal ng tunay na pag-asa na walang iba kundi ang Muling Nabuhay na Nuestro Padre Jesus Nazareno, kahit na sariling buhay ang naging kapalit nito. Ipinaliwanag ng Muling Nabuhay na Nuestro Padre Jesus Nazareno kung bakit Niya ito niloob noong magpakita Siya sa Kaniyang lingkod na si Ananias sa ikalawang bahagi ng salaysay sa Unang Pagbasa. Nais ng Muling Nabuhay na Nuestro Padre Jesus Nazareno na lalo pang lumaganap sa bawat panig, sulok, at bahagi ng daigdig na ito ang dakilang biyaya ng tunay na pag-asang tanging sa Kaniya lamang nagmumula sa pamamagitan ni Apostol San Pablo. 

Ang mga salita sa Salmong Tugunan ay hango mula sa wakas ng Ebanghelyo ni San Marcos kung saan isinugo ng Muling Nabuhay na Nuestro Padre Jesus Nazareno ang Kaniyang mga apostol sa bawat panig at sulok ng daigdig na ito. Ipinagpapatuloy ng Inang Simbahan ang misyong ito na sinimulan ng mga apostol. Hindi titigil at hihinto sa pagpapalaganap ng biyaya ng tunay na pag-asang sa Panginoong Jesus Nazareno lamang nagmumula ang Simbahan. Laging ipapalaganap ng Simbahan ang dakilang biyayang ito sa pamamagitan ng magiting na pagsaksi kay Jesus Nazareno. 

Walang ibang nais at hangad ang Muling Nabuhay na Poong Jesus Nazareno kundi ang manalig at umasa sa Kaniya nang taos-puso ang tanan. Kaya naman, hindi Siya titigil sa pagdudulot ng dakilang biyaya ng tunay na pag-asang nagmumula lamang sa Kaniya sa tuwing idinadaos ang pagdiriwang ng Banal na Eukaristiya.

HANGAD NG BUKAL NG TUNAY NA PAG-ASA

4 Mayo 2025 

Ikatlong Linggo ng Pasko ng Muling Pagkabuhay (K) 

Mga Gawa 5, 27b-32. 40b-41/Salmo 29/Pahayag 5, 11-14/Juan 21, 1-19 (o kaya: 21, 1-14) 

Larawan: Raphael (1483–1520), Christ's Charge to Peter (Matthew 16: 18-19, John 21: 15-17) (c. 1515). Victoria and Albert Museum. Public Domain. 

"Iniibig Mo ba ako nang higit kaysa mga ito?" (Juan 21, 15). Tatlong ulit na binigyan ng pagkakataon ng Muling Nabuhay na Poong Jesus Nazareno ang unang Santo Papa ng Simbahang Kaniyang itinatag na si Apostol San Pedro na ipahayag nang buong linaw ang kaniyang pag-ibig, pananalig, at katapatan sa Kaniya sa pamamagitan ng tatlong ulit na paglahad ng tanong na ito sa kaniya, gaya ng itinampok sa mahabang bersyon ng salaysay sa Ebanghelyo. Kahit na tatlong ulit Siyang ipinagkaila ng apostol na ito, hindi Niya ipinagkait ang biyaya ng tunay na pag-asang bunga ng Kaniyang pag-ibig, kagandahang-loob, habag, at awa na tunay ngang dakila. 

Hindi lamang para sa unang Santo Papa ng Santa Iglesia na si Apostol San Pedro ang tanong ng Muling Nabuhay na Panginoong Jesus Nazareno sa mahabang bersyon ng salaysay na itinampok sa Ebanghelyo. Bagkus, ang tanong na ito ay para rin sa ating lahat. Sa bawat sandali ng ating pansamantalang paglalakbay sa daigdig, lagi tayong binibigyan ng Muling Nabuhay na Panginoong Jesus Nazareno ng pagkakataong hindi mahiya sa pagpapahayag ng ating taos-pusong pagsamba, pagmamahal, pananalig, at pag-asa sa Kaniya. Ninanais ng Muling Nabuhay na Panginoong Jesus Nazareno na ipagmalaki natin na pinananaligan, sinasamba, iniibig, at inaaasahan natin Siya. 

Buong kagitingang inihayag ni Apostol San Pedro na nananalig at umaasa siya nang lubusan sa kaniyang iniibig at sinasamba nang lubos na walang iba kundi ang Muling Nabuhay na Poong Jesus Nazareno. Taglay ang mga biyayang bigay ng Espiritu Santo sa kaniya at sa mga kapwa niyang apostol noong araw ng Pentekostes, sumaksi siya tungkol sa biyaya ng pagligtas ng Diyos sa tanan sa pamamagitan ng Krus na Banal at Muling Pagkabuhay ng Poong Jesus Nazareno. Sa pamamagitan nito, idinulot ng Diyos sa sangkatauhan ang tunay na pag-asang nagmumula sa Kaniya. Hindi na siya katulad ng dati. Dati, naduwag siyang makilala bilang kasamahan ng Mahal na Poong Jesus Nazareno. Nang matanggap na niya ang mga biyaya ng Espiritu Santo, hindi na puspos ng takot at sindak si Apostol San Pedro. Bagkus, buong lakas at giting niyang ipinagmalaki sa lahat na nananalig at umaaasa siya sa Poong Jesus Nazareno. 

Ang mga salita ng mang-aawit na tampok sa Salmong Tugunan ay sumasalamin sa kaniyang taos-pusong pananalig, pagsamba, pag-ibig, at pag-asa sa Diyos. Walang ibang pinananaligan, sinasamba, minamahal, at inaaasahan nang lubos ang nasabing mang-aawit kundi ang Panginoon. Hindi niya ikinahiyang nananalig at umaaasa siya sa Panginoong Diyos. Bagkus, buong puso niyang ipinagmalaki ito. Ito rin ang dapat gawin ng bawat isa sa atin bilang mga bumubuo sa Simbahang itinatag ng Muling Nabuhay na Panginoong Jesus Nazareno. Dapat nating tuparin ang ating misyon at tungkulin bilang mga tapat at magigiting na saksi ng Muling Nabuhay na Panginoong Jesus Nazareno. Sa pamamagitan ng ating tapat at magiting na pagsaksi sa Kaniya sa bawat sandali ng ating buhay sa lupa, ipinapalaganap natin ang biyaya ng tunay na pag-asang nagmumula lamang sa Kaniya. 

Sa Ikalawang Pagbasa, inilarawan ni Apostol San Juan ang kaniyang mga nakita sa isang pangitain habang nakatapon sa Isla ng Patmos. Nakita ni Apostol San Juan sa nasabing pangitain ang paghahandog ng mga anghel ng walang hanggang papuri, pasasalamat, at pagsamba sa Kordero ng Diyos na pinaslang na walang iba kundi ang Muling Nabuhay na Poong Jesus Nazareno, ang bukal ng tunay na pag-asa. Dahil sa kaniyang mga nakita sa nasabing pangitain, lalong napuspos ng kagitingan ang puso at loobin ni Apostol San Juan, kahit na nakatapon siya sa Patmos sa mga sandaling yaon. Hindi nahiya si Apostol San Juan na ipagmalaking nananalig at umaaasa siya sa bukal ng tunay na pag-asa - ang Muling Nabuhay na Poong Jesus Nazareno. 

Nais ng Muling Nabuhay na Panginoong Jesus Nazareno, ang bukal ng tunay na pag-asa, na ipagmalaki natin Siya nang buong kagitingan at katapatan bilang ating Hari, Panginoon, at Manunubos. Sa pamamagitan nito, ang bawat isa sa atin na bumubuo sa Simbahang Kaniyang itinatag ay sumasaksi sa Kaniya nang buong kagitingan. Ang biyaya ng tunay na pag-asang nagmumula lamang sa Kaniya ay ating ibinabahagi at ipinapalaganap sa pamamagitan ng tapat at magiting na pagsaksi sa Kaniya.

SUMASAKSING MAY PAG-ASA

2 Mayo 2025 

Biyernes sa Ikalawang Linggo ng Pasko ng Pagkabuhay 

Mga Gawa 5, 34-42/Salmo 26/Juan 6, 1-15 

Larawan: Lodewijk de Deyster (–1711), Resurrection of Christ (c. 1694). St. James Church, Bruges, Belgium. Public Domain. 

Tampok sa salaysay sa Unang Pagbasa ang pagtatanggol ng Pariseong si Gamaliel na lubos na ginagalang ng lahat bilang isang tagapagturo ng Kautusan ni Moises sa mga apostol laban sa mga pag-uusig ng Sanedrin. Sa halip na makiisa sa pag-uusig at pagpapatahimik sa mga tagasunod ng Muling Nabuhay na Poong Jesus Nazareno, si Gamaliel ay nagpasiyang tumindig para sa kanila. Ang kaniyang pahayag ay mabibigo rin ang mga tagasunod ng Muling Nabuhay na Poong Jesus Nazareno kung hindi sa Diyos nagmumula ang kanilang ipinangangaral at pinatotohanan sa lahat ng mga tao sa Israel at pati na rin sa iba't ibang mga lugar. Sa pamamagitan ng pahayag niyang ito, hindi lamang kapakanan ng mga apostol ang kaniyang inisip kundi na rin ng mga bumubuo sa Sanedrin - mga Pariseo at Saduseo. 

Gaya ng ipinahiwatig sa wakas ng salaysay na tampok sa Unang Pagbasa, ang mga apostol ay hindi tumigil sa pagpapatotoo at pagsaksi sa Muling Nabuhay na Nuestro Padre Jesus Nazareno. Kahit na ipinahagupit sila ng Sanedrin at binalaan nang buong higpit na huwag nang mangaral, magpatotoo, at sumasaksi sa Kaniya, ipinasiya pa rin ng mga apostol na ipagpatuloy ang kanilang misyon bilang mga apostol at saksi ni Kristong Muling Nabuhay. Patuloy nilang ipinalaganap sa tanan ang biyaya ng tunay na pag-asang dulot ng Muling Nabuhay na Jesus Nazareno sa pamamagitan nito. 

Isang himala ng Nuestro Padre Jesus Nazareno ang itinampok at inilahad sa salaysay sa Ebanghelyo. Pinakain ng Nuestro Padre Jesus Nazareno ang limanlibong katao sa pamamagitan ng pagpaparami sa limang tinapay at dalawang isda. Sa pamamagitan nito, inihayag ng Nuestro Padre Jesus Nazareno ang Kaniyang habag at awa para sa kanila. Ito rin ang dahilan kung bakit Niya ipinasiyang idulot sa buong sangkatauhan ang biyaya ng tunay na pag-asang nagmumula lamang sa Kaniya. Dahil sa Kaniyang habag at awa, ipinasiya ng Nuestro Padre Jesus Nazareno na idulot sa bawat tao ang dakilang biyaya ng tunay na pag-asang nagmumula lamang sa Kaniya. Sa kabila ng mga kasalanang nagawa ng sangkatauhan na hindi na mabilang, ang biyayang ito ay ipinasiya pa rin Niyang ipagkaloob sa buong sangkatauhan sa pamamagitan ng Banal na Krus at Muling Pagkabuhay. 

Ang mga salita ng mang-aawit na tampok sa Salmong Tugunan ay mga salita ng mga tunay na umaasa sa Panginoong Diyos. Matapos tanggapin ang biyayang ito mula sa Diyos, ang biyayang ito na ipinagkaloob sa kanila ay buong galak nilang ibinabahagi sa tanan. Sa halip na sarilinin ang biyayang ito, ipinapalaganap nila ito. Itinuturo nila kung saan nagmumula ang kanilang galak at pag-asa - ang Panginoon.

Puspos ng tunay na galak at tunay na pag-asa ang puso at loobin ng lahat ng mga sumasaksi sa Muling Nabuhay na Poong Jesus Nazareno nang buong katapatan. Isa lamang ang dahilan kung bakit. Ang nagkaloob ng galak at pag-asa sa kanila ay ang bukal ng tunay na galak at tunay na pag-asa na walang iba kundi si Jesus Nazareno na Muling Nabuhay.